رەسەيدە تىك ۇشاق قۇلاپ، 19 ادام قازا بولدى

2016.10.24 14:58   كەلۋ قاينارى : حالىق تورابى

　　حالىق تورابى، 24 – قازان، بەيجيڭ. شينحۋا اگەنتتىگىنىڭ حابارلاۋىنشا، رەسەيدىڭ مي – 8 تىك ۇشاعى 21 – قازان كۇنى ورال فەدەراتسيالىق رايونىنىڭ يامال – نەنەتس اۆتونوميالى رايونىندا قۇلاپ، وقيعادا 19 ادام قازا بولدى، 3 ادام قۇتقارىلدى.

　　يتار – تاس اگەنتتىگىنىڭ حابارلاۋىنشا، يامال – نەنەتس اۆتونوميالى رايوندىق شۇعىل جاعدايلار ءبولىمى ماسكەۋ ۋاقىتى بويىنشا 21 – قازان كۇنى ساعات 18دەن 57 مينۋت وتكەندە اتالعان اۆتونوميالى رايوننىڭ ۇرەنگوي قالاشىعىنان باتىس سولتۇستىككە قاراي 80 كيلومەتر قاشىقتىقتا مي – 8 تىك ۇشاعىنىڭ قۇلاعانى تۋرالى مالىمەت تاپسىرىپ العان.

　　تاعى ءبىر حابارعا قاراعاندا، موتوردان كىنارات شىققاندىقتان، ۇشقىش شۇعىل جاعدايدا ەكپىنمەن قونباق بولعاندا تىك ۇشاق قۇلاعان، امان قالعان ادام قولفونىمەن قۇتقارۋ تەلەفونىنىڭ ءنومىرىن جالعاعان.

　　يامال – نەنەتس اۆتونوميالى رايوندىق شۇعىل جاعدايلار ءبولىمى جىبەرگەن ءبىرىنشى توپتاعى قۇتقارۋشى قىزمەتكەرلەر وقيعا تۋىلعان جەرگە جەتكەن، قازىر ولار 19 ادامنىڭ ءمايىتىن تاپقان، تىك ۇشاقتىڭ سىنىقتارىن تازالاۋ بارىسىندا اۋىر جارالانىپ ءتىرى قالعان ەكى ادامدى تاپقان، جارالانعاندار ەمحاناعا جەتكىزىلىپ، شۇعىل قۇتقارىلۋدا. وقيعاعا ۇشىراعان تىك ۇشاقتىڭ «قارا قوبديشاسى» دا تابىلعان.

　　كەلۋ قاينارى: حالىق تورابى