شينجياڭنىڭ قار - مۇز كاسىبىنىڭ التىن ءداۋىرىن اشتى(1)

− مەملەكەتتىك 13 - كەزەكتى قىسقى سپورت جارىسىنىڭ اسەرى جونىندە(2)

2016.02.06 11:15   كەلۋ قاينارى : شينجياڭ گازەتى

　　كەشە عانا اياقتاعان مەملەكەتتىك 13 - كەزەكتى قىسقى سپورت جارىسىنىڭ قىزىقتارى كوز الدىمىزدا تۇر. شينجياڭنىڭ وتاعاسىلىعىمەن وتكەن بۇل جارىس بۇكىل ەل حالقىن جالت قاراتتى. ول جۇڭگونىڭ قىسقى سپورتىنىڭ دامۋ تاريحىنداعى جاڭا ءبىر بەلەس قانا ەمەس، شينجياڭنىڭ قار - مۇز كاسىبىنىڭ التىن ءداۋىرىنىڭ اشىلعاندىعىن اڭعارتتى.

　　قار - مۇز كاسىپ باقشاسى وڭىرلەرىنىڭ دامۋى قارقىن الدى

　　تەڭىز دەڭگەيىنەن 1650 مەتر بيىكتىكتەگى شينجياڭ مۇز ءۇستى سپورتى ورتالىعى مەملەكەتتىك 13 - كەزەكتى قىسقى سپورت جارىسىنىڭ «ۇلكەن سىناعىنان» ءوتتى، سپورتشىلار، باپكەرلەر، قار - مۇز سپورتىنىڭ ماماندارى ءبىر اۋىزدان «ەل ىشىندە جالعىز، ازيادا بىرەگەي، دۇنيە جۇزىلىك دەڭگەيدەگى ساراي» دەپ القادى. «تەز سىرعاناۋ سارايىنا قاتىرىلعان مۇزدىڭ ساپاسى وتە تاماشا، سپورتشىلار ءۇشىن دە حاۋىپسىز، كەدەرگىسى از، دۇنيە جۇزىلىك رەكوردتىڭ جاڭالانۋىنا دا ەرەكشە سەپتىگىن تيگىزدى». 21 - قاڭتاردا شينجياڭ مۇز ءۇستى سپورتى ورتالىعىنىڭ قىسقا اينالىمدى سىرعاناۋ، مانەرلەپ سىرعاناۋ سارايىندا، فان كىشين مەن لي جينيۇي دۇنيە جۇزىلىك رەكوردتى جاڭالاعاننان كەيىن، اۆستراليادان كەلگەن ەرەسەكتەر گرۋپپاسىنىڭ تورەشىسى جيم حايۆيس وسىلاي دەدى.

　　مەملەكەتتىك 13 - كەزەكتى قىسقى سپورت جارىسىنداعى قار ءۇستى ويىندارى وتەتىن جىبەك جولى حالىقارالىق قار شاڭعى الاڭى مەن بوعدا كولى حالىقارالىق قار شاڭعى الاڭى دا جارىسقا قاتىسۋشى قۇرامالاردىڭ القاۋىنا يە بولدى.

　　دۇنيە جۇزىندە بىرەگەي دەڭگەيدە تۇراتىن الاڭدار مەن سارايلار شينجياڭنىڭ قار - مۇز كاسىبىنىڭ زور دامۋىنىڭ «ۇدەتكىشىنە» اينالىپ ۇلگەردى. 26 - قاڭتاردا مەملەكەتتىك دەنە تاربيە باس مەكەمەسى باستىعىنىڭ كومەكشىسى گاۋ جىدان: مەملەكەتتىك 13 - كەزەكتى قىسقى سپورت جارىسىنىڭ سپورت الاڭدارى مەن سارايلارى مەملەكەتتىك قۇرامانىڭ، شينجياڭ قۇراماسىنىڭ، سونداي - اق بۇكىل ەلدەگى تۋىسقان ولكەلەردىڭ قۇرامالارىنىڭ ماڭىزدى جاتتىعۋ بازاسىنا اينالادى. بەيجيڭدە 2022 - جىلى وتەتىن قىسقى وليمپيادانىڭ الدىندا، ەلىمىز ءبىر قىدىرۋ جوعارى دەڭگەيلى قار - مۇز سپورتى جارىستارىن وتكىزۋگە ءوتىنىش بەردى جانە ۇستىنە الىپ وتكىزەدى، سول كەزدە بۇل جەرگە ماڭىزدى تاڭداۋ تۇسەتىن بولادى، − دەدى.

　　قار - مۇز كاسىبىنىڭ دامۋىنا جوعارى دەڭگەيدەگى جارىستاردىڭ دەمەۋى قاجەت. «بۇگىندە حالىقارالىق كونكيشىلەر بىرلەستىگى مەن حالىقارالىق شاڭعىشىلار بىرلەستىگى بىزبەن قاتىستى ىستەر جونىندە اڭگىمەلەسىپ، اقىلداستى، ءبىز الداعى كۇندەردە شينجياڭداعى ءبىر قىدىرۋ حالىقارالىق دەڭگەيدەگى قىسقى سپورت جارىستارىن وتكىزۋگە ۇمتىلامىز ءارى حالىقارالىق جوعارى دەڭگەيدەگى قىسقى سپورت جارىسىنىڭ برەندىن جاساۋعا كۇش سالامىز»، − دەدى اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ شۋجيى لي گۋاڭميڭ.

　　شينجياڭنىڭ قار - مۇز كاسىبىنىڭ دامۋى ساياساتتىق تيىمدىلىكتەن كەندە ەمەس. 2015 - جىلى اۆتونوميالى رايون شىعارعان «دەنە تاربيە كاسىبىنىڭ دامۋىن تەزدەتىپ، سپورتتىق تۇتىنۋدى ىلگەرىلەتۋ جونىندەگى اتقارۋ پىكىردە» شينجياڭنىڭ مەملەكەتتىك 13 - كەزەكتى قىسقى سپورت جارىسىن وتكىزۋ ورايىندا، قوعامداعى كۇشتەردى قار - مۇز سپورت الاڭدارىنىڭ قۇرىلعىلارىن ۇزدىكسىز كەمەلدەندىرۋگە جەتەلەۋ ارقىلى، 2025 - جىلعا دەيىن شينجياڭ مۇز ءۇستى سپورتى ورتالىعىن وزەك ەتكەن مۇز ءۇستى سپورت كاسىبى باقشاسىنىڭ؛ ءۇرىمجىنىڭ نانشان تاۋى، بوعدا كولى، التايداعى گەنەرال تاۋى، ىلەنىڭ كۇنەسى سياقتى جەرلەردى ءتۇيىن ەتكەن ءبىر توپ قار ءۇستى سپورتى كاسىپ باقشالارىنىڭ قۇرىلاتىندىعى العا قويىلدى.

　　قىسقى ساياحاتتىڭ «تابىسى»

　　سانجى حۇيزۋ اۆتونوميالى وبلىستىق حالىق ۇكىمەتىنىڭ ورىنباسار باس حاتشىسى ليۋ ۋانلين 27 - قاڭتار كۇنى: تيانشان بوعدا كولى حالىقارالىق شاڭعى الاڭىنا بيىل 150 مىڭ ادام - رەت كەلەدى دەپ مەجەلەنۋدە، ال بىلتىر 10 مىڭ ادام - رەت كەلگەن - دى، − دەگەندى قۋانا ايتتى. ال التايدا جاڭا اياقتاعان «ۇلىڭگىر كولىندە قىستا بالىق اۋلاۋ مەرەكەسى» وتكىزىلگەن 3 كۇندە 110 مىڭ ادامدى قابىلداعان. قاشقاردىڭ پوسكام التىن توراڭعى حالىقارالىق قار شاڭعى الاڭىنا جاڭا جىل كەزىندە 10 مىڭعا تارتا ادام كەلگەن.
«مەملەكەتتىك 13 - كەزەكتى قىسقى سپورت جارىسىنىڭ شينجياڭنىڭ قىسقى ساياحاتىنا الا كەلگەن ورايى قار - مۇز سپورتىنىڭ تابىسىنان كەم سوقپايدى»، − دەدى اۆتونوميالى رايوندىق ساياحات مەكەمەسى پارتيا باسشىلىق گرۋپپاسىنىڭ شۋجيى لي جيدۇڭ. جارناما ونىمدىلىگىنىڭ قانداي بولاتىندىعى كوپشىلىككە ايتپاساقتا ايان، ونان دا ماڭىزدىسى، مەملەكەتتىك 13 - كەزەكتى قىسقى سپورت جارىسىنىڭ وتكىزىلۋى شينجياڭنىڭ ساياحات ىستەرىنە ءبىر توپ ماماندانعان تەحنيكا دارىندىلارىن تاربيەلەپ بەردى، شينجياڭنىڭ قىزمەت وتەۋ دەڭگەيى، الدە قامتاماسىز ەتۋ قابىلەتى بولسىن بارىندە كورنەكتى ءوسۋ بولدى، بۇل كاسىپ سالاسىنىڭ جۇمساق قۋاتىن جوعارىلاتادى، شينجياڭنىڭ قار - مۇز ساياحاتىنىڭ ماركالانۋ اياق الىسىن جەدەلدەتەدى.

　　مەملەكەتتىك 13 - كەزەكتى قىسقى سپورت جارىسىنىڭ قار - مۇز ساياحاتىن جەبەيتىن رولىن جەتە سەزىنگەن تۇتاس شينجياڭداعى ايماق، وبلىستار ورايدى مىقتى ۇستاپ، قار - مۇز ساياحاتىنىڭ دەڭگەيىن كوتەرۋ جوسپارىن العا قويدى.

　　ءۇرىمجى قالاسىنىڭ ورىنباسار باستىعى جاڭ ايحۋا: 2020 - جىلى ءۇرىمجى قالاسى مۇز سپورتى ورتالىعىن وزەك ەتكەن مۇز سپورتى كاسىپ باقشاسىن قالىپتاستىرادى. 2025 - جىلى ءۇرىمجى اۋدانىن، شۇيموگوۋ رايونىن، ميدۇڭ رايونىن ءتۇيىن ەتكەن ءبىر توپ شاڭعى سپورتى كاسىپ باقشاسىن قۇرادى، - دەدى.

　　التاي «ادامزاتتىڭ بايىرعى شاڭعى مەكەنى»، «جۇڭگوداعى ەڭ كورىكتى مەكەن» سىندى قار - مۇز ماركاسى ابزالدىعىن ۇزدىكسىز كۇشەيتەدى، سونىمەن بىرگە قار - مۇز سپورتىنداعى قۋاتتى ولكە حيلۇڭجياڭنىڭ، جيليننىڭ شينجياڭعا كومەكتەسۋ كۇشىنىڭ دەمەۋىندە التايدى «دۇنيە جۇزىلىك شاڭعى وشاعىنا» اينالدىراتىن بولادى.

　　5 ميلليون ادامدى قار - مۇز سپورتىنا تارتادى

　　«ونەر باسەكەسى بولعان قىسقى سپورت جارىسىنىڭ ەڭ ماڭىزدى ءبىر رولى بۇقارالىق قار - مۇز سپورتىنىڭ ورىستەتىلۋىنە دەم بەرەتىندىگىندە»، - دەدى مەملەكەتتىك دەنە تاربيە باس مەكەمەسىنىڭ باستىعى ليۋ پىڭ.

　　شينجياڭدىقتار تۋمىسىنان قار - مۇز سپورتىن ۇناتادى. ارينە، شينجياڭ ساڭلاقتارى دا اۋىلداستارىن ەرەكشە شاتتاندىردى. شينجياڭ ساڭلاقتارى راقىمباي تالاپقان ۇلى، جۋ جيافان، ءداستۇر تۇرسىنقان ۇلى ەرلەردىڭ قۇرامالىق قۋالاۋ بويىنشا تەز سىرعاناۋ جارىسىندا (8 اينالىم) اعا جۇلدەگەر بولدى. بۇل − شينجياڭنىڭ سپورت شەبەرلەرىنىڭ 25 جىلدان كەيىن مەملەكەتتىك قىسقى سپورت جارىسىنىڭ تەز سىرعاناۋ تۇرىندە سيلىق تورىنە قايتا كوتەرىلۋى. مۇنان باسقا 19 جاستاعى قارامايلىق بويجەتكەن تيان رۇينيڭ جاستار گرۋپپاسىنان ايەلدەردىڭ 3000 مەترگە تەز سىرعاناۋ جارىسىندا كۇمىس مەدالدى قانجىعاسىنا بايلادى؛ تاعى سەرىكتەرىمەن سەلبەسىپ، ايەلدەردىڭ قۇرامالالىق قۋالاۋ بويىنشا (6 اينالىم) تەز سىرعاناۋ جارىسىندا كۇمىس مەدال العان حان فاڭ، زىڭ ۋيۋيلار بار. ولاردىڭ تاماشا بەينەسى شيجياڭنىڭ تەز سىرعاناۋ ءتۇرىنىڭ قايتا تەبىندەگەندىگىن اڭعارتتى.

　　شينجياڭنىڭ قار - مۇز سپورتى ساڭلاقتارىنىڭ مەملەكەتتىك 13 - كەزەكتى قىسقى سپورت جارىسنداعى بەينەسى، ولاردىڭ جۇڭگونىڭ قار - مۇز سپورتىنىڭ تەبىندى قوسىنىنا اينالعانىن كورسەتتى.

　　«ءبىر ميلليون جاس ءوسپىرىمدى قار - مۇز سپورتىنا تارتۋ» قيمىلى ورىستەتىلگەلى 7 جىل بولدى، بۇل قيمىل شينجياڭنىڭ قار - مۇز سپورتىنا زاپاس دارىندىلاردى جەتىلدىرۋمەن بىرگە، ودان دا ماڭىزدىسى، شينجياڭنىڭ تۇستىگى مەن تەرىستىگىندەگى ءبىر ميلليون جاس ءوسپىرىمدى قار - مۇز سپورتىنا باۋرادى. 23 - قاڭتاردا اۆتونوميالى رايوننىڭ ورىنباسار ءتوراعاسى تيان ۋىن اقپار جاريالاۋ ماجىلىسىندە اۆتونوميالى رايوننىڭ الداعى 5 جىلدا رايونىمىزداعى قازىرگى مۇز ءۇستى ويىندارىنان ۇلگى كورسەتەتىن 100 مەكتەپتى 500گە جەتكىزەتىندىگىن، سونداي - اق 100 مەكتەپتى قار سپورتىنىڭ سىناق ءتۇيىنى ەتىپ قۇراتىندىعىن جاريالادى.

　　ول تاعى بىلاي دەدى: شينجياڭ الداعى جەردە قار - مۇز سپورتىندا «وڭتۇستىككە قانات جازۋ، باتىسقا ىرگە كەڭەيتۋ» ستراتەگياسىن اناعۇرلىم ويداعىداي اتقارىپ، قار - مۇز سپورتىنىڭ نەگىزدىك قۇرىلعى قۇرىلىستارىن جەدەلدەتىپ، ءار ءتۇرلى قار - مۇز سپورتىمەن شۇعىلداناتىن دارىندىلاردى تاربيەلەۋ تەبىنىن كۇشەيتىپ، قار - مۇز سپورتىن مەكتەپتەردە جالپىلاستىرۋدى، باقشالاردا ورىستەتۋدى، قار - مۇز سپورتىنا قاتىستى ساۋدانى جانداندىرۋدى ىلگەرىلەتىپ، شينجياڭ حالقىنىڭ تورتتەن ءبىر بولەگىن، ياعني 5 ميلليوننان استام ادامدى قار - مۇز سپورتىنا تارتۋعا كۇش سالىپ، «300 ميلليون ادامدى قار - مۇز سپورتىنا تارتۋعا» ۇلەس قوسادى.