جوشىحان قىراۋبايەۆ: ەكى ەل اراسىندا ديپلوماتيالىق قارىم – قاتىناستىڭ دامۋى يگى باستامالارعا جول اشۋدا

2016.04.08 15:14   كەلۋ قاينارى : حالىق تورابى

　　سۋرەتتە: قازاقستاننىڭ شاڭحايدا تۇراتىن باس كونسۋلى جوشىحان قىراۋبايەۆ

　　حالىق تورابى، 7 – ءساۋىر، جياڭين. (نۇرعيسا قۇرمانجان ۇلى) جۇڭگو - قازاقستان «ءبىر بەلدەۋ، ءبىر جول» سەلبەسە دامۋ حالىقارالىق تالقى جيىنى 6 – ساۋىردە جياڭسۋ ولكەسىنىڭ جياڭين قالاسىندا باستالدى. جيىن بارىسىندا قازاقستاننىڭ شاڭحاي قالاسىندا تۇراتىن باس كونسۋلى جوشىحان قىراۋبايەۆ حالىق تورابىنىڭ ارناۋلى سۇحباتىن قابىلدادى.

　　جوشىحان قىراۋبايەۆ بىلاي دەدى: قازاقستان – جۇڭگو قارىم – قاتىناسى وتە جوعارى دەڭگەيدە، ەكى ەل اراسىندا ەكونوميكا، ساياسي، مادەني سالالاردا ىنتىماقتاستىق بارعان سايىن نىعايىپ كەلەدى. ەكى ەل قارىم – قاتىناسىنىڭ جوعارى دەڭگەيگە كوتەرىلۋى ەكى ەل باسشىلارىنىڭ وسكەلەڭ ءمان بەرۋىمەن تىعىز بايلانىستى.

　　جوشىحان جياڭين قالاسىندا وتكىزىلىپ جاتقان تالقى جيىنىنا جوعارى باعا بەردى، ول بۇل رەتكى جيىندا اۋىل شارۋاشىلىعى، ءوندىرىس قۋاتى، قارجىلاندىرۋ كولەمىن ارتتىرۋ قاتارلى جاقتاردا ارشىندى قادام تاستالعانىن تىلگە تيەك ەتىپ، بۇل جاقتارىندا اياق الىستىڭ جەدەلدەي تۇسكەنىن ايتتى. ونىڭ ايتۋىنشا، وسى جولى جياڭينگە قازاقستاننىڭ بەتكە تۇتار ۇلكەن كاسىپورىندارىنىڭ جەتەكشىلەرى كەلگەن، ولار جياڭيندەگى جانە باسقا جەرلەردەن كەلگەن ءىرى ءوندىرىس ورىندارىنىڭ باسشىلارىمەن جۇزبە – ءجۇز اڭگىمەلەسىپ، اعىنان اقتارىلىپ، ءوزارا تۇسىنىستىكتەرىن ارتتىرۋدا، باس كونسۋل بۇل ىسكە قۋانىشىن جاسىرمادى، ءارى ەكى ەلدىڭ ديپلوماتيالىق جاقتاعى قارىم – قاتىناسىنىڭ دامىپ، وسىنداي يگى باستامالارعا ۇلكەن ۇلەسىن قوسىپ جاتقانىن ءبىلدىردى. باس كونسۋل قىراۋبايەۆ تالقى جيىنى بارىسىندا 2017 – جىلى قازاقستاندا وتكىزىلەتىن الەمدىك كورمەنىڭ جيى اۋىزعا الىنعانىن اتاپ ءوتتى. سەبەبى، قازاقستاننىڭ ەلباسى نازاربايەۆتىڭ جاريالاۋى بويىنشا، 2017 – جىلى جۇڭگونىڭ قازاقستانداعى ساياحات جىلى بولىپ بەلگىلەنگەن. سوندىقتان، جۇڭگو ۇكىمەتى مەن كاسىپورىندارى بۇعان ايرىقشا نازار اۋدارىپ وتىر، قازاقستان ورتا ازيا ەلدەرى، ءتىپتى، ت م د مەملەكەتتەرى اراسىندا ەڭ ءبىرىنشى بولىپ الەمدىك كورمەنى وتكىزگەلى وتىر، بۇل حالىقارالىق قوعامنىڭ قازاقستانعا دەگەن ۇلكەن سەنىمىن بىلدىرەدى. باس كونسۋل قىراۋبايەۆ 2010 – جىلى الەمدىك كورمە جۇڭگونىڭ شاڭحاي قالاسىندا جوعارى دەڭگەيدە وتكىزىلگەنىن ايتا كەلىپ، الەمدىك كورمەنى وتكىزۋدە جۇڭگونىڭ تاجىريبەسى قازاقستاننىڭ ۇيرەنۋىنە تاتيتىنىن اڭگىمەلەدى.

　　جوشىحان قىراۋبايەۆ «ءبىر بەلدەۋ، ءبىر جول» وي جەلىسى مەن قازاقستاننىڭ «نۇرلى جول» باعدارلاماسى تۋرالى توقتالعاندا، «نۇرلى جول» باعدارلاماسىنىڭ قازاقستاننىڭ دامىعان 30 ەلدىڭ قاتارىنان ورىن الۋىنداعى العى شارت ەكەنىن، ەكى ءىرى باعدارلامانىڭ دا تابان تىرەر تياناعى، العا قويعان ماقساتى حالىقتىڭ يگىلىگى، حالىقتىڭ قامى بولىپ، ەلدىڭ باسەكەلەستىك جاعدايدا جاھاندىق دامۋدان قاعىس قالماۋىنا بولا جاسالعان قالاۋلى قادام ەكەنىن تىلگە تيەك ەتتى. مۇنان سىرت، قازىرگى كەزەڭدە حالىقارالىق جاعدايدا بەلەڭ بەرگەن ەكونوميكالىق داعدارىستان شىعۋدىڭ تەتىگى دە وسىندا ەكەنىن العا تارتتى.

　　ءسوز تىزگىنىن ساياحات جاعىنداعى ىنتىماقتاستىق تۋرالى بۇرعاندا، باس كونسۋل قىراۋبايەۆ قازاقستاننىڭ كورىكتى تابيعاتى اسا زور ساياحات بايلىعى ەكەنىن ءبىلدىردى، ونىڭ ايتۋىنشا، قازاقستاندا ءتورت ماۋسىمنىڭ شەت – شەكاراسى ايقىن، ءتورت ماۋسىمدا دا وزىنە ءتان ساياحات بايلىعى بار، مۇنان سىرت، قازاقستاننىڭ زالالسىز ىشپەك – جەمەكتىكتەرى دە ساياحاتشىلاردى باۋرايدى، قازىر قازاقستان ۇكىمەتى بۇل سالاعا زور ءمان بەرىپ، قاراجات ءبولىپ، ساياحات سالاسىن دامىتۋدا، ەندىگى جەردە، ساياحاتشىلاردى تارتۋ ءۇشىن ەكى ەل اراسىنداعى ساياحات سەرىكتىكتەرىنىڭ اراسىنا دانەكەر بولىپ، ولارعا ەكى مەملەكەت اراسىندا ۆيزالىق تارتىپتەردى جەڭىلدەتۋ دە قاراستىرىلۋدا. وسىنىڭ ارقاسىندا، بەيجيڭدە قازاقستاننىڭ باس ەلشىلىگىندە جۇڭگونىڭ ساياحات سەرىكتىكتەرىنىڭ قاتىسۋىمەن جيىندار وتكىزىلدى، مامىر ايىنان باستاپ گرۋپپالىق ساياحاتتى جانداندىرۋ باستالادى، بيىلدان باستاپ قازاقستانعا گرۋپپالىق ساياحاتشىلارعا ارناۋلى جەڭىلدىكتەر قاراستىرىلادى. بۇل ماسەلەلەرگە جاقىن ارادا ءتىپتى دە ءمان بەرىلەدى.

　　كەلۋ قاينارى: حالىق تورابى