بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>سۇحبات

قاباي: قازاق ءتىلى انا تىلىمدەي بولىپ كەتكەن

2015.08.31 15:42     كەلۋ قاينارى : حالىق تورابى


  قاباي اقساقال (سۋرەت ورتالىق تەلەۆيزيا تورابىنان الىندى)

  قاباي اتامىزدىڭ اتى اتالسا، جۇرتتىڭ ەسىنە ونىڭ «اباي» ەپوپەياسىن اۋدارعانى تۇسەدى. ات باسىن قاباي اقساقالدىڭ ۇيىنە بۇرعان جۋرناليستەردىڭ اباي جايلى اۋدارمالارعا سوقپاي وتپەيتىنى جوق شىعار. بۇگىنگى تاڭدا قاباي اقساقال وسى ەڭبەگىمەن – اق قازاقتاردىڭ كوڭىل تۇكپىرىنەن ورىن الدى. ال، ءبىز بۇل سۇحباتىمىزدا قاباي اتامىزدىڭ باسقا قىرلارىنا كوبىرەك نازار اۋدارىپ، ونىڭ ەڭبەك جولى، ءومىر ساپارى تۋرالى جازۋدى باستى ماقساتىمىز ەتتىك.

  نۇرعيسا قۇرمانجان ۇلى: قازاق ءتىلىن قالاي ۇيرەندىڭىز؟

  قاباي: «قازاقتىڭ سالت – ساناسىن، عۇرىپ – ادەتىنە نەگە جۇيرىكسىز» دەگەن سۇراق كوپ سۇرالادى، قازاق ءتىلىن انا تىلىممەن بىردەي ۇيرەندىم، ال قازاقشا جازۋدى كەيىنىرەك ۇيرەندىم. مەن قازاقتاردىڭ ورتاسىندا تۋىلىپ، بالا كۇنىمىزدە قازاق بالالارىمەن اسىق، اقسۇيەك ويناپ، قازاقشا اندەر جاتتاپ وستىك. سول جاس كەزدە ۇيرەنگەن نارسەلەر ەستەن وڭاي كوتەرىلمەي، ءسىڭىستى بولىپ كەتەدى ەكەن.

  اسىق ويناعاندى جاقسى كورۋشى ەدىم، مىنەزىمنىڭ تەزدىگىنەن شىعار، ساقاعا قورعاسىن قۇيامىن دەپ ءجۇرىپ قولىمدى جارالادىم، مىنە قولىمدا سودان قالعان تىرتىق ءالى بار. اسىقتى جانىمداي جاقسى كورۋشى ەدىم. قازىرگە دەيىن جىلىك تارتىلعان جەردە اسىعىن سۇراپ الىپ ساقتاپ جۇرەمىن (اقساقال قارسى ۇيگە ءوتىپ، اسىق سالعان اق دورباسىن اكەلىپ كورسەتتى، شاماسى 40 ~ 50 اسىعى بار ەكەن) جاس كەزىندە ادامنىڭ كوڭىل تورىنەن ورىن العان نارسەلەر ۇمىتىلمايدى، ونى تاستاپ كەتۋ قيىن.

  ايتپاقشىم، قازاقتىڭ ءتىلىن ۇمىتپاعانىم وسى اسىقتى ۇمىتپاعانىم سياقتى، ونى ۇمىتۋ قيىن. ول انا ءتىلىم سياقتى بولىپ كەتكەن.

  ال، قازاقتىڭ ادەبي تىلىمەن كەيىن تانىستىم، ول كەزدە ورتا مەكتەپتە انا تىلدەن سىرت ءبىر ءتىل ۇيرەنۋ مىندەتتەلەدى، اعىلشىن ءتىلىن، ورىس ءتىلىن ۇيرەتەتىن مۇعالىم جەتىسپەيدى، سونىمەن، بىزگە ۇيعۇرشا ۇيرەنۋ جۇكتەلدى، ونى ۇيرەتۋگە كەلگەن مۇعالىمنىڭ ۇلتى قازاق. ايتقانى ۇيعۇرشا دا قازاقشا دا ەمەس، ارالاس ءتىل.

  قازاق بالالارمەن بىرگە وسكەندىكتەن قازاقشانى ءتۇسىنىپ، سويلەي الاتىنمىن، سوندىقتان، ماعان بۇل ساباق وڭاي بولدى، سول كەزدە قازاقشا جازۋدى دا ۇيرەنىپ الدىم. ءتىل عانا ەمەس، جاستايىمنان قازاقتاردىڭ اراسىندا وسكەندىكتەن، قازاقتىڭ سالتى دا ءوز سالتىم بولىپ كەتكەن.

  نۇرعيسا قۇرمانجان ۇلى: اپامىز دا قازاق تىلىنە جۇيرىك بولعان دەسەدى؟

  قاباي: شاۋەشەكتىڭ شىعىس جاعىندا ۇلكەن سەلولار (اۋىل) بار ەدى، سونىڭ ءبىرى قاراقاباق. ءبىز سول قاراقاباقتا تۇردىق، قاراقاباقتا قازاقتار كوپ ەدى. مەنىڭ جۇبايىمنىڭ وتباسى اشىلى دەگەن جەردە قازاقتارمەن ارالاس تۇردى، قىز بالانىڭ وزگە بالالارمەن تىسقا شىعىپ اسىر سالىپ وينايتىن ورايى جوق، سوندىقتان، ول بالا كۇنىندە قازاق ءتىلىن تولىق مەڭگەرىپ كەتە المادى. ءبىراق، تاڭەرتەڭنەن كەشكە دەيىن كەلىمدى – كەتىمدى قوناقتىڭ ءبارى قازاقتار بولعاندىقتان، قۇلاعى قازاق تىلىنە ۇيرەنىسپ قالعان، سويلەي الماعانىمەن تۇسىنە الاتىن، كەيىن مەن قازاقتار اراسىندا قىزمەت ىستەگەندە ول دا كەلىپ ىستەدى، تەز ارادا قازاقشا ۇيرەنىپ الدى، ۇيتكەنى جاس كەزىندە قۇلاعىنا ءسىڭىستى بولىپ قالعان - عوي.

  ءتىلشى: ءسىزدى جۇرت ەڭبەكقور اۋدارماشى رەتىندە تانيدى، ءبىراق، ءبىرتالاي ولەڭدەر دە جازدىڭىز، ولەڭ جازۋدى قالاي باستادىڭىز؟

  قاباي: ارالتوبە گۇڭشىسىندا قىزمەتتە بولعان كەزىمدە اۆتونوميالى رايوندىق ادەبيەت – كوركەمونەرشىلەر بىرلەستىگى مەن ىلە وبلىستىق پارتكومى ارالتوبەدە اقىندار ايتىسىن ۇيىمداستىردى. بۇل وبلىس بويىنشا تۇڭعىش رەت وتكىزىلگەن اقىندار ايتىسى بولعاندىقتان، ايرىقشا ماڭىزعا يە ەدى. سول كەزدە مەن ارالتوبە گۇڭشىسىنىڭ سەكراتارى بولعاندىقتان، ايتىستىڭ بارلىق ورنالاستىرۋ قىزمەتىنە ارالاستىم. ءوزىم دە ولەڭگە قۇشتار ەدىم، اقىندار ايتىسى دا تاماشا وتكىزىلىپ جاتتى، بۇرىن ولەڭ جازباعان باسىم كەشتە ۇيگە قايتىپ كەلسەم ءبىر شابىت كەۋدەمدى كەرنەپ، ولەڭ جازۋعا يتەرمەلەدى، تۇندەلەتىپ حانزۋشا «اعىل، اقىن» ولەڭدى جازىپ شىقتىم. بۇل مەنىڭ تۇڭعىش رەت جازعان ولەڭىم، وسىدان كەيىن بىرنەشە ولەڭدەر جازدىم.

  «مادەنيەت توڭكەرىسى» كەزىندە ون جىل بويى قولىما قالام ۇستاپ، ولەڭ جازباپپىن. «مادەنيەت توڭكەرىسىنەن» كەيىن ازداپ ولەڭ جازا باستادىم، ولەڭدەرىم دە باسىلىم كوردى. تۇڭعىش رەت جازعان «اعىل، اقىن» دەگەن ولەڭىم «تيانشان جۋرنالىنا» باسىلعاننان كەيىن ۇزاماي «حالىق گازەتىنە» باسىلدى. ول كەزدە ولەڭى «حالىق گازەتىنە» باسىلۋ دەگەن وڭاي جۇمىس ەمەس، بۇل ماعان مەدەت بەردى. «مادەنيەت زور توڭكەرىسى» اياقتاعاننان كەيىن، جۋرنال رەداكتورلارى «ولەڭ جاز» دەپ قولقا سالا باستادى. سوندا دا «مادەنيەت توڭكەرىسى» جۇرەكتى شايلىقتىرىپ تاستاعاندىقتان، بىردەن قايتا قالام ۇستاۋعا جۇرەك داۋالامادى. ءبىراق، قالامگەر دوستاردىڭ قايتا – قايتا ايتۋىمەن قولىما قالام الىپ، حانزۋشا «العا قارا» اتتى ولەڭ جازدىم. بۇل ولەڭدى جازۋداعى ويىم: «مادەنيەت توڭكەرىسىندە» جۇرەگى شايلىعىپ قالعان اقىندارعا مەدەت بەرىپ، ولاردى قايتا شىعارماشىلىققا شاقىرۋ ەدى.

  مەن ولەڭدى قاتتى سۇيەمىن، ەگەر جاستايىمنان ولەڭ جازسام ۇلكەن اقىن بولا الماسام دا، كوپ جازعان اقىندار قاتارىندا بولۋىم مۇمكىن ەدى. ۇلكەن اقىن بولۋعا تۋما تالانت كەرەك. جاس كەزىمدە قازاقشا ولەڭدەر دە جازدىم، ءبىراق، قازىر ەسىمدە ءبىرى بار، ءبىرى جوق. العاش رەت «تەكە تاس» دەگەن ولەڭ جازعانىم ەسىمدە. بالا كۇنىمىزدە كۇندە كورىپ جۇرەتىن تاۋ بولعان سوڭ، سونىڭ بيىكتىگىن، اسەمدىگىن، ونداعى مالشى – شوپاندى ولەڭگە قوستىم. حانزۋشا جازعان ولەڭدەرىم كەيىن جۇڭگوداعى ءبىرتالاي بەلدى جيناقتارعا قوسىلدى. «حالىق گازەتىنە» دە باسىلدى.

  نۇرعيسا قۇرمانجان ۇلى: قازاقتا «جەتى ءتۇرلى ءىلىم ءبىل، جەتى جۇرتتىڭ ءتىلىن ءبىل» دەيتىن اتالى ءسوز بار، ابايدايىن عۇلامانى اۋدارۋ قازاق تىلىنە دەگەن تەرەڭ تۇسىنىگىڭىزدى بايقاتسا، ماركسيزم - لەنينيزم شىعارمالارىن قازاق تىلىنە اۋدارۋ بارىسىندا ورىس ءتىلىن جەتتىك بىلگەنىڭىز كوپ جۇمىستىڭ وڭىنا باسۋىنا سەبەپ بولعان – عوي؟

  قاباي: كىشپەيىلدىك تانىتقانىم ەمەس، مەن قازاقشانى حانزۋشاعا جاقسى اۋدارامىن، حانزۋشادان قازاقشاعا اۋدارۋ مەن ءۇشىن قيىنداۋ، بۇل جايىندا وتىرىك ايتۋعا كەلمەيدى. ماركسيزم – لەنينيزم شىعارمالارىن اۋدارۋ بارىسىندا مەنىڭ اتقارعان مىندەتىم: باسقالار اۋدارىپ بىتكەننەن كەيىن، ۇستىنەن قاراپ وتىردىم. اۋدارمانى وقىپ وتىرىپ، حانزۋشا ماعىناسى مەن قازاقشا ماعىناسى سايكەسپەي قالعان سويلەمدەردى تاۋىپ وتىرامىز. ەندى ءبىرى، بۇل اسا ءبىر قيىن اۋدارما، سول كەزدە ءبىز وسى كىتاپتاردىڭ قازاقستاننان شىققان اۋدارماسىنان كوپ پايدالاندىق. ونداعى ەكى ەل قازاقتارىندا قولدانىمى ۇقسامايتىن سوزدەردى وزگەرتىپ الدىق، مىسالى: ولار «رەۆليۆوتسيا» دەپ العان سوزدەردى ءبىز «توڭكەرىس» دەپ اۋدارامىز. كەيبىر سوزدەر مەن سويلەمدەردى اۋدارۋ قيىن بولدى، ونى اۋدارماشىلار توبى بولىپ، اقىل قوسا وتىرىپ اۋداردىق. سوندىقتان، ول كەزدە بۇل كىتاپتاردى اۋدارۋعا كوپ ادامنىڭ ەڭبەگى سىڭگەنىن ايتۋ كەرەك.

  نۇرعيسا قۇرمانجان ۇلى: قازاقستان مەملەكەتى ءسىزدىڭ ەڭبەكتەرىڭىزدى باعالاپ، بىرنەشە رەت ۇلكەن جينالىستارعا ارنايى شاقىردى، ابايدى اۋدارۋ بارىسىندا دا ول جاقتا، اسىرەسە، اباي تۋعان ايماقتا بولىپ قايتتىڭىز، وسى ساپارلاردان قانداي اسەردە بولدىڭىز؟

  قاباي: مەنىڭ اۋدارما قىزمەتىمە قازاقستان ەلىندەگى قاتىستى ادامدار جەتىسىنشە قول ءۇشىن بەردى، ولاردىڭ كورسەتكەن كومەگىنە ءدان ريزامىن. ماعان ون تومدىق سوزدىك جىبەردى، كەرەكتى كىتاپتاردى جىبەرىپ بەردى، قازاقستانعا جينالىستارعا شاقىردى. مەن ءبىر ماقالامدا ابايدى زەرتتەۋ جايلى ەڭ كوپ كۇش شىعارعان ادامداردىڭ ەسىمىن اتاعانمىن. اباي اۋدانىنىڭ سەكراتارى بولعان قاپەز ماتايەۆ دەگەن ازاماتتى ەرەكشە اتاپ وتكىم كەلەدى، ول كىسى ابايدى زەرتتەۋگە اباي اۋدانىنا اياق باسقان وقىمىستىلاردى ورنالاستىرىپ، ولارعا شارت – جاعداي جاساپ بەرۋدە كوپ ۇلەس قوسقان ادام.

  نۇرعيسا قۇرمانجان ۇلى: ءسوزدىڭ جۇلگەسىن تاعى دا ۇلى ابايعا بۇرساق ... ابايدى ءسىز قالاي باعالايسىز؟

  قاباي: قازاقستاندا ءبىر مامان «اباي ــ پوەزيا ءپىرى» دەگەن كولەمدى ماقالا جازدى. مەن بۇل ءسوزدى وتە قۇپتايمىن، ءبىراق، اۆتور ءوزىنىڭ كوزقاراسىن تولىق تۇسىندىرە الماعان. پوەزيا ءپىرى اتانعان ادام ساناۋلى عانا، جۇڭگودا دۋفۋدى وسىلاي اتايدى. ءبىراق، دۋفۋ ولەڭدى كوپ جازعانىمەن، ونىڭ ولەڭدەرىنىڭ فيلوسوفيالىق دەڭگەيى اباي ولەڭدەرىمەن يىق تىرەسە المايدى. سوندىقتان، دۋفۋدى تەك قانا ولەڭى ءۇشىن «اۋليە» دەپ اتاسا وندا قوسىلار ەدىم. ءبىراق، اباي ۇقسامايدى، ابايدىڭ ولەڭدەرىندە فيلوسوفيالىق تەرەڭ ويلار بار، ول ويشىل، اعارتۋشى، كومپوزيتور. ابايدىڭ كوپ قىرى ونىڭ ولەڭدەرىنەن بەلەڭ بەرەدى. بۇل اباي تۋرالى تانىمىم.

  ال، ابايدى زەرتتەۋ جونىندە مەنىڭ ءبىر ۇسىنىسىم بار: قازاقستاندا ابايدى زەرتتەۋ ءىلىمىن ابايتانۋ ءىلىمى دەيدى، بۇل دا قاتە ەمەس، ءبىراق، مەنشە ابايتانۋ ءىلىمى دەگەنشە، اباي ءىلىمى دەپ اتاعان دۇرىس. ورىسشاسىندا وسىنداي ماعىنادا. بۇل مەنىڭ تەك اتاۋعا دەگەن پىكىرىم عانا، اناۋ دۇرىس، مىناۋ قاتە دەگەن ءسوز جوق. اباي جايلى ءبىر كىتاپ جازۋدى باستاپ ەدىم، ءالى بىتپەدى، جارىمىن جازدىم. دەنساۋلىعىم جار بەرمەي جاتىر. قازاقستاندا پۋشكين مەن لەرمونتوۆتى كوبىرەك دارىپتەپ، اباي سولاردان وقىپ، ۇيرەنگەن دەيدى. شىنىنا كەلگەندە، ابايدىڭ پۋشكيندەرگە قاراعاندا ارتىق جەرى كوپ.

  اباي ولەڭدەرىنىڭ ارتىقشىلىعى ــ «مەن ولەڭدى جازبايمىن ەرمەك ءۇشىن» دەپ ابايدىڭ ءوزى ايتقانىنداي، ءاربىر جولى مەن ءاربىر ءسوزىنىڭ ماعىناسى بار، بوسقا ايتىلعان ءبىر اۋىز ءسوز جوق. مىسالى: «قانسوناردا بۇركىتشى شىعادى اڭعا» دەگەن ولەڭى تەك تابيعاتتى سۋرەتتەۋ ەمەس، مۇنىڭ ارعى جاعىندا ءارقانداي ءىستى ءوزىڭ قول سالىپ ىستەپ كورگەندە عانا ونىڭ ءلاززاتىن ۇعىنا الاسىڭ دەگەن تەرەڭ فيلوسوفيالىق ءمان جاتىر.

  ۇزاقتان بەرى، «اۋدارما ءتۇپ نۇسقاسىنان جاقسى بولا الا ما جوق پا» دەگەن ماسەلە تۋرالى تالاس توقتامادى. بۇعان ابايدىڭ اۋدارمالارى جاقسى جاۋاپ بولا الادى. «ونەگيننىڭ سيپاتى» «تاتيانانىڭ ءسوزى» دەگەن ولەڭدەردى اباي اۋدارعان، كەيىن قازاقستاندىقتار پۋشكيننىڭ ولەڭىن تۋرا ماعىناسى بويىنشا سوزبە - ءسوز اۋدارىپ شىقتى، بۇل ەكى اۋدارمانى سالىستىرىپ قاراساڭىز، قازاق وقىرماندارى اباي اۋدارماسىن ۇناتادى. اباي ولەڭ جايلى «سىرتى كۇمىس، ءىشى التىن بولسىن» دەگەن، ابايدىڭ بۇل ءسوزى تەك قانا ولەڭ جازۋعا عانا ايتىلماعان، ول وسى پرينسيپتى ءوز اۋدارماسىنا دا ىستەتكەن. ول اۋدارمانىڭ دا «ءىشى التىن، سىرتى كۇمىس» بولۋىنا دەن قويعان.

  سوندىقتان، اباي اۋدارماسىن دا جاقسى زەرتتەۋ كەرەك. جاڭاعى «اۋدارعان ولەڭ ءتۇپ نۇسقادان جاقسى بولا الا ما جوق پا» دەگەنگە ابايدىڭ اۋدارمالارى جاقسى جاۋاپ بەرەدى.

  نۇرعيسا قۇرمانجان ۇلى: حانزۋ ءتىلى مەن قازاق ءتىلى دە ءسىزدىڭ انا ءتىلىڭىز بولماعانىمەن، ابايدىڭ ولەڭدەرى مەن قارا سوزدەرىن، مۇحتار اۋەزوۆتىڭ اباي تۋرالى ەپوپەياسىن ءتۇپنۇسقاعا بارىنشا جاقىن ەتىپ كوركەمدىك ورەدە اۋدارىپ شىقتىڭىز. بۇل ءۇشىن كوپ ەڭبەكتەنگەنىڭىز ءسوزسىز. ءبىر ۇلتتىڭ تىلىنە ونىڭ دۇنيە تانىمى مەن ويلاۋ جۇيەسى جاسىرىنىپ جاتادى، اۋدارما بارىسىندا ءتۇپنۇسقاداعى ويدى تۇسىنگەنىڭىزبەن، ەكىنشى تىلدە، ياعني، حانزۋ تىلىندە بايانداۋ بارىسىندا قاتتى قينالعان كەزدەرىڭىز بولعان شىعار؟

  قاباي: ادام ءبىر نارسەگە قۇمارتسا، ول قانشالىق اۋىر بولسا دا ودان ءلاززات تابۋعا بولادى. بالا كۇنىمىزدە اسىق ويناعان كەزدە ەكى قولىمىز ءىسىپ كەتەتىن، ۇيگە كەلگەن سوڭ قولعا ماي جاعىپ وتقا قاقتاپ وتىراتىنبىز، سول سياقتى، اۋدارماعا قۇمارتقاننان كەيىن، كەيدە ونىڭ ازابىن ۇمىتىپ، ءلاززاتتانىپ كەتەمىز. اۋدارما دەگەنىمىز ءبىر جاعىنان ەڭبەك بولسا، ءبىر جاعىنان ءلاززات.

  اۋدارما جاعىندا تۋىنداعان قيىنشىلىقتاردى ايتساق، دەنساۋلىق جاعىندا ءبىراز قيىندىقتار بولدى، ونان سوڭ، قازاقشادان حانزۋشاعا اۋدارۋ بارىسىندا، قازاقشا ءمانىسىن ءتۇسىنۋ جاعىندا قيىنالىپ قالعان كەزىمدە، ۇلتتار باسپاسى قازاق بولىمىندەگى قىزمەتتەستەردەن كوپ سۇراپ، ولار ماعان كوپ جاردەم ەتتى، قازاقتاردىڭ ورتاسىندا ءجۇردىم، اۋدارماسىن مەن ىستەگەنىممەن، توڭىرەگىمدەگى قازاق اعايىندار كوپ جاردەم قىلدى.

  مەنىڭ اۋدارمام ابايدىڭ ولەڭىنىڭ كوركەمدىگىنىڭ ۇشتەن بىرىنە جەتە السا، مەن شۇكىر دەر ەدىم. بۇل كىشپەيىلدىك تانىتقانىم ەمەس، شىن ءسوزىم. ابايدىڭ ولەڭىن ءدال وزىندەي بەينەلەپ جەتكىزۋ مۇمكىن ەمەس. ءبىزدىڭ ابايدى اۋدارۋىمىز، ابايدى تانىستىرۋ، ۇگىتتەۋ ءۇشىن، ءوزىمىز ءۇشىن ەمەس، سوندىقتان، ونى بىرنەشە ادام اۋدارسا ءتىپتى دە جاقسى بولار ەدى دەپ ويلايمىن. بۇگىنگى ءبىر توپ جاس اۋدارماشىلار جەتىلىپ كەلەدى، الدا ابايدى مەنىڭ اۋدارمامنان اسىرىپ اۋداراتىنداردىڭ شىعاتىنىنا سەنەمىن. اۋدارما ءسوزسىز بىرەۋ عانا بولۋى كەرەك دەگەن ءسوز جوق – قوي.

  ەرتەرەكتە، كۇنگەي مۇقاجان ۇلى، قۇرمانالى وسپان ۇلى قاتارلىلارمەن بىرگە وتىرعاندا، قۇرمانالى وسپان ۇلى كۇنگەيگە «ابايدىڭ ولەڭىن اۋدارعان قاباي دەگەن جىگىت» وسى دەپ تانىستىردى. سوندا كۇنگەي ورنىنان اتىپ تۇرىپ، ماعان قاراپ باسىن ءيدى، مەن سوندا «ويباي، ءسىز ۇلكەن ادامسىز، بۇلاي ىستەگەنىڭىز جاراسپايدى» دەدىم، مەن مۇنى ماعان بەرىلگەن قۇرمەت ەمەس، ابايدىڭ ولەڭىن اۋدارۋ جۇمىسىنا دەگەن قۇرمەت دەپ ءتۇسىندىم، راسىندا وسىلاي. اۋەلقان دەگەن ءبىر جىگىت «اباي مەن قاباي» دەگەن ماقالا جازىپتى، كەيىن وسى جايلى سالەم ايتىپ جىبەردىم: «بۇلاي ايتپاسىن، بۇل ماعان اۋىر كەلەدى» دەپ. اباي ۇلكەن بايتەرەك، ءبىز ونىڭ قاسىنداعى قۇراق قانامىز، اباي سىندى بايتەرەكتىڭ ءبىر جاپىراعىنا دا تۇرمايمىز. سوندىقتان، اباي مەن مەنىڭ اتىمدى قاتار قويماڭىزدار دەدىم. كەيىن قازاقستاندا دا «ءبىزدىڭ جاقتا اباي، جۇڭگودا قاباي» دەپ سوزگە قوستى، مەن ۇيتپەڭدەر، قاباي مەن ابايدىڭ اتىن قاتار اتاماڭدار، مۇنداي اتاقتى مەن كوتەرە المايمىن دەدىم. قاباي دەگەن اۋدارماشى عانا، ابايدىڭ اتىمەن مەنىڭ اتىمدى قاتار قويۋدى قالامايمىن.

  نۇرعيسا قۇرمانجان ۇلى: بالالارىڭىز قازىر قانداي كاسىپتەرمەن شۇعىلدانۋدا؟

  قاباي: ۇلكەن بالام «ۇلتتار ادەبيەتى» جۋرنالىنىڭ حانزۋشا باسىلىمندا ىستەيدى، ەكىنشى بالام ورتالىق تەلەۆيزيادا باعدارلاما جۇرگىزەدى. قازىر ەكى - ءۇش باعدارلاماعا جاۋاپتى بولىپ ىستەپ ءجۇر. ءۇشىنشى بالام ــ قىز بالا، ول قازىر يۇنناندا، امەريكادان جۇبايىمەن بىرگە يۇننانعا پراكتيكاعا كەلدى، ەڭ كەنجەم تولىق ورتانى ءبىتىردى دە كاسىپورىنعا جۇمىسقا تۇردى، بالالارىمنىڭ جاعدايى وسىلاي.

  كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.