شينجياڭداعى قازاق تىلىندەگى مەكتەپتەردىڭ وقىتۋدى زەرتتەۋ تالقى جيىنى شيحۋ قالاسىندا وتكىزىلدى

2013.12.26 14:39   كەلۋ قاينارى : حالىق تورابى

　　توپتىق سۋرەتتى باركول اۋدانى كۇيسۋ ورتا مەكتەبىنەن باقىتقان دولدا ۇلى تۇسىرگەن.

　　حالىق تورابى قازاقشا ارناسىنىڭ حابارى. تارباعاتاي ايماقتىق ۇكىمەت تورابىندا جاريالانعان حابارعا قاراعاندا، شينجياڭ ۇيعۇر اۆتونوميالى رايوندىق وقۋ – اعارتۋ، عىلىم اكادەمياسى ۇيىمداستىرعان شينجياڭداعى قازاق تىلىندەگى مەكتەپتەردىڭ مىندەتتى وقۋ – اعارتۋ كەزەڭىندەگى مۋزيكا، دەنە – تاربيە، اسەمونەر، ۋنيۆەرسال ءامالياتتىق قيمىل، جەرگىلىكتى ساباق، مەكتەپ ساباعى قاتارلى ساباقتارىنا قاتىستى وقىتۋدى زەرتتەۋ تالقى جينى شيحۋ قالالىق 3-ورتا مەكتەپتە ءساتتى اشىلعان.

　　ءۇرىمجى قالاسى، سانجى وبلىسى، ىلە وبلىسى، بۇراتالا وبلىسى، قۇمىل ايماعى، گانسۋ اقساي قازاق اۆتونوميالى اۋدانى قاتارلى جەرلەردەن جانە اۆتونوميالى رايوندىق وقۋ – اعارتۋ مەڭگەرمەسى وقۋ – اعارتۋدى زەرتتەۋ اكادەمياسىنان باسشىلار، ماماندار جانە قاتىستى مەكتەپتەردىڭ باستىقتارى، وقىتۋ ىستەرىنە جاۋاپتى مەڭگەرۋشىلەرى، وقىتۋدى زەرتتەۋ كەڭسەسىنىڭ مەڭگەرۋشىلەرى، زەرتتەرمەندەر، ارناۋلى جانە قوسىمشا ساباق بەرەتىن مۇعالىمدەردەن 400دەن استام ادام تالقىعا قاتىناستى. قيمىل 4 كۇنگە جالعاستى. تالقى جيىنى لەكسيا سويلەۋ، ساباق وتۋدەن ۇلگى كورسەتۋ، وقۋشىلاردىڭ زەرتتەۋ سيپاتىندىق قيمىلدارىنىڭ ناتيجەسىن كورسەتۋ، كەسكىنمەن ساباق بەرۋ، باعالاۋ، پىكىر الماستىرۋ، تالقىلاۋ سىندى فورمالاردا وتكىزىلدى.

　　20 – جەلتوقساندا تالقى جيىنىنىڭ اشىلۋ سالتى وتكىزىلىپ، جيىنعا قاتىناسۋشىلار مامانداردىڭ لەكسياسىن تىڭداپ، شيحۋ قالالىق 3 – ورتا مەكتەپتىڭ مەكتەپ ساباعىن تىڭدادى جانە حيميا، حانزۋ ءتىلى، فيزيكا، جاعراپيا قاتارلى ساباقتار جونىندە وقۋشىلاردىڭ زەرتتەۋ سيپاتىندىق ۇيرەنۋ ناتيجەلەرىن كوردى.

　　جەمسارى اۋداندىق 3 - ورتا مەكتەپ مۇعالىمى اناربەك ايات ۇلى جيىننان العان ەستەلىگىندە: «بۇگىن شيحۋ قالالىق 3-ورتا مەكتەپتىڭ مەكتەپ ساباعىنان كوركەم جازۋ، قوس تىلدە تاقپاق ايتۋ، سۋرەت سىزۋ، مودەل قۇراۋ، دومبىرادا كۇي تارتۋ، گارمون شالۋ، ءان سالۋ ...سىندى ءتۇرلى ساباق تۇرلەرىن ارالاپ كورىپ قاتتى تولقىدىم، اسىرەسە، مەكتەپ قابىرعاسىندا ءان ساباعىنىڭ رولى السىرەگەلى 10 نەشە جىلدان بەرى ءان ساباعىن ەستىمەگەن ەدىم، بۇگىن ءان ساباعىنان ءشامشىنىڭ اندەرىن ەستىپ قاتتى تەبىرەندىم»،-دەپ اسەرلەنە جازىپتى.

　　بۇل رەتكى قيمىل شينجياڭداعى قازاق تىلىندەگى مەكتەپتەردە مۋزيكا، دەنە – تاربيە، اسەمونەر ساباقتارى مەن جەرگىلىكتى ساباقتاردى جانە مەكتەپ ساباعىن ساپالاندىرۋدا ماڭىزدى رول اتقارادى. قيمىل بارىسىندا وقۋ - وقىتۋ بارىسىندا ساقتالىپ وتىرعان ماسەلەلەر توڭىرەگىندە تالقى ورىستەتىلىپ، ساقتانۋ، شەشىم ەتۋ جولدارى تالقىلاندى، ءوزارا پىكىر الماستىرۋ بارىسىندا، جەر - جەردەن كەلگەن مۇعالىمدەر وزدەرىنىڭ ەندىگى قىزمەتتەرى جونىندە ءتۇرلى وي تۇيىندەپ قايتتى. جيىننىڭ ءمانى دە، مىنە، وسىندا.

　　كەلۋ قاينارى: حالىق تورابى