ەركىن سايىس الاڭىنداعى جارىق جۇلدىز

 سەرىك سابىر ۇلى، جارقىن نۇرابىلدا ۇلى 

2014.02.14 08:57  

　　UFC قازاق تىلىندە ەركىن سايىستىڭ ەڭ جوعارى دەڭگەيى دەگەن ماعىنانى بىلدىرەدى. قازىر دۇنيە جۇزىندەگى ەرەن دارەجەلى كولەمى ۇلكەن كاسىپتىك ۋنيۆەرسال سايىس جارىسى سانالادى. بۇل جارىس ءار جىلى وتكىزىلىپ،جارىس تەلە ارنالارىندا ۇستىنەن اقىلى تاراتىلادى. وسى جارىسقا قاتىناسۋعا جولداما الىپ كەلىسىمگە وتىرعان كاسىپتىك سايىس ساڭلاقتارى تۇگەل جۇيەلى ءارى عىلمي جاتتىعۋ سىناعىنان سۇرىنبەي وتكەندەردەن سارالانادى، الۋان ءتۇرلى سايىس ونەرى تەحنيكا شارتىن تولىق ازىرلەيدى. بۇل جارىس 1993 – جىلى تۇڭعىش رەت ا ق ش – دا وتكىزىلگەن،وندا تورلانعان سەگىز بۇرىشتى الاڭ نەگىزگى سايىسۋ الاڭى ەتىلىپ،دودادا باعىن سىناعان ساڭلاقتارعا ءادىل دە اشىق باسەكە ورتاسىن جاراتىپ بەرۋ ءتۇپ ماقسات ەتىلگەن. وسى سەگىز بۇرىشتى سايىس الاڭىندا سايىسقا تۇسكەن شەبەرلەر شەتىنەن ىرىكتەلىپ،سوڭىندا جارىستىڭ باس جۇلدەسىن قانجىعاسىنا بايلاعان سوڭعى جەڭىمپاز تاڭدالادى. جارىس تايكونداۋ، بالۋاندىق، بوكسەر، سايىسۋ، رۋداۋ سياقتى تۇرلەردى قامتىعان. بۇل كۇندەرى دۇنيە جۇزىندەگى 145 مەملەكەتتىڭ كورەرمەندەرى وسى جارىستىڭ ناق مايدان تارالىمىن تىكە كورە الادى. UFC جارىسى برازيليا، كانادا، ۇلى بريتانيا، گەرمانيا، اراب بىرىككەن امىرلىگى سياقتى ەلدەردە ءساتتى وتكىزىلگەن. وسى جارىستىڭ شەنگە تالاسۋ جارىسى 5 مايدان ۇيىمداستىرىلادى، ءار مايدان ۋاقىتى 5 مينۋت، شەنسىز جارىس 3 مايدان ۇيىمداستىرىلادى، ارالىقتا ءبىر مينۋت دەمالىس بەرىلەدى. جارىس جالپى 7 دارەجەگە بولىنگەن، ساڭلاقتار 120 _ 60 كيلوگرام سالماقتا دوداعا تۇسەدى. جارىستا تورەشى، ەمدەۋ قىزمەتكەرلەرى، باپكەر، ساراپتاۋشى، جۇرگىزۋشى، تۇسىنىك بەرۋشى، تاقتا كوتەرەتىن بويجەتكەن سياقتى قىزمەتكەرلەر بار. جارىسقا تۇسكەن ساڭلاقتاردىڭ قارسى جاعىن باسپەن سۇزۋىنە،مازاقتاۋىنا، ياناتتاۋىنا، شاشىن جۇلۋ، كوزىن شۇقۋ نەمەسە جاندى جەرىنە قول سالۋ ارەكەتتەرىن ىستەۋىنە بولمايدى، بۇلاي ىستەسە جارىس بەلگىلەمەسىنە قيعاشتىق ىستەگەن بولادى دا، جارىسقا قاتىناسۋ تولىمدىلىعىنان ايىرىلادى. بۇل جارىس ەلىمىزگە شەتتەن ەنگەندىكتەن جارىس بەلگىلەمەلەرى مەن ەرەجەسى حالىقارالىق ولشەمدى نەگىز ەتكەن. وسىنداي حالىقارالىق دەڭگەيدەگى جارىس شارشى الاڭىندا ايبارلى دا قارىمدى، جۇتىپ الاتىنداي بوپ تۇرعان ارىپتەستەرىن كورگەندە رۋحتانىپ، دەسى باسىم ءتۇسىپ،ءۇرتىس 32 مايدان جەڭىسكە جەتكەن، التىن بەلبەۋدىڭ يەگەرى، ازيا اعا جۇلدەگەرى، سونداي –اق جۇڭگو ۋنيۆەرسال سايىس مىنبەسىندەگى ەڭ ىقپالدى ساڭلاق، دودالى باسەكەلەردە ەل ىشىندەگى اتاعى جەر جارعان ارىپتەستەرىن عانا ەمەس، ا ق ش، برازيليا، جاپونيا، كورەيا، وڭتۇستىك افريكا، فرانسيا، رەسەي جانە تايلاندتان شىققان ازۋلى دا جۇلدەلى ارىپتەستەرىن شارشى الاڭداعى جەكپە – جەكتە قيداي سىپىرىپ، قازاقتىڭ جۇدىرىعىن ءبىر تانىتقان،ەلىمىزدەن وسى جارىسقا قاتىناسۋعا جولداما الىپ كەلىسمگە وتىرعان تۇڭعىش قازاق ساڭلاعى، ەلىمىزدىڭ ەركىن سايىس شارشى الاڭىنداعى جارىق جۇلدىز، كورەرمەندەر «ساحارا كوكجالى» دەپ اتاپ كەتكەن جۇمابەك تۇرسىن ۇلىنىڭ بوي كورسەتىپ، بيىك بەلەستەردەن كورىنە العانى ەلىمىزدەگى قازاقتى قامتىعان ءار ۇلت حالقىنىڭ مەرەيى مەن مارتەبەسىن اسقاقتاتىپ ءجۇر. ءيلايىم، ۇلت جاندى، قازاق قاندى جاس باتىرىمىز ءتىل - كوزدەن امان بولسىن. ۇلكەن دودالاردا ەل ءىشى - سىرتىنا قازاق ەسىمىن تانتىقان، ەڭ ماڭىزدىسى، كۇش اتاسى قاجىمۇقان، بالۋان شولاق، مۇستافا قاتارلى ەگەيلەردىڭ ءىزىن باسىپ، جەتىلىپ، كورىنىپ كەلە جاتقان پاراساتتى دا بىلىكتى، ءبىلىمدى دە جىگەرلى ۇلاندارىنىڭ بار ەكەنىن اڭعارتا بىلگەن ازاماتىمىز بيىك بەلەستەردەن كورىنە بەرسىن.

　　رەسەي زۇڭتۇڭى پۋتيننىڭ قاسىنان ەكى ەلى ايىرىلمايتىن وققاعارىنىڭ تاربيەلەپ جەتىلدىرىپ، ۇكىلەپ وتىرعان شاكىرتىن شارشى الاڭداعى سايىستا ويسىراتا جەڭىپ ءدۇمپۋ تۋدىرىپ ەسىمى كۇللى ەلگە تانىلعان، ازيا اعا جۇلدەگەرى، UFC - عا قاتىناسۋعا جولداما الىپ كەلىسىمگە وتىرعان ەكىنشى جۇڭگولىق،ەلىمىز ەركىن سايىس سالاسىنداعى جارىق جۇلدىز جۇمابەك تۇرسىن ۇلى بيىل ناۋرىزدىڭ 1-كۇنى اۋمىن قالاسىندا وتكىزىلەتىن حالىقارالىق ەركىن سايىس جارىسىنا قاتىناسۋ ءۇشىن، ەگەيلەر جينالعان تايلاندقا جاتتىعۋعا قاتىناسۋعا اتتانار الدىنداعى ءبىر ورايلى ساتتە اۋىلداعى اتا - اناسى مەن ەل - جۇرتىنا امانداسا كەلىپ،ورىنباسار وبلىس باستىعى مۇقيات جارمۇقانبەت ۇلى مەن وبلىستىق ۇكىمەتتىڭ ورىنباسار باس حاتشىسى سەرىك ماقات ۇلى قاتارلى ەل اعالارىنىڭ ۇسىنسى بويىنشا قاڭتاردىڭ 28 - كۇنى قۇلجا قالاسىنا ات باسىن بۇرىپ، ىلە تەلەۆيزياسى قازاقشا ارناسى «سىر مەن سىمبات» ءتول ايدارىنىڭ سيلى قوناعى بولىپ، جانكۇيەرلەرىمەن سىر ءبولىسىپ، وي ورتاقتاستىردى.

　　قازاقتىڭ قاراپايىم ۇلىمىن

　　جۇمابەك تۇرسىن ۇلى ىلە قازاق اۆتونوميالى وبلىسىنا قاراستى كۇنەس اۋدانى بەستوبە اۋىلى جاڭارسىن قىستاعىندا دۇنيەگە كەلگەن. ول-ەلىمىزدىڭ ۋنيۆەرسالدى سايىس مىنبەسندەگى تەحنيكاسى ەڭ جوعارى شەبەر، ەلىمىزدىڭ ايگىلى ەركىن سايىس ساڭلاعى، ايگىلى سايىس باپكەرى جاۋ شۋەجۇننىڭ ۇكىلەگەن شاكىرتى، بيىل 25 جاستا، قازاق، بويى 1.72 مەتر، سالماعى 60 كيلوگرام. باستاۋىشتىڭ 3–جىلدىعىنان باستاپ دەنەتاربيەگە اۋەس بولعان، تۇڭعىش قادامىن جەڭىل اتلەتيكادان باستاپ، مەكتەپتە وتكىزىلگەن ۇلداردىڭ 100 مەترگە جۇگىرۋ جارىسىندا تۇڭعىش رەت جۇلدەلى بولعان، العاشىندا دەنەتاربيەدە فۋتبول مەن جەڭىل اتلەتيكاعا بوي ۇرىپ، بالا جۇرەگىندە بولاشاقتا اتى ايگىلى سپورتشى بولسام دەگەن ارمانى بولعان، كەيىن ءوزىنىڭ جەڭىل اتلەتيكاعا وتە بەيىم ەمەستىگىن بايقاپ، ورتالاۋدى تامامداعان سوڭ كۇنەس اۋداندىق 1 – ورتا مەكتەپتىڭ كاسىپتىك كلاسىندا وقىعان كەزدە ابەك باپكەر كۇرەستەگى العاشقى ۇستازى بولعان، نابيجان بالۋاننىڭ كۇنەستەگى اشقان بالۋاندىق كۋرسىندا بولىپ، وبلىستىڭ بالۋان جارىسىندا بەستوبە اۋىلى اتىنان ءتۇسىپ جۇلدەگەر بولعان. كەيىن ىلە وبلىستىق دەنەتاربيە مەكتەبىنە ۇزدىك ناتيجەمەن قابىلدانىپ، باپكەر ورالبەكتىڭ قولىندا بولعان. بالۋاندىقتاعى بەيىمى مەن ءبىتىمى دارالاۋ بولعاندىقتان، 2005–جىلدان 2008–جىلعا دەيىن شانشي ولكەسى دەنەتاربيە ورتالىعىنىڭ بالۋاندار كومانداسىندا كاسىپتىك جاتتىعۋ ورايىنا قول جەتكىزگەن ءارى حالىقارالىق ەركىن كۇرەس جارىسىندا ەرلەردىڭ 66 كيلوگرام سالماق دارەجەسى بويىنشا اعا جۇلدەگەر بولعان.

　　جۇمابەك تۇرسىن ۇلى بىلاي دەدى: شانشي ولكەسى دەنەتاربيە ورتالىعىنىڭ بالۋاندار كومانداسىنا بارعان كەزىمدە 18 جاستا ەدىم، وزىمشە بالۋاندىق ونەرىنىڭ قىرى مەن سىرىن جەتىك يگەردىم دەپ جۇرگەم، بارا سالعاندا الدىمەن سىناقتا بولدىم، ءبىر كۇنى باپكەرىم مەنى شارشى الاڭدا بالۋانعا سالدى، ءبىراق ارىپتەسىمنىڭ قىز ەكەنىن كورگەندە باسىندا باپكەردىڭ ويىن تۇسىنە الماي، قىزبەن جارىسقا سالعانى نەسى، مەنى وسال شامالاعانى ما دەپ توپشىلادىم دا، الگى ارىپتەسىممەن بەلدەسە كەتتىم، ويلاماعان جەردەن جۇلدەلى بولىپ جۇرگەن ءوزىمنىڭ قالايدان – قالاي باسىم زەڭىپ، جەردە جاتقانىمدى بىلە المادىم، مەنسىنبەگەن قىز ارىپتەسىم جەڭىپ كەتىپ، نامىستان جارىلا جازدادىم. كەيىن ءبىلدىم باپكەرىمنىڭ دانا ەكەنىن. ول مەنى جۇلدەلى بالۋان بولسا دا، اتاققا بوي ۇرماي وسى كاسىپتىڭ تەحنيكاسى مەن ءادىس - ايلاسىن جەتىك يگەرسىن دەپ جەبەگەن ەكەن، سودان باستاپ جاتتىعۋعا بەرىلە كىرىستىم. مۇندا ءار ۇلتتان قۇرام تاپقان بالۋاندار جينالعاندىقتان جارىس ورايى مەن جوعارى بەلەستەردەن كورىنۋ ءۇشىن باسەكە مەن تاڭداۋ كۇشتى بولدى. سوندىقتان بولار نامىسىمدى، ەسەمدى جىبەرمەۋدى ۇيرەندىم، مىنە، بۇگىن بەرىلە ۇيرەنگەن بالۋاندىق ونەرىم ەركىن سايىس الاڭىندا ەس قاتتى. كەيىن مەرتىگىپ قالدىم دا، بولاشاق كاسىبىمدى تاڭداۋعا تۋرا كەلدى. مەرتىگىپ قالعانىم ەمەس، ەسەمنىڭ كەتكەنى باسقا كاسىپتى تاڭداۋىما تۇرتكى بولدى. سەبەبى ۇلكەن جارىسقا بالۋان ىرىكتەۋدە اعالاپ الدا كەلىپ، سوڭىندا ارىپتەسىمدى جەڭىپ وتىرسام دا، جولىم بولماي سارالاۋدان قالدىم. اۋەلى تورەشىلەر مەن باپكەرلەردى ىزدەپ بارىپ قايتا بەلدەسۋدى، جەڭىلىپ قالسام رازى ەكەنىمدى بىلدىرسەم دە، ناتيجە باسقاشا بولدى دا، كاسىپ تاڭداۋ ويىندا بولدىم. بالۋاندىقتاعى باپكەرىم حۋاڭ جيانميڭ ويىمدى اڭعارسا كەرەك، ءبىر كۇنى مەنى شاقىردى دا: بايقاسام، بالۋاندار كومانداسىندا سەنىڭ قول - اياعىڭ تەز ەكەن، سايىسىپ كورۋگە وراي بەرسەم، قالاي قارايسىڭ، __ دەدى. مەن تويتارمادىم. ول كەزدە ەركىن سايىس،ونىڭ ءادىس – تەحينكاسى ماعان قانىق ەمەس ەدى. تۇڭعىش ەركىن سايىس شارشى الاڭىنداعى ارىپتەسىم يۇنناندىق حانزۋ جىگىت بولدى. مايدانعا تۇسەردەن بۇرىن ول ءىلۋلى تۇرعان قۇم دوربانى تەۋىپ – تەۋىپ ورنىنان لەزدە سىرعىتىپ جىبەرىپ ماعان سەس كورسەتتى. مەن دە قۇم دوربانى تەۋىپ كورىپ ورنىنان سىرعىتا المادىم. ىشتەي شيپامنىڭ بىتكەنى وسى ەكەن دەپ ويلادىم دا ونىمەن بەلدەسە كەتتىم، جارىس 5 مايدانعا سوزىلدى، اراسىندا باسىم زەڭىپ، كوزىم قاراۋىتىپ جاتقانىمدى بىلەم،سوندا دا ەسىمدى تەز جيىپ،نامىسقا تىرىسىپ،ورايىن تاۋىپ جامباسقا الدىم دا توردان سىرتقا اسىرىپ لاقتىرىپ جىبەردىم، ويىمدا وسىلاي ىستەسەم جەڭەم دەپ تۇرمىن، سونىڭ اراسىنشا تورەشى ماعان بىردەڭەلەردى ەسكەرتتى دە،الگىنى قايتا الىپ كەلمەسى بار ما، قويشى سونىمەن الىسىپ ءجۇرىپ جامباسقا باسىپ قىلقىندىرىپ جەڭىپ الدىم، جينالعان ەل دۇرلىگىپ كەتتى. كەيىن ەستىسەم، الگى ارىپتەسىم ەل ىشىندەگى بەلدى جارىستارعا قاتىناسىپ ەسەسىن جىبەرمەي جۇرگەن جۇلدەلى جىگىت ەكەن، 2 – رەتكى بەلدەسۋ باسىنداعىدان وڭاي بولدى، سەبەبى سودان كەيىن مەن بالۋاندىقتان سىرت،وراي مەن ۋاقىتتى مىقتى يگەرىپ اياق - قولدى ىستەتۋگە جاتتىقتىم. ەكىنشى رەت ارىپتەسىمدى تەز جەڭدىم، سونىمەن 2007 - جىلى توردان تۇڭعىش رەت ۋنيۆەرسالدى سايىسۋ جارىس بەينەسىن كورىپ، وسى سپورت تۇرىنە قىزىقتىم،كەيىن شي-ان دەنە-تاربيە ينستيتۋتىنىڭ ساندا كومانداسىندا بولىپ، ۋنيۆەرسالدى سايىستىڭ كاسىپتىك جاتتىعۋىن قابىلدادىم.

　　مىنە، سودان باستاپ 4 جىل ىشىندە ونىڭ ەسىمى ەلىمىزدىڭ ەركىن سايىس شارشى الاڭىندا بارشاعا تانىلىپ،ءۇرتىس 14 مايدان جەڭىسكە جەتتى، مۇندا ءۇش رەت ارىپتەسىن تالدىرىپ ءتۇسىردى، 4 رەت ارىپتەسىن جەر قاپتىرىپ، تاماشا بەينەسى حالىقاراداعى ەڭ جوعارى دەڭگەيدەگى ۋنيۆەرسالدى سايىس جارىسىن ۇيىمداستىرۋ ۇيىمى – UFC دىڭ نازارىن اۋداردى.

　　 ارمان اسۋىندا

　　جۇمابەك ۋنيۆەرسالدى سايىس ءتۇرى بويىنشا 2007 - جىلى كاسىپتىك جاتتىعۋدى باستاعان، كۇنىنە ءۇش ۋاق جاپالى دا ماشاقاتتى كاسىپتىك جاتتىعۋدا تاباندى بولىپ، «ەڭبەگى قاتتىنىڭ تاتقانى ءتاتتى » دەگەندەي، كوزدەگەن ۇلى ارمانى مەن ماقساتىنان جازباي، ەركىن سايىس شارشى الاڭىندا ءۇرتىس 32 مايدان جەڭىسكە جەتتى. ەلىمىزدىڭ وسى تۇردەگى سايىس الاڭىندا كورەرمەننىڭ دەنى جاڭ تيەچۋان، ياڭ جينانپيڭ قاتارلى سايىس ساڭلاقتارىنىڭ ەسىمىنە قانىق بولسا دا، قازاقتىڭ جاس تا بولسا قاس باتىرى جۇمابەكتى بىردەن تانىپ كەتە المادى،ەندى عانا وسى تۇرگە بەل شەشىپ ارالاسقان 25 جاستاعى قازاق ۇلانى كاسىپتىك جارىستا كاسىپتىك جۇلدەلى سايىسكەرلەرگە ەسەسىن جىبەرگەن ەمەس، ايتالىق، شانشي ولكەسىندە وتكىزىلگەن سوڭعى شەشۋشى سايىس جارىسىندا ءۇرتىس 16 مايدان جەڭىسكە جەتتى،بەيجيڭ قالاسىندا وتكىزىلگەن ەڭ سوڭعى ەگەيلەردى تاڭداۋ جۇلدەگەرلىك جارىسىندا اعا جۇلدەرگەر بولدى، گۋاڭشي جۇڭتاي قارسىلاسىن تالدىرىپ ءتۇسىرۋ جارىسىندا اعا جۇلدەگەر بولدى، بۇدان سىرت، توعىز ەلدىڭ بوكس پاتشاسى جارىسى، سوڭعى باتىر سياقتى جارىستارعا قاتىناستى. جۇمابەك تۇرسىن ۇلى ــ قازىرگە دەيىن ەركىن سايىستا جەڭىلىپ كورمەگەن، ەلىمىزدىڭ اتى زاتىنا ساي ەرەن جۇلدىزى، 2013 - جىلى ناۋرىزدىڭ 28 - كۇنى جۇمابەك تۇرسىن ۇلى ەركىن سايىس شارشى الاڭىنداعى ساڭلاقتاردىڭ ۇلى ارمانى مەن ماقساتى ەسەپتەلەتىن ەركىن سايىستىڭ ەڭ جوعارى دەڭگەيىندەگى جارىسقا قاتىناسۋ ورايىنا قول جەتكىزىپ، وسى جارىسقا قاتىناسۋعا جولداما العان ەكىنشى جۇڭگولىق، جۇڭگوداعى تۇڭعىش از ۇلت ازاماتى بولدى. بۇل وسى تۇردەگى جارىستىڭ ەلىمىزدە كەڭىنەن جالپىلاسۋ اياق الىسىنىڭ تەزدەگەنىن اڭعارتادى.

　　جەڭىس تۇعىرىندا

　　جۇمابەك تۇرسىن ۇلىنىڭ سپورتتاعى بەيىمى مەن دارا تالانتىن ەرتەدەن بايقاپ، كەڭ ساحنا مەن وراي ازىرلەپ بەرگەن كورەگەن دە ىسكەر باپكەر وركەن بىلاي دەدى: جۇمابەكتىڭ قازىرگە دەيىن ءۇرتىس 32 مايدان جەڭىسكە قول جەتكىزۋىندە بالۋاندىق ونەرىن مىقتى يگەرگەن تەحنيكاسى كەلەلى رول اتقارىپ وتىر،ول ايبارلى دا الىمدى شەتەل ساڭلاقتارىمەن بەلدەسۋدە باسىم ءتۇسۋ ءۇشىن شي - ان دەنەتاربيە شۋەيۋانىندا كاسىپتىك سايىس ونەرىنە جاتتىقتى. قازىرگە دەيىن سوڭعى سايىس اعا جۇلدەگەرلىگىنە، 60 كيلوگرام سالماق دارەجەسىندەگىلەر اعا جۇلدەگەرلىگىنە، سوڭعى باتىر اعا جۇلدەگەرلىگىنە،قارسىلاسىن تالدىرىپ ءتۇسىرۋ اعا جۇلدەگەرلىگىنە، ۋليڭفىڭ التىن بەلبەۋىنە، ازيا اعا جۇلدەگەرلىگىنە قول جەتكىزدى. وتە - موتە، 2011 - جىلى جەلتوقساننىڭ 17 – كۇنى ۋنيۆەرسالدى سايىستا ەلىمىزدىڭ ساندا اعا جۇلدەگەرى جاۋ يۋانفەيدى، 2012 – جىلى اقپاننىڭ 11 – كۇنى ۋليڭفىڭ جارىسىندا ەلىمىز بالۋاندىق جارىسىنىڭ اعا جۇلدەگەرى تاۋ حۇڭگاڭدى، 2012 – جىلى ناۋرىزدىڭ 24 – كۇنى ازيا بەلدىگىنە تالاسۋدا وڭتۇستىك افريكانىڭ الىتن بەلبەۋىن 2 رەت جەڭىپ العان يسا سايدتى، ءۇش رەت ەۆروپانىڭ اعا جۇلدەگەرى بولعان فرانسيالىق مۇراتتى، 2013 – جىلى جاپونيانىڭ ءۇرتىس 12 مايدان جەڭىسكە جەتكەن التىن بەلبەۋلى ساڭلاعىن، وتە – موتە، پۋتيننىڭ وققاعارىنىڭ ۇكىلەپ وتىرعان شاكىرتىن جەڭىپ العان سوڭ ەسىمى كۇللى ەلگە تارالدى، جۇمابەكتىڭ ءوزى ەل ىشىندەگى سان مايدان دودالى سايىستار مەن سىنداردان سۇرىنبەي وتە الساڭىز عانا حالىقاراعا بەت الۋ ورايى تۋىلادى،-دەگەنىندەي، ەلىمىز وسى تۇردە حالىقاراعا 2 – رەت جۇلدەلى جۇيرىك رەتىندە جىبەرۋگە ۇكىلەپ وتىرعان موڭعۇل ازاماتى جول ورتادا جەڭىستىك الا الماعاندىقتان،سىن مەن سىناققا ءدۇپ كەلگەن جۇمابەككە ەڭ سوڭىندا بيىل ناۋرىزدىڭ 1 – كۇنى اۋمىن قالاسىندا وتەتىن حالىقارالىق جارىسقا قاتىناسۋ ورايى ءناسىپ بولعان.

　　اق جول بولسىن

　　وسىدان ءبىر جىلدىڭ الدىندا جۇمابەك ەل ىشىندەگى بەلدى اقپارات دانەكەرلەرىنىڭ سۇحپاتىن قابىلداعاندا ءوزىنىڭ ۇلى ارمانىنىڭ UFC - عا كىرۋ ەكەنىن،بۇل ءوزىنىڭ عانا ەمەس، وسى كاسىپتى تاڭداپ قان - تەرىن توگىپ،بوداۋ بەرگەن ساڭلاقتاردىڭ دا اسىل ارمانى ەكەنىن بىلدىرگەن بولاتىن. مىنە، ەندى قازاقتىڭ قارا ۇلىنىڭ سول ۇلى ارمانى رەالدىققا اينالدى. دەسە دە،وسىنداي بيىك بەلەستەن كورىنە بىلگەن قاس باتىرىمىزعا قادالعان كوزدەر مەن قاتاڭ سىندار جوق ەمەس. ول بىلاي دەدى: مەنى ۇكىلەپ وسىنداي ۇلكەن جارىسقا جىبەرىپ وتىرعان ەلىمە، حالقىما ءدان ريزامىن، ءار مايدان جارىستىڭ جەڭىسىنە قول جەتكىزۋگە قۇلشىنامىن، قازىرگى جەڭىسىمدى جەتكەن بيىگىم دەي المايمىن، ەل ىشىندەگى جاتتىعۋ جۇيەلى دە كاسىپتىك سيپاتتى بولعانىمەن، مۇنداي جارىسقا قاتىناسۋ ءۇشىن مىعىم ازىرلىك كەرەك، سول ءۇشىن ماعان حالىقارالىق تاجىريبەسى بار شەتەلدىك باپكەر جانە ا ق ش - دا جاتتىعۋ ورايى كەرەك. ا ق ش ساڭلاقتارىنىڭ جاتتىعۋىمەن سالىستىرعاندا، بىزدەگى جاتتىعۋدىڭ جەتەرسىز تۇسى كوپ. سولاي بولسا دا، مەن وزىمە سەنەمىن، سەبەبى، ەل ءىشىنىڭ ۇلكەن ساحنالارىندا ولاردىڭ تالايىمەن جۇدىرىق تۇيىستىرگەم. ابزالدىعى سول، ولار كەمەلدى دە جۇيەلى، ورەلى جاتتىعۋدان وتكەن.

　　ەلىن سۇيە بىلگەن ەردى ەلى دە سۇيە بىلەدى دەگەندەي، سان رەتكى دودادا ەسەسىن جىبەرمەي، ەڭسەسىن تۇسىرمەي،ەلىنىڭ، ۇلتىنىڭ مەرەيىن تاسىتىپ جۇرگەن جاس باھادۇرىمىزعا اق جول تىلەيمىز. ارقالى ەلىنىڭ ءارقاشان رۋحاني سۇيەنىش بولارىنا سەنەمىز.

　　«ىلە كەشى» گازەتى