بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>شينجياڭ حابارلارى

«شينجياڭ قىرعىز ادەبيەتى» جۋرنالىنىڭ 200 سانعا تولعاندىعى قۇتتىقتالدى

2015.09.17 16:15     كەلۋ قاينارى : شينجياڭ گازەتى

  ماقسات قيزات ۇلى حابارلايدى:

  1981 - جىلدان بەرى سۇيىكتى شىعارمالار بەرۋمەن ەل ءىشى - سىرتىنا كەڭىنەن تانىمالى بولىپ كەلە جاتقان «شينجياڭ قىرعىز ادەبيەتى» جۋرنالى مەكەمەسى 11 - قىركۇيەك تۇستەن بۇرىن ۇرىمجىدە شينجياڭنىڭ ءارقايسى وڭىرىندەگى قالامگەرلەرىن شاقىرىپ، جۋرنالدىڭ 200 سانعا تولعاندىعىن قۇتتىقتادى.

  جۋرنالدىڭ 34 جىلدىق بايسالدى ءارى قايراتتى ساپارى جۇڭگو قىرعىزدارىنان تالايلاعان تالانتتى جازۋشىلاردى، تەبىندى اقىنداردى، تولعامدى سىنشىلاردى ادەبيەت ايدىنىنا الىپ كەلدى. زامانعا ساي وي تۇزەگەن جۋرنالدان رۋحاني تۇيسىكتەرىن تۇلەتىپ، شابىتتارىن شىڭداي تۇسكەن قىرعىز قالامگەرلەرى ءتۇرلى جانردا قالام تەربەپ، قوعامداعى قوردالى ماسەلەلەردى قوتارا جازىپ، ۇلتتىق ادەبيەتتىڭ تولقىنىنا تامشىداي بولسا دا تەرىن توكتى، سونىمەن قوسا قىرعىز قالامگەرلەرى تورتكىل دۇنيەگە تانىمالى الەمدىك جازۋشىلاردان وي الىپ، كەمەلدەنگەن جۇڭگو جازۋشىلارىنىڭ شىعارمالارىنان ويانىپ، كەڭدىك پەن تەرەڭدىككە بوي الىپ، قاتپارى قالىڭ شىعارمالاردى حالقىنا سيلاي ءبىلدى.

  «شينجياڭ قىرعىز ادەبيەتى» جۋرنالىنىڭ جەڭىستى جىلدارىن ەسكە العان جۋرنالدىڭ باس رەداكتورى تولقىن تۇردى ۇلى جۋرنالدىڭ 200 سانعا تولعاندىعىن قۇتتىقتاي كەلە بىلاي دەدى: سەپكەن ءداننىڭ ورىلار شاعى بولادى، سول تاقىلەتتەس اشتى تەردىڭ بوداۋىنىڭ ارقاسىندا، جۋرنالدا «قارا ءسوزدىڭ قايماعى»، «ءسوز مەرگەنى»، «دۇنيە ادەبيەتى»، «تۋىسقان ۇلتتار ادەبيەتى»، «كوركەم اۋدارما»، «ەل ءىشى − ونەر كەنىشى»، «ادەبيەت تانۋ جانە ادەبيەت سىنى»، «ساحنا كوركى»، «ارداگەرلەر اماناتى» قاتارلى 20دان استام تاقىرىپتاعى ايدار اشىلىپ، «شينجياڭ قىرعىز ادەبيەتى» جۋرنالى ءوزىنىڭ قوعامدىق، ادەبي، كوركەمدىك سيپاتتارى تەڭ توعىسقان، «ءتورت اياعى تەڭ جورعا» جۋرنال ەكەنىن الىس - جۋىققا ايتارلىقتاي ايعاقتادى. بۇل دا بولسا تارلانبوز رەداكتورلاردىڭ تاجىريبەلىلىگىنىڭ، جاس بۋىن رەداكتورلاردىڭ تالانتتىلىعىنىڭ تاپتىرماس دالەلىندەي ەدى.

  «شينجياڭ قىرعىز ادەبيەتى» جۋرنالىنىڭ پاراقتارىنداعى جازۋلارعا كوز قىدىرتساڭىز ءار ءتۇرلى جانرداعى شىعارمالاردا قىرعىز ەلىنىڭ باعزى زاماننان كەلە جاتقان اتا تاريحى، اسىل ءداستۇرى، مايەكتى مادەنيەتى، دايەكتى ادەبيەتى، ءتۇيىندى فيلوسوفياسى، ءيىرىمدى ەتنوگرافياسى، كەلىسىمدى ويلارى، كەلەشەك تاعدىرى كەڭىنەن قامتىلا باياندالعان. جۋرنال مازمۇنىنداعى مايدا جىرلار مەن مايەكتى پوەمالار، اقىلعا ورانعان اڭگىمەلەر مەن ناقىلعا قۇرىلعان پوۆەستەر، كەڭ تىنىستى روماندار مەن كەرىمسال ىرىستى ساحنالىق شىعارمالار قىرعىز حالقىنىڭ كەشەگىسىنەن ماعلۇمات ايتىپ، بۇگىنىنەن مالىمەت بەرىپ، كەلەشەگىنەن كەڭەس شەرتەدى. بۇل جۋرنال قىرعىزداردىڭ زامان تالابىنا لايىق وي جۇگىرتىپ، تاربيەلى دە ويلى ءومىر كەشۋىنە ۇلكەن جول اشىپ وتىر، ونىڭ باستى ماقساتى − ەلدى ءداۋىردىڭ كوشىنەن قالدىرماي، جۇڭحۋا ۇلتتارىنىڭ ۇلى ىنتىماعىن بەرىك نىعايتىپ، ۇلتتىق ادەبيەتتى ۇزاقتان ۇلىقتاپ، ونى الەم ادەبيەتىمەن يىق تىرەستىرۋ، سول ارقىلى قىرعىز حالقىنىڭ ساناسىن وياتىپ، ساپاسىن جوعارىلاتۋ. مىنە سوندىقتان دا كۇنى كەشە عانا قومۇزىن قۇشاقتاپ «ماناسىن» جىرلاعان قىرعىزدىڭ بۇل كۇندەرى «شينجياڭ قىرعىز ادەبيەتى» دەيتىن وسى ءبىر ونەگەلى جۋرنالىن تۇمارىنداي ارداقتاپ، قوينىنا تىعىپ، قولتىعىنا قىسىپ ءجۇرۋى زاڭدى دا. جۇڭگو قىرعىز جازبا ادەبيەتىنىڭ جىرشىسى بولعان ىرىسبەك اۋقان، تۇرعانباي قىلىشبەك، زۇنۇن تەمىر، سەيپىدىن قىلىشبەك قاتارلى قالامگەرلەر جۋرنال العاش وقىرمانمەن بەت كورىسكەن ساتتە قولدارىنداعى قالامىن قاپىسىز سىلتەپ، ءار ءتۇرلى جانرداعى شىعارمالارىن جۋرنالعا ۇزبەي جاريالاپ، ەكىنشى توپ اقىن - جازۋشىلاردىڭ ءسوز ونەرىنە سۇبەلى ەڭبەك ەتۋىنە ۇلگى بولدى. سونىمەن ءبىرىنشى توپ تۇلپارلاردىڭ تىنىسىنان ءتالىم الىپ، دۇبىرلەرىنە ءدۇبىر قوسۋعا اسىققان ابدىراحمان سىمايىل، جۇماقادىر جاقىپ، تاشكەن ابدىراي، بەكەن جۇمالى قاتارلى جاسامپازدىق ەڭبەكتىڭ جىرشىلارى الدىڭعى اعالارىنىڭ ءىزىن سۋىتپاي، ادەبيەتتەگى ىنتاسىن بولەكشە بايقاتىپ، جۋرنالدىڭ جەتپەي جاتقان ءسوزىن جوقتاپ، تولىسپاي جاتقان تۇستارىن تولىقتاپ شىعا كەلدى.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.