سوعىس جەڭىسىنىڭ 70 جىلدىعىن ەسكە ءتۇسىرۋ جينالىسىندا شي جينپيڭ ماڭىزدى ءسوز سويلەدى (تولىعى)

2015.09.03 14:40   كەلۋ قاينارى : حالىق تورابى

　　

　　حالىق تورابى، 3 – قىركۇيەك، بەيجيڭ. جۇڭگو حالقىنىڭ جاپون باسقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسكە جەتكەنىنىڭ 70 جىلدىعىن ەسكە ءتۇسىرۋ جينالىسى بۇگىن تۇستەن بۇرىن ساعات وندا تيان – انمىن الاڭىندا وتكىزىلدى. ساعات 10 نان 6 مينۋت وتكەندە ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماڭىزدى ءسوز سويلەدى.

　　تومەندە ءسوزدىڭ تولىق مازمۇنىن جاريالايمىز:

　　بۇكىل ەلدەگى باۋىرلاستار، قۇرمەتتى مەملەكەت باسشىلارى، ۇكىمەت باسشىلارى جانە بىرلەسكەن مەملەكەتتەر ۇيىمى قاتارلى حالىقارالىق ۇيىمداردىڭ ۋاكىلدەرى، قۇرمەتتى قوناقتار، شەرۋدەن وتەتىن جالپى قولباسى، جاۋىنگەرلەر، حانىمدار، مىرزالار، جولداستار، دوستار:

　　بۇگىنگى كۇن ــ دۇنيە ءجۇزى حالقىنىڭ ماڭگى ەستە ساقتايتىن كۇنى. 70 جىلدىڭ الدىنداعى وسى كۇنى، جۇڭگو حالقى 14 جىلعا سوزىلعان ماشاقاتتى كۇرەس ارقىلى جۇڭگو حالقىنىڭ جاپون باسقىنشىلارىنا قارسى سوعىسىنىڭ ۇلى جەڭىسىنە قول جەتكىزدى، وسى كۇنى دۇنيە ءجۇزىنىڭ فاشيزمگە قارسى سوعىسىنىڭ تولىق جەڭىسكە جەتكەنى جاريالاندى، وسىلايشا بەيبىتشىلىكتىڭ شۇعىلاسى بايتاق جەر ءجۇزىن تاعى دا نۇرلاندىردى.

　　وسى ارادا مەن پارتيا ورتالىق كوميتەتى، مەملەكەتتىك حالىق قۇرىلتايى، مەملەكەتتىك كەڭەس، مەملەكەتتىك ساياسي كەڭەس، ورتالىق اسكەري ىستەر كوميتەتى اتىنان بۇكىل ەلىمىزدەگى سوعىسقا قاتىناسقان ساقا جاۋىنگەرلەرگە، ساقا جولداستارعا، وتانشىل قايراتكەرلەرگە جانە جاپون باسقىنشىلارىنا قارسى سوعىس قولباسىلارىنا، جۇڭگو حالقىنىڭ جاپون باسقىنشىلارىنا قارسى سوعىسىنىڭ جەڭىسكە جەتۋىنە ەلەۋلى ۇلەس قوسقان ەل ءىشى – سىرتىنداعى جۇڭحۋا ۇلاندارىنا وسكەلەڭ قۇرمەت بىلدىرەمىن! جۇڭگو حالقىنىڭ شاپقىنشىلىققا قارسى تۇرۋىنا كومەك بەرىپ، قولداۋ كورسەتكەن شەتەل ۇكىمەتتەرىنە جانە حالىقاراداعى دوستارعا شىن كوڭىلدەن راقىمەت ايتامىن! بۇگىنگى جينالىسقا قاتىناسۋعا ءار ەلدەن كەلگەن قوناقتاردى جانە اسكەري دوستاردى قىزۋ قارسى الامىن!

　　حانىمدار، مىرزالار، جولداستار، دوستار:

　　جۇڭگو حالقىنىڭ جاپون باسقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى ــ ادىلەت پەن جاۋىزدىقتىڭ، نۇرلى شۋاق پەن قارا تۇنەكتىڭ، العاباسارلىق پەن كەرباقپالىقتىڭ شەشۋشى شايقاسى. سول جولعى قاسىرەتتى سوعىستا جۇڭگو حالقىنىڭ جاپون باسقىنشىلارىنا قارسى سوعىسىنىڭ باستالعان ۋاقىتى ەڭ ەرتە، جالعاسقان ۋاقىتى ەڭ ۇزاق بولدى. شاپقىنشىلاردىڭ الدىندا جۇڭحۋا پەرزەنتتەرى بۇگەجەكتەمەي، قاندى شايقاس جۇرگىزىپ، جاپون ميلليتاريزمشىل شاپقىنشىلارىن تۇبەگەيلى جەڭىپ، جۇڭحۋا ۇلتتارىنىڭ 5 مىڭ جىلدان استام دامۋ بارىسىنداعى مادەنيەت تابىسىن قورعاپ قالدى، ادامزاتتىڭ بەيبىتشىلىك ىستەرىن قورعاپ قالدى، سوعىس تاريحىنداعى كەرەمەتتەردى جاراتىپ، جۇڭحۋا ۇلتتارىنىڭ ەرلىگىن ايگىلەدى.

　　بۇل ــ جۇڭگونىڭ تاياۋ زاماننان بەرگى شەتەل شاپقىنشىلارىنا سوققى بەرۋدەگى تۇڭعىش تولىق جەڭىسى. وسى ۇلى جەڭىس جاپونيا ميلليتاريزمىنىڭ جۇڭگونى وتارلاۋ، قۇلدانۋ قاسكۇنەمدىگىن ءۇزىلدى – كەسىلدى تالقاندادى، تاياۋ زاماننان بەرگى جۇڭگونىڭ شەتەل شاپقىنشىلارىنا سوققى بەرۋدە ىلعي جەڭىلىسكە تاپ بولىپ، نامىسى تاپتالاتىن جاعدايىن وزگەرتتى. وسى ۇلى جەڭىس جۇڭگونىڭ دۇنيە جۇزىندەگى ءىرى ەلدىك ورنىن قايتادان ورناتىپ، جۇڭگو حالقىن دۇنيە جۇزىندەگى بەيبىتشىلىكتى سۇيەتىن حالىقتاردىڭ قۇرمەتىنە بولەدى. وسى ۇلى جەڭىس جۇڭحۋا ۇلتتارى ۇلى گۇلدەنۋىنىڭ نۇرلى بولاشاعىن اشتى، بايىرعى جۇڭگونىڭ سامۇرىقتاي سامعايتىن جاڭا جورىعىنا جول اشتى. سول رەتكى سوعىستا جۇڭگو حالقى وراسان زور قۇرباندىق بەرىپ دۇنيە ءجۇزىنىڭ فاشيزمگە قارسى سوعىسىنداعى شىعىستاعى نەگىزگى شايقاس مايدانى رەتىندە دۇنيە ءجۇزىنىڭ فاشيزمگە قارسى سوعىسىنىڭ جەڭىسكە جەتۋىنە كەلەلى ۇلەس قوستى. جۇڭگو حالقىنىڭ جاپون باسقىنشىلارىنا قارسى سوعىسى حالىقارالىق قوعامنىڭ جان – جاقتى قولداۋىنا دا يە بولدى، جۇڭگو حالقى ءار ەل حالقىنىڭ جۇڭگو حالقىنىڭ جاپون باسقىنشىلارىنا قارسى سوعىستا جەڭىسكە جەتۋىنە قوسقان ۇلەسىن ماڭگى ەستە ساقتايدى!

　　حانىمدار، مىرزالار، جولداستار، دوستار:

　　سوعىستى باستان كەشىرگەن ادامدار بەيبىتشىلىكتىڭ قۇندىلىعىن ءتىپتى دە جاقسى تۇسىنەدى. ءبىزدىڭ جۇڭگو حالقىنىڭ جاپون باسقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسكە جەتكەنىنىڭ 70 جىلدىعىن ەسكە ءتۇسىرۋىمىز تاريحتى ەستە بەرىك ساقتاپ، قۇربانداردى ەسكە الىپ، بەيبىتشىلىكتى قاستەرلەپ، كوركەم بولاشاق جاراتۋ ءۇشىن بولىپ وتىر. سول رەتكى سوعىستىڭ جالىنى ازيانى، ەۆروپانى، افريكانى، وكەانيانى شارپىدى، اسكەري بولىمنەن جانە بۇقارادان قۇربان بولعاندار، جارالانعاندار 100 ميلليون ادامنان استى، مۇنىڭ ىشىندە جۇڭگودان قۇربان بولعانداردىڭ، جارالانعانداردىڭ سانى 35 ميلليوننان استى، سوۆەت وداعىنان قۇربان بولعان ادام سانى 27 ميلليوننان استى. تاريحي تراگەديانىڭ قايتالانۋىنا مۇلدە جول بەرمەۋ ــ ءبىزدىڭ سول كەزدە ادامزاتتىڭ ەگەمەندىگى، ادىلەتتىگى، بەيبىتشىلىگى ءۇشىن قۇربان بولعان جانداردىڭ رۋحى، جازىقسىز قىرعىنداۋعا ۇشىراعان بەيكۇنا جانداردىڭ رۋحى جونىنەن ەڭ تاماشا ەسكە ءتۇسىرۋىمىز بولىپ تابىلادى.

　　سوعىس، بەينە، اينا ىسپەتتى، ول ادامدارعا بەيبىتشىلىكتىڭ قۇندىلىعىن ءتىپتى دە جاقسى تانىتادى. بۇگىنگى كۇندە بەيبىتشىلىك پەن دامۋ ءداۋىردىڭ باس تاقىرىبىنا اينالىپ وتىر، سولاي بولسا دا دۇنيە ءجۇزى ءالى دە ونشالىقتى تىنىش ەمەس، سوعىس قانجارى ءالى دە ادامزات باسىنا ۇيىرىلۋدە. ءبىز تاريحتان ساباق الىپ، بەيبىتشىلىكتى قورعاۋ سەنىمىمىزدى بەكەمدەۋىمىز كەرەك.

　　بەيبىتشىلىك ءۇشىن، ءبىز ادامزاتتىڭ تاعدىرلاس ورتاق تۇلعاسى دەيتىن تانىمدى بەرىك ورناتۋىمىز كەرەك. سىڭار ەزۋلىك پەن كەمسىتۋ، وشپەندىلىك پەن سوعىس تەك قانا اپات جانە قاسىرەت تۋدىرادى. ءوزارا قۇرمەتتەۋ، بارابار، جاراسىمدى بولۋ، بەيبىت دامۋ، بىرگە گۇلدەنۋ – وسىلار عانا ءومىردىڭ سارا جولى. دۇنيە جۇزىندەگى ءارقايسى مەملەكەت بىرلەسكەن مەملەكەتتەر ۇيىمى ەرەجەسىنىڭ ماقساتى مەن پرينسيبىن وزەك ەتكەن حالىقارالىق ءتارتىپ پەن حالىقارالىق جۇيەنى بىرگە قورعاۋى، سەلبەستىك جاساپ، تيىمدىلىككە قاتار قول جەتكىزۋدى وزەك ەتكەن جاڭاشا حالىقارالىق قاتىناستى بەلسەندىلىكپەن ورناتۋى، دۇنيە ءجۇزىنىڭ بەيبىتشىلىك جانە دامۋ سىندى وسكەلەڭ ىستەرىن بىرگە جەبەۋى كەرەك.

　　بەيبىتشىلىك ءۇشىن، جۇڭگو بەيبىت دامۋ جولىمەن بۇلجىماستان جۇرەدى. جۇڭحۋا ۇلتتارى ەجەلدەن بەرى بەيبىتشىلىكتى ايالاپ كەلەدى. دامىپ قانداي باسقىشقا بارسىن، جۇڭگو ماڭگى زورەكەر بولمايدى، ماڭگى ىرگە كەڭەيتپەيدى، ءوزى باستان كەشكەن ايانىشتى كەشىرمەنى باسقا ۇلتتارعا ماڭگى زورلاپ تاڭبايدى. جۇڭگو حالقى دۇنيە جۇزىندەگى ءار ەل حالقىمەن قاي – قاشان دا تاتۋ – ءتاتتى بولىپ، جۇڭگو حالقىنىڭ جاپون باسقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسىنىڭ تابىسىن باتىل قورعاپ، ادامزات ءۇشىن ءتىپتى دە زور تىڭ ۇلەس قوسۋعا قۇلشىنادى.

　　جۇڭگو حالىق ازاتتىق ارمياسى ــ حالىقتىڭ پەرزەنت اسكەرى، تۇتاس ارمياداعى قولباسىلار مەن جاۋىنگەرلەر بۇكىل ىنتا – پەيىلىمەن حالىق ءۇشىن قىزمەت ىستەۋ سىندى ءتۇبىرلى ماقساتتى ەستە بەرىك ساقتاپ، وتاننىڭ حاۋىپسىزدىگىن جانە حالىقتىڭ بەيبىت ءومىرىن قورعاۋ سىندى قاستەرلى بورىشتارىن ادالدىقپەن اتقارۋى، دۇنيە ءجۇزىنىڭ بەيبىتشىلىگىن قورعاۋ سىندى قاسيەتتى مىندەتتەرىن ادالدىقپەن ورىنداۋى كەرەك. مەن قازىر جۇڭگونىڭ ارميادان 300 مىڭ اسكەر قىسقارتاتىنىن جاريالايمىن.

　　حانىمدار، مىرزالار، جولداستار، دوستار!

　　«ءار ءىستىڭ باستاماسى بولعانىمەن، سوڭىنا شىعاتىندارى نەكەن – ساياق». جۇڭحۋا ۇلتتارىنىڭ ۇلى گۇلدەنۋىن جۇزەگە اسىرۋدا ۇرپاقتار بويى قۇلشىنۋعا تۋرا كەلەدى. جۇڭحۋا ۇلتتارى 5 مىڭ جىلدان استام تاريحى بار شۇعىلالى وركەنيەت جاراتتى، بولاشاقتا ءتىپتى دە شۇعىلالى تابىس جاراتارى ءشۇباسىز.

　　العا باسۋ جولىندا بۇكىل ەلدەگى ءار ۇلت حالقى جۇڭگو كوممۋنيستىك پارتياسىنىڭ باسشىلىعىندا، ماركسيزم – لەنينيزمدى، ماۋ زىدۇڭ يدەياسىن، دىڭ شياۋپيڭ نازارياسىن، «ۇشكە ۋاكىلدىك ەتۋ» ماڭىزدى يدەياسىن، عىلمي دامۋ كوزقاراسىن جەتەكشى ەتىپ، جۇڭگوشا سوتسياليزم جولىن بويلاپ، «ءتورتتى جاپپاي ورىنداۋ» ستراتەگيالىق ورنالاستىرۋى بويىنشا، ۇلى وتانشىلدىق رۋحتى ساۋلەلەندىرىپ، شاپقىنشىلىققا قارسى سوعىستىڭ ۇلى رۋحىن ساۋلەلەندىرىپ، ءبىر نيەت، ءبىر تىلەكتە بولىپ، جاپا – ماشاقاتتى ەلەمەي، بەلگىلەنگەن نىسانالارىمىز بويىنشا ەرلىكپەن تىنباي العا باسۋى كەرەك!

　　«جەڭىس ادىلەتتىلىككە ءتان! جەڭىس بەيبىتشىلىككە ءتان! جەڭىس حالىققا ءتان!» دەيتىن تاريحتىڭ ۇلى اقيقاتىن كوكەيىمىزدە بەرىك ساقتايىق!

　　كەلۋ قاينارى: حالىق تورابى