17 باسەكە ءتۇرى مەن 178 ونەر كورسەتۋ تۇرىنە 6240 سپورتشى قاتىناسادى

توپتىق تۇرلەرگە ۇلتى حانزۋ سپورتشىلار تۇڭعىش رەت قاتىناستىرىلادى

2015.07.20 13:48   كەلۋ قاينارى : حالىق تورابى

　　حالىق تورابى، 20 – شىلدە، كوكحوت. (ءتىلشى: بۇرىنبايار) بۇكىل ەلىمىزدەگى 31 ولكەدەن (اۆتونوميالى رايون، قالا)، شينجياڭ ءوندىرىس – قۇرىلىس بيڭتۋانىنان، ازاتتىق ارميا ۋاكىلدەر ۇيىرمەسى مەن تايۋان ۋاكىلدەر ۇيىرمەسىنەن 6240 ادام 17 باسەكە ءتۇرى مەن 178 ونەر كورسەتۋ ءتۇرى بويىنشا بۇل رەتكى سپورت جارىسىنا قاتىناسادى، قاتىناسۋشىلاردىڭ سانى جاعىنان بۇل بۇرىن – سوڭدى بولماعان.

　　ونىڭ ۇستىنە، از ۇلتتاردىڭ ءداستۇرلى سپورت تۇرلەرىن ونان ارى دامىتۋ جانە جالپىلاستىرۋ ءۇشىن، باسەكە تۇرىندەگى توپتىق جارىستار مەن ونەر كورسەتۋگە بەلگىلى سالىستىرمادا ۇلتى حانزۋ سپورتشىلار دا قاتىناستىرىلادى. سوندىقتان، بۇل رەتكى سپورت جارىسى بەلگىلى دەڭگەيدەن ايتقاندا، از ۇلتتاردىڭ سپورت جارىسى سىندى كولەمنەن اسىپ، جۇڭگوداعى 56 ۇلتقا ورتاق «ۇلتتار سپورت جارىسى» بولماقشى. بۇل حاباردى ءتىلشى كەشە تۇستەن كەيىن ىشكى موڭعۇل اۆتونوميالى رايوندىق ۇلتتىق ىستەر كوميتەتى اشقان «از ۇلتتاردىڭ مەملەكەتتىك 10 – كەزەكتى ءداستۇرلى سپورت جارىسىنا دايىندىق قىزمەتى تۋرالى حابارلاندىرۋ ماجىلىسىنەن» ۇعىستى.

　　ىشكى موڭعۇل اۆتونوميالى رايوندىق ۇلتتىق ىستەر كوميتەتى مەڭگەرۋشىسىنىڭ ورىنباسارى، پارتگرۋپپاسىنىڭ مۇشەسى ساۋ يانرۇڭنىڭ ايتۋىنشا، قازىر ءتۇرلى جارىس الاڭدارىن سالۋ جانە وزگەرتۋ قۇرىلىسى اياقتاپ، جارىسقا قاجەتتى بارلىق اسپاپتار دايىندالىپ بولعان، تورەشىلەردى تاڭداۋ مەن كومەكشى تورەشىلەردى تاربيەلەۋ دە اياقتاعان، باسەكەلىك ونەر كورسەتۋ كۇنتارتىبى دە جاسالعان. ىردوس قالاسى 35 ورگان مەن مەكەمەلەردى ءارقايسى ۋاكىلدەر ۇيىرمەسى مەن شياڭگاڭ، اۋمىن، تايۋاندىق قوناقتاردى قابىلداۋعا جاۋاپتى ەتىپ بەلگىلەگەن ءارى سپورت جارىسىنا كەلگەندەردىڭ تاماقتانۋ، جاتىن ورىن، ءجۇرىس – تۇرىس قاتارلى كۇندەلىكتى تۇرمىسىنا جان – جاقتىلى دايىندىق جاساعان.

　　18 مەيمانسارايدى ۇلتتار سپورت جارىسىندا قوناق قابىلدايتىن ورىن ەتىپ بەلگىلەگەن، 12000نان استام ادامنىڭ تاماعى مەن جاتىن ورنىن قامداي الاتىن سپورتشىلار قىستاعى دا پايدالانۋعا بەرىلدى. 14000نان استام ەرىكتىلەردى نەگىزدىك تاربيەلەۋگە قاتىناستىرۋ قىزمەتى اياقتادى ءارى ولار ءوز قىزمەتتەرىنە سايكەس كەلەتىن بولىمدەردە ناقتى ىستەردى بىتىرۋگە تاربيەلەنۋدە. ورتالىق پەن ولكە، قالالارداعى نەگىزگى اقپارات قۇرالدارى جانە ىشكى موڭعۇل اۆتونوميالى رايونىنداعى، ىردوس قالاسىنداعى اقپارات قۇرالدارىنان 800دەن استام ادام سپورت جارىسىنان حابار تاراتۋعا قاتىناسادى، سپورت جارىسىنىڭ بەلگىسى، قۇت بەلگىسى، ءان ۇرانى مەن دايىندىق جاعدايى جاريالاندى.

　　كەلۋ قاينارى: حالىق تورابى