«ىلە كەشى» گازەتىنىڭ 4 – رەتكى «قارعالداق» اتىنداعى سيلىقتى شىعارما باسەكەسى ءساتتى اياقتالدى

2014.12.30 16:57   كەلۋ قاينارى : حالىق تورابى

　　«ىلە كەشى» گازەتىنىڭ ءتىلشىسى سەنبەك اۋەسقان ۇلى حابارلايدى. وسى جىلى تامىزدىڭ باسىندا مەملەكەت مەرەكەسىن، ىلە قازاق اۆتونوميالى وبلىسى قۇرىلعاندىعىنىڭ 60 جىلدىعىن قۇتتىقتاۋ، جۋرناليستەر مەرەكەسىن قارسى الۋ بايلانىسىمەن حالىق تورىنىڭ سەلبەسۋىندە، موڭعۇلكۇرە اۋدانى شاتى قىرعىز ۇلتتىق اۋىلى ورتا مەكتەبىنىڭ مەڭگەرۋشىسى بەكمىرزا نۇرقاسىم ۇلىنىڭ دەمەۋىندە «ىلە كەشى» گازەتىنىڭ 4 – رەتكى «قارعالداق» اتىنداعى سيلىقتى شىعارما (ولەڭ، شاعىن شالقىما) قابىلداۋ قيمىلى باستالعان بولاتىن.

　　قالامگەرلەردىڭ، وقىرمانداردىڭ قولداۋىندا قيمىل ءساتتى باستالىپ، رەداكسياعا تۇسكەن شىعارمالاردى سۇرىپتاۋ، جارامدىلارىن گازەتتە جاريالاۋ بارىستارىنان سوڭ جەلتوقساننىڭ 25 – كۇنى شىعارمالاردىڭ باعالاۋ ناتيجەسى شىعارىلىپ، جەلتوقساننىڭ 28 – كۇنى جۇلدە العان اۆتورلاردى سيلاۋ قيمىلى ىلە كەشى گازەتى مەكەمەسىنىڭ جيىن زالىندا وتكىزىلدى. قيمىلعا قۇلجا قالاسىنداعى جۋرناليستەردى، جۇلدە العان اۆتورلاردى قامتىعان 30 نەشە ادام قاتىناستى.

　　جيىندا ەڭ اۋەلى «ىلە كەشى» گازەتىنىڭ ورىنباسار باس رەداكتورى نۇرجان جانەتقان ۇلى قارسى الۋ ءسوزىن سويلەپ، قيمىلدىڭ ءمان – جايىن ەگجەي – تەگجەيلى تانىستىرىپ، قيمىلدىڭ وتكىزىلۋىنە ءوز جانىنان اقشا شىعارىپ دەمەۋشى بولعان، جومارتتىق كورسەتكەن بەكمىرزا نۇرقاسىم ۇلىنا، دوداعا شىعارما ۇسىنعان اۆتورلارعا ريزاشىلىق ءبىلدىرىپ، جۇلدە العان اۆتورلاردى جۇلدەسىمەن قۇتتىقتادى.

　　بىلىسبەك ءابدىرازاق ۇلى 1 – دارەجەلى جۇلدە الىپ، مىڭ يۋانمەن، جاڭاتاي قابدىكارىم ۇلى، مۇرات اۋەس 2 – دارەجەلى سيلىق الىپ، جەكە – جەكە 500 يۋانمەن، باقىتجان يمانقۇلوۆ، قوسىنبەك بولاتبەك ۇلى، ءابىش بايعازى ۇلى، نۇراقىمەت اۋەتوۆ، ءبي – حامي نۇربازار ۇلى 3 – دارەجەلى سيلىق الىپ، جەكە – جەكە 200 يۋانمەن سيلاندى، باعىنۇر دۇيسەنالى قىزى، ەركىنبەك وكەن ۇلى قاتارلى 8 اۆتور جاقسى تۋىندى سيلىعىن الدى.

　　ىلە گازەتى مەكەمەسى قازاق رەداكسياسىنىڭ مەڭگەرۋشىسى باقىتبەك نەسىپبەك ۇلى ىلە گازەتى مەكەمەسى اتىنان ءسوز سويلەپ، كەشكى گازەتتىڭ «قارعالداق» اتىنداعى سيلىقتى شىعارما باسەكەسىن 4 جىلدان بەرى جالعاستىرۋىنىڭ ماڭىزى زور، وقىرماندار ورتاسىنداعى ىقپالى جاقسى بولعانىن اتاپ ءوتتى ءارى كەشكى گازەتتىڭ ءوز ەرەكشەلىگىن ساۋلەلەندىرىپ، وقىرمانداردىڭ قالاۋىنان شىعا بەرۋىنە تىلەۋلەستىك ءبىلدىردى.

　　ءسايدىراحمان ءابدىلازىز ۇلى، امانتاي ءابدىقان ۇلى ادەبي جاسامپازدىق جونىندە كوكەيدە جۇرگەن ويلارىن ورتاعا سالىپ، اۆتورلارمەن پىكىر الماستىردى.

　　بىلىسبەك ءابدىرازاق ۇلى، جاڭاتاي قابدىكەرىم ۇلى، باقىتجان يمانقۇلوۆ، ءابىش بايعازى ۇلى، بەيسەنباي ساۋىت ۇلى، قوسىنبەك بولاتبەك ۇلى، مۇرات اۋەس، ءبي حاميت نۇربازار ۇلى قاتارلى جۇلدەلى اۆتورلار قيمىلعا قاتىناسۋداعى ماقساتى، قيمىلدىڭ ماڭىزى، قيمىلدان العان شابىتى سياقتى مازمۇنداردا بۇكپەسىز سىر اقتارىپ، قيمىلدىڭ ءار رەتكى قولداۋشىلارىنا العىس ايتىپ، دوداعا قاتىناسۋشى اۆتورلار سانىنىڭ كوبەيە تۇسۋىنە تىلەۋلەستىك ءبىلدىردى.

　　وسى رەتكى قيمىلدىڭ دەمەۋشىسى بەكمىرزا نۇرقاسىم ۇلى ءوزىنىڭ ۇلتىمىزدىڭ ادەبيەت-مادەنيەت ىستەرىنە اۋەلدەن ايرىقشا نازار اۋداراتىنىن، ادەبيەت – كوركەمونەردىڭ ۇلت ومىرىندەگى ماڭىزى زور بولۋى سەبەپتى قالتالى باي بولماسا دا، مەكتەپكە جۇك سالماي، جەكەلەي قولداۋ كورسەتىپ وتىرعانىن جاسىرمادى. ونىڭ لەبىزىن ەستىگەن كوپشىلىك تەبىرەنىستەرىن جاسىرماي، قول سوعىپ قۇرمەت ءبىلدىردى.

　　ىلە وبلىستىق كينو – تەلە فيلمدەردى از ۇلت تىلىنە اۋدارىپ جاساۋ ورتالىعىنىڭ ورىنباسار مەڭگەرۋشىسى، اعا اۋدارماشى باتىرقان قاسىم ۇلى جانكۇيەر وقىرماندار اتىنان ىستىق ىقىلاستى لەبىز ءبىلدىرىپ، كەشكى گازەتتىڭ تەبىنىنە وقىرمان قاۋىمنىڭ ريزا ەكەنىن اتاپ ءوتتى.

　　اقىن، رەداكتور نۇربولات ءابدىقادىر مەن جاماعات شاربەك ۇلى شىعارما ۇيىمداستىرۋ جونىندەگى وي – پىكىرىن كوپشىلىكپەن ورتاقتاستىردى.

　　قيمىلدى ىلە كەشى گازەتى مەكەمەسى قازاق رەداكسياسىنىڭ مەڭگەرۋشىسى سەنبەك اۋەسقان ۇلى باسقاردى.

　　ورىنباسار باس رەداكتور نۇرجان جانەتقان ۇلى مەكەمە اتىنان بەكمىرزا نۇرقاسىم ۇلىنا العىس ايتىپ ارناۋلى جاسالعان قامقا تۋ ۇسىندى.

　　سيلاۋ قيمىلىنا قوسا اۆتور، وقىرماندارمەن تالقى جيىنى وتكىزىلىپ، گازەتتىڭ بۇدان دا تارتىمدى شىعۋىنا سىن – پىكىر ايتىلىپ، ىزگى تىلەك ءبىلدىرىلدى.

　　«ىلە كەشى» گازەتىنىڭ 4-كەزەكتى «قارعالداق» اتىنداعى سيلىقتى شىعارما (ولەڭ، شالقىما) باسەكەسىنىڭ قورىتىندىسى

　　1- دارەجەلى جۇلدە (سيلىعى 1000 يۋان)؛

　　بىلىسبەك ءابدىرازاق ۇلىنىڭ «مەنىڭ قارا شاڭىراعىم – وبلىس» ولەڭىنە بەرىلدى.

　　2- دارەجەلى جۇلدە (سيلىعى 500 يۋاننان):

　　1. جاڭاتاي قابدىكەرىم ۇلىنىڭ «وبلىسىم – اق وردام» ولەڭىنە؛

　　2. مۇرات اۋەستىڭ «دومبىرا» ولەڭىنە بەرىلدى.

　　3- دارەجەلى جۇلدەگە يە بولعان تۋىندىلار (سيلىعى 200 يۋاننان):

　　1. باقىتجان يمانقۇلوۆتىڭ «ساعان بولعان ماحابباتىم قوماعاي» ولەڭىنە؛

　　2. قوسىنبەك بولاتبەك ۇلىنىڭ «التىن وردام» ولەڭىنە؛

　　3. ءابىش بايعازى ۇلىنىڭ «ارداقتايىق انانى» شالقىماسىنا؛

　　4. نۇراحىمەت اۋەتوۆتىڭ «وبلىسىم» ولەڭىنە؛

　　5. ءبي-حاميت نۇربازار ۇلىنىڭ «رۋح» شالقىماسىنا بەرىلدى.

　　جاقسى تۋىندى سيلىعىن العان تۋىندىلار: (سيلىق كۋالىگى بەرىلدى):

　　1. باعىنۇر دۇيسەنالى قىزىنىڭ «انام - جۇڭحۋا» ولەڭى؛

　　2. ەركىنبەك وكەن ۇلىنىڭ «اسىل ەلىم – اي» ولەڭى؛

　　3. مادەن مۇقامەتقان ۇلىنىڭ «تۋعان جەر ساعىنىشى» ولەڭى؛

　　4. گۇلدەن مۇلىك قىزىنىڭ «الپىس جىلدىڭ جەڭىسى مەن جەمىسى» ولەڭى؛

　　5. بەيسەنباي ساۋىت ۇلىنىڭ «قاراسازىم» ولەڭى؛

　　6. ىرىسكەلدى زامانبەك ۇلىنىڭ «الپىسىڭ قۇتتى بولسىن» ولەڭى؛

　　7. مەيرامبەك قالياسقار ۇلىنىڭ «الپىس جىلدىڭ الاۋى» ولەڭى؛

　　8. داۋكەن سۇلتان ۇلىنىڭ «اق شاشۋ الپىسىڭا وبلىسىم» ولەڭى.

　　ىلە كەشى گازەتى مەكەمەسى

　　2014-جىلى جەلتوقساننىڭ 25 – كۇنى

　　كەلۋ قاينارى: حالىق تورابى