ۋاڭ چيشان قازاقستان مەملەكەتتىك حاۋىپسىزدىك كوميتەتىنىڭ ءتوراعاسىمەن كەزدەستى

2019.04.09 14:32   كەلۋ قاينارى : حالىق تورابى

　　حالىق گازەتى، 4 – ايدىڭ 8 – كۇنى، بەيجيڭ (ءتىلشى: دۋ يفەي) مەملەكەت ءتوراعاسىنىڭ ورىنباسارى ۋاڭ چيشان 4 – ايدىڭ 8 – كۇنى جۇڭنانحايداعى زىگۋاڭگى سارايىندا قازاقستاننىڭ مەملەكەتتىك حاۋىپسىزدىك كوميتەتىنىڭ ءتوراعاسى ماسىموۆپەن كەزدەستى.


　　ۋاڭ چيشان مىنانى ءبىلدىردى: جۇڭگو مەن قازاقستان تاتۋ كورشىلەر، جاقسى سەرىكتەر، ەكى ەلدىڭ قارىم – قاتىناسى قاشان دا جوعارى دەڭگەيدە بولىپ كەلەدى. ءتوراعا شي جينپيڭ مەن تۇڭعىش پرەزيدەنت نازاربايەۆتىڭ ستراتەگيالىق جەتەكشىلىگى مەن تىكەلەي ىلگەرىلەتۋىنىڭ ارقاسىندا، ەكى جاق باسشىلار ارا ءجيى قارىم – قاتىناس جاساپ، ساياسي جاقتاعى ءوزارا سەنىمدىلىكتى بەكەمدەدى، «ءبىر بەلدەۋ، ءبىر جولدى» كوركەيتۋدەگى جانە ءتۇرلى سالالارداعى سەلبەستىكتەردە مول تابىستارعا قول جەتكىزدى، حالىقارالىق ىستەردە تىعىز دا ءونىمدى تۇردە سايكەسىپ، ءبىر – ءبىرىنىڭ وزەكتى مۇددەسىنە ساياتىن ماسەلەلەردە ءوزارا باتىل قولداپ كەلدى. قازاقستاننىڭ جاڭا مىندەتكە وتىرعان پرەزيدەنتى توقايەۆ جۇڭگو حالقىنا تانىس كونەكوز دوسىمىز، جاقسى دوسىمىز. ەكى ەل باسشىلارىنىڭ جەتەكشىلىگىندە، جۇڭگو مەن قازاقستاننىڭ جاپپاي ستراتەگيالىق سەرىكتەستىك قارىم – قاتىناسىنىڭ قارىشتاپ دامۋداي جاقسى بەتالىستى ۇزدىكسىز ساقتاپ، ەكى ەل مەن ەكى ەل حالقىنا باقىت جاراتاتىنىنا كامىل سەنەمىز.


　　ءماسىموۆ مىنانى ءبىلدىردى: قازاقستان مەن جۇڭگو تاتۋ كورشى جانە ستراتەگيالىق سەرىكتەر، جۇڭگومەن قارىم – قاتىناستى دامىتۋ قازاقستاننىڭ سىرتقى ىستەر ساياساتىنىڭ ەڭ الدىمەن ويلاستىراتىن باعىتتارىنىڭ ءبىرى. قازاقستان جاق جۇڭگو جاقپەن «ءبىر بەلدەۋ، ءبىر جول» قۇرىلىسىن بىرگە ىلگەرىلەتۋدى، ەكى ەل قارىم – قاتىناسىنىڭ ۇزدىكسىز العا قاراي دامۋىن ىلگەرىلەتۋدى قالايدى.


　　كەلۋ قاينارى: حالىق تورابى