بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>ورتالىقتىڭ ءۇنى

شي جينپيڭ 23 - كەزەكتى سانت - پەتربۋرگ حالىقارالىق ەكونوميكا تالقى مىنبەرىنىڭ جالپى ماجىلىسىنە قاتىناستى ءارى ءسوز سويلەدى

شىت جاڭا باياندى دامۋ جولىن قول ۇستاسا اشىپ، اناعۇرلىم گۇلدەنگەن، كوركەم دە تاماشا دۇنيە ءجۇزىن بىرگە تۇلعالاۋدى باسا دارىپتەدى

2019.06.11 08:55   كەلۋ قاينارى : شينجياڭ گازەتى



  6 - ايدىڭ 7 - كۇنى 23 - كەزەكتى سانت - پەتربۋرگ حالىقارالىق ەكونوميكا تالقى مىنبەرىنىڭ جالپى ءماجىلىسى سانت - پەتربۋرگتە وتكىزىلدى. جۇڭگونىڭ مەملەكەت ءتوراعاسى شي جينپيڭ، رەسەيدىڭ زۇڭتۇڭى پۋتين، بولعاريانىڭ زۇڭتۇڭى رادەۆ، ارمەنيانىڭ زۇڭليى پاشينيان، سلوۆاكيانىڭ زۇڭليى پەللەگريني، بىرلەسكەن مەملەكەتتەر ۇيىمىنىڭ باس حاتشىسى گۇتتەرەس قاتارلىلار قاتىناستى. شي جينپيڭ «باياندى دامۋعا تاباندى بولىپ، گۇلدەنگەن، كوركەم دە تاماشا دۇنيە ءجۇزىن بىرگە تۇلعالايىق» دەگەن تاقىرىپتا ءسوز سويلەدى. سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن

  شينحۋا اگەنتتىگىنىڭ 6 - ايدىڭ 7 - كۇنى سانت - پەتربۋرگتەن بەرگەن حابارى (تىلشىلەر حو شياۋگۋاڭ، لو جۇن، حاۋ ۋيۋي). 23 - كەزەكتى سانت - پەتربۋرگ حالىقارالىق ەكونوميكا تالقى مىنبەرىنىڭ جالپى ءماجىلىسى 6 - ايدىڭ 7 - كۇنى سانت - پەتربۋرگتە وتكىزىلدى. جۇڭگونىڭ مەملەكەت ءتوراعاسى شي جينپيڭ، رەسەيدىڭ زۇڭتۇڭى پۋتين، بولعاريانىڭ زۇڭتۇڭى رادەۆ، ارمەنيانىڭ زۇڭليى پاشينيان، سلوۆاكيانىڭ زۇڭليى پەللەگريني، بىرلەسكەن مەملەكەتتەر ۇيىمىنىڭ باس حاتشىسى گۇتتەرەس قاتارلىلار قاتىناستى.

  شي جينپيڭ «باياندى دامۋعا تاباندى بولىپ، گۇلدەنگەن، كوركەم دە تاماشا دۇنيە ءجۇزىن بىرگە تۇلعالايىق» دەگەن تاقىرىپتا ءسوز سويلەپ، بىلاي دەپ باسا دارىپتەدى: دۇنيە جۇزىندە 100 جىلدا بولماعان زور وزگەرىس الدىندا، جۇڭگو جاق حالىقارالىق قوعاممەن بىرگە اشىق، كوپ نەگىزدى دۇنيە ءجۇزى ەكونوميكاسىن كۇش قوسا تۇلعالاپ، جالپىعا ءتيىمدى، سيىسىمدى باقىتتى قوعام قۇرۋعا قۇلشىنىپ، ادام مەن تابيعات جاراسىمدى بىرگە ءومىر سۇرەتىن كورىكتى مەكەندى قۇرۋعا كۇش سالىپ، شىت جاڭا باياندى دامۋ جولىن قول ۇستاسا اشۋدى قالايدى.

  شي جينپيڭ بىلاي دەپ باسا دارىپتەدى: بيىل جاڭا جۇڭگو قۇرىلعاندىعىنىڭ 70 جىلدىعى. دۇنيە جۇزىندەگى ەڭ ءىرى دامۋ ۇستىندەگى مەملەكەت جانە جاۋاپكەرشىلىك ارقالايتىن ءىرى ەل رەتىندە، جۇڭگو باستان - اياق باياندى دامۋ ۋادەسىن بۇلجىماستان ورىنداپ، باياندى دامۋدىڭ حالىقارالىق سەلبەستىگىن كۇشەيتۋگە وسكەلەڭ ءمان بەردى. 2013 - جىلى مەن ”ءبىر بەلدەۋ، ءبىر جول“دى بىرگە قۇرۋ باستاماسىن العا قويدىم، ونداعى ماقسات − ءار ەلدىڭ ءوزارا تيىمدىلىك جەتكىزىپ بىرگە يگىلىككە كەنەلۋىن، تىزە قوسا دامۋىن جۇزەگە اسىرۋ. ”ءبىر بەلدەۋ، ءبىر جول“دى بىرگە قۇرۋ بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك تارتىبىمەن نىسانا، پرينسيپ، اتقارۋ جولى جاقتارىندا وسكەلەڭ قابىسىپ، حالىقارالىق قوعامنىڭ بەلسەندىلىكپەن ءۇن قوسۋىنا جانە قولداۋىنا يە بولدى. بيىل 4 - ايدا 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرى بەيجيڭدە ءساتتى وتكىزىلدى، ءار جاق ”ءبىر بەلدەۋ، ءبىر جول“دى بىرگە قۇرۋدى جوعارى ساپامەن ىلگەرىلەتىپ، جاسىل، تومەن كومىرتەكتى، باياندى دامۋ جولىمەن جۇرۋگە ءبىر اۋىزدان قوسىلدى.

  شي جينپيڭ بىلاي دەپ اتاپ كورسەتتى: رەسەي جۇڭگونىڭ ءار سالاداعى سەلبەستىكتەردى ورىستەتۋىندەگى ماڭىزدى الدىمەن ويلاستىراتىن سەلبەستىك سەرىگى. ”ءبىر بەلدەۋ، ءبىر جول“دى بىرگە قۇرۋ پۋتين زۇڭتۇڭ باستاما ەتكەن ”ۇلى ەۆروپا - ازيا سەرىكتەستىك قارىم - قاتىناسى“ ۇستانىمىمەن ۇلاسادى، ەكى باستاما ءبىرىن - ءبىرى دەمەيدى، ءوزارا جەبەيدى، ءبىر - بىرىمەن قايشىلىقتى ەمەس، وڭىرلىك ەكونوميكانىڭ توعىسۋىن پارمەندى جەبەپ، ورتاق باياندى دامۋدى جۇزەگە اسىرادى.

  شي جينپيڭ بىلاي دەپ باسا دارىپتەدى: باياندى دامۋ دۇنيە جۇزىندەگى باسىم كوپ ساندى ەلدەردىڭ ورتاق تالاپ - تىلەگىنە ۇيلەسەدى. جۇڭگو جاق حالىقارالىق قوعاممەن بىرگە شىت جاڭا باياندى دامۋ جولىن قول ۇستاسا اشۋدى قالايدى.

  ءبىرىنشى، ءبىز بىرگە اقىلداسۋعا، بىرگە قۇرۋعا، بىرگە بولىسۋگە تاباندى بولىپ، اشىق، كوپ نەگىزدى دۇنيە ءجۇزى ەكونوميكاسىن كۇش بىرىكتىرە سومداۋىمىز كەرەك. جۇڭگو سىرتقا ەسىك اشۋدى ۇزدىكسىز كەڭەيتىپ، بازارعا كىرۋ رۇقساتىن جەڭىلدەتىپ، ءادىل باسەكەلى بازار ورتاسىن قالىپتاستىرادى. ءبىز ەكونوميكانىڭ جاھاندانۋ اياق الىسىن تۋى ايقىن تۇردە ىلگەرىلەتىپ، كوپ جاقتى ساۋدا ءتۇزىلىسىن قورعاپ، دۇنيە ءجۇزى ەكونوميكاسىنىڭ دامۋىنىڭ بىركەلكى بولماۋ، تەپە - تەڭ بولماۋ ماسەلەسىن كۇش سالا شەشىپ، قالىڭ دامۋ ۇستىندەگى ەلدەرگە اناعۇرلىم كوپ وراي جاراتامىز. جۇڭگو ءار ەلمەن 5G تەحنيكاسىن قامتىعان ەڭ جاڭا عىلىم - تەحنيكا تابىسىن بىرگە ءبولىسىپ، جاڭا وزەكتى باسەكەلىك قۋاتتى ورتاق جەتىلدىرۋدى قالايدى.

  ەكىنشى، ءبىز ادامدى نەگىز ەتۋگە تاباندى بولىپ، جالپىعا ءتيىمدى، سيىسىمدى باقىتتى قوعام قۇرۋعا قۇلشىنۋىمىز كەرەك. جۇڭگو كەدەيلىكتەن دالمە - ءدال ارىلتۋدان قامال الۋ شايقاسىن ۇزدىكسىز ويداعىداي جۇرگىزىپ، جۇمىستاندىرۋدى تىڭنان ارتتىرۋعا قۇلشىنىپ، كاسىپتىك تاربيەنى كۇش سالا سۇيەمەلدەپ، ەرىكتى قىزمەت وتەۋدىڭ، قايىرىمدىلىق ىستەرىنىڭ اقاۋسىز دامۋىن قولداپ، ءالسىز قاۋىمنىڭ زاڭدى ۇقىق - مۇددەسىن قامتاماسىز ەتەدى. ءبىز ءار ەلمەن كەدەيلەردى ازايتۋ، قوعامدىق قامتاماسىزداندىرۋ سياقتىلاردا اۋىس - كۇيىستى، سەلبەستىكتى كۇشەيتىپ، ءار ەل حالقىن اناعۇرلىم زور تابىس سەزىمىنە، باقىت سەزىمىنە، حاۋىپسىزدىك سەزىمىنە بولەۋدى قالايمىز.

  ءۇشىنشى، ءبىز جاسىل دامۋعا تاباندى بولىپ، ادام مەن تابيعات جاراسىمدى بىرگە ءومىر سۇرەتىن كورىكتى مەكەن قۇرۋعا كۇش سالۋىمىز كەرەك. ءبىز تۇنىق سۋ، جاسىل تاۋ − باعالى بايلىق دەگەن دامۋ ۇستانىمىنان جازباي، اسپانى اشىق، سۋى تۇنىق، توپىراعى مانات بولۋداعى 3 ۇلكەن قورعاۋ شايقاسىنىڭ جەڭىسىنە باتىل قول جەتكىزىپ، جاسىل ورتانى قورعاۋ كاسىبىن دامىتۋعا شابىتتاندىرىپ، قايتا تۋىندايتىن ەنەرگيانى كۇش سالا دامىتىپ، بايلىقتان ۇنەمدى، شوعىرلى جانە اينالمالى پايدالانۋدى جەبەپ، ءارقايسى جاقپەن تىزە قوسا الەمدىك كليمات وزگەرىسى، ورگانيزمدەردىڭ الۋان تۇرلىلىگىن قورعاۋ سياقتى كوكەي تەستى ماسەلەلەرگە توتەپ بەرىپ، «پاريج كەلىسىمى» سياقتى حالىقارالىق قوعامنىڭ ورتاق تانىمىن ويداعىداي تياناقتاندىرامىز.

  شي جينپيڭ بىلاي دەپ باسا دارىپتەدى: بەيبىتشىلىك پەن دامۋ ءالى دە بۇگىنگى ءداۋىردىڭ نەگىزگى تاقىرىبى، ادامزاتتىڭ تاعدىرى ەجەلدەن بۇگىنگىدەي تىعىز بايلانىسىپ كورگەن ەمەس، ءار ەلدىڭ مۇددەسى ەجەلدەن بۇگىنگىدەي تەرەڭ توعىسىپ كورگەن ەمەس، حالىقارالىق قوعام ءدوپ كەلگەن جاڭا تاقىرىپ، جاڭا سىن - سايىس تا كۇن سايىن ارتۋدا. ادامزات تاريحتىڭ ءتورت كوشەسىنىڭ تۇيىلىسىندە تاعى دا بوي كورسەتتى. باياندى دامۋ كەزەكتەگى الەمدىك ماسەلەلەردى شەشۋدىڭ ”التىن كىلتى“. جۇڭگو ءار جاقپەن قول ۇستاسا قۇلشىنىپ، باياندى دامۋ ۇستانىمىن ساقتاپ، ادامزاتتىڭ تاعدىرلاس ورتاق تۇلعاسى جاۋاپكەرشىلىگىن ايگىلەپ، كوپ جاقتىلىقتى دارىپتەپ، الەمدىك جونگە سالۋدى كەمەلدەندىرىپ، جەر شارى قىستاعىنىڭ باياندى بەيبىتشىلىگىن، تىنىشتىعىن بىرگە جەبەپ، اناعۇرلىم گۇلدەنگەن، تاماشا دۇنيە ءجۇزىن بىرگە جاراتۋدى قالايدى.

  پۋتين مىنالاردى ءبىلدىردى: دۇنيە ءجۇزىنىڭ جاعدايىندا قازىر ادامدى الاڭداتارلىق نىسايلار جارىققا شىقتى. 2008 - جىلى حالىقارالىق فينانس داعدارىسى تۋىلعاننان بەرى، دۇنيە ءجۇزى ەكونوميكاسىنىڭ قۇرىلىمدىق ماسەلەسى تۇبەگەيلى شەشىلمەدى، حالىقارالىق ساۋدانىڭ دۇنيە ءجۇزى ەكونوميكاسىن ارتتىرۋشى رەتىندەگى ىشكى قوزعاۋشى كۇش اسەرى تومەندەپ، قورعامپازدىق باس كوتەردى. بازارى جاڭادان گۇلدەنگەن ەلدەردىڭ قارقىندى دامۋى، دۇنيە ءجۇزى ەكونوميكاسىنداعى ىقپالىنىڭ ارتۋى الدىندا ءىشىنارا باتىس ەلدەرى ساۋدا قاقتىعىسىن تۋدىرۋ، فينانستىق زورەكەرلىك جۇرگىزۋ، قيت ەتسە سىڭار جاقتىلىقپەن جازالاۋ جانە قۇقاي كورسەتىپ باسا بيلەۋ، قالىپتى وقۋ - اعارتۋ، ءىلمي اۋىس - كۇيىسكە كەدەرگىلىك جاساۋ سياقتى ورىنسىز تاسىلدەر ارقىلى قىسىم جاسادى. ءىشىنارا باتىس ەلدەرىنىڭ جۇڭگونىڭ حۋاۋي سەرىكتەستىگىنە جاساعان قىسىمى وسىنىڭ تيپتىك دالەلى. پۋتين بىلاي دەپ باسا دارىپتەدى: دۇنيە جۇزىندە بارلىعىنا باپ كەلەتىن دامۋ ۇلگىسى جوق، ءار ەلدىڭ ءوز دامۋ جولىن تاڭداۋ ۇقىعى بار، ءارقانداي ەلدىڭ ءوز ەركىن بىرەۋگە زورلاپ تاڭاتىن ۇقىعى جوق. تەڭسىز بولعان حالىقارالىق ءتارتىپتىڭ ورنىقتى، باياندى بولۋى مۇمكىن ەمەس. حالىقارالىق قوعامنىڭ جاپپاي ورتاق تانىمى نەگىزىندە جاڭا حالىقارالىق ءتارتىپتى اقىلداسىپ، بىرلەسكەن مەملەكەتتەر ۇيىمىنىڭ حالىقارالىق ىستەردەگى وزەكتى ورنىنا شىنايى قۇرمەت ەتىپ، قالىڭ دامۋ ۇستىندەگى ەلدەردىڭ دامۋ ۇقىق - مۇددەسىنە تولىق كوڭىل ءبولۋ كەرەك. رەسەي حالىقارالىق قوعاممەن بىرگە ىنتىماقتاسىپ ورتاق سايىستارعا توتەپ بەرۋدى قالايدى.

  ماجىلىسكە قاتىناسقان وزگە باسشىلار جابال مىنالاردى ءبىلدىردى: جاھاندانۋ بوگەۋ بەرمەيتىن ءداۋىر اعىمى، ادامزات قوعامى ءدوپ كەلگەن ءتۇرلى ماسەلەلەر مەن سايىستار الدىندا جەكە سايىسۋ جارامايدى، ءار ەل، ءسوز جوق، تىزە قوسا توتەپ بەرۋى كەرەك. ولار مىنالاردى ءبىلدىردى: جۇڭگو كوپ جاقتىلىقتى، حالىقارالىق قاعيدا مەن ەركىن ساۋدانى قورعاۋدىڭ ماڭىزدى كۇشىنە اينالدى. ءار ەل سىڭار جاقتىلىققا باتىل قارسى تۇرىپ، كوپ جاقتىلىقتى جانە كوپ ۇيەكتەنۋ ءۇردىسىن قورعاۋى، بىرلەسكەن مەملەكەتتەر ۇيىمىنىڭ بەدەلى مەن رولىن قورعاۋى كەرەك. كەڭەسۋدى، تىلدەسۋدى جيىلەتىپ، الەمدىك جونگە سالۋدى كەمەلدەندىرىپ، ناقتى ىستەر سەلبەستىگىن تەرەڭدەتىپ، وزدەرىنىڭ دامۋ ستراتەگياسىن، سونداي - اق ەۆروپا - ازيا ەكونوميكالىق وداعى سياقتى وڭىرلىك سەلبەستىك مەحانيزمىن ”ءبىر بەلدەۋ، ءبىر جول“مەن ۇشتاستىرۋدى كۇشەيتىپ، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن جاپپاي تياناقتاندىرىپ، جاسىل، تومەن كومىرتەكتى، باياندى دامۋ جولىن بەلسەنە قاراستىرىپ، سيفر جىلعاسىن جويىپ، ەكونوميكانىڭ جاھاندانۋىنىڭ اناعۇرلىم تەپە - تەڭ، سيىسىمدى، ءادىل، باياندى باعىتقا قاراي دامۋىن ىلگەرىلەتىپ، حالىقارانىڭ حاۋىپسىزدىگى مەن دۇنيە ءجۇزىنىڭ جاراسىمدىلىعىن قورعاۋ كەرەك.

  سۇراۋعا جاۋاپ بەرىپ، پىكىر اۋىستىرۋ بۋىنىندا، شي جينپيڭ تاعى دا جاھاندانۋعا كەرى اعار كەلۋ، ”ءبىر بەلدەۋ، ءبىر جول“دى بىرگە قۇرۋ، چاۋشيان تۇبەگىن يادروسىزداندىرۋ سياقتى ماسەلەلەر جونىندە جالپى ءماجىلىس جۇرگىزۋشىسىنىڭ سۇراۋلارىنا جاۋاپ بەردى.

  شي جينپيڭ بىلاي دەپ اتاپ كورسەتتى: جاھاندانۋ تاريحتىڭ ۇلكەن بەتالىسى، جۇڭگو جاھاندانۋدىڭ ەڭ مىزعىماس دارىپتەۋشىسىنىڭ جانە قورعاۋشىسىنىڭ ءبىرى. كەزەكتەگى دۇنيە جۇزىندە جارىققا شىققان جاھاندانۋعا قارسى كەلۋ نىسايى تەك جاھاندانۋ اۋقىمىندا پايدا بولعان ءىشىنارا تولقىن شاشىراندىلارى عانا، ول جاھاندانۋدىڭ ۇلكەن تولقىنىن توسا المايدى. جاھاندانۋدا ءىشىنارا ماسەلەلەردىڭ تۋىلۋى قورقىنىشتى ەمەس، وعان بولا قاقالامىن دەپ اس ىشپەي قويىپ، قيت ەتسە بولعانى قورعانىمپازدىق، سىڭار جاقتىلىق شارالاردى قولدانۋعا بولمايدى، كورشىسىنە زيان جەتكىزەتىن باس پايداشىلدىق ىستەۋگە بولمايدى. ءبىز مىنانى تانىپ جەتۋىمىز كەرەك، جاھاندانۋدا جارىققا شىققان ماسەلەدە اڭىس ەتىلگەنى الەمدىك جونگە سالۋدىڭ كەنجە قالۋى. بۇل ماسەلەلەردى شەشۋ ءۇشىن، ەسىك اشۋدى باعدار ەتۋگە تاباندى بولىپ، كوپ جاقتى ساۋدا ءتۇزىلىسىن باتىل قورعاۋ كەرەك. ءبىز جەكە قازان اسپاقشى ەمەسپىز، قايتا قازىر اتقارىلىپ جاتقان حالىقارالىق جۇيەنى كەمەلدەندىرمەكشىمىز. ادىلدىكتى، تەڭدىكتى نەگىز ەتىپ، بازارى جاڭادان وركەندەگەن مەملەكەتتەر مەن دامۋ ۇستىندەگى مەملەكەتتەردىڭ كوپ جاقتى قۇرىلىمدارداعى ۋاكىلدىك سيپاتىن جانە سويلەۋ ۇقىعىن جوعارىلاتىپ، جونگە سالۋ قۇرىلىمى مەن مۇددە ءبولىسىن اناعۇرلىم تەپە - تەڭ دە ۇيلەسىمدى ەتۋىمىز كەرەك. ءوزارا قۇرمەت ەتەتىن پوزيتسيا ۇستانىپ، ءار ەلدىڭ قوعامدىق ءتۇزىمى مەن دامۋ جولىنا قۇرمەت ەتىپ، بايلانىستى، سايكەسۋدى كۇشەيتىپ، الاۋىزدىقتاردى ۇيلەسىمدى شەشۋىمىز كەرەك.

  شي جينپيڭ باسا دارىپتەپ بىلاي دەدى: جۇڭگو حالىقارالىق قوعامدى ءبۇلدىرۋشى ەمەس، قايتا قۇرۋشىسى بولۋعا، ور قازۋشى ەمەس، قايتا كوپىر سالۋشىسى بولۋعا كۇش سالادى. ءبىز دوستار شەڭبەرىمىزدى كەڭەيتۋگە كۇش سالامىز، جۇڭگو - رەسەي جان - جاقتى ستراتەگيالىق ىستەستىك سەرىكتەس. جۇڭگو ازياداعى، ەۆروپا وداعىنداعى، افريكاداعى، لاتىن امەريكاسىنداعى، وڭتۇستىك تىنىق مۇحيتتاعى ەلدەرمەن سەلبەستىك سەرىككە اينالدى. جۇڭگو - امەريكا قۇراما شتاتتارى اراسىنداعى بارىس - كەلىس ءجيى، مۇددەسى توعىسقان، ايتىلمىس ءۇزىلىپ قالدى دەۋشىلىك اقىلعا سيمايدى. مۇنى امەريكا قۇراما شتاتتارى جاقتىڭ ءار سالاسىنداعىلاردىڭ دا كورگىسى كەلمەيتىنىنە سەنەمىز.

  شي جينپيڭ بىلاي دەپ اتاپ كورسەتتى: ”ءبىر بەلدەۋ، ءبىر جول“دى بىرگە قۇرۋ باستاماسى العا قويىلعان 6 جىلدان بەرى، ءار جاقتىڭ بەلسەنە ءۇن قوسۋىنا جانە قولداۋىنا يە بولدى، ات سالىسقان جاقتار تاريحتاعى ”ءبىر بەلدەۋ، ءبىر جول“ كولەمىنەن الدەقايدا اسىپ، وسى باستامانىڭ قۋاتتى ۇيىستىرۋ كۇشىن تولىق ءتۇسىندىردى ءارى بۇل تەك جۇڭگونىڭ عانا تىلەگى ەمەس. ”ءبىر بەلدەۋ، ءبىر جول“ بىرگە كەڭەسۋگە، بىرگە قۇرۋعا، بىرگە بولىسۋگە تاباندى بولادى، ءوزارا قۇرمەتتەۋگە، ءوزارا پايدا جەتكىزۋگە، ورتاق يگىلىككە كەنەلۋگە تاباندى بولادى، استە كەيبىرەۋلەر ايتقان وسى زامانعى مارشالل جوسپارى ەمەس. ”ءبىر بەلدەۋ، ءبىر جول“ استە ايتىلمىس جۇڭگونىڭ وتارلاۋ جوسپارى دا ەمەس، جۇڭگونىڭ ەجەلدەن وزگە ەلدى وتارلاۋ تاريحى بولعان ەمەس. ءبىز جۇڭگونىڭ ءوز ءىسىن باتىل تۇردە ويداعىداي ىستەيمىز ءارى ”ءبىر بەلدەۋ، ءبىر جول“دى ۇزدىكسىز بىرگە قۇرۋ ارقىلى، ادامزاتتىڭ تاعدىرلاس ورتاق تۇلعاسىن قۇرۋعا قۇلشىنامىز. ءبىز وسى مۇراتتىڭ حالىقارالىق قوعامدا ءتىپتى دە كەڭ ورتاق تانىمعا يە بولاتىندىعىنا ءارى مۇنىڭ، ءسوز جوق، جۇزەگە اساتىندىعىنا سەنەمىز.

  شي جينپيڭ مىنانى اتاپ كورسەتتى: چاۋشيان تۇبەگى ماسەلەسىندە حالىقارالىق قوعام چاۋشيان مەن امەريكا قۇراما شتاتتاردى ەكى جاقتىڭ تىلدەسۋ ارقىلى ءوزارا سەنىمدىلىك ورناتىپ، ءوزارا كوڭىل بولەتىن ماسەلەلەرىن شەشىپ، تۇبەك ماسەلەسىنىڭ ۇيلەسىمدى شەشىلۋىن كۇش بىرىكتىرىپ ىلگەرىلەتۋگە ۇزدىكسىز ىنتالاندىرۋ كەرەك. جۇڭگو جاق جاراستىرۋعا، كەڭەس وتكىزۋدى جەبەۋگە ۇزدىكسىز بەلسەنە كۇش سالىپ، تۇبەكتىڭ بەيبىتشىلىگى مەن ورنىقتىلىعىن قورعايدى.

  پۋتين سۇراققا جاۋاپ بەرىپ، پىكىر اۋىستىرۋ بۋىنىندا جۇڭگو - رەسەي ەكى ەلدىڭ دوستىعى مەن تىعىز سايكەستىك سەلبەستىگىن تاعى دا القاپ، رەسەي مەن جۇڭگونىڭ ستراتەگيالىق سەرىكتەر ەكەندىگىن، ەكى ەلدىڭ ءوزارا قۇرمەت ەتۋ جانە تەڭدىك نەگىزىندە ەكى جاقتى قارىم - قاتىناستى ىلگەرىلەتۋگە تاباندى بولاتىندىعىن، ءوزارا ىستەستىك جاساسۋدىڭ بولاشاعىنىڭ كەڭ ەكەندىگىن، حالىقارالىق ىستەردەگى ىستەستىگىنىڭ مول ناتيجەلى بولعاندىعىن ءبىلدىردى.

  پۋتين مىنانى ءبىلدىردى: ءتوراعا شي جينپيڭ ورتاعا قويعان ”ءبىر بەلدەۋ، ءبىر جول“ باستاماسى ءار ەلگە وراي الا كەلدى، جۇڭگو جاق وسى باستامانى ىلگەرىلەتكەن كەزدە ەشقاشان باسقالارعا زورلاپ تاڭعان ەمەس. ماجىلىسكە قاتىناسقان وزگە ەلدەردىڭ باسشىلارى دا ”ءبىر بەلدەۋ، ءبىر جول“دى بىرگە قۇرۋ سەلبەستىگىنە بەلسەنە ات سالىسۋدى قالايتىندىقتارىن، كەيبىر ەلدەردىڭ ”ءبىر بەلدەۋ، ءبىر جول“دان الاڭداۋىنىڭ قاجەتى جوق ەكەندىگىن ءبىلدىردى.

  ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى. (تيانشان تورابى)

جاۋاپتى رەداكتورى : نۇرعيسا قۇرمانجان ۇلى

 سۋرەت

  • سۋرەتتە: 6 – ايدىڭ 2 – كۇنى حالىق ساقشىلارى قيمىل بارىسىندا اتا – انالار مەن بالالارعا الداپ ساتۋدان ساقتانۋدى ۇگىتتەۋ ماتەريالدارىن تاراتۋدا. شينحۋا اگەنتتىگى (قوعام حاۋىپسىزدىگى مينيسترلىگى بەرگەن)