- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
بەرەكەلى روتا، ادال اسكەرلەر
− شينجياڭ اسكەري رايونى بەلگىلى پولكى ۇلتتىق 6 - روتاسىنىڭ وتاندى قورعاپ، شەكارانى كۇزەتۋ ىستەرى تۋرالى
2016.07.20 12:37 كەلۋ قاينارى : شينجياڭ گازەتى
قاراقۇرىم تاۋىنىڭ ەتەگىندە ءبىر قاھارمان روتا بار، وتان كۇزەتىندە تۇرعان 70 نەشە جىلدا وسى جاۋىنگەر كوللەكتيۆ شەكارانى بەكەمدەۋدىڭ، ورنىقتىلىقتى قورعاۋدىڭ، ۇلتتار ىنتىماعىن نىعايتۋدىڭ تاريحي جاۋاپكەرشىلىگىن ارقالاپ، «پارتيانىڭ ءسوزىن تىڭداپ، پارتياعا ىلەسەمىز، سەنىمدى بەكەمدەپ، ماڭگى وزگەرمەيمىز» دەگەن ايبىندى سەرتتەرىن اقتاپ جانە جالعاستىرىپ، شەكارانى تىزگىندەۋ، قاتەردەن اراشالاپ، اپاتتان قۇتقارۋ، قورعانىس قۇرىلىستارىن جۇرگىزۋ سياقتى شۇعىل، قيىن، قاتەرلى، اۋىر مىندەتتەردى تابىسپەن ورىنداپ وتىردى.
شىلىڭگىر شىلدە ايىندا ءبىز تالاي ەڭبەك كورسەتىپ، تالاي تارتىمدى تابىستارعا جەتكەن ۇلگىلى كوللەكتيۆكە ات باسىن تىرەپ، ولاردىڭ رەفورما جاساپ، ارميانى قۇدىرەتتەندىرۋ جولىنداعى اسەرلى اڭگىمەلەرىنە قۇلاق قۇرىشىمىزدى قاندىردىق.
پارتيانىڭ ءسوزىن تىڭداپ، پارتياعا ىلەسەمىز، سەنىمدى بەكەمدەپ، ماڭگى وزگەرمەيمىز
«پارتيانىڭ ءسوزىن تىڭداپ، پارتياعا ىلەسەمىز، سەنىمدى بەكەمدەپ، ماڭگى وزگەرمەيمىز». بۇل ۇلتتىق 6 - روتانىڭ رۋحاني مۇراتى، روتانىڭ داڭق بولمەسىندەگى ەڭ كورنەكتى ورىنعا وسى جازۋلار جازىلعان.
«روتا كومانديرىنىڭ بويىنان سەنىم مەن ادالدىقتى كوردىم». 10 - شىلدە كۇنى وپتيكالىق كابەل قۇرىلىسىن جۇرگىزۋ تۋرالى اڭگىمە بولعاندا، 6 - روتانىڭ ۋاقىتشا ۆزۆود كومانديرى ءمانسۇر اعىنان اقتارىلدى.
2009 - جىلى ۇلتتىق 6 - روتا شيزاڭنىڭ الي دەگەن جەرىندە وپتيكالىق كابەل تارتۋ قۇرىلىسىن جۇرگىزۋگە جاۋاپتى بولادى. قىركۇيەكتىڭ ءبىر كۇنى قۇرىلىس مەرزىمىنىڭ ەڭ سوڭعى كۇنى بولاتىن. سول كۇنى تەڭىز دەڭگەيىنەن 6400 مەتر بيىك تاۋ جوتاسىنا 2000 مەتر وپتيكالىق كابەل جاتقىزىلۋعا ءتيىس ەدى. مىندەت ەرەكشە جاپالى بولعاندىقتان، روتا 15 پارتيا مۇشەسىن اتتاندىرۋ تۋرالى شەشىم قابىلدايدى.
قۇرىلىس ورنى الىس بولعاندىقتان، 15 پارتيا مۇشەسى تاڭعى ساعات 4تە اتتانادى. ءار ادامنىڭ سومكەسىندە بىردەن توقاش، بىردەن جۇمىرتقا جانە ءبىر قۇمىرادان مينەرال سۋ بار، بۇل ولاردىڭ ءبىر كۇندىك ازىعى ەدى. ولار بانگوڭ كولىنىڭ وڭتۇستىك جاعاسىنان تاۋ باسىنا تۋرا تارتادى. ءالى جارىق تۇسپەگەن، جەردىڭ ويلى - شۇڭقىرى بىلىنبەيتىن، ولار سوندا دا جولسىزدان جول تاۋىپ، تىرمىسا ورمەلەي بەرەدى. تەڭىز دەڭگەيىنەن بيىكتەگەن سايىن، كۇن رايى دا قۇبىلا باستايدى. تەڭىز دەڭگەيىنەن 4500 مەتر بيىككە كوتەرىلگەندە سىركىرەپ جاڭبىر جاۋسا، 5200 مەتردەن اسقاندا توپەلەگەن بۇرشاققا تاپ بولادى. 5500 مەتردەن بيىك جەردە قار جاۋىپ تۇرعان بولاتىن. ولار اق قار، كوك مۇزعا بوگەلمەي العا تارتا بەرەدى. قالىڭ ماقتالى قولعاپ كيگەنمەن، سۇيەكتەن وتەر سۋىقتىڭ ىزعارى ساۋساقتى تىزىلداتادى.
15 ادام ءۇش - ۇشتەن گرۋپپاعا بولىنگەن، ءار ادام 10 كيلوگرامنان كەم ەمەس كابەل كوتەرگەن. ءمانسۇر مەن روتا كومانديرى يان شياۋ - ي، بولىمشە كومانديرى ءومار ۇشەۋى ەڭ الدا بولاتىن، جولدى روتا كومانديرى باستاپ كەلە جاتقان. كەنەت روتا كومانديرى مۇرتتاي ۇشىپ، تۇلا بويى قالشىلداپ بارىپ تالىقسىپ كەتەدى. روتا كومانديرى ەسىن جيعاندا، قالعاندارى وعان تاۋعا شىقپاۋ تۋرالى اقىل ايتادى. ءبىراق روتا كومانديرى ءسوزىن شەگەلەپ، «بولمايدى، مەن روتا كومانديرى عانا ەمەس، پارتيا مۇشەسىمىن دە» دەپ شورت كەسەدى.
روتا كومانديرىنىڭ قۇر سۇلدەرىن سۇيرەتىپ، تاۋ باسىنا ازەر ورلەپ بارا جاتقانى ءمانسۇردى قاتتى اسەرلەندىرەدى. وسى كورىنىس ونىڭ ساناسىندا ساقتالىپ قالادى.
8 ساعاتقا سوزىلعان اۋىر جۇرىستەن كەيىن، ولار ساعات 12دە قۇرىلىس ورنىنا جەتەدى. سونان تاڭعى ساعات 3كە دەيىن 2000 مەتر جەرگە وپتيكالىق كابەل تولىق جاتقىزىلىپ بولادى. وسى رەتكى مىندەتتى ابىرويمەن اتقارعان ۇلتتىق 6 - روتاعا كوللەكتيۆ 3 - دارەجەلى ەڭبەك جازىلادى.
1944 - جىلدان قازىرگە دەيىن وتاننىڭ ەڭ ءبىر قاجەتى تۇسكەن ماڭىزدى تاريحي ساتتەردە، ۇلتتىق 6 - روتانىڭ نەشە بۋىن كوماندير - جاۋىنگەرلەرى ىستىق قان، ادال جۇرەكتەرىمەن وتان مەن حالىقتى الاڭسىز ەتەر ەڭبەكتەر تىندىردى.
1990 - جىلى ءبىر توپ سودىر الىنەن اسىپ، لاڭ سالادى، 6 - روتانىڭ كوماندير - جاۋىنگەرلەرى تىزگىن ۇشىندا جەتىپ، ولاردى ءبىر جاقتى ەتەدى. اۋىر سىناق وتىندە روتاداعى كوماندير - جاۋىنگەرلەر «پارتيانىڭ ءسوزىن تىڭداپ، پارتياعا ىلەسەمىز، سەنىمدى بەكەمدەپ، ماڭگى وزگەرمەيمىز» دەگەن ايبىندى سەرتىن ىسىمەن اقتاپ، بۇلىكشىلەرمەن تۋى ايقىن تۇردە كۇرەس جۇرگىزىپ، شەكارا ءوڭىردىڭ قوعام ورنىقتىلىعىن پارمەندى تۇردە قورعايدى. 1991 - جىلى ورتالىق اسكەري ىستەر كوميتەتى وسى روتاعا «وتان كۇزەتىندەگى قاھارمان روتا» دەگەن داڭقتى اتاق بەرەدى.
«مىلتىق مەنى تىڭدايدى، مەن پارتيانى تىڭدايمىن». ۇلتتىق 6 - روتانىڭ نەشە بۋىن كوماندير - جاۋىنگەرلەرى وت پەن وقتىڭ سنىنان ءوتىپ، قاي - قاشان دا اسكەري قىزمەتكەرگە ءتان ادالدىقتى ايگىلەپ، وڭتۇستىك شينجياڭداعى توتەنشە مايداننىڭ قوعام ورنىقتىلىعىن قورعاۋشى «تەمىر قازىققا» اينالادى.
روتا − مەنىڭ وتباسىم، جاۋىنگەر سەرىكتەر − تۋعان اعا - باۋىرىم
ۇلتتىق 6 - روتانىڭ جاۋىنگەرلەرى ۇيعۇر، حۇيزۋ، قازاق، تاجىك، قىرعىز، موڭعۇل جانە حانزۋ سياقتى 7 ۇلتتان قۇرالعان. ولار ۇلتتار ىنتىماعىن كوزىنىڭ قاراشىعىنداي قورعاپ، «مەيلى قاي ۇلت بولسا دا − جۇڭحۋا ۇلتى، مەيلى قاي جەرلىك بولسا دا − جۇڭگولىق» دەگەن ورتاق تانىمدى ءسات سايىن ايگىلەپ كەلەدى.
«ۇلتتىق 6 - روتانىڭ ماعان بەرگەن ەڭ تەرەڭ اسەرى − وتە ىنتىماقتى، وتە بەرەكەلى»، - دەدى 2 - باتاليوننىڭ كومانديرى يان شياۋ - ي 10 - شىلدەدە.
2008 - جىلدان 2011 - جىلعا دەيىن يان شياۋ - ي ۇلتتىق 6 - روتانىڭ كومانديرى مىندەتىن اتقارادى. 2008 - جىلى تامىزدىڭ باسىندا يان شياۋ - ي روتاعا كەلەدى. كوپ وتپەي، 6 - روتاداعى كوماندير - جاۋىنگەرلەر جارتى جىلدىق تەكسەرۋ بابىمەن وتكىزىلگەن 5 كيلومەترلىك قارۋلى دالا جۇگىرىسىندە جاڭا كەلگەن وسى كومانديرعا تەرەڭ اسەر بەرەدى. «تاڭداي قاقتىم! تامساندىم!». ونىڭ ايتۋىنشا، 5 كيلومەترلىك قارۋلى جۇگىرىستە بۇكىل روتانىڭ جاۋىنگەرلەرى جۇدىرىقتاي جۇمىلا بىلگەن، جاۋىنگەرلەردىڭ ءبىرى ىلەسە المايتىن باستانسا، سەرىكتەرى دەرەۋ كومەككە كەلىپ، دەمەپ، جەبەپ وتىرعان، بۇكىل روتا اربانىڭ دوڭعالاعىنشا تەك العا جىلجي بەرگەن.
«روتاعا جەتكەنىڭ − ۇيىڭە جەتكەنىڭ»، - دەدى يان شياۋ - ي. ول ەسىنەن كەتپەس ءبىر ءىس تۋراسىندا اڭگىمە تيەگىن اعىتتى. 2010 - جىلى ول باستاعان روتا پولكتە وتكىزىلگەن تۇنگى نىسانا اتۋ جارىسىنا قاتىسىپ، پولك بويىنشا ءبىرىنشى بولادى. ول جاۋىنگەرلەردى باستاپ، لاگەرگە ورالعاندا، ۇيدە قالعان كوماندير - جاۋىنگەرلەر روتانىڭ سول كەزدەگى ساياسي جەتەكشىسى روزى مامەتتىڭ ۇيىمداستىرۋىمەن جانىپ تۇرعان بالاۋىز شامدى «家» دەگەن ءارىپ بەينەسىندە ءتىزىپ قويعانىن كورەدى، ۇيدە قالعان كوماندير - جاۋىنگەرلەر بالاۋىز شامداردىڭ ەكى قاناتىندا ساپقا تۇرىپ، ولاردىڭ جەڭىسپەن ورالعانىن شاپالاق سوعىپ قارسى الادى.
ۇلتتىق 6 - روتا «قوس اياقتاپ جۇگىرۋ» ماشىعىن ءجيى وتكىزىپ تۇرادى، بۇندا 20 نەشە ادام يىق تىرەسە تۇرىپ، اياقتارىن ءبىر - بىرىمەن قوساقتاپ بايلاپ، مارەگە قاراي تەڭ قاداممەن جۇگىرەدى. ءبىر ادامنىڭ قادامى سايكەس كەلمەسە، قوساقتاعى بارلىق ادام دومينو تاسىنداي جاپىرىلا قۇلايدى. ساياسي جەتەكشى سالام يسامدين: مۇنداي جاتتىعۋدىڭ ماقساتى كوماندير - جاۋىنگەرلەردىڭ بىرلىك تانىمى مەن كوللەكتيۆ تانىمىن كۇشەيتۋ، - دەدى. 6 - روتا وسىنداي كوللەكتيۆ تۇردە العا ۇمتىلاتىن كوماندا، كوماندير - جاۋىنگەرلەر بىلەك بىرىكتىرىپ قانا قالماستان، جۇرەكتەرىن دە مىقتاپ توعىستىرعان.
روتانىڭ جايشىلىقتاعى جاتتىعۋى كەزىندە، نىسانا اتۋدىڭ شەبەرى، قازاق جاۋىنگەر ءانۋار ارتتا قالعان جاۋىنگەرلەردى قوسىمشا جاتتىقتىرۋ مىندەتىن «موينىنا الادى»؛ 5 كيلومەترلىك قارۋلى دالا جۇگىرىسىنىڭ مايتالمانى ءمانسۇر ءار رەتكى كوللەكتيۆ باعالاۋ كەزىندە ىرىقتى تۇردە سوڭىندا قالىپ، نەگىزى ءالسىز جاۋىنگەر سەرىكتەرىن دەمەپ، جەبەپ وتىرادى؛ نەگىزدىك جاتتىعۋدىڭ شەبەرى، حۇيزۋ ۇلتىنان شىققان اعا اسكەر ما پىڭ سانالى تۇردە «كىشى جاتتىقتىرۋشى» مىندەتىن اتقارىپ، 6 ءتۇرلى دارالانعان فيزيكالىق جاتتىعۋ ءادىسىن جاساپ، جاۋىنگەرلەردىڭ جاتتىعۋعا اۋەسىن ايتارلىقتاي كوتەرەدى. بۇگىنگى كۇندە 6 - روتانىڭ كوماندير - جاۋىنگەرلەرى ءوزارا كومەكتەسۋ، ءوزارا ۇيرەنۋ، ءوزارا ۇيرەتۋ بارىسىندا بارلىعى بىردەي كوپ ونەرگە توسەلىپ، جەڭىسكە نىق سەنىم بايلاپ وتىر.
«وسىنداي ورتادا ءومىر سۇرسەڭىز، ءارقانداي ىسكە ىنتالى بولاسىز». بۇل تىلشىلىك بابىمەن ۇلتتىق 6 - روتادا بولعانىمىزدا، ەڭ كوپ ەستىگەن ءسوزىمىز.
باتىل شايقاستار جاساپ، قاتەرلى مىندەتتەردى ورىنداۋدا اتويلاپ الدا ءجۇردى
«6 - روتا، 6 - روتا، ەرلىكپەن العا». مىنە بۇل − 6 - روتاداعى نەشە بۋىن كوماندير - جاۋىنگەرلەردىڭ اسقاق ۇرانى.
شىلدەنىڭ باسىندا جاياۋ اسكەرلەر پولكى سۇركەيلى تابيعي ورتادا ناقتى سوعىس جاتتىعۋىن جاساۋ ءۇشىن، 1000 شاقىرىم جول باسىپ، تاكلاماكان شولىنە شەرۋ تارتتى. قىسقا عانا بىرنەشە كۇندە ۇلتتىق 6 - روتا جوعارىنىڭ تالابىنا ساي، جەر استى ۇيلەرىندە تۇنەپ قانا قويماي، كىشكەنە بەكىنىستەر سالىپ، بايلانىس ورنىن قازىپ، ناقتى سوعىسقا ارنالعان جوبا، سوعىستىق ورنالاستىرۋ جاسادى. روتا كومانديرى ۋاڭ مىڭدۇڭ: رەفورما جاساپ ارميانى قۇدىرەتتەندىرۋگە ات سالىسىپ، وتان قورعاۋشى قاھارمان بولۋ اۋىزدا ايتىلماۋى كەرەك، ءسوز جوق، ناقتى ارەكەت ىستەۋ كەرەك، − دەيدى.
10 - شىلدە كۇنى تۇستەن كەيىن ساعات 4تە جاتتىعۋ الاڭىندا ىسقىرىق ءۇنى ەستىلدى. جاۋىنگەرلەر شاتىرلاردان شاپشاڭ جۇگىرىپ شىعىپ جيىلا قالدى. جەتەكشى سالام دەنە قۋاتى جاتتىعۋىنىڭ باستالعانىن ايتتى. بۇل كەزدە كۇن مي قايناتارداي ىستىق ەدى. كوماندير - جاۋىنگەرلەردىڭ قولى مەن بەتى ابدەن توتىعىپ كۇيگەن، ءبىراق رۋحى اسقاق.
ۇعىسىپ كورسەك، دالادا بولعانىمەن، ءار كۇنى 7 جارىم ساعات دەنە قۋاتى جاتتىعۋىن، ارناۋلى تەحنيكالىق شەبەرلىك جاتتىعۋىن، سوعىس تاكتيكاسى جاتتىعۋىن جاساۋ كەسىلمەس شورە ەكەن.
سالام بىلاي دەدى: 1 - شىلدەدە اسكەري ءبولىم وسى جاتتىعۋ الاڭىنا كەلگەن كەزدە، جەر بەتىندەگى 50 نەشە سانتيمەتر قالىڭدىقتاعى قۇم جاۋىنگەرلەردىڭ اسكەري ەتىگىنە قۇيىلدى. تۇستە اۋانىڭ تەمپەراتۋراسى 50 نەشە سەلتسي گرادۋسقا شىقتى، شاتىرداعى توسەكتەرىندە جاۋىنگەرلەر «تەمىردىڭ ۇستىندە قاقتالعاننان» ارى كۇي كەشتى. 2 كۇندە تاڭەرتەڭنەن كەشكە دەيىن قۇمدى بوران سوقتى، شاتىر الاسالاۋ جەرگە تىگىلگەندىكتەن، شاتىردىڭ ءىشىن قۇم الىپ قالدى، جاۋىنگەرلەر ۇيىقتاعاندا بوراننان قورعانۋ كوزىلدىرىگىن تاعىپ جاتتى.
ورتا جاعدايىنىڭ جاپالىلىعىنا توقتالعاندا، باتاليون كومانديرى يان شياۋ - ي: جاپادان، شارشاپ - شالدىعۋدان قورىقساڭ، بۇل جەرگە كەلمە، - دەدى. ونىڭ ايتۋىنشا، ءار جىلى ناۋرىز ايىندا اسكەري ءبولىم دالادا، بەيتانىس جەرلەردە جاتتىعۋ جاساپ، قاراشا ايىندا عانا كازارماعا ورالادى ەكەن، مۇنداعى ماقسات − قوسىندى شىڭاپ شىنىقتىرۋ ەكەن.
ۋاقىتشا ۆزۆود كومانديرى ءمانسۇردىڭ وڭ جاق شىنتاعىندا 7 سانتيمەتر ۇزىندىقتا تىرتىق بار. ول ءبىر رەتكى جاتتىعۋدىڭ وعان سيلاعان «وردەنى». الدەبىر جىلى تامىزدا ءمانسۇر پولك جاعىنان ۇيىمداستىرىلعان برونەۆيكتى جاياۋ اسكەرلەر روتاسىنىڭ شابۋىل تاكتيكاسى امبەباپ مانەۆرىنە قاتىناسادى. «جاۋدىڭ» الدىڭعى شەبىنە شابۋىل باستالىپ، ءمانسۇر «جاۋ» زەڭبىرەگىنىڭ وعىنان قورعانباقشى بولعاندا، بىلەگىنىڭ اۋىرعانىن سەزەدى، «مايدان» جاعدايى شۇعىل بولعاندىقتان، ول مۇنى ەلەمەيدى. مانەۆر اياقتاعان سوڭ بارىپ ول وڭ جاق بىلەگى مەن قولىنىڭ قانعا بويالعانىن كورەدى. دالالىق سوعىس شيپاحاناسىنا قولىن تاڭدىرۋعا بارعاندا ناركوز تاۋسىلىپ قالماسى بار ما؟ سونىمەن ءمانسۇر ناركوز ىستەتپەي - اق جارانىڭ اۋزىن تىگۋدى ايتادى. 5 ءجىپ تىككەنىن كورىپ، جانىنداعى ساپتاسىنىڭ ءوزى قورقىپ كەتەدى. ال ءمانسۇر جارانىڭ اۋزىنا قاراپ قارقىلداپ كۇلەدى.
6 - روتا 5 - وددلەنيەسىنىڭ كومانديرى ءجۇرات قوسىنعا جاڭادان كەلگەن كەزدە، سايىس ونەرىندە جىعىلىپ، اياعى اۋىر مەرتىگەدى. جىل اياعىنداعى باعالاۋ كەزىندە، اياعىندا شەگەلەنگەن تەمىر تاياقشاسى بار ءجۇرات 5 كيلومەتر ارالىقتا قارۋ الىپ جۇگىرۋگە قاتىناسىپ، بۇكىل پولكتى اسەرلەندىرەدى.
2015 - جىلى جەلتوقساندا پولك 5 كۇندىك دالادا تۇنەپ جاتتىعۋ جۇمىسىن ۇيىمداستىرادى. 40 كيلومەترلىك جاياۋ جورىقتا اۋىر جۇك ارقالاۋ، مىلتىق ۇستاپ جۇگىرۋ، بەكىنىس سالۋ، دالادا تىرشىلىك ەتۋ... سياقتى سىنداردان ءوتۋ كەرەك. ءسويتىپ، 5 تاۋلىك دالادا تاماقتانىپ، دالادا تۇنەپ، 16 ساباقتى ورىندايدى. قارلى بورانداعى جاتتىعۋدا 6 - روتاداعى كوماندير - جاۋىنگەرلەردىڭ قايىسپاس جاۋىنگەرلىك جىگەرى مەن تاباندى جاۋىنگەرلىك ستيلى بۇكىل پولكتەگى كوماندير - جاۋىنگەرلەردىڭ القاۋىنا بولەنەدى.
2013 - جىلى بۇرىنعى لانجوۋ اسكەري رايونى ۇيىمداستىرعان قۇراما باتاليونداردىڭ سوعىس تاكتيكاسى باعالاۋىندا، ۇلتتىق 6 - روتا نەگىزگى شابۋىل مىندەتىن ارقالاپ، باس جۇلدەنى جەڭىپ الدى.
ۇلتتىق 6 - روتاداعى نەشە بۋىن كوماندير - جاۋىنگەرلەر وزدەرىنىڭ ادال جانە قايىسپاس سوعىستىق جىگەرىمەن «6 - روتا، ەرلىكپەن العا» دەگەن شۇعىلالى اسەرلى بارىسىن جازدى؛ روتا ىلگەرىندى - كەيىندى 9 رەت «نەگىزگى ساتى قۇرىلىسىنداعى ۇلگىلى روتا» بولىپ ماداقتالىپ − سيلاندى؛ 20 رەت «نەگىزگى ساتى قۇرىلىسىنداعى وزات ورىن» بولىپ ماداقتالىپ − سيلاندى؛ 9 رەت «وزات نەگىزگى ساتى پارتيا ياچەيكاسى» بولىپ ماداقتالىپ − سيلاندى؛ 7 رەت كوللەكتيۆ 2 - دارەجەلى ەڭبەك جازىلدى؛ 11 رەت كوللەكتيۆ 3 - دارەجەلى ەڭبەك جازىلدى.
شينجياڭ اسكەري رايونى بەلگىلى پولكى ۇلتتىق 6 - روتاسىنداعى وفيتسەر - جاۋىنگەرلەر 5 كيلومەترلىك قارۋلى دالا جۇگىرىسىندە. (ماتەريال سۋرەت)
سۋرەتتى ۋاڭ نيڭ تۇسىرگەن
كەلۋ قاينارى: شينجياڭ گازەتى
جاۋاپتى رەداكتورى : مانەپ ەربول ۇلى (پراكتيكانت)
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
