بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>مادەنيەت

قۋانىشتى حابار

2014.12.29 18:36   كەلۋ قاينارى : حالىق تورابى



  ورتالىق حالىق راديو ستانسياسىنىڭ ارناۋلى بەتىنە كىرىڭىز

  ورتالىق حالىق راديو ستانسياسىنىڭ قازاق تىلىندەگى راديوسى 1971-جىلى پارتيامىزدىڭ ابزال ۇلتتىق ساياساتىنىڭ ساياسىندا، استانامىز بەيجيڭدە شاڭىراق كوتەردى. سونان بەرگى جارىم عاسىرعا جۋىق ۋاقىتتا ىرگەسى كەڭەيىپ، شاڭىراعى بيىكتەي تۇسكەن قازاق راديوسى العاشىندا كۇنىنە جارتى ساعات باعدارلاما تاراتۋدان 2014-جىلعا دەيىن كۇنىنە 7 ساعات باعدارلاما تاراتۋ ورەسىنە جەتتى. استانا تورىنەن، ۇلى جۇڭحۋا ەلىنەن، تۇنىق قازاق تىلىندە سويلەگەن وتان، دۇنيە جاڭالىقتارى، تاريح، مادەنيەت، وقۋ-عارتۋ، مەديتسينا، ادەبيەت-كوركەمونەر حاقىندا بەرىلگەن الۋان ءتۇرلى باعدارلامالار، اسەم ءان، ءتاتتى كۇيلەر، بۇكىل ورتا ازيا اسپانىن ەركىن شارلاپ كەتتى.

  جوقتان بارعا اينالعان قازاق تىلىندەگى راديونى ورنىنان قاز تۇرعىزىپ، تابان ەت، ماڭداي تەرىن ارناعان اعابۋىن قىزمەتكەرلەر باس بولعان قوسىن، ورتالىق حالىق راديو ستانسياسى از ۇلت تىلىندەگى راديوداعى وزگە ۇلت ازاماتتارىمەن بەرەكە-بىرلىكتە بولا وتىرىپ، قازاق تىلىندەگى راديو قىزمەتىن، مازمۇن، فورما، ۋاقىت جاعىنان ۇزدىكىسز كەمەلدەندرىپ بايىتىپ وتىردى.

  ەلىمىزدەگى ۇلى جاڭالىقتار، مەملەكەتتىك ساياسي كەڭەس جانە حالىق قۇرىلتاي ماجىلىستەرى قاتارلى كەلەلى ىستەردى كەڭەسىپ، كەسەك شەشىم جاسايتىن ماڭىزدى مەملەكەتتىك ماجىلىستەر، پارتيامىزدىڭ ءار كەزەكتى قۇرىلتاي رۋحى، زاڭ-ساياساتتار دەركەزىندە، استانادان انا تىلىمىزدە اۋەگە كوتەرىلىپ، تىڭدارمان تىلەگىنەن شىقتى. قازاق تىلىندەگى راديو پارتيانىڭ ءۇنى، حالىقتىڭ كوز قۇلاعى، جاڭالىقتىڭ ۇشقىر جارشىسى، حالىقتىڭ ەلپەك قولعاناتى بولا ءجۇرىپ، «زاڭ جانە زامانا»، «جاس داۋرەن»، «ونەر ولكەسىندە»، «التىن ايماق»، «قاينار»، «شالقار»، «اگۋگاي»، «ءداريعاي-داۋرەن»، «ازاماتتىڭ ايتارى» قاتارلى ءتول باعدارلامالار ارقىلى تاريحىمىزدى دايەكتەپ، مادەنيەت پەن ونەرىمىزدىڭ جوقتاۋشىسى بولدى. حالىق ومىرىندەگى ۇلى وزگەرىستەر مەن تابىس، جەتىستىكتەرگە ەڭ الدىمەن قول سوعىپ، قۋانا ۇگىتتەدى. حالقىمىزدى تۇلعالىق جاقتان وركەندەۋگە، وسۋگە جەتەلەيتىن، كەيبىر ناشار ادەتتەردەن ارىلۋعا جەتەلەيتىن ويلى، ايتارى بار ماقالالاردى تىڭدارمانعا كوپتەپ ۇسىندى. مۇنان سىرت، جۇڭحۋا مادەنيەتىن، اسىرەسە، كوشپەلىلەردىڭ جىلقى جالىندا جاراتقان ۇلى مادەنيەتىن، ءتول تاريح، سالت-ءداستۇرىمىزدى ۇرپاققا ۇعىندىرۋدا ەسەلەپ قىزمەت ەتتى.

  قازاق راديوسى استانا اياسىندا ۇيعۇر، زاڭزۋ، موڭعۇل، چاۋشيان قاتارلى از ۇلتتاردىڭ راديوسىمەن بىرلىكتە دامىپ، تاعدىرلاس، تىنىستاس بوپ بىرلىكتە وركەندەپ، ارشىندى قاداممەن العا باسىپ، كەسەك تابىستارعا قول جەتكىزدى. جاڭا عاسىردان كەيىن پارتيامىز از ۇلت تىلىندەگى راديو قىزمەتىن اناعۇرلىم جەبەي ءتۇستى. مازمۇن، كولەم جاقتان كەمەلدەندىرىپ، بۇرىنعىدان دا بايىتا ءتۇسۋدى العا قويدى. سول ۇلى ساياساتتىڭ جەتەگىندە ورتالىق حالىق راديو ستانسياسىنداعى ءار ۇلت تىلىندەگى راديونىڭ بولىمشە وتاۋلارى جەر-جەردەن شاڭىراق كوتەرىپ، مازمۇن، ۋاقىت جاقتان جاڭا بەلەسكە كوتەرىلدى. سول قاتاردا قازاق تىلىندەگى راديونىڭ دا، بولىمشە رەداكسياسى، شينجاڭ ۇيعۇر اۆتونوميالى رايونى ءۇرىمجى قالاسىنان شاڭىراق كوتەرىپ، 2015-جىلى 1-قاڭتاردان باستاپ، تاۋلىگىنە 18 ساعاتتىق پروگرامما تاراتۋىن باستاپ كەتتى. وسىلايشا، ۇلى تاريح داستاننىڭ جاڭا بەتى اشىلىپ، جاڭا تاراۋى باستالدى. بۇل حالقىمىزدىڭ، جۇڭگوداعى قازاق تىلىندەگى اقپاراتتىڭ، بىرگە ءوسىپ، بىتە قايناسقان ءار ۇلت حالقىنىڭ جۇرەك جاردى شەكسىز قۋانىشى. وسىناۋ جاڭا سەرپىن تىڭ ءورىس ۇلتىمىزدىڭ مادەني رۋحاني ءومىرىن اناعۇرلىم بايىتۋ جاراسىمدى قوعامنىڭ جارقىن وبرازىن اسقاقتاتۋ جولىنداعى باياندى باستاما.

  كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

 سۋرەت