شي جينپيڭ رەسەي تەلەۆيزياسىنىڭ ارناۋلى سۇحباتىن قابىلدادى

2014.02.10 16:23   كەلۋ قاينارى : حالىق تورابى

　　شي جينپيڭ: پۋتين زۇڭتۇڭنىڭ ۇسىنىس ەتۋىمەن سوچيعا كەلىپ، 22 – كەزەكتى قىسقى وليمپيك جارىسىنا قاتىناسقاندىعىما وتە قۋانىشتىمىن. وسى رەت ارناۋلى كەلۋ ارقىلى جۇڭگو ۇكىمەتى مەن حالقىنىڭ جانە ءوزىمنىڭ رەسەيدىڭ سوچي قالاسىندا وتەتىن قىسقى وليمپيك جارىسىن قولدايتىندىعىمىزدى بىلدىرمەكپىن. الدىمەن مەنىڭ رەسەي حالقىنا دەگەن ىقىلاستى سالەمىمدى جەتكىزگەيسىزدەر.

　　بۇل مەنىڭ سوچيعا تۇڭعىش رەت كەلۋىم، الايدا سوچيدى بۇرىننان بىلەمىن. جاس كەزىمدە «قۇرىش قالاي شىنىقتى» رومانىن كوپ رەت وقىپ شىققامىن، وستروۆسكي بۇل رومانىن وسى سوچيدا تامامداعان. اڭىزدارعا قاراعاندا پرومەتەي سوچيداعى تاۋلاردىڭ اراسىنا قامالعان ەكەن، سوچيدا ريم يمپەرياسىنىڭ، ۆيزانتيا يمپەرياسىنىڭ جۇرتتارى كوپ، مىنە بۇلار سوچيدىڭ ۇزاق تاريحقا يە مادەنيەت قالاسى ەكەندىگىن تولىق كورسەتىپ بەرە الادى.

　　سوچيدىڭ جاعراپيالىق ورنى بولەكشە، ول جەر شارىنىڭ ەڭ سولتۇستىگىندەگى بىردەن – ءبىر قوڭىرجاي بەلدەۋ. وسى رەت سوچيعا كەلىپ ەستىگەندەرىم مەن كورگەندەرىمنىڭ ايتقانداي – اق كەرەمەت ەكەنىن ءبىلدىم. بۇل ارا ءتورت ماۋسىم بويى جاپ – جاسىل بولىپ تۇرادى، اسپانى اشىق، تەڭىزى كوكپەڭبەك، شاڭعى تەبەتىن الاڭى دا تابيعي ءارى تاماشا. سوچي حالقى توتەنشە مەيماندوس ەكەن. سوچي جالىندى ءارى تارتىمدى جەر بولىپ، قىسقى وليمپيك جارىسىن وتكىزۋگە توتەنشە ۇيلەسەدى. قىسقى وليمپيك جارىسىنان كەيىن سوچيدىڭ اتاعى ءتىپتى دە كەڭ جايىلىپ، جۇڭگولىقتار دا مۇندا كوپتەپ كەلەتىن بولادى.

　　سوچي قىسقى وليمپيك جارىسىن ۇيىمداستىرۋ جۇمىستارى تاماشا ىستەلىپتى. زۇڭتۇڭ پۋتين بۇعان بارىنشا ءمان بەرىپ، دايىندىق جۇمىستارىنا ءوزى باس - كوز بولىپتى، رەسەي حالقى وعان جاپا - تارماعاي قولداۋ كورسەتىپتى. مەن سوچي قىسقى وليمپيك جارىسىنىڭ ءسوزسىز ەستەن كەتپەيتىن حالىقارالىق سپورت سالتاناتى بولىپ، حالىقارالىق وليمپيك ىستەرىنىڭ دامۋىنا تىڭ ۇلەستەر قوساتىندىعىنا كامىل سەنەمىن.

　　مەن مىناداي ءۇش تىلەك بىلدىرەمىن: ءبىرىنشى، بۇگىنگى باستالۋ سالتى دۋماندى دا سالتاناتتى بولسىن، ەكىنشى، بارلىق ەلدىڭ سپورتشىلارى تاماشا تابىستارعا جەتسىن، ءۇشىنشى، سوچي دامىپ، بارعان سايىن كوركەيىپ – گۇلدەنىپ، جۇڭگونىڭ قالالارىمەن دوستىعى كۇشەيە ءتۇسسىن.

　　(جۇڭگو ۇلتتار اۋدارما مەكەمەسى اۋدارعان)

　　كەلۋ قاينارى: حالىق تورابى