بەتتى ساقتاۋ |باس بەت قىلۋ |حات ساندىعى |حابارلاسىڭىز|ءبىز تۋرالى
اقىن جارىمەن اڭگىمە
(ماعاز رازدان ۇلىنىڭ جۇبايى شابەتاي اپامەن سۇحپات)
دۋمان سايدە  ۇلى
2011.04.07 15:56     كەلۋ قاينارى : حالىق تورابى
{ ءارىپتىڭ ۇلكەن-كىشىلىگى كىشى ورتا ۇلكەن} باسىپ شىعارۋ  
      
  ماعاز رازدان ۇلى شيىنجياڭ قازاق ادەبيەتىنىڭ ولەڭ ءسوزبەن قارا سوزگە تەڭ تولاعاي جۇك سالعان قابىرعالى قارا نارلاردىڭ ءبىرى. ماقاڭ اۋمالى-توكپەلى قوعامدىق جاعدايلاردىڭ كەسىرىنەن ءومىرىنىڭ ادۋىن شاعىن ۇر دا جىق جىلدارعا ۇرلاتسا دا، جەمىسىن جۇتقا بەرمەگەن، «تارلانداپ تابىلسا دا» تاۋداي تابىسىمەن ءتانتى ەتكەن اعا بۋىنداردىڭ ۋاكىلى. اقىننىڭ ارامىزدان وزعانىنا دا مىنە ون ەكى-ون ءۇش جىلدىڭ ءجۇزى بولىپتى. تۇستاستارى، قالامداس ىنىلەرى، قالامگەردى كورە قالعاندار، ونەگەسىن العانداردىڭ اقىن تۋرالى ايتارى، شىعارماشىلىق ۇردىستەرى تۋالى تولعاقتى لەبىزدەرى جالعاسا بەرەرى ءسوزسىز. اقىن تۋرالى ايتارىمىز ارتپاسا ازايمايتىنى بەلگىلى. مەن اقىننىڭ ارداقتى جارى، بۇل كۇندە سەكسەننىڭ سەڭگىرىنە شىققان شابەتاي اپامىزبەن اڭگىمەدە بولعان ەدىم. سونى كوپ نازارىنا ۇسىنىپ وتىرمىن.

  شابەتاي قاجىنابي قىزى ماقاڭمەن 50 جىل جولداس بولعان. 5 بالانىڭ اناسى. ماقاڭ «تۇرىكپەننىڭ تۇبىنە» بارعان جالالى جىلداردا شابەتاي اپا اقىن ۇرپاقتارىن ايالى الاقانىمەن ماپەلەپ، سۇرقىلتاي جىلداردان امان-ەسەن الىپ شىقتى. باقىتتى وتباسىنىڭ التىن دىڭگەگى بولدى. قازىر اپامىز 84 جاسقا كەلسە دە، ءسوزى جۇيەلى، ويى سەرگەك. اپامىزدىڭ ماعاز اقىنمەن بىرگە باسىپ وتكەن ءومىر ەلەستەرى اپامىزدىڭ قىمباتتى ەستەمەسى.

  دۋمان سايدە ۇلى: اپا، تۋعان ەلىڭىز اقيىق اقىن، جان جولداسىڭىز ماعاز رازدان ۇلىنىڭ ەڭبەكتەرىمەن ماقتانادى، ماقاڭنىڭ وتتى ولەڭدەرى، تامىرىن تاريحپەن سۋارىپ، كوسەم وي ايتاتىن اڭگىمە-پوۆەستتەرى، «ساى بەل» ولەڭ رومانى، قارا ءسوزدىڭ قادىرىن تانىتاتىن قوماقتى ەڭبەگى، تاريحي رومان «التاي اقيىقتارى» ءبىزدىڭ ەرتەڭگە ۇيالماي ۇسىنار قازىنامىز. ماقاڭ تۋرالى ەسسەلەر، ماقالالار جازىلدى. سوندا قالامگەردىڭ ءومىر ءىزى، قالام تارتۋ شەبەرلىگى تولىق ايتىلعان. سولايدا، ءوز اۋزىڭىزدان اقىننىڭ بىلايعى جۇرت كوپ بىلە بەرمەيتىن، بىلگىسى كەلەتىن تۇستارى تۋرالى سىر بولىسسەك دەيمىز.

  ءيا، اپا، ابەس كورمەسەڭىز «ماحاببات ماڭگى ەرتەگى» دەيدى. ءوزىڭىز التاي بەتىندەگى ايگىلى ادامداردىڭ ءبىرى قاجىنابي ۋاليدىڭ ەركە قىزى بولىپ بۇلعاقتاپ ءوسىپسىز، ماقاڭ ەكەۋلەرىڭىزدىڭ تانىسۋ، ءۇي بولۋ بارىستارىڭىزدى «ماعاز تۋرالى ەسسەلەر» كىتابىندا دا تىلگە العانسىز، ماقاڭمەن العاش تانىسۋ بارىسىڭىزدى، ماحاببات كەشىرمەلەرىڭىزدى ەسكە الا كەتسەڭىز؟ كەزىندە ءسىزدىڭ كوڭىلىڭىزدە، نازارىڭىزدا ماقاڭ قاي قىرىمەن ورىن العان ەدى، ول كەزدە جاس ماعاز ولەڭ جازا ما ەكەن، جازعان ولەڭدەرى بولسا كورسەتتى مە، وزىڭىزگە ماحاببات ليريكاسىن ارنادى ما دەگەندەي؟

  شابەتاي اپا: مەن وتكەندە «اقىنمەن بىرگە وتكەن كۇندەردە» دەگەن ماقالا جازعان ەدىم. سوندا تولىق ايتقام. ونى قايتالاپ وتىرمايىن. ماقاڭنىڭ اكەلەرىمەن اكەم قاجىنابي دوس، ۇزەڭگىلەس ادامدار بولدى. ءبىزدىڭ اۋىلدارىمىز قىس قىستاۋ ، جاز جايلاۋ جاقىن ارالاس-قۇرالاس بولعاندىقتان، ماقاڭ ەكەۋىمىز ەرتەدەن ءبىر بىرىمىزدى بىلەتىن ەدىك. 1941-جىلى مەنىڭ اكەم قاجىنابي بار، ماقاڭنىڭ اكەسى بار بارلىعىن «قۇرال اداقتايمىز» دەگەن اتپەن ۇرىمجىگە اكەتتى. سوندا ءبىر جىلعا جۋىق اينالدى. وسى جىلدىڭ 9-ايلارى بولۋ كەرەك ماقاڭ قاسىندا ساعي باستاعان جولداس-جورا جىگىتتەرى بار جولقاراسۋ دەگەن جەردە وتىرعان ءبىزدىڭ ۇيگە ءتۇستى. بۇيىمتايلارى: ۇرىمجىگە اكەتكەن كىسىلەردەن حات-حابار بارما ەكەن بىلەيىك دەپ كەلدىك،-دەيدى. سيلى اۋىلدىڭ جاستارىن ۇلكەندەر جىلى قارسى الدى. ىڭىردە مال سويىلىپ، كوڭىلدى داستارقانعا قىمىز قۇيىلىپ، ءان ايتىلدى. سوندا شەشەم اپەكەم ەكەۋىمىزگە قوياردا قويماي «اۋىلدىڭ التى اۋىزىن» ايتىڭدار دەپ ءان سالعىزدى. ءبىزدەن كەيىن ماقاڭ ارت-ارتىنان ابايدىڭ بىرنەشە ءانىن ايتتى. ماقاڭ ايتقان ابايدىڭ «ايتتىم سالەم قالام قاس» قاتارلى اندەرى جانىما بولەكشە اسەر بەرىپ، كوپكە دەيىن كوڭىمنەن كوتەرىلمەي ءجۇردى. وسىدان ءبىر جىلدان كەيىن ماقاڭنىڭ وزىنەن ءتورت جاس ۇلكەن اعاسى ءماسىعۇتقا قوساي زالىڭنىڭ زامە دەگەن قىزىنا قۇدا ءتۇسىپ، التايدىڭ تورعايتى جايلاۋىندا بولعان كەشكى تويعا باردىق. ماقاڭمەن سول جولى جانە كەزىكتىم. ماقاڭنىڭ ءبىزدىڭ اۋىلعا ءجايدان-جاي ءجيى سوعىپ جۇرمەگەنى دە بەلگىلى ەدى. ماحابباتتىڭ ءوزىندىك قۇپياسى دا بولادى. بالالارىما وتە جىڭىشكەلەپ كەتپەيىن. ماقاڭ ەكەۋىمىز 1945-جىلى شىلدەدە قۇدالاسىپ، 47-جىلى باسىمىزعا شاڭىراق كوتەرىپ، باۋىرىمىزعا قازان استىق. ماقاڭنىڭ ول كەزدە ولەڭ جازاتىنىن بىلمەيدى ەكەنمىن. ءبىراق قازاقتىڭ قاي بوز بالاسى قارا ولەڭنەن قۇر جاياۋ دەيسىڭ. ماقاڭ ابايدى ۇستاز تۇتىپ، ولەڭدەرىن وقىپ، كىتاپقا كوشىرىپ جازىپ، جاتقادا بىلەتىن. ءاندى دە جاقسى ايتاتىن ەدى. ۇلى اباي «ماحابباتسىز دۇنيە بوس» دەگەن. ماقاڭ ەكەۋىمىز جاقسى كۇندە دە، جامان كۇندە دە بىرگە بولدىق. ماقاڭ كەيىن ەرتەڭى نە بولارى بۇلدىر بولىپ، باسىنا اۋىر كۇن تۋعاندا قاسىنان تابىلىپ، ومىرگە سەنىممەن، ۇمىتپەن قاراۋىنا ۇلەس قوستىم. وسىنىڭ بارلىعى جۇرەكپەن جالعاسقان شىنايى ماحاببات كۇشى ما دەپ ويلايمىن.

  دۋمان: ماعاز اقىن العاش «التاي گازەتىندە» رەداكتورلىق قىزمەتتە بولعانى بەلگىلى. سول تۇستا ءوز كەزىنىڭ ۋاكىلدىك تۋىندىلارى بولعان «اداسقان ايۋدىڭ اقتىق جىرى» سىندى جىر داستاندارىن جازىپ، تۋ باستان سۋىرىپ سالما جۇيرىك ەكەنىن بايقاتقان. سول تۇستا اقىن قانداي جازۋ ماشىعىن باستان كەشىرگەن ەدى؟

  شابەتاي اپا: ماقاڭ ول كەزدە كىتاپتى وتە كوپ وقۋشى ەدى. ول كەزدە قازاقشا كىتاپتار جوقتىڭ قاسى ەدى. كوبىندە قازاقىستاننان كەلەتىن ابايدىڭ، بايروننىڭ، ءسابيىت مۇحاننىڭ ت ب جازۋشىلاردىڭ كىتاپتارىن، «جۇلدىز» جۋرنالىن الىپ، وقىپ پايدالاناتىن. وقۋدان باس المايتىن. كۇندىز قىزمەتتەن كەلگەن سوڭ جازۋعا وتىراتىن. ولەڭدى كوبىندە تۇندە جازىپ ءجۇردى. ول كەزدە قىسقا ولەڭدەرى جازعان-سىزعانىنىڭ دەنىن قۇرايتىن ەدى.

  دۋمان: ماقاڭنىڭ سول تۇستاعى جانە كەيىنگى جازۋ جانە تۇرمىس داعدىسى قالاي بولدى؟

  شابەتاي اپا: ماقاڭ تۇرمىسقا وتە كومپىس ادام ەدى. جازۋعا دا ورتا تالدامايتىن. وسى كۇنى ويلاسام نەگىزى تىنىشتىقتى قالايدى ەكەن. تۇندە كوبىرەك وتىرىپ جازۋمەن شۇعىلداناتىن. جازدا دالادا تىنىش ورىندا جازۋدى قالايتىن. بەرتىن كەلە كۇندىز ۇيگە كەلىمدى-كەتىمدى كىسى كوپ بولعاندىقتان الدىن الا ۋادەلەسپەگەندە، الىستان كەلگەن ماڭىزدى ادامدار بولماعاندا نەگىزىنەن وڭاشا قالۋىنا شارت جاراتىپ بەرىپ وتىردىق. قولدان كەتكەن بوس ۋاقىتىنىڭ ورىنىن تولتىرۋىنا كومەكتەستىك. قالامگەر ءۇشىن ۋاقىت شىنىندا قىمبات ەكەنىن ماقاڭ ارقىلى ءتىپتى دە تەرەڭ تۇسىنگەندەي بولدىم. ول كىسى ۋاقىتىن زايا كەتىرمەيتىن ادام ەدى. جازۋدان شارشاعاندا دالادا از جەڭىل ەڭبەك ىستەيتىن، راديو تىڭدايتىن.

  دۋمان: جازىقسىز جالادان قۇتىلعان سوڭ ماقاڭ تۇرمىسقا، ومىرگە قالاي قارادى، باياعىنداعى قايراتتى ماقاڭنىڭ تۇلعاسىن «تارلانداپ بارىپ تابىلعان» ماقاڭنان تابا الدىڭىز با؟

  شابەتاي اپا: «ەل ءىشى التىن بەسىك» دەگەن. ماقاڭ تۇرمەدەن كەلە تەز تۇلەدى. ساعىنىش قۇنداعىنا ۇزاق جىل بولەنگەن اقىن نوسەر جىرىن اعىتتى. شىعارماشىلىعىندا ايقىن ءوسۋ بارلىعىن بايقاتتى. مۇنى زەردەلى وقىرمان مەنەن جاقسى بىلەدى. ال تۇرمىستىق جاعىن ايتسام ماقاڭ ءوزىن سەرى ۇستايتىن، تازا، رەتتى جۇرۋدى قالايتىن ادام ەدى. «سىرلى اياقتىڭ سىرى كەتسە دە، سىنى كەتپەيدى» دەگەندەي، تۇرمەدە جۇرگەندە دە كىيىمدەرىن جاماپ-جاسقاپ بولسادا رەتتى، تازا ۇستاپ، ۇقىپتىلىقپەن تۇرمىسىن باسقارىپتى. كەلگەننەن كەيىن مەن شامامنىڭ كەلىسىنشە جازعان كىتاپتارىن كوشىرىسىپ، قولجازبالارىن تۇپتەپ، ارحيپكە ساقتاۋعا جاردەمدەسىپ تۇردىم. جاسىمنىڭ ۇلعايعانىنا قاراماي ماقاڭنىڭ كومەكشىسى بولعانىمدى، الاڭسىز شىعارماشىلىقپەن شۇعىلدانعانىنا جاعداي جاساعانىمدى قۋانىش سانادىم.

  دۋمان: ەڭبەكتەرىنىڭ العاشىقى وقىرمانى بولىپ كوردىڭىز بە؟ جازعان شىعارمالارىن نەمەسە جازار جوبالارىن سىزگە سىر عىپ ايتۋشى ما ەدى؟ ءسىز وقىرمان تۇرعىسىنان قانداي مىندەت اتقاردىم دەپ ويلايسىز؟

  شاباتاي اپا: ول كىسى جازعان ولەڭدەرىن ماعان وقىپ بەرەتىن، مەن تىڭداماعان ولەڭدى جىرتا سالاتىن. ول كىسى ماعان: «سەنىڭ نازارىڭدى اۋدارماعان ولەڭ ەگىنشى-مالشى قاۋىمنىڭ نازارىن ءتىپتى دە اۋدارمايدى» دەيتىن. سودان ولەڭىن جىرتا سالاما دەپ شاماشا شىن پەيىلىممەن تىڭدايتىن بولدىم. اقىن جازۋشى ءۇشىن وقىرمانمەن ەسەپتەسۋ دە وتە قاجەتتى ەكەن.

  دۋمان: ادەتتە، اقىن شىعارمالارىن وقيتىن با ەدىڭىز؟ باسقا ادەبي شىعارمالاردى كورەسىز بە؟

  شابەتاي اپا: جاس كەزىمدە مۇعالىم بولدىم. ول كەزدە وقيتىن ادەبي شىعارمالار دا تاپشى كوبىندە پەداگوگيالىق كىتاپتاردى وقىدىق. ىبىراي التىنساريىننىڭ «كەل بالالار وقىلىق» دەگەن ولەڭ جولدارىن وقۋشىلارعا تاربيە نەگىزىندە وقىپ بەرەتىنبىز. سونداي-اق وقىتۋ مەتوتى جونىندە «ا. س. ماكارونكانىڭ كىتابىن» پايدالاندىم. ماقاڭ كىتاپتى كوپ جياتىن، سول كىتاپتاردىڭ قاجەتتىسىن وقىپ پايدالاندىم. گازەتتەرگە دە جازىلاتىنمىن. ماقاڭنىڭ ءار ولەڭى جاڭالىققا تولى سياقتى سەزىلەتىن. ءمان بەرىپ وقىعاندىكى مە «تىلگە جەڭىل، جۇرەككە جىلى تيەتىن» ەدى.

  دۋمان: ول كىسى قايسى قالامگەرلەردى جاقسى باعالايتىن ەدى.؟.

  شابەتاي اپا: ماقاڭ جالپى ادامدارعا قۇرمەتپەن قاراۋدى ۇناتاتىن ادام. «ءار قالامگەر ءوز تۇرعىسىنان ءتيىستى باعاسىن الۋ كەرەك» دەپ وتىراتىن. ال، ناقتىراق ايتسام ومارعازى ايتان ۇلىن تەرەڭ ويلى جۇيرىك قالامگەر دەپ شىن باعالايتىن. ابدەنباي باجايدىڭ، شاكەن وڭالبايدىڭ ولەڭدەرىن جاقسى كورەتىن. كەيىنگى جاس اقىن-جازۋشىلاردىڭ شىعارمالارىن دا جوعارى باعالاپ وقىپ ءجۇردى. ال، اساعاڭمەن ـــ اسقار تاتاناي ۇلىمەن سىرلاس، دوس بولىپ ءوتتى. ابىز اساعاڭمەن اسا تاياعىن ۇستاپ قولداسىپ وتكەن از ۋاقىتىن ءومىرىنىڭ اسا ءماندى شاعى رەتىندە ەسكە الىپ وتىراتىن.

  دۋمان: ماقاڭ «تارلانداپ بارىپ» قولعا السا دا سوڭىنا دەيىن ەنتىكپەي جەتكەن ەڭبەگى «التاي اقيىقتارى» رومانى قاي جاعىنان دا قالامگەردىڭ شىن جۇيرىكتىگىن بەينەلەگەن كولەمدى ەڭبەك بولدى. وسى قوماقتى ەڭبەگىن جازۋ بارىسىن ايتا كەتسەڭىز؟

  شابەتاي اپا: ول كىسى رومانعا ماتەريال الۋ ءۇشىن شىعارماسىنا جەلى بولعان جەرلەردىڭ وي-قىرىن كوپ ارالادى. كوپتەگەن ادامدارمەن كەزىكتى، كوپ ماتەريال توپتادى، وتە ءمان بەردى. شىنىن ايتۋ كەرەك، استىندا دايىن كولىك بولماعان سوڭ كەي جەرلەرگە بارۋ ءۇشىن بىرەۋدەن ساقالىن ساتىپ اۆتوكولىك سۇراسا، كەيدە الپىستى القىمداعان جاسىنا قاراماي، قىستا اق بۇرقاقتاتىپ اتپەن دە كەتىپ ءجۇردى. الايدا، از ۋاقىتتا وندىرە جازىپ بۇل تاريحي ەڭبەگىنىڭ دە سوڭىنا توشكى قويدى. توسەلگەن قالامگەر ەكەنىن كورسەتتى. بۇل شىعارماسى اۆتونوميالى رايوندىق، مەملەكەتتىك سيلىقتار الدى. قالامگەر ءۇشىن بۇدان ارتىق نە بار.

  دۋمان: ماقاڭ ومىردەن وزعاننان كەيىن تۇرمىسىڭىزدا قانداي وزگەرىس بولدى؟ ماقاڭنىڭ ورىنى وگەيسىدى مە ؟ كوڭىلىڭىز نەلەرگە تولىپ، نەلەردەن قالدى؟

  شابەتاي اپا: ماقاڭ باردا شاڭىراعىمىزدان ادام اياعى ۇزىلمەتىن ەدى. نە ءبىر قاسقا مەن جايساڭ ءدام تاتقان شاڭىراق ەدىك. تەك ادەبي ورتا عانا ەمەس ،ەل اعالارى دا كەلىپ سالەمدەسىپ اڭگىمەلەسىپ قايتاتىن. شىنى سول كەيدە ادام اياعى سىيرەگەندەي قوڭىلتاقسىپ قالامىز. ماقاڭنىڭ ورنى وگەسىپ تۇرعانداي بولادى. ول كىسىنىڭ ونەردە دە، ومىردە دە ورىنى بولەك ەكەنىن ۋاقىت وزعان سايىن شىنداپ سەزگەندەي بولدىق. تىلەگىم: تۋعان حالقىنىڭ ورتاسىنداعى، جۇرەگىندەگى ورنى، ادەبيەتتەگى ورنى وگەيسىمەسە ەكەن، سوڭىنان ىزدەيتىندەر ۇزىلمەسە ەكەن دەپ وتىرامىن. ال قۇدايعا شۇكىر قازىر بەس بالامنان ون بەستەي نەمەرەم بار. الدى جوعارى مەكتەپ ءبىتىرىپ قىزمەتكە شىقتى. اكەسىنىڭ شاڭىراعىنداعى كەنجەم موكەننىڭ دە وزدەرى تۇستاس دوس-جاراندارى كەلىپ-كەتىپ تۇرادى. قۇدايدىڭ بەرگەنىنە شۇكىرشىلىك. سولاردىڭ ورتاسىندا شالقىپ وتىرمىن.

  دۋمان: اقىن تۋرالى شاعىن بولسادا ءبىر ەسسەلەر جيناعى جارىق كوردى، ماقاڭ تۋرالى جازىلعان ماقالالار، ارناۋلار، ەستەلىكتەر از ەمەس، ءالى دە جازىلا بەرەرى ءسوزسىز، وسى ەڭبەكتەردى جالعاستىرىپ جيناۋ دايارلاۋ جۇمىسىنىڭ ءجۇرىلۋى قانداي؟ الدا ماقاڭ تۋرالى قانداي جۇمىستار قولعا الىنسا دەپ ويلايسىز؟

  شاباتاي اپا: ماقاڭ قايتىس بولعاننان كەيىن ىلە حالىق باسپاسىنان «ەرتەڭ» اتتى ولەڭدەر جيناعى، شيىنجياڭ حالىق باسپاسىنان «بوساعا» اتتى ولەڭدەر جيناعى جارىق كوردى. سەرىكبەك ساقىش ۇلى ءبىر ەسسەلەر جيناعىن قۇراستىردى. قولىمدا تاعى جاريالانباعان 13 قالتاداي كولەمدى ورگينال بار. بۇلار نەگىزىنەن ءار جىلدارداعى ماقالالار، ولەڭدەر، سويلەنگەن سوزدەر، كوزى تىرىسىندە جانە قايتىس بولعاننان كەيىن ماقاڭ تۋرالى جازىلعان ارناۋلار، قارالى ولەڭدەر، ەسسەلەر، تەلەگرامالار، باتالار دەگەندەي، ونى مازمۇن بويىنشا تۇرگە ءبولىپ ساقتاپ وتىرمىن. ەستى ۇرپاقتىڭ ەسكەرەتىنە سەنەمىن.

  دۋمان: اقىن ءومىرىنىڭ سوڭعى كەزىندە ناۋقاستانىپ، التىن ۋاقىتىنىڭ ءبىرازىن اۋرۋ توسەگىندە وتكىزدى، وسى بارىسىن ايتا كەتسەڭىز؟ وسى ناۋقاستان كەيىن شىعارماشىلىققا ورالا الدى ما؟

  شابەتاي اپا: ماقاڭنىڭ 1992-جىلى جالعىز اعاسى قايتىس بولدى. 1994-جىلى مادەنيەت ۇيىندە ىستەيتىن بالاسى 36 جاسىندا تۇتقيىل جۇرەك اۋرۋىنان دۇنيە سالدى. وسىنىڭ بارلىعى جالعاسىپ، اقىننىڭ كوڭىل–كۇيى جابىرقاۋ كۇيگە ءتۇستى. بۇرىننان بار قان قىسىم ناۋقاسىنا «جۇرەك» دەيتىن پالە كەلىپ قوسىلدى. 1995-جىلى قازان ايىندا ۇرىمجىدەگى اۆتونوميالى رايوندىق حالىق دوحترحاناسىندا ەسكىلىكتى ناۋقاسىمەن ەمدەلىپ جاتقاندا ويلاماعان جەردەن ءبىر اياق، ءبىر قولى جانسىزداپ، توسەك تارتىپ جاتىپ قالدى.ەمحاناعا دەر كەزىندە اپارىلعاندىقتان، ەمدەلىپ وزدىگىنەن جۇرە الاتىن دارەجەگە كەلدى. سودان ۇيدە كۇتىمدەدىك. ءوز وتباسىندا جاقسى ۇيىقتاپ، جاقسى تاماقتانىپ، ءبىر كۇندە ۇيقىسى بۇزىلمادى. الايدا، سۇراسا جاۋاپ بەرەتىن، وزدىگىنەن كوپ سويلەمەيتىن بولدى. بالا-شاعا، كەلىن-كەشەكتەرى كوڭىلى نەنى قالاسا، سول تاماعىن ىستەپ بەرىپ وتە جاقسى كۇتتى. ەڭ وكىنىشتىسى وسى جولعى ناۋقاستان كەيىن قولىنا قايىتىپ قالام الا المادى. اقىرى 1998-جىلى 5-ايدىڭ 2–كۇنى شۇعىل قىسىلىپ اۋىرىپ، بۋىرشىن اۋداندىق ەمحانادا جۇرەك ولەتتەنۋ ناۋقاسىنان قايتىس بولدى. ءوزىن ۇزاق جىل ساعىنىش قۇنداعىنا بولەگەن مەكەنى كوكسىن تاۋىنىڭ ەتەگىنە ماڭگىلىك جانتايدى. بالالارى سول جىلى كۇمبەزىنىڭ باسىنا قالام مەن كىتاپ بەينەسىندە ەسكەرتكىش ورناتتى. بۇل كۇندە بۋىرشىن قالاشىعىنان شىعا بەرىستەگى بۋىرشىن-جەمەنەي تاس جولىنىڭ شىعىس جاق ىرگەسىندەگى قابىرىستاندىقتا جاتقان اقىن قابىرى باسىنا بارىپ اقىن رۋحىنا تاعىزىم ەتۋشىلەردىڭ اياعى سيىرەمەيدى.

  بالام، اقىن تۋرالى كوپ سۇراق قويىپ وتىرسىڭ، جاسىم ۇلعايعاندىقتان كوپ نارسەلەردى ۇمىتىپ تا قالدىم. بىلگەنىم بويىنشا جاۋاپ بەرىپ جاتىرمىن. «جاقسىنىڭ اتى ولمەيدى، عالىمنىڭ حاتى ولمەيدى» دەيدى. ەسكەرىپ، ىزدەپ جاتقاندارىڭا اتالارىنىڭ ارۋاعى ريزا بولسىن. قىزمەتىڭ تابىستى، دەنىڭ ساۋ بولسىن بالام !

  دۋمان: اپا، جاسىڭىزدىڭ ۇلعايعانىنا، دەنساۋلىعىڭىزدىڭ السىزدىگىنە قاراماي ۋاقىت ءبولىپ، ۇلكەن ءمان بەرىپ اڭگىمەلەسكەنىڭىزگە شىن كوڭىلدەن راحىمەت ايتامىن. سىزگە مىقتى دەنساۋلىق تىلەيمىن. اقىن شىعارمالارىء وزىنىڭ سۇيىكتى وقىرمانىمەن بىرگە ۋاقىت وزعان سايىن جاڭارىپ، تىڭ قىرىمەن كورىنە بەرەرىنە سەنەمىن. وزىڭىزگە دە قۇرمەتىمىز ارتا بەرەمەك!

  كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
حابارلار
كوپ مەديا
ۇلتتىق مانەر
تەلەفون: 67 /65368365-010 ‍حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved