سەرىك عالىمقان ۇلى اجىداروۆ، حالىق ءانشىسى، حالىق اندەرىن زەرتتەۋشى جانە جالعاستىرۋشى، ءان مۇعالىمى، «حالىق ءانى ــ قازىنام» اتتى ءداستۇرلى ءان ورىنداۋ كەشىن 2012-جىلى 8-جەلتوقسان كۇنى بەيجيڭدە ورتالىق ۇلتتار ۋنيۆەرسيتەتىنىڭ مۋزيكا زالىندا تابىستى وتكىزدى، بۇل ەلىمىز قازاقتارىنان شىققان حالىق ونەرپازىنىڭ بەيجيڭدە تۇڭعىش رەت ءداستۇرلى اندەردەن جەكە كونسەرت وتكىزۋى. 2013-جىلى 12-ماۋسىم كۇنى «جۇڭگو از ۇلتتار مۋزيكا قوعامى»، «جۇڭگو مۋزيكا ينيستيتۋتى»، «جۇڭحۋا مۋزيكا-مادەنيەت قورى» ينجەنەرياسىنىڭ ەرەكشە ۇسىنىسىمەن جۇڭگو مۋزيكا ينيستيتۋتى وپەرا زالىندا «حالىق ءانى ــ  قازىنام» اتتى ەكىنشى رەتكى ءداستۇرلى ءان ورىنداۋ كەشىن وتكىزدى، بۇل جۇڭگوداعى بيىك ورەدەگى مۋزيكا ينيستيتۋتىندا بولعان قازاقشا ءداستۇرلى ءان ورىنداۋ كەشى، حالىقارالىق ساحناعا كوتەرىلۋدىڭ ەڭ سوڭعى بەكەتى بولماق. سەرىك اعامىز قازىر، جۇڭگو حالىقارالىق ءان كوركەمونەرىن زەرتتەۋ قوعامى، جۇڭگو از ۇلتتار مۋزيكا قوعامى، شينجياڭ مۋزيكانتتار قوعامى، شينجياڭ ءان قوعامى، ىلە قازاق اۆتونوميالى وبلىستىق مۋزيكانتتار قوعامىنىڭ مۇشەسى. مەملەكەت قۇرىلعاندىعىنىڭ 60 جىلدىعىندا شينجياڭ ۇيعۇر اۆتونوميالى رايونىندا وتكىزىلگەن ءان بايقاۋىندا حالىقتىق سىلوپتاعى ءان ورىنداۋدان التىن سيلىقتىڭ يەگەرى. «ءان حالىقتىڭ مۇراسى، حالىق ءانى سارقىلماس قازىنا، ونى جاي عانا ءان سالۋ، كوڭىل كوتەرۋ دەپ تۇسىنسەك بولمايدى، سەبەبى وندا تولىپ جاتقان وزگە قاسيەتتەر بار»،-دەيدى اعامىز، قازىر شينجياڭ قولدانىلمالى كاسىپتىك تەحنيكا ينيستيتۋتى مۋزيكا-ءبي فاكۋلتەتىنىڭ ءان ۇستازى، حالىق ءانشىسى، حالىق اندەرىمىزدىڭ زەرتتەرمەنى.