كاكەش قايىرجان ۇلى

2014.11.26 11:05  

　　اعا اۋدارماشى كاكەش قايىرجان ۇلى 1941 - جىلى تولى اۋدانىندا دۇنيەگە كەلگەن. اۆتونوميالى رايوندىق پارتكوم كەڭسە ىستەر مەڭگەرمەسىنىڭ اۋدارماشىلار باسقارماسى، شينجياڭ حالىق راديوسىنىڭ قازاق رەداكسياسى، شينجياڭ تەلەۆيزياسى قازاق ءبولىمى سەكىلدى ورىنداردا ىستەدى. شينجياڭ تەلەۆيزياسى قازاق رەداكسياسىنىڭ تۇڭعىش كەزەكتى مەڭگەرۋشىسى بولدى. اۋدارماشى «كاليلا مەن دەمىنا»،«وسىزامانعى شەتەل جازۋشىلارىنىڭ اڭگىمەلەرىنەن»، «ساكيا مۋني»، «قۇران حيكايالارى» (قازاقستان «جالىن» باسپاسى كوشىرىپ باسقان) جانە «چيڭ اۋلەتى ساراي جىلنامالارىنداعى قازاققا قاتىستى دەرەكتەر» (قاھارمان مۇقان ۇلىمەن بىرلەسىپ اۋدارعان)، «جۇڭگو تاريحىنداعى قازاققا قاتىستى دەرەكتەر» (ابدىلدابەك اقىشتاي، شادىمان اقىمەت قاتارلىلارمەن بىرلەسىپ اۋدارعان) سىندى اۋدارمالارى جارىق كورگەن. «قۇران حيكايالارى» رايونىمىزدىڭ قوعامدىق عىلىم سالاسى بويىنشا 3 - كەزەكتى تاڭداۋلى كىتاپتاردى ساراپتاۋدا 1 - دارەجەلى سيلىق العان. «ءسوز ساندىق» اتتى قىمباتتى قازىنا 2010 - جىلى «ۇلتتار» باسپاسىنان قايتالاي باسىلۋمەن قاتار، 2014 - جىلى قازاقستاننىڭ ونەر باسپاسىنان مەملەكەتتىك باعدارلاما اياسىمەن باسىلىم كورىپ وتىر، بۇل جۇڭگو قازاقتارىنىڭ تۇڭعىش رەت قازاقستان مەملەكەت باعدارلاماسىنان يگىلىكتەنە الۋى.

　　كاكەش قايىرجان ۇلى تەرمينولوگيا، اۋدارما، ادەبي ءتىل، ادەپ جۇيەسى سەكىلدى تاقىرىپتاردا قىرۋار قۇندى ماقالالار جازدى. «اقپاراتتىق ادەبي ءتىل ـــ ۇلتتىق ءتىل مادەنيەتىمىزدىڭ ايناسى»، «سوزدىك قۇرىلىسىمىزعا ۇڭىلسەك» قاتارلى ماقالالارى مەملەكەتتىك جانە اۆتونوميالى رايوندىق 1 - دارەجەلى سيلىقتى ەنشىلەدى. مەملەكەتتىك كەڭەس ۇكىمەتتىك ەرەكشە ستيپەنديانىڭ يەگەرى اتاعىن بەرگەن.

　　كەلۋ قاينارى: حالىق تورابى