- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
التاي ايماعى تۇڭعىش كەزەكتى قازاق ەتنوگرافيالىق مادەنيەت، ساياحات ىستەرىن دامىتۋ تالقى جيىنىن وتكىزدى
2016.01.21 14:16 كەلۋ قاينارى : ءتاڭىرتاۋ تورابى
قالياكبار ۇسەمقان ۇلى ۇرىمجىدەن حابارلايدى. التاي ايماعىنىڭ تۇڭعىش كەزەكتى قازاق ەتنوگرافيالىق مادەنيەت، ساياحات ىستەرىن دامىتۋ تالقى جيىنى 15 - قاڭتار كۇنى ۇرىمجىدە اشىلدى. التاي ايماقتىق پارتكوم مەن اكىمشىلىك مەكەمەسىنىڭ قۋاتتاۋىندا، بۋىرشىن اۋداندىق اقكۇنگەيتى ۇلتتىق مادەنيەت، ساياحات ىستەرىن دامىتۋ شەكتى سەرىكتەستىگى جاۋاپتى بولىپ وتكىزگەن بۇل تالقى جيىنعا اۆتونوميالى رايوندىق مادەنيەت، ساياحات، مۇراجاي مەكەمەلەرىنىڭ قاتىستى باسشىلارى جانە رايونىمىزداعى قازاق تاريحىن، مادەنيەتىن زەرتتەۋشى مامان - وقىمىستىلار مەن قازاقستاننان ارنايى شاقىرىلعان مادەنيەت قايراتكەرلەرى قاتىناستى.
التاي ايماعى سوڭعى جىلداردان بەرى، حالىقاراعا ايگىلى قاناس كولى كورىنىس رايونى مەن ءامىرسانا كورىنىس رايونىن وزەك ەتە وتىرىپ، ساياحات كاسىبىن دامىتۋمەن قاتار، ايماقتىڭ مادەنيەتىنىڭ دامۋى مەن ونداعى ۇلتتاردىڭ سالت - ساناسىنداعى وزگەشەلىكتەردى دە كورنەكتىلەندىرىپ، ساياحاتشىلاردى تابيعاتپەن عانا تامساندىرىپ قويماي، ۇلتتىق ەرەكشەلىككە يە وڭىرلىك مادەنيەتپەن دە ءلاززاتتاندىرۋعا كۇش سالدى. اقكۇنگەيتى بالبالتاس قازاق مادەنيەت سالت - سانا باقشاسى − الىس - جۋىقتان كەلگەن ساياحاتشىلارعا ساياحات ىستەرىمەن بىرلەستىرە وتىرىپ، قازاق ۇلتىنىڭ سالت - سانا مادەنيەتىن تانىستىراتىن التاي ايماعىنداعى بىردەن - ءبىر ۇلتتىق سالت - سانا، مادەنيەت باقشاسى.
مەملەكەتتىك 4A دارەجەلى ساياحات ورنى بولىپ بەكىتىلگەن اقكۇنگەيتى بالبالتاس قازاق مادەنيەت سالت - سانا باقشاسى (تومەندە قىسقارتىلىپ ەتنوگرافيالىق باقشا دەپ الىندى) 2013 - جىلى شاڭىراق كوتەرگەن. جالپى اۋماعى 400 مۋعا جۋىق. قازىرگە دەيىن 25 ميلليون يۋان قارجى قوسىلعان. قاناس كورىنىس ساياحات رايونىنا باراتىن جولدىڭ شەتىندەگى جاسىل پۇلىسپەن كومكەرىلگەن اپايتوس جازىققا ورنالاسقان بۇل ەتنوگرفيالىق باقشانىڭ ورنى وتە ۇرىمتال جەردە، بۋىرشىن اۋدانىنا جاقىن، قاناس اۋەجايىنا نە بارى 10 كيلومەتر. جاز ماۋسىمىندا قاناسقا باراتىن ساياحاتشىلاردىڭ اسقار تاۋ، مانات دالانىڭ سۇلۋ مەڭىندەي مەن مۇندالاپ، ادامعا «ەرتەگىلەر ەلىنەن كوشىپ كەلگەندەي» اسەر سيلايتىن بۇل ەتنوگرافيالىق باقشاعا نازار اۋدارماي وتە شىعۋى مۇمكىن ەمەس.
− اقكۇنگەيتى ەتنوگرافيالىق باقشاسى بىزگە تاۋەلدى بولعانىمەن، ونداعى كورنەكتىلەنگەن مادەنيەت حالىقتىكى. ەندەشە، ونىڭ دۇرىس، ويداعىداي ۇگىتتەلۋى تەك مەنىڭ عانا جۇمىسىم ەمەس، قازاق ۇلتىنا، قازاق مادەنيەتىنە جان اشىر بولعان ءاربىر ازاماتتىڭ جۇمىسى. قازاق مادەنيەتىن كورسەتۋدىڭ شاعىن كارتيناسى ىسپەتتى سالت - سانا باقشامىزدى بۇدان بىلاي قالاي دامىتامىز، قايتسەك وركەندەتىپ، قايتكەندە ۇلتىمىزدىڭ مادەنيەتىن ءار قىرىنان تانىتا الامىز دەگەن ماقساتتا «كەڭەسپەن پىشكەن تون كەلتە بولمايدى» دەگەندەي، مامانداردى شاقىرىپ، كەڭەس العالى وتىرمىز، - دەيدى اقكۇنگەيتى ەتنوگرافيالىق باقشاسىنىڭ باس مەڭگەرۋشىسى راحات ءابدىقادىر ۇلى.
تالقى جيىنعا قاتىناسقان قازاق مادەنيەتىن زەرتتەۋمەن اينالىسقان جاقىپ مىرزاقان ۇلى، قابدەش ءجانابىل ۇلى، اپەتاي مۇقاراپ ۇلى، ما شيۇڭپۋ، داعىستان ابزالقان ۇلى قاتارلى تاريحشى، اقىن - جازۋشى، مامان، وقىمىستىلار ۇتىمدى ۇسىنىس، سىندارلى پىكىرلەرىن ورتاعا سالدى. قازاقستان رەسپۋبليكاسىنان ارنايى شاقىرىلعان تاريح عىلىمدارىنىڭ دوكتورى احمەت توقتاي مەن ءنابيجان مۇقامەتحان ۇلى جۇڭگونىڭ از ۇلتتاردىڭ مادەنيەتىن، بەيزاتتىق مۇرالاردى قورعاۋعا وسكەلەڭ دارەجەدە ءمان بەرىپ وتىرعانىن ايىرىقشا القاي كەلىپ، ەتنوگرافيالىق باقشانى دامىتۋ مەن قازاق مادەنيەتىن ۇگىتتەۋدە باسا نازار اۋدارۋعا ءتيىستى تۇيىندەر توڭىرەگىندە توقتالدى.
− قاناسقا ساياحاتتاي كەلگەن ساياحاتشىلاردىڭ كوبى قازاق ۇلتىن تۇسىنبەيدى. ءتىپتى، ولار بۇرىن قازاقتى كورىپ، بىلمەگەندەر. سوندىقتان قازاق ۇلتىن تاۋ ساعالاپ، سۋ جاعالاپ كوشپەلى تۇرمىس كەشكەن، ەشقانداي مادەنيەتى جوق حالىق ەكەن دەپ ويلايدى. ال ولاردىڭ قازاق مادەنيەتىن كورىپ، قازاق ۇلتى جونىندە ازدا بولسا تۇسىنىك قالىپتاستىرۋىنا مۇمكىندىك جاسالماعان. مىنە وسى ماسەلە مەنىڭ اقكۇنگەيتى ەتنوگرافيالىق باقشاسىن قۇرۋىما سەبەپشى بولدى. قازاق مادەنيەتىن ءتىپتى دە ايگىلەۋ ءۇشىن، قازىر مۇراجاي دا سالدىرىپ جاتىرمىز. بۇگىنگى ايتىلعان ۇسىنىستار بويىنشا دا ءبىر قىدىرۋ جۇمىستار ىستەلەدى، - دەيدى راحات مىرزا. «شينجياڭ گازەتى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
