بەتتى ساقتاۋ | باس بەت قىلۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>مادەنيەت

بىيجيڭدە ناۋرىز

حاباردى جازعان: نۇرعيسا قۇرمانجان ۇلى

2013.03.25 11:38     كەلۋ قاينارى : حالىق تورابى


  جەر انا بۋسانىپ، ۇلىستىڭ ۇلى كۇنى، جىل باسى ناۋرىز كەلدى. كەڭ-مول داستارقان جايىلىپ، الىس-جاقىن ارقا-جارقا جۇزدەسىپ، بىرلىكتىڭ، بەرەكەنىڭ اسى ــ ناۋرىز كوجە ىشەتىن، «ەسكى جىل ەسىركە، جاڭا جىل جارىلقا» دەپ جاراتقاننان جاقسىلىق تىلەيتىن، قىتىمىر قىستىڭ ىزعارى قايتىپ، قىردا ءتورت تۇلىك تولدەپ، ويداعى ەل قىدىرىپ كوجە ىشەتىن مەزگىل.

  ايدان امان، جىلدان ەسەن وتكەنىنە شۇكىرلىك ەتىپ، جاڭا جىلدى شاتتانا قارسى الىپ، مول باقىت پەن بايلىق سيلاعان كونە جىلدى ۇزاتىپ سالۋ ءار حالىقتا بار ءداستۇر. وسىنداي ءبىر ىزگى تىلەكتەردەن تۋىنداعان ناۋرىزداي ءنارلى مەرەكە تاريحتىڭ تارعالاڭ تۇستارىندا ەسكىشىلدىك دەپ ايىپتالىپ، ەلدىڭ جۇرەگىنە قاياۋ تۇسكەن كەز بولعان. الايدا ءدانىشپان پارتيانىڭ كورەگەن ساياساتى شار تاراپقا شۇعىلاسىن شاشقان شاقتا، ەلدىڭ كوڭىلىندەگى كۇدىك سەيىلىپ، تاعىلىمى مول سالت-ءداستۇرىمىز ارامىزعا قايتا ورالدى.

  سول ءبىر ساياسات سامالىنىڭ سارايلى تۇسىن ەرتە سەزىنگەن بىيجيڭدەگى قازاق زيالىلارىنىڭ باستاماشىلدىق ەتۋىمەن، ناۋرىز مەرەكەسىنىڭ بىيجيڭدە توپتىق تويلانا باستاعانىنا مىنە بيىل 31 جىل تولعان ەكەن. جىل سايىن ارلەنىپ، جىل سايىن جاڭا مازمۇندەرمەن تولىعىپ كەلە جاتقان بىيجيڭدەگى ناۋرىز تويى بيىل دا وزگەشە مەرەيمەن تويلاندى.

  بيىلعى ناۋرىز مەرەكەسىنە قوسىلعان جاڭا مازمۇن ــ ىلە قازاق اۆتونوميالى وبىلىسىنىڭ ۇلتتىق مادەنيەت جانە ۇلتتىق ونىمدەر كورمەسىنىڭ بىيجيڭدە وتكىزىلۋى بولدى. كورمەدە ىلە وبلىسىنىڭ جەر-جەرىنەن سارالانعان حالىق اراسىنداعى قولونەرشىلەر وزدەرىنىڭ ىسمەر قولدارىنان شىققان قازاقى قولونەر بۇيىمدارىن بىيجيڭ قالاسىنىڭ تۇرعىندارى مەن شەتەلدىك ساياحاتشىلارعا كورسەتىپ، ولارعا قازاق مادەنيەتى جونىندە جاقسى اسەر قالدىردى. مۇنان سىرت، كورمەدە حالىق اراسىنداعى ونەرپازداردىڭ حۇسنيحات تۋىندىلارى مەن سىزبا سۋرەتتەر دە كورسەتىلدى. ىلە وبلىسىنداعى جاڭادان شاڭىراق كوتەرىپ، ۋىعىن شانشىعان ءسۇت ونىمدەرى كوپەراتيۆىنىڭ كورمەگە اكەلگەن ونىمدەرى دە جۇرتتىڭ كوڭىلىنەن شىعىپ، لەزدە ساتىلىپ ۇلگىردى. ورمەك توقۋ، ورتەكە ويناتۋ سياقتى قۇندى مادەني مۇرالار دا بىيجيڭنىڭ تورىنەن كورىنىپ، ناعىز قازاقى اۋىلعا ورالعانداي كۇي كەشتىك.

  20-ناۋرىزدا باستالعان قيمىل ءۇش كۇنگە جالعاسىپ، 22-ناۋرىزداعى سىرگە جيار شارادا، ىلە وبلىستىق ءان-ءبي ۇيىرمەسىنىڭ ونەرپازدارى مەن حالىق ونەرپازدارى قازاقتىڭ ءان-بيىمەن كورەرمەندەردىڭ ايىزىن قاندىرىپ، اتالعان يگى ءىستى ءتىپتى دە بيىك بەلەسكە كوتەرگەندەي بولدى. ءۇش كۇنگە ۇلاسقان قيمىل بىيجيڭدەگى رىتان باقشاسىندا ــ اشىق الاڭدا وتكىزىلگەندىكتەن، كورەرمەندەردىڭ سانى دا مول بولدى. ارينە، بىرەۋدەن بىرەۋ ەستىپ دەگەندەي، بۇل حاباردىڭ دا تالاي جەرگە تارالعانى انىق. قيمىلدىڭ ەڭ سوڭعى كۇنى حالقىمىزدىڭ ناۋرىز مەرەكەسىنە ءدال كەلگەندىكتەن، باقشاداعى كورمە رايونىنىڭ ءبىر شەتىنە قازى-قارتا، نان قاتارلى جەمەكتىكتەر قويىلىپ، كورەرمەندەر ناۋرىزدىڭ دامىنەن اۋىز ءتيدى.

  وسى جولعى قيمىلدىڭ ءساتتى وتكىزىلۋىنە جاقىننان جاردەمشى بولعان چاۋياڭ رايونىنداعى قاتىستى ورىندارعا العىسىمىز بولەك. وسى جولعى ناۋرىز مەرەكەسى بىيجيڭ قالاسى چاۋياڭ رايونىنىڭ «چۇنفىن (كوكتەمگى كۇن مەن ءتۇننىڭ تەڭەلۋى) چاۋياڭ مادەنيەت فەستيۆالىنىڭ» اياسىندا، مەملەكەتتىك ساياسي كەڭەس مۇشەسى، ايگىلى جازۋشى اكبار ءماجيت ۇلىنىڭ باستاماشىلدىق ەتۋىمەن، ىلە قازاق اۆتونوميالى وبلىستىق مادەنيەت، دەنە تاربيە، راديو-تەلەۆيزيا، كينو مەكەمەسىنىڭ باستىعى قىزىركەلدى ءابدىراحمان ۇلىنىڭ بىلەك سىبانا كىرىسۋىمەن ءساتتى وتكىزىلدى. مەرەكەنىڭ بۇكىل بارىسىن ىلە تەلەۆيزياسى مەن جياڭسۋ تەلەۆيزياسى بىرلىكتە ەكرانعا ءتۇسىردى. وسى ارادا ىلە تەلەۆيزياسىنىڭ نەشە جىلدان بەرى بىيجيڭدەگى قازاقتاردىڭ ناۋرىز تويىن كوگىلدىر ەكرانعا كوتەرىپ، شالعايدا جاتقان تۋىستارعا كورسەتۋدە ەرەكشە ەڭبەك ەتىپ كەلە جاتقانىن ايتا كەتۋ كەرەك.

  ناۋرىز تويىنىڭ سوڭىنا الا، ءبىز بىرنەشە كورەرمەندى سوزگە تارتتىق. تومەندە سول لەبىزدەردى وقىرمانداردىڭ نازارىنا ۇسىنامىز:

  مەملەكەتتىك ساياسي كەڭەس مۇشەسى، ايگىلى جازۋشى اكبار ءماجيت ۇلى: ناۋرىز مەرەكەسىن ۇزاق تاريحتان بەرى وتكىزىپ كەلەمىز، بىيجيڭدە تويلانىپ كەلە جاتقانىنا دا مىنە 31 جىل بولدى، الايدا بۇرىن بىيجيڭدەگى ناۋرىز تويى ءوز ارامىزدا، داستارقان باسىندا وتكىزىلىپ كەلە جاتقان. قازىرگىدەي باياشات زاماندا ناۋرىز مەرەكەسىن دۋماندى وتكىزۋ كەرەك. بىلتىرعى ناۋرىزدا ساحنالىق كونسەرت قويىلدى، الايدا مادەنيەتىمىزدى تۋىسقان ۇلتتارعا تانىستىرۋ جاعىندا بۇل جەتكىلىكتى بولماعانداي. «چۇنفىن چاۋياڭ مادەنيەت مەرەكەسىنە» جىلدا قاتىناسىپ كەلەمىن، بىلتىر ناۋرىز مەرەكەسىمەن وسى مەرەكەنى قوسىپ وتكىزۋدى قاتىستى ادامدارعا جەتكىزدىم. مىنە بيىل بىيجيڭدەگى ءبىر جاڭالىق بولدى، بارلىعىمىز دا قۋانىپ جاتىرمىز. قازاقتىڭ ناۋرىز مەرەكەسىن تويلاۋ ءۇشىن ارنايى كونسەرتتىك ۇيىمنىڭ بىيجيڭگە كەلىپ ويىن قويۋى تۇڭعىش رەت بولىپ وتىر، قازاقى بوياۋى كۇشتى، جاقسى وتكىزىلدى. چاۋياڭ رايونىنداعى قاتىستى ورىندار دا قۋانا القاپ جاتىر، بۇدان بىلاي جىل سايىن وسىلاي وتكىزەمىز.

  قازاقستان رەسپۋبليكاسىنىڭ شاڭحاي سەلبەستىك ۇيىمى حاتشىلىعى جانىنداعى تۇراقتى ۋاكىلى باعدات سەيىتباتتالوۆ: ۇلىستىڭ ۇلى كۇنى ناۋرىزدا ىلە قازاق اۆتونوميالى وبلىسىنان ونەر ۇيىرمەسى كەلىپ، بىيجيڭدە كونسەرت قويدى. قازاقستان رەسپۋبليكاسىنىڭ بىيجيڭدەگى ەلشىلىگىنەن كەلىپ قاتىناسىپ، ۇلكەن اسەر الدىق. مىڭداعان ادام تاماشالاپ، ناۋرىزدى قالاي تويلايتىنىمىزدى كورىپ، سالت-ءداستۇرىمىزدى كورىپ، تانىسىپ جاتىر. تەك كونسەرت قانا ەمەس، قازاقتىڭ ەجەلگى ءداستۇرىن كورسەتىپ، ءدام-تۇزدارىڭىزدى الىپ كەلىپسىزدەر. باسقۇر، الاشا سىندى ءۇي جيھازدارىن توقۋ ونەرى كورسەتىلىپ، قولونەر بۇيىمدارى كورمەگە قويىلىپتى. وسىنىڭ بارلىعى استانا قالا بىيجيڭدەگى جۇرتشىلىققا وتە جاقسى اسەر قالدىردى. بۇگىن ەلشىلىكتىڭ قىزمەتكەرلەرى سىزدەردىڭ كونسەرتتەرىڭىزگە قاتىناسىپ، جاقسى كوڭىل-كۇيدەمىز. ناۋرىز قۇتتى بولسىن، ۇلىستىڭ ۇلى كۇنى دەندەرىڭىزگە ساۋلىق، بارلىقتارىڭىزعا امانشىلىق تىلەيمىز. ەكى ەل جۇرتشىلىعى امان بولسىن، تۋىستىق قارىم-قاتىناسىمىز جاقسى بولسىن، ءارقاشان جاقسىلىقتا، وسىنداي مەيرامداردا كەزدەسە بەرەيىك.

  ىلە وبلىستىق مادەنيەت، دەنە تاربيە، راديو-تەلەۆيزيا، كينو مەكەمەسىنىڭ باستىعى قىزىركەلدى ءابدىراحمان ۇلى: مەملەكەتتىك ساياسي كەڭەس مۇشەسى اكبار ءماجيت ۇلى ناۋرىز مەرەكەسىن چاۋياڭ رايونىمەن بىرلەسىپ وتكىزۋ ورايىن جاراتىپ بەردى. بۇل يگى ىسكە وبلىستىق پارتكوم مەن وبلىستىق حالىق ۇكىمەتى ءمان بەرىپ، مانەن زەينەل ۇلى ارناۋلى ورنالاستىرۋ جاساپ، وبلىستىڭ ورىنباسار باستىعى مۇقيات جارمۇقامەت ۇلى ۇيىمداستىرىپ، 50 ادامدىق ۇيىرمەنى بىيجيڭگە الىپ كەلدىك. كۇيتۇن قالاسى، نىلقى اۋدانى، قۇلجا قالاسى، موڭعۇلكۇرە اۋدانى قاتارلى اۋدان-قالالارداعى حالىق ونەرپازداردى، سونىمەن قوسا، ۇلتتىق كادەلى ونىمدەر كورگىزبەسىن دە الا كەلدىك. بۇل جولعى ناۋرىز قيمىلى وتە ءساتتى بولدى، ويلاعانىمىزداي بولدى. اسىرەسە، اكبار اعامىز باستاعان بىيجيڭدەگى ازاماتتار ەرەكشە قولداۋ كورسەتتى، چاۋياڭ رايونىنىڭ ۇلكەن قولداۋىنا يە بولدىق. وسىدان ءار ۇلت حالقىنىڭ بەرەكە-بىرلىگى، ىنتىماعى ايگىلەندى. قازاق حالقىنىڭ ناۋرىز مەرەكەسىن استاناداعى، چاۋياڭ رايونىنداعى ءار ۇلت حالقىمەن بىرگە تويلادىق، ۇلتتار ارا تۇسىنىگىمىز اناعۇرلىم تەرەڭدەي ءتۇسىپ، جاقسى ناتيجەگە جەتتىك.

  ىلە تەلەۆيزياسى قازاق رەداكسياسىنىڭ مەڭگەرۋشىسى كۇلانبەك ابەۋبەك ۇلى: بۇگىن استانامىز بىيجيڭدە قازاق حالقىنىڭ ناۋرىز مەرەكەسى چاۋياڭ رايونىنىڭ چۇنفىن مادەنيەت فەستيۆالىمەن بىرگە دۋماندى وتكىزىلۋدە. استانادا ناۋرىز وتكىزىلگەلى بيىل 31 جىل بولىپتى، قازىر مىنەكي كولەمى ۇلعايىپ، مازمۇنى مولايىپ، سانگە ءسان قوسىلىپ، دۋماندى وتكىزىلىپ جاتىر. ءوز باسىم ارت-ارتىنان ءۇش جىل استاناداعى ناۋرىز تويىنا كۋا بولدىم. وسىدان بۇرىنعى ەكى جىلدا وسىنداعى قازاق ازاماتتارى، باسشىلار، ستۋدەنتتەر بولىپ، بىرنەشە جەرگە جيىلىپ، «ەكى ءماجىلىس» ۋاكىل-مۇشەلەرىمەن بىرگە دۋمانداتىپ، جاقسى وتكىزگەن. بيىلعى ءبىر وزگەشەلىك، قازاق حالقىنىڭ ناۋرىز مەرەكەسىن ەسكەرگەن چاۋياڭ رايونى مەن ىلە قازاق اۆتونوميالى وبلىستىق مادەنيەت، دەنە تاربيە، راديو-تەلەۆيزيا، كينو مەكەمەسى بىرلىكتە وسى قيمىلدى جاقسى وتكىزدى، بۇل قيمىلعا وبلىس باسشىلارى ەرەكشە دەمەۋ كورسەتتى. قيمىلدىڭ مازمۇنى، ورنالاستىرىلۋى، قۇرامى ەرەكشە ۇيلەسىمدى بولدى، قازاقشا-حانزۋشا ەكى تىلدە جۇرگىزىلىپ، ەكى تىلدە دە ويىن نومىرلەرى قويىلدى. وسىنىڭ ناتيجەسىندە حانزۋ كورەرمەندەر دە تاپجىلماي بىرگە وتىرىپ، كونسەرتتى تاماشالاپ، قازاق حالقىنىڭ كەڭ ساحاراسىنا بارعانداي بولدى. بيىلعى ناۋرىزدى كەسكىنگە الۋدا جياڭسۋ ولكەلىك راديو-تەلەۆيزيا باس مەكەمەسى كوپ كومەك كورسەتتى، وسى جولى تۇسىرىلگەن كوركەمونەر نومىرلەرى تەلەۆيزيادا تاراتىلىپ، كورەرمەندەر كوزايىم بولادى.

  كورەرمەن ۋاكىلى، ءانيپا زاكەش اپامىز: بۇگىن مەن بىيجيڭدەگى ناۋرىز مەرەكەسىنە قاتىناسىپ وتىرمىن، شينجياڭ سانجى وبلىسى شونجى اۋدانىنان تۋىسشىلاي كەلگەنمىن. بۇيرىقشا بۇگىن وسى مەرەكەگە قاتىناستىم. بىيجيڭدەگى از قازاقتىڭ مەرەكەنى مىناداي تويلاپ جاتقانىنا مەن توتەنشە ريزا بولدىم. ىلە وبلىسىنان كەلگەن ءان-ءبي ۇيىرمەسىنە توتەنشە راحىمەت ايتامىن. يلايىم بۇدان كەيىن دە، بىيجيڭدەگى قازاقتاردىڭ ىنتىماعى وسىنداي جاقسى بولا بەرسىن. ناۋرىز مەرەكەلەرىڭىز قۇتتى بولسىن، قىزمەتتەرىڭىز تابىستى بولسىن، دەندەرىڭىز ساۋ بولسىن، جان ۇيالارىڭىز باقىتتى بولسىن، وسىنداي جاقسى كۇندەر باستارىڭىزدان كەتپەسىن!

  كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
 بىيجيڭدە ناۋرىز 
وقىرمان نازارىنا
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.