- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
شي جينپيڭ بريكس ەلدەرى باسشىلارىنىڭ بەيرەسمي كەڭەسىنە قاتىناستى
رەسەيدىڭ، ەگيپەتتىڭ، مەكسيكانىڭ، اۆستراليانىڭ، ءۇندىستاننىڭ، تايلاندتىڭ باسشىلارىمەن جەكە - جەكە كەزدەستى
2016.09.08 11:18 كەلۋ قاينارى : شينجياڭ گازەتى
شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. بريكس ەلدەرى باسشىلارىنىڭ بەيرەسمي كەڭەسى 4 - قىركۇيەكتە حاڭجوۋدا وتكىزىلدى. مەملەكەت ءتوراعاسى شي جينپيڭ، ءۇندىستاننىڭ زۇڭليى مودي، وڭتۇستىك افريكانىڭ زۇڭتۇڭى زۋما، برازيليانىڭ زۇڭتۇڭى تەمەر، رەسەيدىڭ زۇڭتۇڭى پۋتين كەڭەسكە قاتىناستى. 5 ەلدىڭ باسشىلارى بريكس ەلدەرىنىڭ سەلبەستىكتى تەرەڭدەتۋى، قازىرگى سىن - سايىسقا بىرگە توتەپ بەرۋى جونىندە ىشكەرىلەي پىكىر اۋىستىردى.
شي جينپيڭ قارسى الۋ سوزىندە بىلاي دەپ اتاپ كورسەتتى: بيىل بريكس ەلدەرىنىڭ سەلبەستىگى تاماشا دامۋ بەتالىسىن ساقتادى، سالالار ونان ارى كەڭەيىپ، تابىستار ونان ارى كورنەكتىلەنە ءتۇستى. بريكس ەلدەرى بازارى جاڭادان گۇلدەنگەن ەلدەر مەن دامۋ ۇستىندەگى ەلدەردىڭ سەركەسى، سونداي - اق 20 ەل توبىنىڭ ماڭىزدى مۇشەسى. ءبىز تاريحتىڭ اعىمىنا ۇيلەسىپ، حالىقارالىق جالپى اۋقىمدى مەڭگەرىپ، سايكەسۋ مەن سەلبەسۋدى كۇشەيتىپ، بريكس ەلدەرى مەن 20 ەل توبى سىندى ەكى ماڭىزدى تەكشەنى تىزە قوسا ويداعىداي گۇلدەندىرىپ، ويداعىداي قورعاپ، ويداعىداي دامىتىپ، بازارى جاڭادان گۇلدەنگەن ەلدەر مەن دامۋ ۇستىندەگى ەلدەردىڭ حالىقارالىق ىستەردە اناعۇرلىم زور رول اتقارۋىن العا ىلگەرىلەتۋىمىز كەرەك.
كەڭەستى بريكس ەلدەرى مەحانيزمىنىڭ كەزەكتى ءتوراعا ەلى ءۇندىستاننىڭ زۇڭليى مودي باسقاردى.
شي جينپيڭ سوزىندە بىلاي دەپ اتاپ كورسەتتى: قازىر دۇنيە ءجۇزى ەكونوميكاسى جاڭا - كونە قوزعالىس ەنەرگياسى اۋىسقان كەزەڭدە تۇر، قايتا كوتەرىلۋى باياۋ، بريكس ەلدەرى تۇرعان حالىقارالىق ۇلكەن ورتا تۇلعالىق جاقتان ورنىقتىلىقتى ساقتاعانىمەن، اساۋ تولقىندار ءالسىن - ءالى كوتەرىلىپ وتىر. جاڭا جاعداي الدىندا ءبىز سەنىمدى بەكەمدەپ، تۇراقتىلىقتى ساقتاۋىمىز، بريكس ەلدەرىنىڭ كولەمى مەن كومەسكى كۇشىن كورە ءبىلۋىمىز، بريكس ەلدەرى ۋاكىل بولعان بازارى جاڭادان گۇلدەنگەن ەلدەر مەن دامۋ ۇستىندەگى ەلدەردىڭ ومىرشەڭدىك كۇشىن كورە ءبىلۋىمىز ءتيىس. تەك نەگىزدى بەكەمدەپ، تياناقتى كۇشەيتىپ، قازىر ءدوپ كەلىپ وتىرعان ماسەلەلەر مەن سىن - سايىستاردى تىڭعىلىقتى شەشىپ، بەرەكە - بىرلىكتى كۇشەيتىپ، ءوزارا سەنىمدىلىك پەن سەلبەستىكتى تەرەڭدەتسەك بولعانى، بريكس ەلدەرى سەلبەستىگىنىڭ جاڭا جاعدايىن، ءسوز جوق، قارسى الاتىن بولامىز.
شي جينپيڭ بريكس ەلدەرىنىڭ سەلبەستىگىن كۇشەيتۋ جونىندە 4 ءتۇرلى ۇسىنىس قويدى.
ءبىرىنشى، ارتۋ فورماسىن بىرگە جاڭالاۋ. جۇڭگو العا ىلگەرىلەتىپ وتىرعان 20 ەل توبىنىڭ جاڭالىق اشۋ، ارتۋ جوسپارىن جاساۋ ورايىن مىقتاپ يگەرىپ، جاڭالىق اشۋ ارقىلى دامۋعا دەم بەرۋ ستراتەگياسىن جەدەل اتقارىپ، جالپى سۇرانىستىڭ كەڭەيۋ سەرپىنىن ارتتىرىپ، قۇرىلىمدىق رەفورمانى تەرەڭدەتىپ، ءداستۇرلى سالىستىرمالى باسىمدىلىقتى جاڭالاپ، دەڭگەيىن ءوسىرىپ، ورتا، ۇزاق مەرزىمدىك ارتۋدىڭ كومەسكى كۇشىن جوعارىلاتۋ كەرەك. بىلتىرعى ۋفا كەڭەسىندە ماقۇلدانعان «بريكس ەلدەرىنىڭ ەكونوميكالىق سەرىكتەستىك ستراتەگياسىن» مۇقيات تياناقتاندىرىپ، ساۋدا، قارجى قوسۋ كەڭ كولەمدە توعىسقان، اقشا، فينانس كەڭ كولەمدە اينالىم جاساعان، نەگىزدىك قۇرىلعىلار كەڭ كولەمدى بايلانىسقان، ادامدار، مادەنيەتتەر اراسىندا كەڭ كولەمدە اۋىس - كۇيىس ورناعان تىڭ جاعدايدى اشىپ، باسىمدىلىقتار ارقىلى ءبىرىن - ءبىرى تولىقتاۋدىڭ، ارتۋ جاعىندا بىرلەسە قيمىلداۋدىڭ قۇدىرەتتى بىرىككەن كۇشىن قالىپتاستىرۋ كەرەك.
ەكىنشى، الەمدى جونگە سالۋدى بىرگە كەمەلدەندىرۋ. 20 ەل توبى اياسىندا اۋىس - كۇيىس پەن سايكەسۋدى ۇزدىكسىز كۇشەيتىپ، حالىقارالىق اقشا قورى ۇيىمى مەن دۇنيە بانكەسىنىڭ جونگە سالۋ قۇرىلىمى رەفورماسىن بەلسەنە العا ىلگەرىلەتىپ، بازارى جاڭادان گۇلدەنگەن ەلدەر مەن دامۋ ۇستىندەگى ەلدەردىڭ ۋاكىلدىك سيپاتى مەن سويلەۋ ۇقىعىن ارتتىرۋ كەرەك. كوپ جاقتى ساۋدا ءتۇزىلىسىنىڭ نەگىزگى ارنالىق ورنىن باتىل قورعاپ، اشىق الەم ەكونوميكاسىن بىرگە قۇرىپ، ءارقانداي فورماداعى قورعانىمپازدىق پەن قاقپايلاۋشىلىققا قارسى تۇرىپ، ءار ەلدىڭ دامۋ ۇقىعىنىڭ تەڭدىگىن، ورايىنىڭ تەڭدىگىن، قاعيدانىڭ تەڭدىگىن قامتاماسىز ەتۋ كەرەك. جاڭا وركەندەتۋ بانكەسىنىڭ العاشقى توپتاعى نىسانىن جەدەل تياناقتاندىرىپ، باسقارۋ ورەسى مەن قارجى توپتاۋ قابىلەتىن ۇزدىكسىز جوعارىلاتىپ، شۇعىل جاعدايعا توتەپ بەرەتىن زاپاستى ورنالاستىرۋ جونىندەگى ماكرولىق زەرتتەۋ قابىلەتىن كۇشەيتىپ، بريكس ەلدەرىنىڭ فينانس حاۋىپسىزدىگى تورىن بەكەمدەۋ كەرەك.
ءۇشىنشى، حالىقارالىق ادىلدىكتى، ادىلەتتىلىكتى تىزە قوسا قورعاۋ، بەيبىت، ورنىقتى دامۋ ورتاسىن ورناتۋ. ءبىر - ءبىرىنىڭ باسا نازار اۋدارىپ وتىرعان تۇيىندەرىنە قۇرمەت ەتۋ، ءبىر - ءبىرىنىڭ مۇددەسىنە كوڭىل ءبولۋ نەگىزىندە ساياسي حاۋىپسىزدىك سەلبەستىگىن ۇزدىكسىز كۇشەيتۋ كەرەك. ب م ۇ ەرەجەسىنىڭ ماقساتى مەن پرينسيبىن، حالىقارالىق قاتىناستىڭ نەگىزگى ولشەمىن قورعاپ، سەلبەسە وتىرىپ بىرگە يگىلىككە كەنەلەتىن جاڭاشا حالىقارالىق قاتىناستىڭ ورناۋىن جەبەپ، بەيبىت، ورنىقتى، ءادىل، ۇيلەسىمدى حالىقارالىق ءتارتىپتى تۇلعالاۋ كەرەك. ءوز مەملەكەتتەرىنىڭ جاعدايىنا قاراي تاڭداعان دامۋ جولىنا تاباندى بولىپ، سىرتقى كۇشتەردىڭ بريكس ەلدەرىنىڭ ىشكى ىسىنە كيلىگۋىنە باتىل قارسى تۇرۋ كەرەك. بريكس ەلدەرى اياسىنداعى لاڭكەستىككە قارسى تۇرۋ، سىرتقى كەڭىستىك، ەنەرگيا حاۋىپسىزدىگى، ينتەرنەت حاۋىپسىزدىگى سياقتى سالالارداعى ناقتى سەلبەستىكتى كۇشەيتىپ، ءارقايسى جاقتاردىڭ مۇددەسى مەن نازار اۋدارىپ وتىرعان تۇيىندەرىن تەڭ تۇرعىدا بەينەلەيتىن حالىقارالىق قاعيدانىڭ بەلگىلەنۋىن جەبەۋ كەرەك.
ءتورتىنشى، حالىقارالىق دامۋ سەلبەستىگىن تىزە قوسا جەبەپ، باياندى دامۋ جولىمەن ءجۇرۋ. ەل ىشىندەگى دامۋ ستراتەگياسىن حالىقارالىق دامۋدىڭ كەڭەستىك تارتىپتەرىمەن ءونىمدى ۇشتاستىرۋدى قۇلشىنا جۇزەگە اسىرۋ كەرەك. «20 ەل توبىنىڭ 2030 - جىلعا دەيىنگى باياندى دامۋ كەڭەستىك ءتارتىبىن تياناقتاندىرۋدىڭ ارەكەت جوسپارىمەن» ۇشتاستىرىپ، الەمدىك دامۋ جونىندەگى جاڭاشا سەرىكتەستىك قاتىناستى بەلسەنە ورناتىپ، دامىعان ەلدەردىڭ ۋادەسىن ورىنداۋىن جەبەپ، دامۋ ۇستىندەگى ەلدەردىڭ دامۋ نىساناسىن جۇزەگە اسىرۋىنا پارمەندى قولداۋ كورسەتۋ كەرەك. وڭتۇستىك پەن وڭتۇستىك سەلبەستىگىن كۇشەيتىپ، وزگە دە دامۋ ۇستىندەگى ەلدەردىڭ دامۋ قابىلەتىن كۇشەيتۋىنە شامانىڭ جەتىسىنشە كومەك كورسەتىپ، ولاردى بريكس ەلدەرىنىڭ دامۋ ارناسىنا ءتۇسىرۋ كەرەك. بريكس ەلدەرى اياسىنداعى ناقتى سەلبەستىكتى العا ىلگەرىلەتىپ، باياندى دامۋدىڭ كەڭەستىك تارتىپتەرىن سەلبەسە تياناقتاندىرىپ، ءتۇرلى مۇددەلەس تاراپتار قول ۇستاسا بىرگە قۇراتىن، ءارقايسى سالالاردا بىركەلكى، بىرگە ىلگەرىلەيتىن، ءارقايسى جىكتەر گۇلدەنىپ - كوركەيىپ، بىرگە يگىلىكتەنەتىن دامۋدىڭ تىڭ جاعدايىن قۇلشىنا قالىپتاستىرۋ كەرەك.
شي جينپيڭ بىلاي دەپ باسا دارىپتەدى: بريكس ەلدەرىنىڭ سىرتقى ىستەر مينيسترلەرىنىڭ تۇڭعىش رەتكى ءماجىلىسى اشىلعاننان قازىرگە دەيىن، بريكس ەلدەرىنىڭ سەلبەستىگىنە دە 10 جىل بولىپتى. ءبىز تەك اشىق، قامتىمدى، سەلبەسەتىن، تەڭ يگىلىكتەنەتىن بريكس ەلدەرى رۋحىن ۇستانىپ، بوران - شاشىنداردا مىزعىماي، بوگدە سىبىستارعا سەلت ەتپەي، قيىنشىلىقتارعا توسىلماي، سەرىكتەستىك قاتىناستى تىنباي كۇشەيتەتىن بولساق، بريكس ەلدەرى اناعۇرلىم زور دامۋدى، ءسوز جوق، جۇزەگە اسىرادى دەپ سەنەمىز.
كەڭەسكە قاتىناسقان باسشىلار بىلاي دەپ قارادى: بريكس ەلدەرىنىڭ ەكونوميكالىق ارتۋ بولاشاعى مەن قوزعاۋشى كۇشى بۇرىنعىداي مىعىم، ءالى دە دۇنيە ءجۇزى ەكونوميكاسىنىڭ ماڭىزدى قوزعالتقىشى. بريكس ەلدەرى اشىق، ىنتىماقتى، تەپە - تەڭ، ءوزارا ءتۇسىنىسۋ، قامتىمدى، ءوزارا پايدا جەتكىزۋ، سەلبەسۋ سياقتى پرينسيپتەردىڭ جەتەكشىلىگىندە، ستراتەگيالىق سەرىكتەستىك سەلبەستىك قاتىناستى ونان ارى كۇشەيتىپ، حالىقارالىق زاڭ نەگىزىندە ءادىل، ادىلەتتى حالىقارالىق ءتارتىپتى ورناتۋدى العا ىلگەرىلەتۋى كەرەك.
كەڭەسكە قاتىناسقان باسشىلار جۇڭگونىڭ 2016 - جىلى 20 ەل توبىنىڭ ءتوراعا ەلى بولعانىن قۇتتىقتادى ءارى قولدادى، حاڭجوۋداعى باس قوسۋدىڭ تولاعاي تابىستارعا قول جەتكىزەتىنىنە كامىل سەنەتىندىكتەرىن ءبىلدىرىسىپ، ءتوراعا ەل ساناتىنداعى جۇڭگونىڭ دامۋ كەڭەستىك تارتىپتەرىنە كوڭىل بولگەنىن القادى، 20 ەل توبى اياسىندا بريكس ەلدەرى بىرگە نازار اۋدارىپ وتىرعان الەمدىك ماسەلەلەر جونىندە تىعىز سايكەستىرۋ جاساپ، بازارى جاڭادان كوركەيگەن وزگە دە ەكونوميكالىق تۇلعالارمەن، دامۋ ۇستىندەگى ەلدەرمەن بولعان تىلدەسۋمەن سەلبەستىكتى كۇشەيتكەنىن قۇپتادى. شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. مەملەكەت ءتوراعاسى شي جينپيڭ 4 - قىركۇيەكتە حاڭجوۋدا رەسەي زۇڭتۇڭى پۋتينمەن كەزدەستى.
شي جينپيڭ پۋتيننىڭ 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا قاتىسۋ ءۇشىن جۇڭگوعا كەلگەنىن قارسى الدى. شي جينپيڭ مىنالاردى اتاپ كورسەتتى: پۋتين زۇڭتۇڭ بيىل ماۋسىم ايىندا جۇڭگوعا ساپارلاي كەلگەن كەزدە، ءبىز «جۇڭگو - رەسەي تاتۋ كورشىلىك دوستىق سەلبەستىك شارتىنا» قول قويىلعاندىعىنىڭ 15 جىلدىعىن سالتاناتتى تۇردە قۇتتىقتاپ، ماڭىزدى 3 بىرلەسكەن مالىمدەگە بىرگە قول قويدىق جانە جاريالادىق، سونداي - اق 30عا جۋىق سىندارلى سەلبەستىك كەلىسىمىنە قول قويىلعاندىعىنا كۋا بولدىق، بۇل ەكى ەلدىڭ جاپپاي ستراتەگيالىق سەلبەستىك سەرىكتەستىك قاتىناستى تەرەڭدەتۋ جونىندەگى باتىل بەكىمىن تولىق كورسەتىپ، تاراپتاردىڭ كەلەلى حالىقارالىق جانە وڭىرلىك ماسەلەلەردەگى ورتاق تۇرعىسىن تولىق ايگىلەپ، جۇڭگو مەن رەسەيدىڭ الەمدىك ستراتەگيالىق حاۋىپسىزدىكتى، الەمدىك بەيبىتشىلىك پەن تۇراقتىلىقتى بىرگە قورعايتىن ءبىر اۋىزدى ءۇنىن جەتكىزدى. تاراپتار زۇڭتۇڭ مىرزا ەكەۋىمىز قول جەتكىزگەن ورتاق تانىمدار مەن كەلىسىمدەردى جاقسى تياناقتاندىرىپ، جۇڭگو مەن رەسەيدىڭ ءتۇرلى سالالارداعى سەلبەستىگىنىڭ ۇزدىكسىز جاڭا ناتيجەلەرگە قول جەتكىزۋىن ىلگەرىلەتۋى كەرەك.
شي جينپيڭ مىنالاردى باسا دارىپتەدى: جۇڭگو مەن رەسەي جان - جاقتى ستراتەگيالىق سەلبەستىكتەردى ودان ارى جيىلەتە كۇشەيتۋ، قارسى جاعىنىڭ ءوز مەملەكەت يەلىك ۇقىعىن، حاۋىپسىزدىگىن، دامۋ مۇددەسىن قورعاۋ جولىنداعى قۇلشىنىستارىن باتىل قولداۋ كەرەك. ەكى ەلدىڭ دامۋ ستراتەگيالارىن توعىستىرۋدى جانە «ءبىر بەلدەۋ، ءبىر جول» قۇرىلىسىن ەۆرو - ازيالىق ەكونوميكالىق وداق قۇرىلىسىمەن ءونىمدى توعىستىرۋدى بەلسەندى تۇردە ىلگەرىلەتىپ، نەگىزدىك قۇرىلعى قۇرىلىسى، ەنەرگيا، اۆياتسيا، عارىش ىستەرى، جوعارى، جاڭا تەحنيكا سياقتى سالالارداعى سىندارلى سەلبەستىكتەردى جەبەپ، اسكەري ىستەردەگى اۋىس - كۇيىس پەن حاۋىپسىزدىك سەلبەستىگىن كۇشەيتۋ كەرەك. حالىقارالىق جانە وڭىرلىك ىستەردەگى سايكەسۋ مەن ۇيلەسۋدى جيىلەتىپ، ب م ۇ ەرەجەسىنىڭ ماقساتى پەن پرينسيبىن جانە حالىقارالىق قاتىناستاردىڭ نەگىزگى ولشەمدەرىن باتىل قورعاپ، حالىقارالىق تەڭدىك پەن ادىلدىكتى قورعاپ، الەمنىڭ بەيبىتشىلىگىن، تۇراقتىلىعىن، گۇلدەنۋىن جەبەۋ كەرەك.
شي جينپيڭ بىلاي دەپ اتاپ كورسەتتى: كەزەكتەگى جاعدايدا، ءار جاق 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا ۇلكەن ءۇمىت ارتىپ وتىر. رەسەي 20 ەل توبىنىڭ بەلدى مۇشەسى، رەسەيدى قامتىعان ءار جاقتىڭ قولداۋىندا، حاڭجوۋ باس قوسۋىنىڭ، ءسوز جوق، تابىسقا جەتەتىنىنە سەنەمىن.
پۋتين رەسەيدىڭ جۇڭگومەن بىرگە ەكى ەلدىڭ ساياسي ءوزارا سەنىمدىلىگى مەن حالىقتار دوستىعىن ەكونوميكالىق سەلبەستىكتىڭ ءتىپتى دە كۇشتى قوزعاۋشى كۇشىنە اينالدىرىپ، ساۋدا، قارجى قوسۋ، فينانس، ەنەرگيا، عىلىم - تەحنيكا سياقتى سالالارداعى سەلبەستىكتى كەڭەيتىپ، ەكى ەل حالقىنا ءتىپتى كوپ ناقتى يگىلىكتەر سيلاۋدى قالايتىنىن، رەسەيدىڭ جۇڭگونىڭ 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋى ءۇشىن بەلگىلەگەن باس تاقىرىبى پەن كەڭەستىك تاقىرىپتارىن قولدايتىنىن، حاڭجوۋ باس قوسۋىنىڭ تولىق تابىسقا جەتۋىنە تىلەكتەس ەكەنىن ءبىلدىردى. شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. مەملەكەت ءتوراعاسى شي جينپيڭ 4 - قىركۇيەكتە حاڭجوۋدا 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا شاقىرۋمەن كەلگەن ەگيپەت زۇڭتۇڭى سەسيمەن كەزدەستى.
شي جينپيڭ: سوڭعى جىلداردان بەرى، جۇڭگو مەن ەگيپەتتىڭ جان - جاقتى ستراتەگيالىق سەرىكتەستىك قاتىناسى ۇزدىكسىز تەرەڭدەدى جانە دامىدى، جۇڭگو بۇعان ريزاشىلىق بىلدىرەدى، - دەپ اتاپ كورسەتتى.
شي جينپيڭ مىنالاردى باسا دارىپتەدى: جۇڭگو جۇڭگو - ەگيپەت قاتىناسىنا ايرىقشا ءمان بەرەدى. ءبىز ەگيپەتتىڭ مەملەكەت تۇراقتىلىعىن قورعاۋىن، ءوز مەملەكەت جاعدايىنا ۇيلەسەتىن دامۋ جولىندا ىزدەنىس جاساۋىن باتىل قولدايمىز، ەگيپەتپەن بىرگە ءبىر - ءبىرىمىزدىڭ نازار اۋداراتىن وزەكتى ماسەلەلەرىمىزگە ۇزدىكسىز ءوزارا قولداۋ كورسەتۋدى قالايمىز. ەكى ەلدىڭ ساۋدا - ەكونوميكا سەلبەستىگىن ناقتى تياناقتاندىرىپ، ءتۇيىندى سەلبەستىك نىساندارىنىڭ ەرتەرەك جۇرگىزىلۋىن جەبەپ، وندىرىستىك قۋات، فينانس، حالىق تۇرمىسى، قورشاعان ورتا، نەگىزدىك قۇرىلعىلار سالاسىنداعى سەلبەستىكتەردى كۇشەيتىپ، حالىقارالىق جانە وڭىرلىك ىستەردەگى سايكەسۋ مەن ۇيلەسۋدى جيىلەتۋ كەرەك. تاراپتار ەكى ەلدىڭ ديپلوماتيالىق قاتىناس ورناتقانىنىڭ 60 جىلدىعىن جاڭا باستاما ەتىپ، جۇڭگو - ەگيپەت قاتىناسىنىڭ تىڭ، ءتىپتى دە ۇلكەن دامۋشىلىقتارعا ۇزدىكسىز قول جەتكىزۋىن جەبەۋ كەرەك.
سەسي ءتوراعا شي جينپيڭنىڭ 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا شاقىرعانىنا العىس ايتىپ، بۇنىڭ ەگيپەت پەن جۇڭگو قاتىناسىنىڭ جوعارى دەڭگەيىن نەعۇرلىم ايگىلەي تۇسەتىنىن، ەگيپەتتىڭ ەگيپەت - جۇڭگو قاتىناسىن ۇزدىكسىز ىلگەرىلەتۋگە كۇش سالىپ، ەكى ەل حالقىنىڭ كۇتكەن ءۇمىتىن ونان ارى قاناعاتتاندىرۋعا مۇمكىندىك جاسايتىنىن ءبىلدىردى. شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. مەملەكەت ءتوراعاسى شي جينپيڭ 4 - قىركۇيەكتە حاڭجوۋدا 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا قاتىسۋعا كەلگەن مەكسيكانىڭ زۇڭتۇڭى پەنيامەن كەزدەستى.
شي جينپيڭ مىنالاردى اتاپ كورسەتتى: جۇڭگو مەن مەكسيكانىڭ جان - جاقتى ستراتەگيالىق سەرىكتەستىك قاتىناسىن دامىتۋ ءىز اشار ءىس. كەزەكتە، تاراپتار زۇڭتۇڭ مىرزا ەكەۋىمىز قول جەتكىزگەن ورتاق تانىمداردى بەلسەنە تياناقتاندىرۋ ۇستىندە، ەكى جاقتى ساۋدا، قارجى قوسۋ، فينانس، ەنەرگيا سياقتى سالالارداعى سەلبەستىك كوپتەگەن ناقتى جەمىستەر بەردى.
شي جينپيڭ مىنالاردى باسا دارىپتەدى: جۇڭگو مەن مەكسيكا جوعارى جىكتەگىلەردىڭ تىعىز بارىس - كەلىسىن ساقتاپ، ءار دارەجەلى، ءار سالاداعى اۋىس - كۇيىستەردى جەبەپ، كەلەسى 5 جىلداعى جۇڭگو - مەكسيكا سەلبەستىگىنىڭ جول كارتاسىن جاقسى جوسپارلاۋ كەرەك. ءبىرىن - ءبىرى تولىقتاۋ سىندى ارتىقشىلىقتاردان تولىق پايدالانىپ، جۇڭگونىڭ «31 - بەسجىلدىق» دامۋ جوباسىنىڭ، جاڭالىق اشۋدى جەتەكشى ەتكەن دامۋ ستراتەگياسىنىڭ مەكسيكانىڭ قۇرىلىمدىق رەفورمالارىمەن ۇشتاسۋ تۇيىندەرىن مىقتى يگەرىپ، ونەركاسىپتىك قارجى قوسۋلار، نەگىزدىك قۇرىلعى قۇرىلىستارى، ەرەكشە رايون قۇرىلىسى، فينانس، ەلەكتروندىق حابارلاسۋ، جاڭا ەنەرگيا، گەوماتيكا، نانومەتر تەحنولوگياسى سياقتى سالالارداعى سىندارلى سەلبەستىكتەردى جەبەۋ كەرەك. گۋمانيتارلىق اۋىس - كۇيىستەردى تەرەڭدەتىپ، ادامداردىڭ بارىس - كەلىسىن قولايلىلاستىرۋ كەرەك. كەلەلى حالىقارالىق جانە وڭىرلىك ماسەلەلەردە ءجيى بارىس - كەلىستى ساقتاۋ كەرەك.
پەنيا جۇڭگونىڭ مەكسيكانىڭ جاقىن دوسى جانە ماڭىزدى ساۋدا سەرىكتەسى ەكەنىن، مەكسيكانىڭ مەكسيكا مەن جۇڭگونىڭ جان - جاقتى ستراتەگيالىق سەرىكتەستىك قاتىناسىن ناقتى تياناقتاندىرۋعا كۇش سالاتىنىن، ەكى ەلدىڭ قارجى قوسۋ، فينانس، ساياحات، ەرەكشە رايون قۇرىلىسى سياقتى سالالارداعى سەلبەستىگىن ىلگەرىلەتۋدى، جۇڭگومەن حالىقارالىق ىستەردەگى پىكىر اۋىسۋدى جانە سايكەسۋدى جيىلەتۋدى قالايتىنىن ءبىلدىردى. شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. مەملەكەت ءتوراعاسى شي جينپيڭ 4 - قىركۇيەكتە حاڭجوۋدا 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا قاتىناسىپ جاتقان اۆستراليانىڭ زۇڭليى تەرنبۇلمەن كەزدەستى.
شي جينپيڭ مىنالاردى اتاپ كورسەتتى: ءوزارا سەنىمدىلىك جۇڭگو - اۆستراليا قاتىناسىنىڭ ءساتتى دامۋىنىڭ العى شارتى. جۇڭگو مەن اۆستراليا وزدەرى تاڭداعان دامۋ جولىنا قۇرمەت ەتۋى، ءبىر - ءبىرىنىڭ وزەكتى مۇددەسى مەن نازار اۋدارىپ وتىرعان ماڭىزدى تۇيىندەرىنە قۇرمەت ەتۋى كەرەك. باسىمدىلىقتارى ارقىلى ءبىرىن - ءبىرى تولىقتاۋدى كۇشەيتىپ، جۇڭگو مەن اۆستراليانىڭ ەركىن ساۋدا كەلىسىمىن ۇزدىكسىز ويداعىداي اتقارىپ، جۇڭگونىڭ «ءبىر بەلدەۋ، ءبىر جول» دارىپتەمەسىنىڭ اۆستراليانىڭ «سولتۇستىك بولىكتى قاۋىرت اشۋ» جوسپارىمەن توعىسۋىن جەدەل ىلگەرىلەتىپ، ەنەرگيا بايلىعى، ەگىن، مال شارۋاشىلىعى، ازىق - تۇلىك وڭدەۋ، نەگىزدىك قۇرىلعىلار قۇرىلىسى سياقتى سالالاردا سەلبەستىك اياسىن بەلسەنە كەڭەيتىپ، ءوزارا تيىمدىلىك جاساپ، تەڭ يگىلىككە كەنەلۋدى ويداعىداي جۇزەگە اسىرۋىمىز كەرەك. اۆستراليانىڭ شەتەل قارجىسىنا ءادىل، جاريا، بولجامدى ساياسات ورتاسىن ازىرلەۋگە ۇزبەي كۇش سالۋىن ءۇمىت ەتەمىن. بۇل اۆستراليانىڭ ءوز مۇددەسىنە دە ۇيلەسەدى. جاڭالىق اشا دامۋ ستراتەگياسىنىڭ توعىسۋىن ىشكەرىلەي ىلگەرىلەتىپ، ازىق - تۇلىك، اۋىل شارۋاشىلىعى، كەن كاسىبى، تەڭىز - مۇحيت عىلىمى سياقتى سالالاردا بىرلەسىپ زەرتتەۋ - اشۋ اياسىن كەڭەيتۋىمىز قاجەت. وقۋ - اعارتۋ، مادەنيەت، ساياحات سەكىلدى سالالارداعى اۋىس - كۇيىستى تەرەڭدەتىپ، ەكى ەل حالقىنىڭ ءوزارا تۇسىنىستىگى مەن دوستىعىن نىعايتۋىمىز ءتيىس. جەمقورلىققا قارسى تۇرۋ، قاشىپ جۇرگەن قىلمىستىلاردى قۋعىنداۋ، ارام اقشانى قايتارىپ اكەلۋ مەن لاڭكەستىككە قارسى تۇرۋ سەلبەستىگىن كۇشەيتۋىمىز كەرەك. جۇڭگو اۆستراليامەن بىرگە ب م ۇ، 20 ەل توبى، ازيا - تىنىق مۇحيت ەكونوميكالىق سەلبەسۋ ۇيىمى، شىعىس ازيا ەلدەرى باسشىلارىنىڭ باس قوسۋى، ت. ب مەحانيزمدەرىندەگى سايكەسۋ مەن سەلبەستىكتى كۇشەيتۋدى قالايدى.
تەرنبۇل بىلاي دەدى: اۆستراليا اۆستراليا - جۇڭگو ەركىن ساۋدا كەلىسىمىن بەلسەنە تياناقتاندىرۋعا كۇش سالادى، ەكى ەلدىڭ ەكونوميكا - ساۋدا قاتىناسىن تەرەڭدەتۋدى قالايدى، جۇڭگونىڭ اۆسترالياعا قارجى قوسۋىن ۇزدىكسىز قارسى الادى. اۆستراليا جۇڭگونىڭ 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىن تابىستى وتكىزۋىن قولدايدى. شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. مەملەكەت ءتوراعاسى شي جينپيڭ 4 - قىركۇيەكتە 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا قاتىناسىپ جاتقان ءۇندىستاننىڭ زۇڭليى موديمەن كەزدەستى.
شي جينپيڭ مىنالاردى باسا دارىپتەدى: قازىر جۇڭگو - ءۇندىستان قاتىناسى اقاۋسىز، ورنىقتى، جەدەل دامۋداي تاماشا جاعدايدى ساقتاۋدا. دامۋ ۇستىندەگى كورشىلەس ءىرى ەكى ەل رەتىندە جۇڭگو مەن ءۇندىستان جوعارى جىكتەگىلەردىڭ بارىس - كەلىسىن ساقتاپ، جۇڭگو - ءۇندىستان قاتىناسىنىڭ ۇلكەن بەتالىسىن ويداعىداي يگەرىپ، ءار جىكتەگىلەردىڭ، ءار سالانىڭ ديالوگ مەحانيزمىنىڭ رولىن تولىق ساۋلەلەندىرىپ، بىرگە نازار اۋدارعان كەلەلى ماسەلەلەر جونىندە ۇنەمى پىكىرلەسىپ، ستراتەگيالىق بايلانىستى كۇشەيتىپ، ءوزارا تۇسىنىستىك پەن سەنىمدىلىكتى نىعايتۋى كەرەك. ءبىر - ءبىرىنىڭ دامۋ ستراتەگياسى مەن جوباسىن توعىستىرىپ، نەگىزدىك قۇرىلعىلار قۇرىلىسى، وندىرىستىك قۋات سەلبەستىگى سياقتى سالالاردا ناقتى ءىرى نىسانداردى اتقارۋدى اقىلداسۋى كەرەك. گۋمانيتارلىق اۋىس - كۇيىستى ۇزدىكسىز كۇشەيتۋ قاجەت. جۇڭگو جۇڭگو كاسىپورىندارىن ءۇندىستانعا بارىپ قارجى قوسىپ، شارۋاشىلىق جۇرگىزۋگە ۇزبەي ىنتالاندىرادى. ءبىر - ءبىرىمىزدىڭ نازار اۋدارىپ وتىرعان ماڭىزدى تۇيىندەرىمىزگە قۇرمەت ەتىپ جانە كوڭىل ءبولىپ، الاۋىزدىق ساقتالعان ماسەلەلەردى سىندارلى تاسىلدەرمەن يكەمدى ءبىر جايلى ەتۋىمىز قاجەت. جۇڭگو ۇندىستانمەن بىرگە جۇڭگو - ءۇندىستان قاتىناسىندا وڭاي - وسپاق قولعا كەلمەگەن تاماشا جاعدايدى ويداعىداي قورعاپ، تاراپتاردىڭ دوستىق سەلبەستىگىنىڭ تىڭ ىلگەرىلەۋشىلىكتەرگە قول جەتكىزە بەرۋىن جەبەۋدى قالايدى.
شي جينپيڭ مىنالاردى اتاپ كورسەتتى: جۇڭگو ۇندىستانمەن بىرگە 20 ەل توبى اياسىندا سەلبەستىكتى تەرەڭدەتىپ، الەمدىك ەكونوميكانىڭ ارتۋىنا دەم بەرۋگە، الەمدىك ەكونوميكانى جونگە سالۋدى كەمەلدەندىرۋگە ءتىپتى زور ۇلەس قوسۋدى قالايدى. ءۇندىستاننىڭ جۇڭگومەن بىرگە 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنىڭ بەلسەندى ناتيجەگە قول جەتكىزۋىن جەبەۋىن ءۇمىت ەتەمىن.
مودي بىلاي دەدى: 21 - عاسىر − ازيا عاسىرى. ازياداعى ەلدەر قول ۇستاسا قۇلشىنىپ، ورنىقتىلىق پەن گۇلدەنۋدى بىرگە جۇزەگە اسىرۋى كەرەك. ءۇندىستان جۇڭگومەن سايكەسىپ، 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنىڭ بەلسەندى ناتيجەگە قول جەتكىزۋىن جەبەيدى. ءتوراعا شي جينپيڭنىڭ ءۇندىستاندا وتكىزىلەتىن بريكس ەلدەرى باسشىلارىنىڭ 8 - رەتكى كەڭەسىنە قاتىناسۋىن اسىعا كۇتەمىن. شينحۋا اگەنتتىگىنىڭ 4 - قىركۇيەكتە حاڭجوۋدان بەرگەن حابارى. مەملەكەت ءتوراعاسى شي جينپيڭ 4 - قىركۇيەكتە حاڭجوۋدا قوناق يەسى ەلىنىڭ باسشىسى رەتىندە 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا قاتىناسۋعا كەلگەن تايلاندتىڭ زۇڭليى پرايۇتپەن كەزدەستى.
شي جينپيڭ مىنالاردى اتاپ كورسەتتى: جۇڭگو مەن تايلاند ءبىر ءۇيدىڭ ادامىنداي ەتەنە. جۇڭگو مەن تايلاند ازيا قۇرلىعىنداعى دامۋ ۇستىندەگى ماڭىزدى ەلدەر، ەكەۋى دە ەكونوميكانى دامىتۋ، حالىق تۇرمىسىن جاقسارتۋ، ورنىقتىلىقتى قورعاۋ سىندى ماڭىزدى مىندەتكە ءدوپ كەلىپ وتىر. جۇڭگو مەن تايلاند ستراتەگيالىق بايلانىستى كۇشەيتىپ، دامۋ ستراتەگياسىن توعىستىرۋدى كۇشەيتىپ، ەكى ەلدىڭ ءار سالاداعى ءوزارا تيىمدىلىك سەلبەستىگىن كۇش سالا ىلگەرىلەتىپ، ادامداردىڭ بارىس - كەلىسىن كەڭەيتىپ، كوپ جاقتى اياداعى سايكەسۋ مەن سەلبەسۋدى كۇشەيتۋى كەرەك. پرايۇت زۇڭليدىڭ 77 ەل توبىنىڭ كەزەكتى ءتوراعا ەلىنىڭ باسشىسى رەتىندە 20 ەل توبىنا مۇشە ەلدەر باسشىلارىنىڭ حاڭجوۋداعى باس قوسۋىنا قاتىناسۋى دامۋ ۇستىندەگى ەلدەردىڭ جۇڭگونىڭ باس قوسۋدى ۇستىنە الىپ وتكىزۋىنە قولداۋ كورسەتكەنىن ايگىلەدى. جۇڭگو تايلاندپەن بىرگە قۇلشىنىپ باس قوسۋدىڭ تابىستى بولۋىن جەبەۋدى ءۇمىت ەتەدى.
پرايۇت بىلاي دەدى: جۇڭگونىڭ تايلاندتى 20 ەل توبى باسشىلارىنىڭ حاڭجوۋداعى باس قوسۋىنا شاقىرعانىنا العىس ايتامىن. دامۋ ۇستىندەگى ەلدەر جۇڭگونىڭ 20 ەل توبىنىڭ 77 ەل توبىمەن سەلبەستىكتى كۇشەيتۋدى جەبەگەنىن بارىنشا القايدى. تايلاند پەن جۇڭگو ءبىر ءۇيدىڭ ادامىنداي ەتەنە. تايلاند ەكى ەل حالقىنىڭ ءداستۇرلى دوستىعىن تەرەڭدەتىپ، ەكى ەلدىڭ ەكونوميكا - ساۋدا، ساياحات، نەگىزدىك قۇرىلعىلار سياقتى سالالاردا سەلبەستىك اياسىن كەڭەيتۋگە كۇش سالادى.
كەلۋ قاينارى: شينجياڭ گازەتى
جاۋاپتى رەداكتورى : مانەپ ەربول ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
