- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«ايگەرىم» كوركەم فيلمىنىڭ جابىق كورسەتىلىمى ۇرىمجىدە ءوتتى
2015.06.29 15:19 كەلۋ قاينارى : ءتاڭىرتاۋ تورابى
24 - ماۋسىم كۇنى، ءۇرىمجى قالاسىندا قازاق زيالىلارى مەن كينو ماماندارىنىڭ پىكىرلەرىن تىڭداپ وي ءبولىسۋ ماقساتىندا، قازاقستاندىق رەجيسسەر ەركىن راقىشەۆ تۇسىرگەن «ايگەرىم» كوركەم فيلمىنىڭ جابىق كورسەتىلىمى ءوتتى. كينو الماتى مەن ءۇرىمجى قالالارىندا تۇسىرىلگەن. باستى رولدەردى قازاقستاندىق اكتەرلەرمەن بىرگە جۇڭگولىق اكتەرلەر دە سومداعان. جارىمجان، زاعيپ قىزدىڭ ومىرىنە ارقاۋ بولعان فيلم بۇل جاقتاعى كورەرمەندەردىڭ كوڭىلىنەن شىقتى. كوپشىلىگى كوزىنە جاس الا وتىرىپ كوردى. فيلمدە ىزگىلىك پەن ماحاببات، ادامگەرشىلىك پەن ۇلتتار اراسىنداعى دوستىق قارىم - قاتىناستار قاتار ءوربيدى.
فيلم سوڭىندا ءسوز العان رەجيسسەر ەركىن راقىشەۆ فيلمنىڭ يدەياسى مەن ءتۇسىرىلۋ ماقساتىن ايتا كەلىپ، بىلاي دەدى: «مەن 1931 - 1933 جىلدارى قازاقستاندا بولعان اشارشىلىق جايلى «اشارشىلىق» دەرەكتى فيلمىن ءتۇسىرۋ بارىسىندا، قازاق ەلى - جۇڭگو قارىم - قاتىناسىنا بايلانىستى كوپتەگەن قۇجاتتارعا كەزدەستىم. سول جىلدارى، كەڭەس ۇكىمەتىنىڭ زۇلىمدىق ساياساتىنان قازاق ۇلتىنىڭ جارتىسىنان استامى قىرىلىپ قالعان. زورلىق - زومبىلىق پەن اشتىقتان قاشقان ءجۇز مىڭداعان قازاق جۇڭگو جەرىنە كەلىپ پانالاپ، جۇڭگو حالقىنىڭ كومەگىنىڭ ارقاسىندا امان قالعان. بۇگىن دە سول بابالارىمىزدان تاراعان ۇرپاقتار ءتىلى مەن مادەنيەتىن، ءدىنى مەن سالت - ءداستۇرىن ساقتاپ، ءوسىپ - ءونىپ وتىر. وسى ماڭىزدى وقيعانى نەگىزگە الىپ، جۇڭگو مەملەكەتىنىڭ قازاق ۇلتىنا جاساعان جاقسىلىعىنا راحمەت ايتۋ ماقساتىندا وسى كوركەم فيلمدى ءتۇسىردىم».
فيلم اياقتالعان سوڭ، كورەرمەندەر ءوز ويلارىن ورتاعا سالدى.
العاشقى ءسوز العان مادەنيەت تانۋشى، عالىم - بەكسۇلتان كاسەي ۇلى: «تالاي كينولاردى كورىپ ءجۇرمىن. بۇل كينو مەنى قاتتى تەبىرەنتتى. فيلمدە ەكى ەلدىڭ اراسىنداعى دوستىق - تاريحقا نەگىزدەلىپ ناقتى كورسەتىلگەن. وسىنداي تۋىندىلار ۇلتتار اراسىنداعى ىنتىماقتاستىق پەن دوستىقتى ودان ارى نىعايتۋعا سەپتىگىن تيگىزەدى»،ـــ دەدى.
بۇرىنعى وقۋ - اعارتۋ مينيسترى، قارت پەنسيونەر ءمانسۇر ءابىل ۇلى: «زاماناۋي فيلمگە تاريحي وقيعانىڭ سىنالاي ەنگىزىلۋى ـــ جاس ۇرپاقتى وتان سۇيگىشتىككە تاربيەلەيدى. بۇل كينونى مۇرالىق تاربيە وقۋلىعى رەتىندە قولدانىسقا ەنگىزىپ، ەلىمىزدە تۇراتىن ءاربىر ازامات كورۋى كەرەك».
جۇڭگولىق رەجيسسەر - ۋ گان: «فيلم جەكەلەگەن كەمشىلىكتەرىنە قاراماي وتە ءساتتى شىققان. سوزدەرىن تۇسىنبەسەم دە قاتتى اسەر الدىم. اكتەرلەردىڭ ويىنى ۇنادى. مەن ءوزىم ءبىر فيلمگە دايىندىق جاساپ، اكتەرلەردى تاڭداپ جاتىرمىن. وسى كينوداعى باستى رولدىڭ ءبىرىن سومداعان ەرىك جۇماعۇلوۆتى ءوز فيلمىمە تۇسۋگە شاقىرامىن».
سىنشى، باسپاگەر، جۋرناليست اسان ابەۋ ۇلى: «كەمتار ادامداردىڭ قوعامداعى تراگەدياسىن جەرىنە جەتكىزە كورسەتىپ بارىپ، اياعىندا كورەرمەنگە قۋانىش ءلاززاتىن سيلاعان، ۇلتتار اراسىنداعى دوستىقتى جىرلايتىن كوركەمدىك ورەسى جوعارى تۋىندى دەپ قارايمىن».
جۇڭگولىق رەجيسسەر - قۇربانجان: «فيلمنىڭ سەناريى وتە تارتىمدى جازىلعان. اكتەرلەر ءوز رولدەرىنە بايلانىستى وتە ءساتتى تاڭدالىنعان. كاسىبي شەبەرلىكتەرى دە جوعارى دەڭگەيدە، ءوز كەيىپكەرلەرىن شىنايى سومدايدى. اۋەنمەن ارلەنۋىندە ءبىراز كەمشىلىكتەر بار. ساز سىرنايدى كوبىرەك قولدانسا جاقسى بولار ەدى».
ءىس - شارانىڭ سوڭىندا، كوپشىلىكتىڭ كوڭىلىنەن شىققان فيلمنىڭ كورسەتىلىمىنە مۇرىندىق بولعان بەلگىلى اكتەر دالەلحان قادىر ۇلى مەن كاسىپكەر ەسبول، فيلمنىڭ رەجيسسەرى ەركىن راقىشيەۆ پەن سەناريىن جازعان رامازان قۇر بەرىلگەن ۇسىنىس - پىكىرلەردى جىلى قابىلداپ، كوركەم فيلمنىڭ ءساتتى شىعۋىنا ءوز سەنىمدەرىن ءبىلدىردى. ەكى ەل دوستىعىنا ارقاۋ بولعان وسى كوركەم فيلم جۋىق ارادا كورەرمەندەرگە جول الادى.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
