بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>سۇحبات

مەملەكەتتىك حالىق قۇرىلتايى ۋاكىلى سەرجان: قيىنشىلىعى بارلارعا كوپ بولىپ كومەكتەسۋ جاقسى سالت

2013.03.12 16:05     كەلۋ قاينارى : حالىق تورابى


  سەرجان توقتىمۇرات ۇلى 1977-جىلى تامىزدا تۋىلعان، شىعىس جۇڭگو مۇناي ۋنيۆەرسيتەتىنىڭ مۇناي ينجەنەرياسى كاسىبىنەن وقۋ تاۋىسقان، ۋنيۆەرسيتەتتىڭ تولىق كۋرس ماعلۇماتىنا يە، ينجەنەرلىك عىلىمىنىڭ باكلاۋرلىق اتاعىن العان، 12-كەزەكتى مەملەكەتتىك حالىق قۇرىلتايىنىڭ ۋاكىلى (شينجياڭ ۋاكىلدەر ۇيىرمەسىنىڭ قۇرامىندا). قازىر باتىس تەرىستىك مۇناي الابى تارىم مۇناي بۇرعىلاۋ 1-زاۆودىندا ءوندىرىستى سايكەستىرۋ قىزمەتىمەن شۇعىلدانادى.

  مەملەكەتتىك «ەكى ءماجىلىس» مەزگىلىندە، قۇرىلتاي ۋاكىلى سەرجان توقتىمۇرات ۇلىمەن سۇحبات وتكىزىپ، پىكىر-ۇسىنىستارىن تىڭدادىق. تومەندە سۇحباتىمىزدىڭ مازمۇنىن نازارلارىڭىزعا ۇسىنامىز.

  ءتىلشى: باتىس تەرىستىك مۇناي الابى مەكەمەسىنەن تۇڭعىش رەت مەملەكەتتىك حالىق قۇرىلتايى ۋاكىلى بولىپ سايلانۋ ورايى سىزگە بۇيىرىپتى؟ ۇقتىرۋدى تاپسىرىپ العاندا قانداي كوڭىل كۇيدە بولدىڭىز؟

  سەرجان: حالىق قۇرىلتايى ۋاكىلى بولىپ سايلانعانىم تۋرالى ۇقتىرۋدى تاپسىرىپ العاندا ءوز كوزىمە ءوزىم سەنبەدىم. مەملەكەتتىڭ كەلەلى ىستەرىن كەڭەسەتىن وسىنداي القالى جيىنعا ۋاكىل رەتىندە قاتىناساتىنىمدى بىلگەندە قۋانىشتى كوڭىل-كۇيدە بولعانىمدى جاسىرا المايمىن. الايدا، العاشقى قۋانىشتى كوڭىل كۇيدەن سوڭ، وزىمە ارتىلعان جاۋاپكەرشىلىكتىڭ دە اۋىر ەكەنىن سەزىندىم، ويتكەنى، مەن تەك مۇناي سالاسىنىڭ عانا ۋاكىلى ەمەسپىن، مەنى كەزىكتىرگەندەر مەنى بىردەن قازاق ۇلتىنىڭ ۋاكىلى رەتىندە دە قابىلداۋى مۇمكىن-عوي. العاش رەت ۋاكىل بولىپ سايلانعاندىقتان، حالىق قۇرىلتايى ۋاكىلىنىڭ مىندەت اتقارۋ بارىسىمەن ىشكەرىلەي تانىسۋ، كوپ نارسەلەردى ۇيرەنۋ كەرەك بولدى. جاڭا ءوزىڭ ايتقانداي، باتىس تەرىستىك مۇناي الابى مەكەمەسىنەن تۇڭعىش رەت مەملەكەتتىك حالىق قۇرىلتايى بولىپ سايلانۋ ورايى ماعان بۇيىرعاندىقتان، ارينە، وسى سالاداعى باسشىلار دا اتالعان سالادا كوپتىڭ كوڭىلىن كۇپتى قىلعان ماسەلەلەردى قاتىستى ورىندارعا جەتكىزىپ، شەشىلۋىنە تۇرتكى بولادى دەپ كۇتىپ وتىر. سوندىقتان مەنىڭ وسى جولعى ۇسىنىستارىم نەگىزىنەن ءوزىم قىزمەت ىستەپ وتىرعان سالا تۋرالى بولدى. ارينە، ءتىپتى دە كوپ ۇسىنىستاردى كەلەسى كەزەكتى ماجىلىستەردە ورتاعا قويا جاتارمىز.

  ءتىلشى: ەندەشە وسى جولى قانداي ۇسىنىس-پىكىر ايتپاقشىسىز؟

  سەرجان: رەسمي ۇسىنىس رەتىندە «پارتيا-ۇكىمەت ورىندارى، كاسىپورىندار مەن ءىس ورىندارى باس بولىپ، ۇلتتىق ونەركاسىپ ونىمدەرىن قولداۋ، ۇلتتىق ونەركاسىپتى وركەندەتۋ مەن دامىتۋ» تۋرالى ۇسىنىس قويدىم. مۇنان سىرت، ءوزىم قىزمەت ىستەپ وتىرعان ورىننىڭ ناقتى جاعدايىنا قاراي، قۇمايتتانۋدىڭ الدىن الۋ شارالارىن اناعۇرلىم كۇشەيتىپ، ۇزاق ۋاقىتتىق، عىلمي، جۇيەلى ينجەنەريا قۇرىلىسىن قولعا الۋ تۋرالى ۇندەۋ تاستادىم. ۇشىنشىدەن، شينجياڭداعى مۇناي الاپتارىنىڭ كولەمىنىڭ كەڭەيۋىنە بايلانىستى، سىرتتان كەلەتىن جۇمىسكەرلەردىڭ ارا سالماعى دا ارتۋدا. مۇناي الاپتارىنداعى جان سانىنىڭ ارتىپ، ءتۇرلى ادامداردىڭ كەلۋىنە بايلانىستى، ۇرلىق-قارلىق سىندى قىلمىس وتكىزۋ سالىستىرماسى دا جوعارىلاۋدا. سوندىقتان مۇناي الاپتارىندا قوعام اماندىعىن قورعاۋدى كۇشەيتۋدىڭ كەزەك كۇتتىرمەيتىن مىندەتكە اينالعانىن ورتاعا قويدىم.

  ءتىلشى: ۇكىمەت قىزمەتىنەن باياندامانى تىڭداۋ بارىسىندا قانداي ويلار تۋىندادى؟

  سەرجان: ۇكىمەت قىزمەتىنەن باياندامانى تىڭداۋ بارىسىندا العان اسەرىم: باياندامانىڭ مازمۇنى تەرەڭ، ماقساتى ايقىن، وي جەلىسى انىق، كىسىنى جەلپىندىرەدى. پارتيا-ۇكىمەت شينجياڭنىڭ سەكىرمەلى دامۋىنا باستان-اياق وسكەلەڭ ءمان بەرىپ كەلەدى. ءوزىم نەگىزگى ساتىداعى جۇمىسكەر رەتىندە، اينالامدا تۋىلعان وزگەرىستەردى مىسالعا السام-اق جەتىپ جاتىر. مىسالى: قازىر ۇكىمەت نەگىزگى ساتىداعى كاسىپسىز جاستاردى كاسىپتەندىرۋدە كولەمدى شارالاردى اتقارۋدا. بەلگىلى ماعلۇماتقا يە، كاسىپتەنە الماي جۇرگەن جاستاردى ىشكى ولكەلەرگە اكەلىپ ەكى جىل تاربيەلەپ، ءوزى تۇرعان ورىنعا قايتارىپ قىزمەتكە ورنالاستىرۋ سىندى شارا اتقارىلىپ جاتىر. مىنە العاشقى توپتاعى ىشكى ولكەگە بارىپ تاربيەلەنگەن جاستار دا كۋرس مەرزىمى اياقتالىپ، قىزمەتكە ءبولىنۋ الدىندا. مۇنان سىرت، وڭتۇستىك شينجياڭنان كوپتەگەن ايەل بالالاردى ىشكى ولكەلەردەگى فابريكالارعا توپتىق جۇمىسقا الىپ، ولاردىڭ كاسىپتەنۋىنە كومەكتەسۋدە. وسىنىڭ ءبارى جاقسى ساياساتتىڭ ارقاسى دەپ ويلايمىن. وسىنداي مىسالدار تولىپ جاتىر.

  ءتىلشى: ءوزىڭىزدى ويلاندىرعان ىستەر تۋرالى اڭگىمە شەرتسەڭىز؟

  سەرجان: جۋىرداعى جىلداردان بەرى باسىنا حاۋىپ ءتونىپ، قيىنشىلىق قىسپاعىندا قالعان تالاي ادام عالامتوردىڭ ارقاسىندا قوعامداعى مەيىرلى جانداردىڭ كومەگىنە يە بولىپ، قوعامنىڭ ىقىلاستى مەيىرىنە بولەنۋدە. قيىنشىلىعى بارلارعا كومەكتەسۋ جاقسى سالت. وسىنى ۇزبەي، ءتىپتى دە جۇيەلى ىستەۋ ءۇشىن، بالكىم، ءمالىم ءبىر بەدەلدى ادامداردىڭ توڭىرەگىنە توپتاسىپ، قوعامدىق قور رەتىندە ۇيىسۋ كەرەك شىعار. بۇل دا مەنىڭ ءوز ويىم عانا، مۇمكىنشىلىگى قانشالىق، ونى تاعى زەردەلەپ كورۋ كەرەك. مىسال كەلتىرمەي-اق قويايىن، كەيبىر ىستەردە بىلمەستىكپەن قاتەلىك وتكىزىپ، ومىرلىك وكىنىش ارقالاپ قالاتىندار دا بولادى. وسىنداي ىستەردەن ساقتانۋ ءۇشىن، الەۋمەتتىك يگىلىك سيپاتىنداعى ۇگىت-ءناسيحاتتاردى كۇشەيتۋ كەرەك دەپ ەسەپتەيمىن.

  ءتىلشى: سۇحباتىڭىزعا راحىمەت!

  سەرجان: وزىڭە دە راحىمەت.

  كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.