بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>ورتالىقتىڭ ءۇنى

شي جينپيڭ «2017 - جىلعى سۇڭدۋ حالىقارالىق تالقى مىنبەرىنە» قاتىناسقان شەتەلدىك سيلى قوناقتارمەن كەزدەستى

2017.12.04 09:19   كەلۋ قاينارى : شينجياڭ گازەتى



  30 - قاراشادا مەملەكەت ءتوراعاسى شي جينپيڭ حالىق سارايىندا جۇڭگوعا «2017 - جىلعى سۇڭدۋ حالىقارالىق تالقى مىنبەرىنە» قاتىناسۋعا كەلگەن الەمدىك كوسەمدەر وداعىنىڭ مۇشەلەرىمەن كەزدەستى. كەزدەسۋدىڭ الدىندا، شي جينپيڭ شەتەلدىك سيلى قوناقتارمەن توپتىق سۋرەتكە ءتۇستى.


  شينحۋا اگەنتتىگىنىڭ 30 - قاراشادا بەيجيڭنەن بەرگەن حابارى (ءتىلشى ۋاڭ حۇيحۇي). مەملەكەت ءتوراعاسى شي جينپيڭ 30 - قاراشادا حالىق سارايىندا «2017 - جىلعى سۇڭدۋ حالىقارالىق تالقى مىنبەرىنە» قاتىناسقان الەمدىك كوسەمدەر وداعىنىڭ مۇشەلەرىمەن كەزدەستى.


  شي جينپيڭ جۇڭگونىڭ دامۋ جولىن، سونداي - اق جۇڭگونىڭ دۇنيە ءجۇزىن جونگە سالۋعا ات سالىسۋ پرينسيبى مەن قۋاتتاماسىن ءتۇيىندى تۇردە تانىستىردى، سونداي - اق شەتەلدىك سيلى قوناقتاردىڭ ۋاكىلدەرىنىڭ ءسوزىن تىڭدادى.


  شي جينپيڭ مىنانى اتاپ كورسەتتى: جۇڭگو نىڭ دامۋ جولى − جۇڭگوشا سوتسياليزم جولى. ءبىزدىڭ بۇل جولمەن ءجۇرۋىمىز تاريحتىڭ تالعامى، حالىقتىڭ تالعامى. جاڭا جۇڭگو قۇرىلعاننان، اسىرەسە، رەفورما جاساپ، ەسىك اشقان 40 جىلعا تاياۋ ۋاقىتتان بەرى، جۇڭگودا كەرەمەت وزگەرىستەر تۋىلىپ، دۇنيە جۇزىندەگى 2 - ۇلكەن ەكونوميكالىق تۇلعاعا اينالدى، ءبىر ميلليارد 300 ميلليون حالىقتىڭ تۇرمىسى ۇزدىكسىز جاقسارىپ، 700 ميلليوننان استام ادام كەدەيلىكتەن قۇتىلدى. اماليات اقيقاتتى سىننان وتكىزەتىن بىردەن - ءبىر ولشەم. جۇڭگو قول جەتكىزگەن تاريحي تابىستار ءبىزدىڭ جۇڭگوشا سوتسياليزم جولىنا، نازارياسىنا، تۇزىمىنە، مادەنيەتىنە تاباندى بولۋ سەنىمىمىزدى بەكەمدەي ءتۇستى. مەن پارتيا 19 - قۇرىلتايىنداعى باياندامامدا مىنالاردى اتاپ كورسەتتىم: 10 نەشە جىل دامۋ ارقىلى جۇڭگوشا سوتسياليزم جاڭا داۋىرگە ءوتتى. جۇڭگو قوعامىنىڭ باستى قايشىلىعى حالىقتىڭ كۇن سايىن ارتىپ وتىرعان تاماشا تۇرمىس قاجەتى مەن دامۋدىڭ بىركەلكى، تولىق بولماۋى اراسىنداعى قايشىلىققا وزگەردى. بۇرىن «بار ما، جوق پا» ماسەلەسىن شەشسەك، قازىر «جاقسى ما، جوق پا» ماسەلەسىن شەشۋگە كىرىستىك. ءبىز دامۋ ساپاسى مەن ونىمدىلىگىن كۇش سالا جوعارىلاتىپ، حالىقتىڭ كۇن سايىن ارتىپ وتىرعان قاجەتىن اناعۇرلىم ويداعىداي قاناعاتتاندىرىپ، ادامنىڭ جان - جاقتى دامۋىن، جالپى حالىقتىڭ بىرگە بايۋىن اناعۇرلىم ويداعىداي جەبەيمىز. 2050 - جىلعا بارعاندا، جۇڭگونى باي، دەموكراتيالى، وركەنيەتتى، جاراسىمدى، گۇلدەنىپ - كوركەيگەن سوتسياليستىك وسىزاماندانعان قۇدىرەتتى ەل ەتىپ قۇرىپ شىعامىز.


  شي جينپيڭ مىنانى اتاپ كورسەتتى: ج ك پ 19 - قۇرىلتايى جۇڭگونىڭ ەكونوميكالىق قۇرىلىسى، ساياسي قۇرىلىسى، مادەنيەت قۇرىلىسى، قوعامدىق قۇرىلىسى، ەكولوگيالىق وركەنيەت قۇرىلىسى جونىندە جان - جاقتى ورنالاستىرۋ جاسادى. ءبىز حالىقتى وزەك ەتكەن دامۋ يدەياسىنان جازباي، جاڭالىق اشا دامۋ، سايكەستى دامۋ، جاسىل دامۋ، اشىق دامۋ، تەك يگىلىكتەنەتىن دامۋ ۇستانىمىن ىشكەرىلەي دايەكتىلەندىرۋدى العا قويدىق. ءبىز رەفورمانى جاپپاي تەرەڭدەتۋ ارقىلى تۇتاس قوعامنىڭ جاسامپازدىق قۋاتىن بارىنشا قوزعاپ، دامۋدىڭ ومىرشەڭدىگىن ۇزدىكسىز ساۋلەلەندىرەمىز. ءبىز اناعۇرلىم جوعارى دەڭگەيدە سىرتقا ەسىك اشۋ ارقىلى جاپپاي ەسىك اشۋ جاڭا جاعدايىن قالىپتاستىرۋدى جەبەيمىز. جۇڭگو ەسىكتى جاپپايدى، قايتا ونان ارى ايقارا اشادى. ءبىزدىڭ نىسانامىز توتەنشە ايبىندى ءارى توتەنشە قاراپايىم، سايىپ كەلگەندە، تۇتاس جۇڭگو حالقىن باقىتتى تۇرمىسقا كەنەلتۋ. ءبىزدىڭ نىسانانى جۇزەگە اسىرۋعا سەنىمىمىز كامىل.


  شي جينپيڭ مىنانى باسا دارىپتەدى: جۇڭگو ءار ەل حالقىنىڭ ءوز دامۋ جولىن تاڭداۋىنا ۇقىقتى ەكەنىن ەجەلدەن قۋاتتاپ كەلەدى. دۇنيە جۇزىندە بارىنە بىردەي ساي كەلەتىن دامۋ جولى جوق. ەگەر بارلىق زات، بارلىق دۇنيە ءبىرىڭعاي بولىپ كەتسە، وندا زاتتاردىڭ دامۋى مەن دۇنيە ءجۇزىنىڭ العا باسۋى دا توقىرايدى. ءبىر ەلدىڭ دامۋ جولىنىڭ ۇيلەسىمدى بولعان - بولماعاندىعىنا، تەك سول ەل حالقىنىڭ عانا پىكىر بەرۋ ۇقىعى بار. جۇڭگو وركەنيەتتىڭ الۋان تۇرلىلىگىنە قۇرمەت ەتەدى، اۋىس - كۇيىس جاساۋدى، ءبىر - بىرىنەن ۇلگى الۋدى دارىپتەيدى. جۇڭگو ءار ەلمەن ەل باسقارۋ تاجىريبەسى جونىندە اۋىس - كۇيىس جاساپ، اۋىس - كۇيىس بارىسىندا ارتىقشىلىقتى قابىلداپ، ولقىلىقتاردى تولىقتىرىپ، بىرگە العا باسۋدى قالايدى.


  شي جينپيڭ مىنانى اتاپ كورسەتتى: الەم − جەر شارى قىستاعى ىسپەتتى، ءار ەل ءبىر - بىرىنە سۇيەنەدى، مۇددەسى ورتاق، تاعدىرى ءبىر. جۇڭگو جاڭاشا حالىقارالىق قاتىناس ورناتىپ، ادامزاتتىڭ تاعدىرلاس ورتاق تۇلعاسىن قالىپتاستىرۋدى جەبەيدى. مىنە بۇل جاڭا داۋىردەگى جۇڭگونىڭ ديپلوماتيالىق تالپىنىس نىساناسى ءارى دۇنيە جۇزىندەگى ەلدەردىڭ بىرگە قۇلشىناتىن بەتالىسى. جاڭاشا حالىقارالىق قاتىناس ورناتۋدى جەبەۋ ءۇشىن، ءوزارا قۇرمەت ەتۋ، ءادىل، تۋراشىل بولۋ، سەلبەسىپ تەڭ يگىلىكتەنۋ، كۇشتىلەر السىزدەردى باسىناتىن قاساڭ قاعيدانى تاستاپ، قارسىلاسپايتىن، قايتا كەلىسەتىن، وداقتاسپايتىن، قايتا سەرىكتەسەتىن ەلدەر ارا قاتىناستىڭ جاڭا جولىن قاراستىرۋ كەرەك. ادامزاتتىڭ تاعدىرلاس ورتاق تۇلعاسىن قالىپتاستىرۋدى جەبەۋدە باياندى بەيبىت، جاپپاي حاۋىپسىز، بىرگە كوركەيگەن، اشىق، باۋىرمال، كىرشىكسىز، كوركەم دۇنيە قۇرۋ كەرەك. جۇڭگو ارمانىنا جۇڭگو حالقىنىڭ كوركەم تۇرمىسقا دەگەن تالپىنىسىنىڭ ەڭ ۇلكەن ورتاق بولگىشى جيناقتالعان، ادامزاتتىڭ تاعدىرلاس ورتاق تۇلعاسىنا دۇنيە جۇزىندەگى ءار ەل حالقىنىڭ بەيبىتشىلىككە، دامۋعا، گۇلدەنۋگە تالپىنسىنىڭ ەڭ ۇلكەن ورتاق بولگىشى جيناقتالعان.


  شي جينپيڭ مىنالاردى باسا دارىپتەدى: ءبىر ميلليارد 300 ميلليوننان استام جان سانى بار مەملەكەت رەتىندە، جۇڭگونىڭ ۇزاق ۋاقىت ورنىقتى دامۋىنىڭ ءوزى دە ادامزاتتىڭ تاعدىرلاس ورتاق تۇلعاسىن تۇلعالاۋعا قوسقان ۇلەسى. جۇڭگو باستان - اياق بەيبىت دامۋ جولىمەن جۇرەدى، مەملەكەت قۇدىرەتتەنسە بولدى، زورەكەرلىككە باساتىن جولمەن جۇرمەيدى. ءبىز دەربەس، وزىنە - ءوزى قوجا بولۋ بەيبىت ديپلوماتيالىق ساياساتتى باتىل اتقارىپ، حالىقارالىق ادىلدىك پەن تۋراشىلدىقتى قورعايمىز، ءوزىنىڭ ەركىن باسقالارعا زورلاپ تاڭۋعا قارسى تۇرامىز، وزگە ەلدىڭ ىشكى ىسىنە كيلىگۋگە قارسى تۇرامىز، كۇشتىنىڭ ءالسىزدى باسىنۋىنا قارسى تۇرامىز. جۇڭگو حالىقارالىق ىنتىماقتاستىقتى قانات جايدىرىپ، «ءبىر بەلدەۋ، ءبىر جولدى» بىرگە تۇلعالاۋدا ەشقاشان دا وزگە ەلدىڭ ىشكى ىسىنە كيلىگۋدى ۇستەمە شارت ەتپەيدى. جۇڭگو الەمدىك سەرىكتەستىك قاتىناستى بەلسەنە دامىتىپ، ءار ەلدىڭ مۇددە بىرلىگىن كەڭەيتىپ، ءىرى ەلدەردىڭ سايكەسۋى مەن ىنتىماقتاستىعىن ۇزدىكسىز ىلگەرىلەتىپ، توڭىرەكتەگى ەلدەرمەن قارىم - قاتىناستى تەرەڭدەتىپ، دامۋ ۇستىندەگى ەلدەرمەن بەرەكە - بىرلىكتى، ىنتىماقتاستىقتى كۇشەيتەدى. جۇڭگو مەملەكەتتىڭ سىرتقا ەسىك اشۋ سىندى نەگىزگى ساياساتىنا تاباندى بولادى.


  شي جينپيڭ مىنالاردى باسا دارىپتەدى: جۇڭگو اناعۇرلىم بەلسەندى بەينەمەن دۇنيە ءجۇزىن جونگە سالۋعا ات سالىسادى، يەلىك ۇقىق تەڭدىگىنە، ادىلدىككە، ادىلەتتىلىككە تاباندى بولادى، بىرگە اقىلداسۋعا، بىرگە گۇلدەندىرۋگە، ورتاقتاسۋعا، ىنتىماقتاسىپ تەڭ يگىلىككە كەنەلۋگە تاباندى بولادى، كوپ جاقتىلىققا، ورنىقتىلىقتى قورعاۋعا تاباندى بولادى، بىرتىندەپ ىلگەرىلەۋگە، رەفورما جاساپ، جاڭالىق اشۋعا تاباندى بولادى. جۇڭگو «ءبىر بەلدەۋ، ءبىر جول» دارىپتەمەسىن ىشكەرىلەي ىلگەرىلەتەدى، ياعني بىرگە اقىلداسۋ، بىرگە گۇلدەندىرۋ، ورتاقتاسۋ پرينسيبىن ۇستانىپ، ءار ەلدىڭ ىنتىماقتاستىعى ءۇشىن جاڭا تەكشە ازىرلەپ، باسىمدىقتار ارقىلى ءوزارا تولىقتىرۋدى جۇزەگە اسىرىپ، ىنتىماقتاسىپ تەڭ يگىلىككە كەنەلۋدى جەبەيدى. جۇڭگو بەيبىت كەلىسسوزدەر جۇرگىزۋدى جەبەۋگە قۇلشىنىپ، حالىقارالىق قولامتالى، قيىن ماسەلەلەردى ساياسي جولمەن شەشۋ اياق الىسىن ىلگەرىلەتەدى، ب م ۇ - نىڭ بەيبىتشىلىكتى قورعاۋ ارەكەتىنە بەلسەنە قاتىناسادى، كليمات وزگەرىسى جونىندەگى «پاريج كەلىسىمى» مەن ب م ۇ - نىڭ 2030 - جىلعا دەيىنگى باياندى دامۋ كۇن ءتارتىبىن تياناقتاندىرۋعا كۇش سالادى. جۇڭگو دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋعا، دۇنيە ءجۇزىنىڭ دامۋىن، گۇلدەنۋىن جەبەۋگە اناعۇرلىم زور ۇلەس قوسادى.


  شي جينپيڭ مىنالاردى اتاپ كورسەتتى: 5 قۇرلىقتان كەلگەن الەمدىك كوسەمدەر وداعىنداعى جاڭا - كونە دوستاردىڭ بارلىعى ءار ەلدىڭ جۇڭگومەن اۋىس - كۇيىسىن، ىنتىماقتاستىعىن جەبەۋ جولىندا كوپ جۇمىستار ىستەدى، مەن مۇنى ەرەكشە القايمىن. سىزدەردىڭ ءوز باسىمدىقتارىڭىزدى ساۋلەلەندىرىپ، جۇڭگونىڭ دامۋىنا كوبىرەك اقىل قوسىپ، جۇڭگو حالقىنىڭ ءار ەل حالقىمەن ءوزارا ءتۇسىنىسۋى مەن دوستىعىن تەرەڭدەتۋلەرىڭىزدى ءۇمىت ەتەمىن.


  لاتۆيانىڭ بۇرىنعى زۇڭتۇڭى، الەمدىك كوسەمدەر وداعىنىڭ ءتوراعاسى فرايبەرگا، يتاليانىڭ بۇرىنعى زۇڭليى، ەۆروپا وداعى كوميتەتىنىڭ بۇرىنعى ءتوراعاسى پرودي، چيليدىڭ بۇرىنعى زۇڭتۇڭى لاگوس، نيگەريانىڭ بۇرىنعى زۇڭتۇڭى وباسانجو، ب م ۇ - نىڭ بۇرىنعى باس حاتشىسى پان كيمۋن، جاپونيانىڭ بۇرىنعى باس ءۋازىرى يۋكيو حاتوياما، اۆستراليا - جۇڭگو دوستىق قارىم - قاتىناس قوعامىنىڭ باستىعى جوۋ زىرۇڭ ىركەس - تىركەس ءسوز كەزەگىن الدى. ولار ج ك پ 19 - قۇرىلتايىنىڭ ءساتتى اشىلعانىن قۇتتىقتادى. ولار بىلاي دەدى: جاڭا داۋىرگە قادام قويعان جۇڭگو حالىقارالىق قوعامعا اناعۇرلىم مول ىرىس - قۇت اكەلەدى. جۇڭگونىڭ دامۋ جەتىستىكتەرىنە دۇنيە ءجۇزى كوز تىگۋدە، جۇڭگو دۇنيە ءجۇزى ەكونوميكاسىنىڭ باسشى كۇشىنە جانە دۇنيە ءجۇزىنىڭ كوپ ۇيەكتەنۋىن ىلگەرىلەتەتىن ماڭىزدى كۇشكە اينالدى، دۇنيە ءجۇزى ىستەرىندە جۇڭگونىڭ ىقپالى كۇن سايىن كەڭەيۋدە. جۇڭگو جاھاندانۋدىڭ اناعۇرلىم تەپە - تەڭ، قامتىمدى بەتالىسقا قاراي دامۋىن ىلگەرىلەتۋگە كۇش سالىپ، دۇنيە ءجۇزىنىڭ گۇلدەنۋىن جەبەپ، كليمات وزگەرىسىنە توتەپ بەرۋ جونىندەگى حالىقارالىق ىنتىماقتاستىققا كۇش سالىپ، دامۋ ۇستىندەگى ەلدەرگە بەلسەنە كومەكتەسۋدە. جۇڭگونىڭ دامۋ تاجىريبەسى دامۋ ۇستىندەگى ەلدەرگە اسا ءتيىمدى. جۇڭگو العا قويعان «ءبىر بەلدەۋ، ءبىر جول» دارىپتەمەسى مەن ازيا نەگىزدىك قۇرىلعىلارعا قارجى قوسۋ بانكەسى تاراپتاردىڭ جۇڭگومەن ىنتىماقتاستىعىنىڭ كوپىرىنە اينالىپ، اناعۇرلىم مول ورايلار ازىرلەدى. قازىرگى جاعدايدا، حالىقارالىق قوعام جۇڭگونىڭ قۋاتتاماسى مەن جوباسىن اناعۇرلىم كوبىرەك تىڭداعىسى كەلەدى، جۇڭگومەن ەكونوميكا - ساۋدا، گۋمانيتارلىق سياقتى سالالارداعى اۋىس - كۇيىستى، ىنتىماقتاستىقتى كۇشەيتىپ، تەڭ يگىلىككە كەنەلۋدى ءۇمىت ەتەدى.


  كەزدەسۋدەن بۇرىن شي جينپيڭ شەتەلدىك سيلى قوناقتارمەن ءبىر - بىرلەپ قول الىستى ءارى توپتىق سۋرەتكە ءتۇستى.


  «سۇڭدۋ حالىقارالىق مىنبەرىن» جۇڭگو حالقىنىڭ شەتەلدەرمەن دوستىق بايلانىس قوعامى مەن اۆستراليا - جۇڭگو دوستىق قارىم - قاتىناس قوعامى 2014 - جىلى بىرگە قۇرىپ، كوپتەگەن ەلدەردىڭ بۇرىنعى ۇكىمەت قايراتكەرلەرىن، ايگىلى ماماندارىن، وقىمىستىلارىن، ساۋدا سالاسىنىڭ كوسەمدەرىن بۇعان قاتىناسۋعا ۇسىنىس ەتكەن. «2017 - جىلدىق سۇڭدۋ مىنبەرى» 28 - قاراشادان 30 - قاراشاعا دەيىن گۋاڭجوۋدا وتكىزىلدى، مىنبەردىڭ تاقىرىبى − «دۇنيە ءجۇزىن جونگە سالۋ جانە جۇڭگو قۋاتتاماسى».

جاۋاپتى رەداكتورى : نۇرعيسا قۇرمانجان ۇلى

 سۋرەت