- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
شينجياڭ تەلەۆيزياسى قازاقشا تەلە ارناسى قۇرىلعاندىعىنىڭ جەمىستى 30 جىلى
سەرىك بالشات ۇلى
2016.01.13 13:48
شينجياڭ تەلەۆيزياسىنىڭ قازاق تىلىندەگى تەلە ارناسى ۇلتىمىزدىڭ ماڭىزدى اقپارات دانەكەرلەرىنىڭ ءبىرى ءارى ادەبيەتىمىز بەن مادەنيەتىمىزدىڭ جانە كوركەمونەرىمىزدىڭ نەگىزگى ۇيىتقىسى. قازاق تىلىندە تاراتىلاتىن تەلە ارنامىز شاڭىراق كوتەرگەننەن بەرى، پارتيا مەن حالىقتىڭ اراسىنداعى ماڭىزدى دانەكەر رەتىندە پارتيا - ۇكىمەتتىڭ باعىت - ساياساتتارىن جۇرتشىلىققا جەتكىزۋ جاعىندا جۇيەلى جۇمىستار تىندىرىپ، تورتكىل دۇنيەنىڭ تۇكپىر – تۇكپىرىندەگى تىڭ جاڭالىقتاردى كورەرمەنگە كوگىلدىر ەكران ارقىلى جەتكىزىپ كەلەدى. قوعام قويناۋىنداعى ءار الۋان مازمۇنداعى مايەكتى باعدارلامالار ارقىلى بارشا قاۋىمعا باعالى رۋحاني ءنار سيلاپ كەلەدى. سونىمەن بىرگە، ۇلتىمىز وركەنيەتىنىڭ رايى مەن شىرايى جونىندەگى جان تەبىرەنتەرلىك جەتىستىكتەردى، جاڭا ينفورماتسيالاردى جاندى اقپارات ءتىلى ارقىلى ءدال ۋاعىندا كورەرمەنگە تارتۋ ەتتى. الەمنىڭ ءار قيىرىنان سىر شەرتىپ، وتان اياسىنداعى اۋقىمدى دامۋ ۇردىستەرىن دەركەزىندە كوگىلدىر ەكرانعا كوتەرىپ وتىردى. تۇتاس مەملەكەت جانە رايونىمىز كولەمىندەگى ءتۇرلى سالالارداعى تولاعاي تابىستاردى تولاسسىز حالىققا جەتكىزىپ، كورەرمەن قاۋىمدى سۇبەلى مازمۇندارىمەن قامداپ كەلدى. بۇدان تىس، ۇلتىمىز كورەرمەندەرىن باي مازمۇندى بىلىمدەرمەن سۋسىنداتىپ، تۇرمىستارىنا تىڭ تىنىس باعىشتادى. انە سول ارقىلى ءوزىنىڭ ۇلتتىق جانە داۋىرلىك مىندەتىن تىڭعىلىقتى تىندىردى.
شينجياڭ تەلەۆيزياسى قازاق تىلىندەگى تەلە ارناسى 1985 – جىلى قىركۇيەكتىڭ 23 – كۇنى كوگىلدىر ەكرانعا كوتەرىلگەننەن بەرى، ەلىمىزدەگى قازاق حالقى دا وزگە تۋىسقان ۇلتتار قاتارىندا، تەلە ارنا سىندى وسى وزىق اقپارات قۇرالىنان تولىق يگىلىكتەنۋگە مۇمكىندىك الدى. سول كۇننەن باستاپ، كوگىلدىر ەكران ارقىلى قازاق تىلىندەگى تاراتىلىم ءوز كورەرمەنىمەن قاۋىشىپ، ۇلتىمىز وركەنيەتىندە بۇرىلىس سيپاتتى وزگەرىستەر جارىققا شىقتى. وسىنداي ورايلى ساتتە، ەرەكشە اۋىزعا الا كەتۋگە تاتيتىنى ءبىزدىڭ قازاق تىلىندەگى تەلە ارنامىزدىڭ اشىلۋىنا، سول تۇستاعى زەينوللا شاكەرباي ۇلى باستاعان اعا بۋىن ازاماتتارىمىزدىڭ قاتىستى ورىندارعا ءوتىنىش جازىپ، قازاق تىلىندە تەلە ارنا اشۋ ىسىنە بەلسەنە كىرىسۋىمەن، اۆتونوميالى رايونىمىزداعى ءار دارەجەلى قاتىستى باسشىلاردىڭ قولداۋىمەن، قاتىستى ورىندارعا بەكىتتىرىپ، قازاق تىلىندەگى تەلە ارنانىڭ شاڭىراعىن ءوز قولدارىمەن كوتەرىپ بەرۋى ءارى قازىرگە دەيىن ءتۇرلى جاقتان ءمان بەرىپ قولداپ – قۋاتتاۋى ەدى.
ءبىز ەلىم دەگەن سول ءبىر ەگەي اعالارىمىزعا شىن جۇرەكتەن العىس جانە ازاماتتىق بورىشتىلىق بىلدىرەمىز. سونىمەن بىرگە ايتا كەتەرلىگى، شينجياڭ تەلەۆيزياسى قازاق تىلىندەگى تەلە ارناسىنىڭ اشىلۋى - پارتيانىڭ ۇلت ساياساتىنىڭ ناقتى كورنەكتىلەنۋى مەن «ۇلتتىق تەرريتوريالى اۆتونوميا زاڭىنىڭ» جارقىن كورىنىسى ەدى. سونداي – اق بۇل اۆتونوميالى رايونىمىز قۇرىلعان 60 جىلدىڭ دا ايتۋلى ناتيجەلەرىنىڭ ءبىرى بولىپ تابىلادى.
ءارقانداي سالانىڭ وزىندىك دامۋ زاڭدىلىعى بولادى، بىردەن كەمەلدەنە قالاتىن ەشتەڭە جوق. قازاق تىلىندەگى تەلە ارنانىڭ تاريحى دا بۇل زاڭدىلىقتان شەت قالعان جوق. كىشكەنەدەن ۇلكەيىپ، ازدان كوبەيىپ، باستالۋ، قالىپتاسۋ، دامۋ، كەمەلدەنۋ كەزەڭدەرىن باستان كەشىرگەن تەلە ارنامىزدىڭ وتكەن كۇنىن ويمەن شولاتىن بولساق، كوپتەگەن سىرلارعا كوڭىلىمىز قانىعادى. ەڭ العاش 8 ادامدىق گرۋپپامەن جابدىقتالىپ، بىرتىندەپ، 14 ادامعا كوبەيىپ، العاشقى كۇندەلىكتى حابارلاردى اۋدارماعا سۇيەنىپ ازىرلەگەن قازاق تىلىندەگى تەلە ارنا اۋەلدە وزگە كانالعا مىنگەسىپ جۇمىس جاساعانى بەلگىلى. ناقتىلاپ ايتقاندا، العاشقى جىلى حانزۋ تىلىندە حابار تاراتاتىن 5 – كانالدىڭ جەكسەنبى كۇنگى كەشكى ەكى ساعاتىنان پايدالانىپ، اپتاسىنا ءبىر رەت عانا ەكرانعا كوتەرىلگەن سوڭ، ءبىر جىلدان كەيىن بارەكەلدى ايتقىزار بەدەلگە قول جەتكىزىپ، 1986 – جىلدىڭ سوڭىندا ارناۋلى ارناعا يە بولىپ، 12 – ارنادا ارناۋلى قازاق تىلىندە باعدارلاما تاراتۋعا مۇمكىندىك العان بولاتىن. العاشقى جىلى اپتاسىنا ارەڭ ەكى ساعات عانا حابار تاراتۋعا شارتى تولعان تەلە ارنا، وسى جىلدان باستاپ، بۇگىن بەرىلگەن حاباردى، ەرتەڭىندە ەكرانعا كوتەرەتىن دەڭگەيگە جەتۋى سول تۇستا شىنىمەن دە كوڭىل توعايتارلىق جاعداي ەدى. سونىمەن قوسا، وسى كەزەڭدە قىزمەتكەرلەر قوسىنىنىڭ قاتارى كوبەۋىنە بايلانىستى، ورتالىق تەلەۆيزياسىنىڭ ارناۋلى تاقىرىپتىق باعدارلامالارىن اۋدارۋدى قولعا الىپ، «حايۋاناتتار دۇنيەسى» سياقتى باعدالامالاردى قازاق كورەرمەندەرىمەن قالتقىسىز جۇزدەستىرگەن ەدى. ول كەزدە قازاق تىلىندەگى تەلە فيلم اۋدارما ءبولىمى قۇرىلماعاندىقتان، تيانشان كينو ستۋدياسىنىڭ اۋدارىپ دايىنداعان قازاق تىلىندەگى كينو فيلمدەرى عانا تاراتىلاتىن. ال ونداي فيلمدەر ارحيۆتە ساقتالمايتىندىقتان، ول فيلمدەردى اۋدان، اۋىلدارداعى كينوحانالاردان جيناپ اكەلىپ تاراتتى. باستابىندا بۇل كينو فيلم سارسەنبى، سەنبى، جەكسەنبى كۇندەرى 3 ساعات ۋاقىتپەن تۇراقتى تاراتىپ تۇردى. بۇل جاعدايدا ەكى جىل وتكەننەن كەيىن ەلەۋلى بۇرىلىستار بولدى.
1988 – جىلعا كەلگەندە، قازاق تىلىندەگى كينو اۋدارما ورتالىعى قۇرىلدى. مارقۇم شاكەن قاليوللا ۇلى ءوزى باس بولىپ، كينو فيلمدەردى اۋدارىپ، دىبىس بەرىپ جاساۋعا كىرىستى. وسىنىڭ ناتيجەسىندە، حالىقتىڭ اۋدارما فيلمدەرگە دەگەن سۇرانسىن سالدە بولسا قاناعاتتاندىرۋعا مۇمكىندىكتەر جاراتىلدى. وسىعان جالعاستى زەينوللا شاكەرباي ۇلى تەلە ارنامىزدا قازاق تىلىندەگى «ارناۋلى تاقىرىپتىق حابارلار» ءبولىمىن قۇرىپ، «ءار شالعايدان» ايدارى اشىلدى. قازاق تىلىندەگى تەلە ارنانىڭ ءتول ايدار تاريحى مىنە وسىدان باستاۋ الادى. باستابىندا بۇل ايداردا ماتەريالىنا قاراي، كەيدە جارتى ساعات، كەيدە 20 مينۋت ۋاقىتپەن ارەڭ جارىم ايدا ءبىر رەت ەكرانعا كوتەرىلىپ وتىردى. دەگەنمەن ۋاقىتتىڭ وتۋىنە بايلانىستى، كوپتەگەن ولقىلىقتاردىڭ ورنى تولىقتانىپ، تەلە قىزمەتكەرلەرى قوسىنىنىڭ قاتارىنىڭ مولىعۋىنا بايلانىستى، ءتول ايدارلارىمىزدىڭ دا ءتۇرى كوبەيە باستادى. جىلدان جىلعا جاڭا قىزمەتكەرلەر قاتارعا قوسىلدى، سوعان سايكەستى سان الۋان مازمۇندى باعدارلامالار دۇنيەگە كەلىپ، بارشا حالىققا باعالى قۋانىش رەتىندە تارتۋ ەتىلدى. وسىنداي ورەلى وزگەرىستەردىڭ ارقاسىندا، 30 جىلدىڭ ءوزى تابىستىڭ تورىنە اينالدى. ەڭ العاش 8 اداممەن ىرگە تاسىن قالاعان قازاق تىلىندەگى تەلە ارنا بۇگىنگە كەلگەندە، 258 قىزمەتكەرى بار، بىرەگەي اقپارات ورداسىنا اينالدى. قازاق تىلىندەگى تەلە ارنا العاش قۇرىلعاندا، اپپاراتتىڭ تەتىگىن يگەرگەن جالعىز زەينوللا شاكەرباي ۇلى بولسا، ال قازىر ءارقانداي فيلمدى ءتۇسىرىپ، جاساۋعا كۇشى قاپتال جەتەتىن قۋاتتى قوسىنىمىز قالىپتاسىپ ۇلگىردى. ءبىر اپتادا ءبىر حابار بەرەتىن جاعدايدان، كۇن ارالاتىپ حابار بەرۋگە، ودان كۇنبە – كۇن حابار بەرەتىن دەڭگەيگە جەتسەك، ال قازىر ورتالىق تەلەۆيزيانىڭ «مەملەكەتتىك – حالىقارالىق حابارلارىن» 2 ساعاتتان كەيىن اۋدارىپ تاراتساق، «شينجياڭ حابارلارىن» 3 تىلدە ءبىر ۋاقىتتا تاراتاتىن دەڭگەيگە جەتتىك. مىنە، بۇنىڭ ءوزى وڭاي جەتىستىك ەمەس. قازاق تىلىندەگى تەلە ارنانىڭ بۇگىنگىدەي بيىككە كوتەرىلۋى كەشەگى كونەكوز اعا بۋىنداردىڭ، وتكەنگى ورتا بۋىنداردىڭ، بۇگىنگى بىرەگەي جاس بۋىنداردىڭ جان – جاقتى قۇلشىنىسى مەن تىنباي توككەن تەرىنىڭ ارقاسى ەكەندىگىن اۋىز تولتىرىپ ايتقىمىز كەلەدى. شىنىندا وسىنداي تەبىرەنۋگە ءتيىستى تاماشا تابىستارىمىزبەن ماقتانۋعا، مارقايۋعا ابدەن حاقىلىمىز.
قازاق تىلىندەگى تەلە ارنانىڭ تەلەگەي تابىستارىنىڭ تولاعاي كورسەتكىشتەرىن ءتول ايدارلاردىڭ تۇلعاسىنان تولىق تاني الامىز. ونىڭ ۇستىنە، قازاق تىلىندەگى تەلە ارنا بۇرىنعى جالعىز ارنادان، قازىر 3 ارناعا كوبەيدى. سوعان بايلانىستى ءتول ايدارلارىنىڭ دا ءتۇرى مولايدى. 1994 – جىلى ناۋرىزدىڭ 6 – كۇنى قازاق تىلىندە تاراتىلاتىن 8 – ارنا قۇرىلدى. 2006 – جىلى بالالار ارناسى اشىلدى. قازىر 3 – ارنا 19 ساعات باعدارلاما تاراتادى. «شاراپات»، «جولاۋشى»، «اۋىل اياسى»، «زەردە»، «بىلگەنگە مارجان»، «شالقار» سياقتى كۇنىنە 30 مينۋد ۋاقىتپەن بەرىلەتىن 7 ءتول ايدارى بار. 8 – ارنا كۇنىنە 17 ساعات باعدارلاما تاراتادى. بۇل ارنانىڭ دا «گۇلدەر – اي»، «بايتەرەك»، «سپورت الەمى»، «اراي»، «ەكونوميكا» سىندى 6 ءتول ايدارى بار. ونىڭ بەسەۋى 20 مينۋت ۋاقىتپەن، بىرەۋى 40 مينۋت ۋاقىتپەن كوگىلدىر ەكرانعا كوتەرىلەدى. ال بالالار ارناسى كۇنىنە 4 ساعات باعدارلاما تاراتادى. ول 30 مينۋت ۋاقىتپەن «قارعالداق» ايدارىن كورەرمەنگە ۇسىنادى. وسى 3 ايداردا جالپى جيىنى 14 ءتول ايدار بار.
ال قازاق تىلىندەگى تەلە ارنانىڭ قازاق مادەنيەتىن دامىتۋ جانە ونى زامان ۇردىسىنە قاراي ۇگىتتەۋ جاعىنداعى ەڭبەكتەرى ۇشان تەڭىز. سونىڭ ايقىن دالەلى رەتىندە، 500 ساعاتتىڭ ۇستىندە اقىندار ايتىسىن، 400 ساعاتتىڭ ۇستىندە كونسەرتتىك ساۋىق كەشتەردى، 30 دان استام ءتۇرلى تاقىرىپتا دەرەكتى فيلم ءتۇسىردى ءارى ونى ەكىراندا تاراتىپ، قالىڭ قاۋىمنىڭ ىستىق ىقىلاسىنا بولەندى. ماسەلەن، اقىندار ايتىسى 1986 – جىلدان باستاپ تەلە ارنادا تاراتىلا باستادى. مىنە، وسى 30 جىل ۋاقىتتا اقىندار ايتىسىن ۇگىتتەۋ، ناسيحاتتاۋ جاعىنان تەلەنىڭ ەڭبەگى ەرەن. 1991 – جىلى ءشامىش قۇمار ۇلىنىڭ «جۋساندى دالا» پۆەستىن سەنەريالاستىرىپ، تەلە فيلم ءتۇسىردى. مىنە، بۇل قازاق تىلىندەگى تەلە ارنا تۇڭعىش تۇسىرگەن تەلە فيلم بولىپ تابىلادى. سودان بەرى ەسەپتەگەندە «ىلە سالتاناتى»، «مارعابىلدىڭ قارا قاسقا اتى»، «باركول بايان»، «كوش»، «جىلقى جالىنداعى مادەنيەت»، «تاريح تاڭبالارى» سياقتى تارتىمدى تەلە بەرىلىمدەر مەن اقىت سياقتى ۇلى تۇلعالاردى تىلگە تيەك ەتىپ شىعارىلعان دەرەكتى فيلمدەردىڭ دە سانى ءبىرتالايعا جەتتى. ال اتاۋلى كۇندەردەگى كونسەرتتەردەن تىس، «كۇمىس كومەي»، «جەز تاڭداي»، «التىن ساۋساق» سياقتى كولەمدى كونسەرتتىك باعدارلامالاردا بار. ارينە، بۇل ءبىزدىڭ جۇمىستارىمىزدىڭ باستاماسى عانا. بۇدان بىلاي قازاق مادەنيەتىنە، ۇلتتىق قۇندىلىقتارىنا قاتىستى كوپتەگەن دەرەكتى فيلمدەر جاسالادى. «جوق جومارتتىڭ قولىن بايلايدى» دەگەندەي، بۇنداي جۇمىستارعا كوبىندە قارجى جاعى تۇساۋ بولاتىنى بەلگىلى جاي.
قازاق تىلىندەگى تەلە ارنا ءوزىنىڭ ۇگىتتىك، ءناسيحاتتىق رولىن دا ويداعىداي ساۋلەلەندىرىپ كەلەدى. ءار باعدارلاما سايىن ماڭىزدى مازمۇنداردى نەگىز ەتە وتىرىپ، حالىققا دۇرىس ۇگىتتىك ۇعىمداردى جەتكىزۋدە جاقسى ناتيجەلەرگە قول جەتكىزدى. ارينە، باعدارلاما باسقارۋدا اتامالى كۇندەردى ارقاۋ ەتۋ، كەزەڭدىك تاقىرىپتى مىقتى يگەرۋ، تاقىرىپتىق مازمۇنداردى ءتۇيىن ەتۋ – باعدارلامامىزدىڭ ىقپالىن كەڭەيتۋدەگى دۇرىس جول. وسى تۇرعىدان الىپ ايتقاندا، قازاق تىلىندەگى تەلە ارنادا سوڭعى جىلدارى تۇيىقسىز تۋىلعان ىستەردى حابارلاۋ، مەملەكەتىمىزدىڭ، رايونىمىزدىڭ كولەمدى ۇگىتتىك ناۋقاندارىن ىشكەرىلەي ۇگىتتەۋ جاعىندا ءتىلشى جىبەرۋ، ستۋدياعا سيلى قوناق ۇسىنىس ەتۋ، ۇستىنەن تاراتۋ سىندى تەلە ارنانىڭ «تەزدىك» ەرەكشەلىگىن ايگىلەيتىن جاڭا جانر، فورمالاردى ىسكە قوسىپ، زور قوعامدىق ونىمدىلىك جاراتىلدى. اسىرەسە، پارتيا 17 –، 18-قۇرىلتايىنىڭ اشىلۋ سالتى، رەفورما جاساپ، ەسىك اشۋدىڭ 30 جىلدىعى، جاڭا جۇڭگو قۇرىلعاندىعىنىڭ 60 جىلدىعى جانە 65 جىلدىعى، اۆتونوميالى رايون قۇرىلعاندىعىنىڭ 60 جىلدىعى، فاشيسيزمگە قارسى سوعىس جەڭىسىنىڭ 70 جىلدىعى سەكىلدى دابىرالى ۇگىتتىك ناۋقاندار تۇسىندا، سونداي – اق جۋىق جىلدارى رايونىمىزدا تۋىلعان قار، تاسقىن اپاتى كەزىندە تەلە ارنانىڭ ۇگىتى ءوزىنىڭ ومىرشەڭدىك قۇدىرەتىن تولىق ساۋلەلەندىرىپ، اقپارات سالاسىنداعى باسەكەلىك كۇشىن تولىق ايگىلەدى.
مىنەكي قازاق تىلىندەگى تەلە ارنا وردا بۇزار 30 جاسقا كەلىپ، تابىستىڭ تالعارىنان كورىنىپ وتىر. وسىعان وراي ءبىز ارنامىز قۇرىلعان 30 جىلدى شاعىن كولەمدە اتاپ وتتىك. ماسەلەن، شەجىرە كىتابى دايىندالىپ، دەرەكتى فيلم ءتۇسىرىلدى. ارنامىزدان تاراتىلعان دەرەكتى فيلمدەردىڭ ءبىر ءبولىمىن البوم ەتىپ شىعارۋ جۇمىسى دا قاۋىرت ىستەلۋدە. سونىمەن قاتار، شاعىن كولەمدە كونسەرت ۇيىمداستىرىلدى.
قولدا بارمەن قاناعاتتانىپ قالۋعا بولمايدى. زامان تالابىنا ۇيلەسىپ، قوعام قارقىنىنا ىلەسۋ ءۇشىن، الداعى كۇندەردىڭ بىزگە جۇكتەيتىن مىندەتى دە جەڭىل بولا قويمايدى. سوندىقتان ءاربىر قادامىمىزدى نىق باسىپ، ءتۇرلى سىن – سىناقتاردان سۇرىنبەي وتۋگە ساقاداي ساي بولۋىمىز كەرەك. ارينە، الداعى جەردە تەلە باعدارلامالارىن باسقارۋ رەفورماسىن اناعۇرلىم جەدەلدەتۋ ءۇشىن، باعدارلاما مازمۇنىن بارىنشا تەرەڭدەتۋ قاجەت. بۇندا باعدارلاما باسقارۋدا «ۇشكە ەتەنە جاناسىمدى بولۋ» باعىتىندا تاباندى بولىپ، كورەرمەن قاجەتىنەن شىعاتىن، كورەرمەننىڭ كۇتكەنىنەن تابىلاتىن ساپالى باعدارلامالاردى باسقارۋ – الداعى رەفورمانىڭ ۇلكەن بەتالىسى ەسەپتەلەدى. سوندىقتان تەلە ارنانىڭ قوسىن قۇرىلىسىن مىقتى يگەرىپ، كاسىپتىك ساپانى بارىنشا جوعارىلاتۋ كەرەك. قازىر تەلە ارنانىڭ وزىق تاراتۋ جابدىقتارىنىڭ قىرى مەن سىرىن تولىق يگەرگەن، جۇرگىزۋشىلىك، ديكتورلىق، رەداكتورلىق، تىلشىلىك، اۋدارماشىلىق سەكىلدى ءتۇرلى كاسىپتىك قابىلەتتى ءبىر تۇلعالاندىرعان ءبىر ونەرگە جۇيرىك، بار ونەردەن حابارلى قوسىن كۇشىن جەدەل قالىپتاستىرۋ وتە قاجەتتى.
رايونىمىزداعى اقپارات ورىندارىنىڭ ۇگىت – ناسيحات ىستەرىندە قىزمەت سالماقتى، مىندەت اۋىر. جاقىنعى جىلداردان بەرى پارتيا ورتالىق كوميتەتى مەن مەملەكەتتىك كەڭەستىڭ پارمەندى باسشىلىعىندا تۋىسقان ولكە، قالالاردىڭ قالتقىسىز كومەكتەسۋ سىندى ۇلى ناۋقاندىق ۇگىتتىڭ سالماعى جۇكتەلدى. اسىرەسە، ورتالىقتىڭ شينجياڭ قىزمەتى جونىندەگى اڭگىمە ءماجىلىسى مەن شينجياڭعا 19 ولكە، قالانىڭ سالالار بويىىنشا كومەكتەسۋ ءىسى، بۇكىل ەلدىڭ اقىل – پاراساتىن شوعىرلاندىرعان، بۇكىل شينجياڭنىڭ ومىرشەڭدىك كۇشىنە دەم بەرگەن ماڭىزدى ءماجىلىسى جانە قولدانعان پارمەندى شاراسى. ول شينجياڭنىڭ ەكونوميكاسى مەن قوعامىنىڭ تەز دامۋىن، سونداي – اق دامۋ ارقىلى ورنىقتىلىقتى جەبەپ، ورنىقتىلىق ارقىلى دامۋعا كەپىلدىك ەتۋدە كەلەلى ساياسي ءمان الادى. قازىر رايونىمىزدىڭ جەر – جەرىندە شينجياڭعا سالالار بويىنشا كومەكتەسۋ ناۋقانىنىڭ دەم بەرۋىندە، كەڭ كولەمدە قۇرىلىس جۇرگىزگەن، جاپپاي اشقان، قاۋىرت دامىعان، جەر – جەرمەن كومەك بەرەتىن ولكە، قالالار ءوزارا تىعىز سەلبەسكەن، ورتالىقتىڭ شينجياڭنىڭ قارىشتاپ دامۋى مەن باياندى تىنىشتىعىن ىلگەرىلەتۋ جونىندەگى كەلەلى ستراتەگيالىق ورنالاستىرۋى مەن كەمەڭگەر شەشىمدەرىنىڭ تياناقتانا باستاعان ايبىندى كورىنىسى جارىققا شىقتى.
سوندىقتان شينجياڭنىڭ قارىشتاپ دامۋى مەن باياندى تىنىشتىعىن جۇزەگە اسىرۋدا ۇلتتىق تەلە ارنانىڭ ۇگىتى يدەيا مەن قيمىلدى ورتالىقتىڭ شينجياڭ قىزمەتى جونىندەگى اڭگىمە ءماجىلىسىنىڭ رۋحىمەن شىنايى بىرلىككە كەلتىرىپ، تانىمدى جوعارىلاتىپ، ەرىك – جىگەردى ۇشتاپ، رۋحتى تاسقىنداتىپ، شينجياڭداعى ءار ۇلت جۇرتشىلىعىن دۇرىس جۇرتشىلىق پىكىرىنە باستاپ، ءماجىلىس رۋحىن جاپپاي دايەكتىلەندىرىپ، شينجياڭعا كومەك بەرگەن قاتىستى قىزمەتتەردىڭ ۇگىتىن مىقتى يگەرۋلەرى كەرەك. حالىق جۇرتشىلىعىنا وتان قۇشاعىنىڭ جىلىلىعىن، پارتيانىڭ مەيىر – شاپاعاتىن تولىعىنان ۇعىندىرۋ ءتيىس.
كوپشىلىككە ايان تەلە ارنا رەفورماسىنىڭ ماقساتى – تەلە بەرىلىمدەرىنىڭ ساپاسىن اناعۇرلىم جاقسارتۋ، سول ارقىلى حالىق بۇقاراسىنىڭ، سونداي – اق كورەرمەندەردىڭ رۋحاني سۇرانىسىن قاناعاتتاندىرۋ بولىپ تابىلادى.
ءسوز سوڭىندا قازاق تىلىندەگى تەلە ارنانىڭ ءتىپتى دە تەلەگەي تابىستارعا قول جەتكىزىپ، ەرتەڭىنىڭ بۇگىنگىدەن دە بيىك بەلەستەردەن كورىنۋى ءۇشىن، جالپى جابىلا ءۇن قوسىپ، ەرىنبەي ەڭبەك ەتىپ، تەلە ارنانىڭ نۇرلى بولاشاعىن ورتاق جاراتۋعا قۇلشىنا كۇش قوسۋىن شىن جۇرەكتەن ءۇمىت ەتەمىن!
كەلۋ قاينارى: «ىلە گازەتى» - ىلە اقپارات تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
