زيدانە رەال مادريدتتىڭ ايباتىن اسىرىپ، قايراتىن تاسىتا الاما؟

2016.01.06 15:20   كەلۋ قاينارى : حالىق تورابى

　　حالىق تورابى، 6 – قاڭتار، بەيجيڭ. يسپانيا بىرلەسپە جارىسىنىڭ داۋلەتتى كلۋبى رەال مادريد باپكەر بەنيتەزگە جالعاستى ۋاقىت بەرۋگە شىدامى تاۋسىلدى. رەال مادريد كلۋبىنىڭ قامشىسىن 7 اي ۇستاعاننان كەيىن، باپكەر بەنيتەز 4 – قاڭتار كەشتە باپكەرلىك قىزمەتىنەن بوسادى، ونىڭ ورنىنا رەال مادريدتتىڭ ەكىنشى كومانداسىنىڭ باپكەرى، كەزىندە كەرەمەت فۋتبولشى بولعان زيدانە شىقتى.

　　قازىرگى باپكەر بەنيتەزدىڭ باپكەرلىك قىزمەتىنەن بوساۋى تەككە ەمەس ەدى، ول بىلتىر ماۋسىم ايىندا الدىڭعى كەزەكتى باپكەر انسەلوتتيدىڭ ورنىنا باپكەر بولعاننان باستاپ، رەال مادريد كومانداسىنىڭ بۇل ماۋسىمداعى بىرلەسپە جارىسىنىڭ ناتيجەسى 11 رەت ۇتىپ، 4 رەت تەڭ ءتۇسىپ، 3 رەت جەڭىلىپ، جالپى ءنومىر جيندىعىندا 37 نومىرمەن ءۇشىنشى ورىندا تۇر، كوماندا كوش باستاپ تۇرعان اتلەتيكا مادريد كومانداسىنان 4 ءنومىر قالسا، ءبىر مايدان جارىستى از ويناعان بارسەلونا كومانداسىنان 2 ءنومىر ارتتا قالدى. كوماندانىڭ جالپى ناتيجەسى جۇرت ويلاعانداي ناشار ەمەس، دەسە دە ول باپكەر بولىپ تۇرعان كوماندا جارىستا جەڭىپ قالماستان، ادەمى ويناۋدى تالاپ ەتكەن كوماندا ەكەنى بارىمىزگە بەلگىلى.

　　بەنيتەز جەتەكشىلىك ەتكەن بۇل ماۋسىمدىق يسپانيا بىرلەسپە جارىسىندا، مىقتى كوماندالارمەن بەلدەسۋدە جەڭىسكە جەتكەن ەمەس، اۋەلى دەسەڭىز بارسەلونامەن بەلدەسكەن جارىستا 4:0 ۇپايمەن ويسىراي جەڭىلدى. ەڭ سوراقىسى، ول رەال مادريدتقا باپكەر بولعاننان باستاپ، جانكۇيەرلەر ونى ءبىر ساتتە جاقتىرعان ەمەس، كومانداداعى فۋتبولشىلاردى دا جاقسى ۇيىمداستىرا المادى، مۇنىڭ سىرتىندا ونىڭ تاكتيكاسى دا وتە قاراپايىم بولدى، قىسقاسى، قاي جاعىنان الىپ ايتساڭدا، بەنيتەزدىڭ «ستيلى» رەال مادريدتتىڭ تالابىنا سايكەس كەلمەدى.

　　زيدانە فۋتبولشى بولىپ تۇرعان كەزىندە، اتى زاتىنا ساي فۋتبول جۇلدىزدارىنىڭ ءبىرى بولدى، ءبىراق ول باپكەرلىك سالاسىندا تالانتىن تولىق ايگىلەۋگە ۇلگىرمەدى. 2013 ــ 2014 – جىلعى ماۋسىمدىق جارىستا ول كوماندانىڭ جەتەكشى باپكەرى رەتىندە، باس باپكەر انسەلوتتيگە ىلەسىپ، رەال مادريد كومانداسىنا ونىنشى رەتكى ەۆروپا چەمپيوندار ليگاسىنىڭ اعا جۇلدەگەرلىگىن الۋىنا ءوز ۇلەسىن قوستى، 2014 – جىلى ول رەال مادريد كومانداسىنىڭ ەكىنشى كومانداسىنا باس باپكەر بولدى. ەجەلدەن ءبىرىنشى كومانداعا باس باپكەر بولعان ەمەس، مىنە قازىر باپكەرلىك سالاسىن اتتاي سالىسىمەن رەال مادريد سياقتى ساۋلەتتى كلۋبتىڭ باس باپكەرى بولۋى، راسىندا، وعان وڭاي شارۋا ەمەس.

　　جاقىنعى جىلداردان بەرى، كەزىندە فۋتبول جۇلدىزى بولىپ، قازىر باپكەرلىك سالاسىنىڭ جۇلدىزى بولىپ جۇرگەن فۋتبولشىلار دا از ەمەس، ماسەلەنگە: ەندى عانا 45 جاسقا تولاتىن گۋارديولا ءوزىنىڭ كەرەمەت باپكەر ەكەنىن باياعىدان دالەلدەسە، 45 جاستاعى سيمەون اتلەتيكا مادريد كومانداسىندا باپكەرلىكتەن باعىن جاندىردى، ال، 45 جاستاعى ەنريكۋە بىلتىر بارسەلونا كومانداسىن باستاپ، 5 اعا جۇلدەگەرلىك لوڭقانى قورجىنىنا سالىپ ۇلگىردى، ال ەندى 44 جاستاعى زيدانەنىڭ وسىنداي سۇبەلى تابىسقا قول جەتكىزۋ – جەتكىزە الماۋى ءوز قولىندا تۇرعان سياقتى. قىسقاسى قاي جاعىنان الىپ ايتساقتا، رەال مادريدتتىڭ بۇل رەتكى باپكەر الماستىرۋى رەال مادريد پەن زيدانە ءۇشىن دە ءبىر رەتكى وراي، ءبىر رەتكى تاۋەكەلگە باسىن ءباي تىگۋ بولماق.

　　كەلۋ قاينارى: حالىق تورابى