بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>دەنە تاربيە

برازيليانىڭ چاپەسوەنسە فۋتبول كومانداسى ۇشاق اپاتىنا ۇشىرادى

برازيليا 3 كۇن ازا بىلدىرەتىنىن جاريالادى

2016.11.30 14:59   كەلۋ قاينارى : حالىق تورابى



  حالىق تورابى، 30 – قاراشا، بەيجيڭ. برازيليانىڭ چاپەسوەنسە فۋتبول كومانداسىنىڭ دوپشىلارى وتىرعان ارناۋلى ۇشاق 29 – قاراشا كۇنى كولۋمبيانىڭ مەدەللين قالاسىنىڭ ماڭىنداعى ىستىق بەلدەۋلى جاڭبىرلى ورماندا قۇلاعان. جەرگىلىكتى ساقشى جاق 76 ادامنىڭ قازا بولىپ، 5 ادامنىڭ ءتىرى قالعانىن جاريالادى.

  سول كۇنى ارناۋلى ۇشاققا وتىرعان چاپەسوەنسە فۋتبول كومانداسى مەدەللين قالاسىنا جەتىپ، 30 – قاراشا كۇنى وتكىزىلەتىن لاتىن امەريكاسى چەمپيوناتى شەشۋشى جارىسىنىڭ ءبىرىنشى اينالىم جارىسىنا قاتىناسپاق بولعان، ولاردىڭ قارسىلاسى كولۋمبيا ۇلتتىق اتلەتيكا فۋتبول كومانداسى بولاتىن.

  ۋاقيعا تۋىلعان جەردە تىلشىلىك ىستەپ جۇرگەن رەيتەر اگەنتتىگى فوتو ءتىلشىسىنىڭ ايتۋىنشا، ۇشاقتىڭ ەكىگە بولىنگەنىن، تەك ۇشاقتىڭ تۇمسىعى مەن قاناتىنان عانا ۇشاقتى تانۋعا بولاتىنىن، ۇشاق قۇيرىعىنىڭ كۇل – پارشا بولعانىن ايتقان.

  ۋاقيعا تۋىلعان جەردەگى جاعدايعا قاراعاندا، ۇشاقتىڭ قۇيرىعى الدىمەن جەرگە تۇسكەن.

  كولۋميبا اپاتقا توتەپ بەرۋ ورگانىنىڭ جاريالاعان مالىمەتىندە، شىرعالاڭدا چاپەسوەنسە فۋتبول كومانداسىنىڭ الاين رۇسچەل، ماركۋەز پاديللا جانە جەكسون فورەمان قاتارلى ءٴۇش دوپشىسى ءتىرى قالعان.

  ۇشاق اپاتى تۋىلعاننان كەيىن، برازيليانىڭ پرەزيدەنتى بۇكىل ەل بويىنشا قازا بولعاندارعا 3 كۇن ازا ءبىلدىرەتىنىن جاريالادى.

  چاپەسوەنسە فۋتبول كلۋبى مالىمدەمە جاريالاپ، كولۋمبيانىڭ قاتىستى ورگاندارىنان ءتىپتى دە كوپ ينفورماتسيا قابىلداعاننان كەيىن، بۇل ۋاقيعاعا جاۋاپ پىكىر بىلدىرەتىنىن جاريالادى.

  كلۋب ءتوراعاسىنىڭ ورىنباسارى يۆان توزو جەرگىلىكتى تەلەۆيزيانىڭ سۇقپاتىن قابىلداعاندا، قايعىدان قابىرعاسى قايىسقانىن ءبىلدىرىپ: «ءبىز لاتىن امەريكا چەمپيوناتى شەشۋشى جارىسىنا جولداما الدىق، مەن كوماندا ٴءوز بيىگىنە جەتتى دەپ تۇرعانىم جوق، ءبىراق ءبىز ءوزىمىزدىڭ ۇلتتىق بولمىسىمىزدى ايگىلەي الدىق، ءدال وسىنداي ساتتە اپاتقا ۇشىرادىق. بۇل وتە قيىن، قايعىلى جاعداي بولدى» دەدى.

  كولۋمبيا جەرگىلىكتى ساقشى جاعىنىڭ ءمانساپتىسى يوسە اكەۆەدو: «ءبىز ۋاقيعا تۋىلعان جەردەن ءتىرى قالعان التى ادامدى قۇتقارىپ الدىق، وكىنىشكە وراي، سوڭىنان ءبىر ادام قازا بولدى. سونىمەن بۇل رەتكى اپاتتا 76 ادام قازا بولدى» دەدى.

  چاپەسوەنسە فۋتبول كلۋبى مالىمدەمەشىسىنىڭ حابارلاۋىنشا، ولاردىڭ كلۋبىنداعى قاقپاشى دانيلو ەمحاناعا جەتكىزىلگەننەن كەيىن، قۇتقارۋ ءونىم بەرمەي قازا بولعان.

  كەلۋ قاينارى: حالىق تورابى

جاۋاپتى رەداكتورى : مۇحيت امانتاي ۇلى

 سۋرەت