لي كىچياڭ قازاقستاندىق قوناقتارمەن كەزدەستى

2015.08.26 14:26   كەلۋ قاينارى : حالىق تورابى

　　حالىق گازەتى، 25 – تامىز، بەيجيڭ. مەملەكەتتىك كەڭەس زۇڭليى لي كىچياڭ 25 – تامىز كۇنى تۇستەن كەيىن جۇڭنانحايدىڭ زىگۋاڭ سارايىندا جۇڭگو – قازاقستان سەلبەستىك كوميتەتىنىڭ 7 – رەتكى ماجىلىسىنە قاتىناسۋعا كەلگەن قازاقستان پرەمەر – مينيسترىنىڭ ءبىرىنشى ورىنباسارى باقىتجان ساعىنتايەۆپەن كەزدەستى.

　　لي كىچياڭ بىلاي دەدى: جۇڭگو مەن قازاقستان تاتۋ كورشى. بىلتىر جەلتوقساندا قازاقستانعا ساپارلاي بارعان كەزىمدە، قازاقستان باسشىلارىمەن ءوندىرىس قۋاتى جاعىنداعى سەلبەستىكتى كەڭ كولەمدە ورىستەتۋ تۋرالى ورتاق تانىمعا كەلگەنبىز، سودان بەرى جارىم جىلعا جەتپەيتىن ۋاقىتتا باستاپقى مەزگىلدە ءبىرتالاي ناتيجەلەرگە دە قول جەتكىزدىك. جۇڭگو قازاقستانمەن دامۋ ستراتەگياسىن ۇندەستىرۋدى، ەكونوميكا، ساۋدا – ساتتىق سالاسىندا ساياساتتىق جاقتاعى سايكەسۋدى كۇشەيتۋدى قالايدى. ەكى ەل ۇكىمەتىنىڭ جۇڭگو – قازاقستان ءوندىرىس قۋاتى سەلبەستىگىن ىلگەرىلەتۋگە ساياساتتىق جاقتان قولداۋ كورسەتىپ، جاڭاشا، ۇلگىلىك سيپاتتاعى ءىرى نىسانداردى قۇرىپ، اناعۇرلىم كوپ سەلبەستىك نىساندارىنىڭ تەزىرەك تياناقتاندىرىلىپ، ناتيجە جاراتۋىن جەبەۋىنءۇمىت ەتەمىز.

　　لي كىچياڭ بىلاي دەدى: الەم ەكونوميكاسىنىڭ قازىرگى كۇيىنە ءجىپ تاعۋعا كەلمەيدى، بازاردىڭ تولقۋى زور، بۇل جۇڭگو ەكونوميكاسىنا دا ىقپال ەتۋدە. الايدا، جۇڭگو ەكونوميكاسى تۇتاس تۇلعالىق جاقتان ورنىقتى، ەكونوميكانىڭ اينالىمى ۇيلەسىمدى ارالىقتى ساقتاۋدا، ونىڭ ۇستىنە ناقتى ەكونوميكانىڭ جاقسارۋىنا تىرەك بولاتىن بەلسەندى فاكتورلار ۇزدىكسىز توپتالۋدا. بىزدە جاسامپازدىقپەن ماكرولىق رەتتەۋ جۇرگىزۋگە جانە ونى كادەگە جاراتۋعا مۇمكىندىك بار، ەل ىشىندەگى سۇرانىس تا ءبىرشاما كەڭ ورىسكە يە. ەكونوميكانىڭ ورنىقتى ارتۋىنا، قۇرىلىمدىق رەفورمانىڭ ىلگەرىلەۋىنە، «بۇقارانىڭ كاسىپ كوزىن اشۋى، الەۋمەتتىڭ جاڭالىق جاراتۋى» سىندى ۇندەۋدىڭ بازارعا سەرپىن بەرۋىنە، سونىمەن بىرگە، حالىققا تيىمدىلىك جەتكىزۋ، حاۋىپتەن ساقتاندىرۋ سىندى شارالاردىڭ ارت – ارتىنان ورتاعا قويىلۋىنا جانە ونىڭ ءوز رولىن ساۋلەلەندىرۋىنە بايلانىستى، جۇڭگونىڭ ەكونوميكانى دامىتۋدىڭ جىلدىق باستى مىندەتىن ورىنداۋعا قۋاتى مەن شارت – جاعدايى جەتكىلىكتى، بۇل دۇنيە ءجۇزى ەكونوميكاسىنىڭ قايتا جاندانۋىنا دا زور ۇلەس قوسقاندىق بولىپ ەسەپتەلەدى.

　　حالىق اقشاسىنىڭ سىندىرىلىمى تۋرالى لي كىچياڭ بىلاي دەدى: جۋىردا حالىق اقشاسىنىڭ سىندىرىلىمىنداعى ارالىق باعا كەسۋ مەحانيزمىن كەمەلدەندىردىك، بۇل حالىقارالىق فينانس بازارىنىڭ بەتالىسىنا بەيىمدەلۋ ءۇشىن شىعارىلعان ۇيلەسىمدى شارا، بۇل رەتتەۋ مەن رەفورما كەزەڭىندە تۇرعانىمىزدى دا كورسەتەدى. قازىر حالىق اقشاسىنىڭ سىندىرىلىمىندا ۇزدىكسىز قۇنسىزدانۋدىڭ نەگىزى جوق، ۇيلەسىمدى تەپە – تەڭ ورەدەگى نەگىزدىك ورنىقتى كۇيدى ساقتاي الامىز.

　　ساعىنتايەۆ بىلاي دەدى: قازاقستان - جۇڭگو اراسىنداعى ءوندىرىس قۋاتى جاعىنداعى سەلبەستىك بەلسەندى ورىستەتىلۋدە. قازاقستان ءوندىرىس قۋاتى جاعىندا سەلبەستىكتى ورىستەتۋ تۋرالى جۇڭگومەن كەلىسىمگە كەلگەن ورتاق تانىمدى تياناقتاندىرىپ، ەكى ەلدىڭ ونەركاسىپ، ەنەرگيا، تەمىر جول تاسىمالى، اۋىل شارۋاشىلىعى قاتارلى سالالاردا ناقتى سەلبەستىگىن ىلگەرىلەتۋدى قالايدى. قازاقستان جۇڭگو ەكونوميكاسىنىڭ دامۋى مەن قازاقستان – جۇڭگو سەلبەستىگىنىڭ بولاشاعىنا زور ۇمىتپەن قارايدى.

　　كەلۋ قاينارى: حالىق تورابى