- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«ىلە جاستارى» جۋرنالى «شينجياڭ قازاق جاستارى» بولىپ شىعا باستادى
2016.02.15 16:06
سەنبەك اۋەسقان ۇلى حابارلايدى. ىلە جاستار – ورەندەر گازەت – جۋرنال مەكەمەسى جاعىنان شىعارىلاتىن ءبىر گازەت، ەكى جۋرنالدىڭ اتى وزگەرتىلەتىنىنە بايلانىستى وسى گازەت، جۋرنالداردا ءبىر جىلدان بەرى ايتىلىپ كەلگەن ەدى. سول يگى ءىس ورىندالىپ، 2016 – جىلى قاڭتاردىڭ سوڭعى شەنىندە «ىلە جاستارى» جۋرنالىنىڭ ورنىنا «شينجياڭ قازاق جاستارىنىڭ» العاشقى سانى شىعارىلىپ، جاستاردى قامتىعان جالپى قازاق وقىرماندارىن شاتتىققا بولەدى.
مۇقاباداعى ايگىلى حاتكەر ءابدىماجيت ەرتۋعان ۇلى جازىپ بەرگەن «شينجياڭ قازاق جاستارى» دەگەن كوركەم جازۋ ەرەكشە كوز تارتادى. جۋرنال بەتىنە ۇزدىك مۋلتفيلم رەجيسسەرى سيلىعىنىڭ يەگەرى ارىسبەك نۇقان ۇلىنىڭ سۋرەتى باسىلعان. مۇقابانىڭ 2 – بەتىندە وسى مەكەمە جاعىنان شىعارىلاتىن، اتى وزگەرىپ، تۇلەي تۇسكەن «شينجياڭ قازاق جاستارى»، «شينجياڭ قازاق بالالارى» جۋرنالدارىنىڭ، «شينجياڭ قازاق ورەندەرى» گازەتىنىڭ باس بەتتەرى فوتو كۇيىندە بەرىلگەن. مۇقابانىڭ 3 – بەتىنەن قايرات قايىپجان ۇلىنىڭ فوتو سۋرەت تۋىندىلارى، مۇقابانىڭ 4 – بەتىنەن ايقىن يماش ۇلىنىڭ «جىلقىشى» اتتى ماي بوياۋ سۋرەتى ورىن العان. جۋرنالدىڭ تيتول بەتىندە «جانكۇيەر وقىرماندارعا جالىندى سالەم» دەگەن اتپەن مەكەمەنىڭ وقىرماندارعا جولداعان ىستىق ىقىلاستى سالەمى جاريالانعان. مازمۇنىنا كەلسەك، «زامانا ديدارى»، «قۇلشىنعانعا قۇت ءۇيىر»، «تەز باسى»، «ورتاعا سالار ويلار بار»، «وي قوزعار»، «تالعام تارازىسى»، «ۇلاعات»، «انا ءتىلى ــ التىن قازىق»، «سىر شەرتەر»، «مىس قوڭىراۋ»، «بۇگىنگى قارا ءسوز»، «جەتى بوياۋ»، «تۇزدىق» دەگەن ايدارشالارمەن تۇرلەنىپ، ارلەنىپ تۇر.
كەزىندەگى ىلە رايوندىق وداق كوميتەتى شۋجيىنىڭ سول تۇستاعى ورىنباسارى قاپەز سۇلەيمەنوۆتىڭ باس رەداكتورلىق، قۇباقان دوكەي ۇلى مەن مۋ ىن جولداستىڭ باس رەداكتوردىڭ ورىنباسارى مىندەت ارقالاۋىمەن، داۋلەت جەلىكبايەۆ، ابدىكەرىم ەسەنجولوۆ، ءجانابىل جابىقبايەۆتەردىڭ ماقالا ازىرلەۋ جۇمىستارىن ىستەۋىمەن 1956 – جىلى قازان ايىنان باستاپ 32 فورماتتى، 18 بەتتىك ايلىق جۋرنال بولىپ جارىق كورگەن «ىلە جاستارى» جۋرنالى تالاي – تالاي ىستىق – سۋىقتى، ءبىرتالاي وزگەرىستى باستان كەشىپ، 60 جىلدىق تاريحتى وتكەرىپ، قازىرگە دەيىن جالپى 722 سان شىعىپ، حالىققا مول رۋحاني ازىق سيلاعان بەلدى باسىلىمعا اينالدى. 1982 – جىلى قاڭتاردان باستاپ 16 فورماتتى، ەكى باسپا تاباقتىق (64 بەتتىك)، كوركەم سىزبا، فوتو سۋرەت مۇقابالى تۇرپاتپەن شىعا باستاسا، 2015 – جىلى قاڭتاردان باستاپ ءىشى – سىرتى بىردەي ءتۇستى باسىلىممەن باسىلدى، ەندى مىنە جوعارى دارەجەلى ورىنداردىڭ ءمان بەرىپ، قولداۋىمەن «شينجياڭ قازاق جاستارى» بولىپ شىعىپ وتىر.
ىلە جاستار – ورەندەر گازەت – جۋرنال مەكەمەسى باستىعىنىڭ ورىنباسارى، باس رەداكتورىنىڭ ورىنباسارى قۋاندىق ءنۇسىپقان ۇلى ءۇش باسىلىمنىڭ اتى وزگەرۋىنە بايلانىستى قۋانىشپەن بىلاي دەدى: بۇل ءۇش باسىلىمنىڭ الدىنىڭ شىعا باستاعانىنا 60 جىل بولدى، سوڭعىسىنىڭ شىعا باستاعانىنا 31 جىل بولدى، بۇل باسىلىمدار باسقارۋ قۇرىلىمىنىڭ ىلەدە بولۋىنا بايلانىستى ات جاعىنان «ىلە» دەگەن ءسوزدى ارقاۋ ەتكەنىمەن، اۋەلدەن – اق تۇتاس ەلىمىزدەگى قازاق جاستارى مەن ورەندەرىن وقىرمان وبيەكتىسى ەتكەن. دەسە دە، بۇل اتتاردىڭ وڭىرلىك شەكتەمەسى دە بولماي قالعان جوق. وسىنداي سەبەپتەردەن مەكەمەمىزدىڭ باسشىلارى جوعارىعا دوكلاد جازىپ، ءۇش باسىلىمنىڭ اتىن وزگەرتۋدى ءوتىندى. مەملەكەتىمىزدىڭ قامقورلىعىندا ورتالىق اقپارات – باسپا ءسوز مەكەمەسىنىڭ بەكىتۋىمەن بۇل جۇمىستار رەسمي ورىندالدى. مۇنىڭ ءوزى ــ ءداۋىردىڭ تالابى، رەفورمانىڭ قاجەتى، ۇلتىمىزدىڭ زور قۋانىشى. وسى ورايدا بارشا وقىرماندى قۋانىشتارىمەن قۇتتىقتايمىن، الداعى جەردە ءۇش باسىلىمدى مازمۇنى مەن كوركەمدىگىن سايكەستىرە وتىرىپ ءتىپتى دە ساپالى شىعارۋعا قۇلشىنامىز.
جۋرنالدىڭ كونە وقىرمان، سىرلاس دوستارىنىڭ ءبىرى سەرىكبول داۋلەتكەلدى ۇلى: جۋرنالدىڭ شىعا باستاعانىنا 60 جىل تولۋ قارساڭىندا اتىنىڭ وزگەرۋى قۋانىش ۇستىنە قۋانىش بولدى، بۇل جۋرنال ءبىز سياقتى تالايلاعان جاستىڭ قالامىن ۇشتادى، جۋرنال رەداكسياسىنداعى قىزمەتكەرلەرگە ۇلكەن العىس ايتامىز، قازىرگى قوسىننىڭ وسى ورايدى ۇلكەن باستاما دەپ ءبىلىپ، ءتىپتى دە زور ناتيجە جاراتا بەرۋلەرىنە تىلەۋلەسپىن! – دەدى.
كەلۋ قاينارى: «ىلە كەشى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
