بەتتى ساقتاۋ | باس بەت قىلۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

فرانسيانىڭ «دە-گاۋلو» اتتى اۆياماتكاسى.

تايلاندتتىڭ «گاكەلي نالۆەبيت» اتتى اۆياماتكاسى.

كەسكىن

حالىق تورابى>>ءتىل-ادەبيەت

جاقسىنىڭ جەتپەيدى ەكەن ءبىر كۇنىنە...

(جول ەستەلىگى)

دۋمان سايدە ۇلى

2011.07.28 15:18     كەلۋ قاينارى : حالىق تورابى

  2009- جىل. مامىراجاي ماۋسىمنىڭ تاڭ نۇرىنا شۇمىلا، تاعى ءبىر قاربالاس قىزمەت كۇنىنىڭ قامىنا قول ۇزارتا بەرگەنىم سول ەدى، بۋىرشىن اۋداندىق مادەنيەت-دەنە تاربيە مەكەمەسىنىڭ قىزمەتكەرى داۋلەت اعا كەڭسەمە كىرىپ كەلدى. ۇزاق جىل اۋداندىق ويىن-ساۋىق ۇيىرمەسىندە دومبىراشى بولىپ جۇمىس ىستەگەن داۋكەڭ، بۇل كۇندە اق تۇلپارىنىڭ تىزگىنىن قوسىمشا ۇستاپ جۇر. داۋكەڭنىڭ جەتكىزگەن اۋداندىق مادەنيەت دەنە تاربيە مەكەمەسىنىڭ بەيزاتتىق مادەني مۇرا جيناۋ قىزمەتىنە تىلشىلىك ىستەپ بىرگە بارۋ جايلى بۇيىمتايىن قۋانا قابىل الدىم. ءبىز الدىمەن بۇل جۇمىستان الدىن الا حاباردار وتىرعان بەلگىلى جازۋشى اسىلبەك ساقىش ۇلىنىڭ ۇيىنە سوعا كەتىپ، اعانىڭ ءار نارسەگە اسىقپايتىن، تۇلىبى كەڭ جۇبايى ءسانيا اپايدىڭ تاڭەرتەڭگىلىك قايماقتى شايىنان اۋىز تيگەن سوڭ، اقىن ازيا ماعىپەر قىزىمەن بىرگە قالتون ساحاراسى قايداسىڭ دەپ ءجۇرىپ كەتتىك.

  وي مەن قىرعا بىردەي جۇيرىك اق تۇلپاردىڭ الدىڭعى ورىندىعىندا قوڭىر كوز اينەگى جالپاق بەتىنە جاراسىپ اساعاڭ ـــ اسىلبەك ساقىش ۇلى وتىر. نازىك سەزىمگە تولى، ويلى، كۇيلى جىرلاردىڭ اۆتورى ءازيا ماعىپەر قىزى ەر مىنەزدى، اشىق-جارقىن جان. بۇل كۇندە اۋداندىق مادەنيەت ءۇيىنىڭ مادەني مۇرالار قىزمەتىنە جاۋاپتى بولىپ، ويلى-قىرلى شاپقىلاپ ءجۇرىپ-اق، اقىن كوڭىلى كوپ-كوپ ويلار ارقالاپ، جاڭا جاسامپازدىققا جۇكتى بولىپ قايتادى. اڭگىمە تىزگىنى دە اقجارقىن اقىن اپەكەمىزدە. ماشينانىڭ ءۇن العىشىنان توگىلگەن ادەمى اندەر دە بىرىنەن سوڭ ءبىرى جالعاسىپ وزگەشە كوڭىلدىلىك سيلايدى.

  تاسپاداي تىلىنگەن بۋىرشىن-قاناس اسفاليت جولىندا جۇيرىك كولىك سۋىرىلىپ العا تارتۋدا. بۇل مەزگىل ساياحاتشىلاردىڭ دەگەنباي قاناسقا اعىلاتىن مەزگىلى. قالاشىقتان شىعا ساياحاتشىلاردى باۋراۋ ءۇشىن بوي كوتەرگەن ۇزىن مويىن مۇنارا ۇيلەرى سونادايدان كورىنەتىن توقىمتى سولتۇستىك شينجياڭ تەڭىز قايراڭى، ويماقى جانە شۇڭقىر اۋىلدارىنىڭ جول بويىنداعى جەرلىك ونىمدەر بازارى بىرىنەن سوڭ ءبىرى كوزگە ۇرىلادى. ال، مەن ءۇشىن وسى ورتانىڭ ءار تاس، ءار تال شوبىنە دەيىن قىمبات. وسى جولدى ارلى-بەرلى سان باسسام دا، جول بويىنداعى كوڭىلگە دە كوزگە دە تانىس كورىنىستەرگە ءار وتكەن سايىن جاي كوزبەن قاراعان ەمەسپىن. تۋعان توپىراق تۋعان پەرزەنتىنە قانداي ىستىق!

  «جول قىسقارسىن، اڭگىمە ايتا وتىر» دەيتىن ەمەس، ءازيا اپەكەم ەكەۋىمىز اۋىل جاڭالىعىنان، حالىقتىڭ بۇگىنگى تۇرمىس تىنىسىنان تارتىپ، ادەبي جاسامپازدىقتىڭ قازىرگى اۋانىنا دەيىن بارىپ، تىزگىن تارتار ەمەسپىز.

  اساعاڭ بىلتىرعى قىركۇيەك ايىندا دەمالىسقا شىقسا دا، اۋدانىنىڭ بەيزاتتىق مادەني مۇرالارىنا قاتىستى جازبا ماتەريالىن دايارلاۋ جۇمىسىنا قاتىناسىپ، جىلداردىڭ وزۋىمەن ۇرپاقتار ساناسىنان وشكىندەپ بارا جاتقان مۇرالارىمىزى قۇتقارۋ، قورعاۋ، جيناقتاۋ قىزمەتىنىڭ شىنايى جاناشىرى بولىپ، وزىندىك ۇلەسىن قوسىپ ءجۇر. بەيزاتتىق مادەني مۇرا ـــ ءبىر ۇلتتىڭ وتكەن سان عاسىرلار بويى جاراتقان، مۇراگەرلىك ەتىپ كەلگەن، حالىق تۇرمىسىمەن تىعىز بايلانىستى ءتۇرلى ءداستۇرلى مادەنيەتىنىڭ ناقتىلى زاتتاي جانە اۋىزشا ايتىلاتىن بەينەلەنۋ فورماسى. نەلەر تاريحي كەزەڭدەردى باستان كەشىپ، سارالانعان ۇلتتىڭ وزىنە عانا ءتان رۋحاني جاسامپازدىق ەڭبەگىنىڭ جەمىسى. بىلتىردان بەرى، بۋىرشىن اۋدانى بەيزاتتق مادەني مۇرالاردى قورعاۋ قىزمەتىنە بولعان باسشىلىقتى كۇشەيتىپ، ارناۋلى كەڭسە قۇرىپ، قاجەتتى قارجىنى تياناقتاندىرىپ، بەيزاتتىق مادەني مۇرالاردى جۇيەلى ەستەلىككە الىپ، دەر كەزىندە جوعارىعا جولداپ وتىردى. تەك وتكەن جىلىدىڭ وزىندە بۇل اۋدان ايماققا ون ءتۇرلى بەيزاتتىق مادەني مۇرانىڭ ماتەريالىن جولدادى، مۇنىڭ ىشىندە بەيسەنبى دونەنباي ۇلىنىڭ كۇيلەرى، بۋىرشىنعا قونىستانعان ورىستاردىڭ سىرا اشىتۋ ونەرى، دىبالاردىڭ اركى تارتۋى، قازاق ورىمشىلىگى، قازاق سىبىزعىسى قاتارلى بەس بەيزاتتق مادەني مۇرا ايماقتىڭ تەكسەرىپ-بەكىتۋىنەن ءوتىپ، اۆتونومعا جولداندى. بيىل تاعى جاڭادان ون ءبىر ءتۇرلى بەيزاتتىق مادەني مۇرانى تۇراقتاندىرىپ، ماتەريالىن جازىپ، جوعارىعا جولداۋ ۇستىندە.

  قابىرعالى قالامگەر ماعاز رازدان ۇلىنىڭ ايگىلى «سوڭعى اس» اڭگىمەسىندە اتالاتىن اتاقتى قالتون جازىعىنا جەتكەنشە ارعى-بەرگىدەن قوزعالعان اڭگىمە جەلىسى ءبىر ۇزىلگەن جوق.

  قوس قالامگەردە وسىنداي ءبىر ءساتتى ساپاردى ساعىنىپ قالعانداي سەزىلدى ماعان. اقىن جانى قانداي نازىك. ماشينا بۋىرشىن- قاناس تاس جولى بويىنداعى قاناس اۋە جايىنىڭ تۇسىنان وتكەن سوڭ «ورىس قالاسىنان» قۇلداپ، قالتون جازىعىنداعى تالاي تارلان ۋاقيعاعا كۋا بولعان بايگە توبەگە جەتكەندە، ءازيا اپەكەم،-وسى ارادا مەنىڭ بالا كۇنىمدە ءبىزدىڭ ءۇيدىڭ كەر توبەل اتى بايگەدەن كەلىپ، بۇكىل اۋىل بولىپ مارە-سارە بولعان ەدىك. اجەم جارىقتىق ءشاشۋ ءشاشىپ، قۋانىشتان اعىل-تەگىل جىلاعان ەدى، بۇگىنگى بايگە توبە كوزىمە مۇنان الدە قايدا ەڭسەلى كورىنۋشى ەدى،-دەگەندە، بالا كەزدە كوكەيدە قالعان سول سۋرەت: قامقور قارت اجە، باسى ءبۇتىن بەرەكەلى اۋىل تىرلىگى، الىستا قالعان قامسىز بالالىق شاعى ەسىنە كەلدى مە، كوزىنەن مونشاقتاپ جاس تا شىعىپ كەتتى. قۋانىش پەن مۇڭنىڭ كۋاسىنا جارالعان ايەل كوز جاسى–اي دەيسىڭ ەرىكسىز. وسى ارادا اقىن اپەكەمىزدىڭ:

  ەرتە كەزدە تەنتەكتەۋ قۇلاق كەستى،

  سال سانامدا ءبىر سەزىم تۇراق تەپتى.

  كەر توبەلى اتامنىڭ بايگەدەن كەپ،

  ەسىل اجەم ەڭىرەپ جىلاپ كەتتى.

  ەتەگىنە ورالدىم اڭتارىلىپ،

  ءبىر سۇراققا قالعانداي قاڭتارىلىپ،

  كوكجيەككە قادالىپ وتىردى اجەم،

  قاتار سيىپ كوزىنە اڭسار-ءۇمىت!.. دەپ كەلەتىن «بايگە» اتتى ولەڭى ويىما ورالدى. الدىڭعى ورىندىقتا جامباستاي وتىرعان ءىشتى اساعاڭ ەشنارسەدەن حابارسىز جانداي ءۇنسىز. زايىرى، اقىن ويىن بولمەيىن دەيتىن سياقتى. مەنىڭ دە ءاز جانى ءبىز دەپ وتكەن، بالالارىنا بار شۋاعىن توككەن مارحۇم اپام ويىما كەلىپ، كەڭسىرىگىم شىم ەتە ءتۇستى...

  كوزەۋلى جەرىمىز قالتوننىڭ تەرەكتى جايلاماسىنداعى جاسىنان حالىقتىق استرونوميالىق قاعيدالارعا دەن قويىپ، اۋارايى وزگەرىسىن باقىلاپ، ونى ءامالي ءوندىرىس، تۇرمىستا جاندى پايدالانىپ جۇرگەن توكەن ءماميموللا ۇلى اقساقالدىڭ وتباسى. توكەن اقساقالدىڭ وتباسى ءبىزدىڭ بۇيىمتايىمىزدان ابدەن حابارلى ەكەن. اقساقالىمىز انادايداي شىعىپ، قاۋقالاقتاي قارسى الدى.

  قالتوننىڭ تەرەكتى سايى بيىككە بوي تارتقان اق تەرەگىمەن انادايدان كوزگە وتتاي باسىلاتىن، تىڭ تىرلىك تىنىسىنداي كورىنەتىن شاعىن قورجا. ويماقى اۋىلىنىڭ ءبىر بولىم مالشىلارىنىڭ ۇزاق جىلدىق قۇتتى ۇياسى. وسى ارادا 43 جىلدى ءبىر كۇنگىدەي وتكىزگەن، جاسى الپىستىڭ ءىشىن ەركىن ارالاعان توكەن اقساقال ەتى ءتىرى سوزگە تەتىك ادام ەكەن. بۇرىننان «قالتوندا توكەن دەگەن اۋا رايى وزگەرىسىن الدىن الا بولجايتىن ادام بارەكەن. ايتقانى اينىماي كەلەدى ەكەن.ءتىپتى ءباز بىرەۋلەر قاعىر جەرگە استىق سالۋ ءۇشىن دە جىلدىڭ جاۋىندى-جاۋىنسىز بولاتىنىن بولجاتىپتى» دەپ اتى اڭىزداي بولعان اقساقالدىڭ داڭقىن كوپ ەستيتىنبىز. اڭگىمە بارىسىندا توكەڭ بالسىنبەي–اق وزىنىڭ اۋارايى قۇبىلىسىنداعى وزگەرىستەردى حالىقتىق تاجىريبەگە سۇيەنىپ، جان-جانۋاردىڭ، وسىمدىكتەردىڭ، بۇلتتىڭ وزگەرىسىنە قاراي پارىقتاپ، ۇزبەي باقىلاپ، ەستەلىككە الاتىنىن، مۇنىڭ بارلىعى قازاق حالقىنىڭ اتام زاماننان جالعاسقان ورتاق قازىناسى ەكەنىن ايتىپ، جيناۋ، جالعاستىرۋ ءىسىنىڭ قولعا الىنعانىن قۋانا قۇپتايتىندىعىن ءبىلدىردى.

  قاراپايىم اۋىل اقساقالى ءوزىنىڭ ۇزاق جىلدىق ءوندىرىس، تۇرمىس امالياتىنان قورتىندىلاعان باي استرونوميالىق تاجىريبەسىن ماقال-ماتەلدەپ، كەستەلى سوزدەرمەن توگىلتىپ جەتكىزىپ وتىر. ىسىلعان مادەنيەت قىزمەتكەرى، جازۋشى، سارتابان ءتىلشى اسىلبەك اعا مەن ءازيا اپەكەمىز توكەڭمەن تەز ءتىل تابىسىپ، اسىعا ەستەلىك الىپ، قىزۋ اڭگىمەگە كىرىسىپ كەتتى.

  اڭگىمە تاقىرىبى كەيدە بۇيىمتايدان القىپ، اقساقالدىڭ اڭگىمەسىندە كەزدەسكەن تىڭ ءسوز ساپتاۋلار مەن كەيبىر ماقال-ماتەلدەرىمىزدىڭ ماعىناسى، استارى توڭىرەگىنە دەيىن تىزگىن تارتپاي بارىپ-بارىپ قايتىپ وتىر. اساعاڭنىڭ قۇنتتى قالامى دا قويىن داپتەرىنە وزىنىڭ ۇساق ءىزىن قالدىرىپ جاتىر. ءار كاسىپتىڭ ءوز قىزىعى بار. مەن دە تەلە اپپاراتىمنىڭ كوزىن تۋرالاپ، قاجەت دەپ بىلگەن كورىنىستەرىمدى لەنتاعا ءتۇسىرىپ جاتىرمىن ... ىڭ-جىڭسىز ورتا، ىرگەدەن قۇلاپ اعىپ جاتقان اعىس قاتتى تەنتەك تاۋ بۇلاعى، بالا كۇنىمىزدە، جايلاۋعا كوشەردە ءوزىمىز وگىز-تايىنشاعا تالاي مىنگەسىپ-ۇشقاسىپ ءجۇرىپ وتكەن «ۋقورعاسىن»، «ءۇشتاس» جايلاۋلارىنا اساتىن تانىس تاۋ جولى، ءبار-ءبارى وزگەشە ىستىق.

  اڭگىمە ارىعا جالعاسۋدا. اققۇيرىق شايدىڭ اياعىنا جالعاس، قۇنتتى قولمەن ساقتالىپ، كەبەجەنىڭ تۇبىندە مەيىزدەي قاتقان ءسۇرى دە كەلدى. اڭگىمە كورىگىن ۇرلەگەن كادىمگى قازاقي داستارقان، تابيعي جاراسىمدىلىق...

  بەلگىلى جازۋشى، كەزىندەگى ايتۋلى ءتىلشى ريزابەك ءسادۋاقاس ۇلىنىڭ وتباسى دا بۇل كۇندە وسى تەرەكتىدە. جيىرما جاسىندا «ويانۋ» اتتى پوۆەستىمەن ادەبيەت مايدانىندا حاس باتىرداي ويقاستاپ كورىنگەن ريزابەك، ءوزى ايتقانداي «قوڭىر تاۋدىڭ قويناۋىندا» جاتىپ- اق، حالقىنا از بولماعان دۇنيەلەر ۇسىنىپ ۇلگىرگەن قالامگەر. ريزابەكتىڭ ءۇيىنىڭ ىرگەسىنە كەلىپ تۇرىپ ءۇنسىز كەتۋدى ابەس كورگەن اساعاڭ ارەدىك تەلەفون جالعاپ ەدى، رەكەڭ ۇيىندە بولماي شىقتى. «ءبىز كەتەردەن بۇرىن ۇيىنە ورالسا بولار ەدى، بولماسا سالەم بەرە كەتەتىن» دەپ مەن وتىرمىن. رەكەڭمەن وسىدان ون نەشە جىلدىڭ الدىندا، ياعني، مەن بوزبالا، رەكەڭ وتىزعا ەندى بەتتەگەن كەزدە ويماقى اۋىلىنىڭ قاتاي جاتاقتى مەكتەبىندە وقىتۋشىلىق ىستەيتىن، بەلگىلى اقىن، سىرلاس دوس اعام شايسولتان شاعىلباي ۇلىنىڭ قۇتتى مەشىن وتاۋىندا ءبىر كەش بىرگە بولىپ، «قارا كوپىر»، «جۇرەك ءامىرى» سياقتى وزگەشە شابىتپەن جاتقا سوعاتىن وتتى جىرلارىن تىڭداپ، تاعى ءبىر قىرىنان تانىعان ەدىم. ءازيا دا ءوزى قۇرالىپتاس قالامداس اۋىلداسىنا كەزىگە كەتۋدى قۇپتاپ، ونىڭ وتباسىن كورىپ، حال-ءجايىن بىلۋگە دىلگىر ەكەنىن ايتتى.

  «جولى بولار جىگىتتىڭ جەڭگەسى الدىنان شىعادى» دەگەندەي توكەن اقساقالدىڭ ۇيىنەن اتتانىپ، ءازيانىڭ تالابى بويىنشا، قالتوننىڭ ‹قازاق قالاسىنا› سوعا كەتپەكشى بولىپ، ءسال قۇلداعانىمىزدا، كادىمگى ءوندىرىستىڭ كومپىس كولىگى ـــ قول تراكتوردىڭ ۇستىندە جيىرماسىندا جۇلدىزى جانىپ، وتىزىندا وردا بۇزعان، بۇيراباس، كىشكەنە ويلى كوزدى، كەلە كەزىگە كەتۋدى پارىز قىلىپ وتىرعان ريزابەگىمىز كەتىپ بارادى. كورگەن جەردەن شۋ ەتە ءتۇستىك.

  ريزابەكتىڭ ۇيىنە بۇرىلاتىن سۇرلەۋدىڭ ۇستىندەمىز. ءبىر اۋىلدا بولسا دا، كۇندە كەزىگىپ جۇرمەگەن، جاسامپازدىقتا دا ءۇش تاۋدىڭ بۇعىسى سياقتى وسى ءۇش قالامگەردەن ايگىلى توقباي قاجىنىڭ اسى وتكەن مەكەندە، ماڭعاز ماعازدىڭ ءىزى قالعان جەردە ءبىر ەستەلىك الۋدى عانيبەت بىلگەن مەن فوتو اپپارات كوزىن ءۇش قالامگەرگە تۋرالاي بەردىم.

  ءيا، جاسىنان جاقسى مەن جايساڭدى كوپ كورىپ، كوپ جورتقان، ءوزى جاقسى دا «جامان» دا بولىپ كورگەن، ادەبي ورتانى ساعىنىپ جۇرگەن جامپوز رەكەڭ جىعىلا جابىسقانىمەن، ارتتاعى باسقا دا قول بايلاعان جۇمىستار سەبەبىنەن، قىسقا اماندىقتان كەيىن وتباسىنا كەيىن باراتىن بولىپ اتتانىپ كەتتىك.

  قالتوننىڭ «قازاق قالاسى» كەزىندە دە، قازىر دە ءبىر شوعىر قازاق اۋىلىنىڭ قۇتتى قونىسى بولعان شاعىن قورجا. ازيانىڭ ءار كەز جىرىنىڭ جەلىسى، اڭگىمەسىنىڭ ارقاۋى بولعان، اجە مەيىرىنىڭ ىستىق شۋاعىنا شومىلعان، باداناداي بولىپ بالالىق اياق ءىزى قالعان، قوزى جايىپ، اقسۇيەك ويناعان، ءموپ-مولدىر اسپانىنا ءسابي داۋىسى سىڭگەن جەرىنە دە جەتتىك.

  قورجاعا تاياعان جەردە كولەمدى زيراتتىق بار ەكەن. زيراتتاردىڭ دەنى شاعىن تومپەشىككە، توپىراققا اينالىپ كەتىپتى. وسى جەردە مارقۇمدارعا بىلەتىن حۇلحۋاللامىزدى قايىرىپ، قورجاعا تارتتىق. قالتوندا «ورىس قالاسى»، «قازاق قالاسى» دەپ داڭقى قاتار ەستىلەتىن «قازاق قالاسىىڭ» دا ۇيلەرى ەسكىرگەن، شاعىن كوشە فورىمىنداعى توپىراق جولدا دا ادام اياعى سيرەك.ءيا، ءازيا دا وزىنە تانىس بەينەنى ىزدەگەندەي اينالاسىنا كوپ كوز توقتاتادى. شاماسى كەلسە، وسىنداعى ءار كورىنىستى كوڭىل ەكرانىنا قوندىرىپ الا كەتۋگە بار سياقتى. وسى بالتا سابىنداي كوشە بويىنداعى كەي ۇيلەر اعاشتان سالىنسا، كەيى تامنان سوعىلىپتى. ورنالاسۋى دا تىم رەتتى ەمەس. ءبىراق، ءبىر تاريحتىڭ كۋاسىنداي بولىپ، قالقيىپ تۇرعانىمەن، كوزگە دە كوڭىلگە دە ىستىق.

  قايتار جولدامىز، جەر تابانىن قۋىرعان جۇردەك ماشينا ويماقى اۋىلىنىڭ ۇلەسىندەگى وڭىرگە ىلىنگەندە اساعاڭ بىزگە قىرىنداي وتىرىپ اڭگىمەسىن باستادى:-ءسوز قالتون دەگەننەن شىعادى،- دەيدى اساعاڭ. قازىر قالتون دەگەن جەر اتىنىڭ ءوزى قالۋتان، قيلۋتان دەپءتۇرلى ايتىلا بەرەتىن بولدى. «قالتون» اتى وسى جەردەگى ءبىر جولعى قاقتىعىستا جاۋلارى باتىردىڭ ءوزىنە شاماسى كەلمەي قاپتاپ تونىنا جارماسقاندا، توندى تاستاپ كەتۋىنەن تون قالعان جەر، «قال-تون» دەگەن سوزدەن شىققان جەر اتاۋى، مۇنى باسقاعا تەلۋدىڭ ەش قيسىنى جوق. ال، كەزىندە «تيانشان قىزىل گۇلى»، «التىن اتكەزشىلىگىن شەكتەۋ اترەتى» قاتارلى كينو-فيلىمدەردە اكتەر بولعان، 1-تامىز اۋىل شارۋاشىلىق ينيستيتۋتىندا وقىتۋشى بولىپ، كەيىن ءوزىمىزدىڭ بۋىرشىن اۋداندىق ساياسي كەڭەستىڭ ورىنباسار ءتوراعاسىندىق مىندەت وتەپ زەينەتكە شىققان بەردىقان جاپاي ۇلى اعامىز التىن وردانىڭ حانى ـــ ءاز تاۋكەنىڭ 8- ۇرپاعى. سول كىسىنىڭ ايتۋىنشا، مىنا «التۋايىت» قىستاعىنىڭ اتىن دا ءبىز قاتە ايتىپ ءجۇرمىز. بۇل ارا ءاسىلىندە قوجامجار تورەنىڭ سالبۋىرىنعا شىعاتىن جەرى ەكەن.قۇسىن «اي، تۋايت، اي، تۋايت» دەپ قايىرىپ جۇرگەسىن، بۇل جەر ءبىر مەزەت «اي تۋايت » دەپ اتالىپ، كۇندەردىڭ وتۋىمەن «التۋايتقا» وزگەرىپ كەتىپ وتىر.ءوزىن كەيدە «ايماق دارەجەلى تەمەكىشىمىن» دەپ سوگەتىن، سوكسە دە قويا الماي جۇرگەن اعامىز تەمەكىسىن بۇرقىلداتا وتىرىپ، تاعى ءبىر اڭگىمەنىڭ شەتىن شىعاردى: كەيبىرەۋلەر «ويماقى» اۋىلىنىڭ اتى ويماقتاي بوپ كورىنەتىن جەر تۇزىلىسىنە قاراي قويىلعان دەپ تۇسپالدايدى. انىعىندا، بۇل دا اعات تۇسىنىك. بايىزداپ قاراساڭىز بۇل ارانىڭ ويماققا ۇقسايتىن ەش بەلگىسى جوق. مارقۇم اسقار تاتاناي ۇلى اتامىزدىڭ ايتۋىنشا، ويماقى دەگەن ادام اتى، ياعني ارقالىق باتىردىڭ اپەكەسىنىڭ ەسىمى. كەيىن ول كىسى ومىردەن وزعاسىن سۇيەگى وسى كۇنگى ەگىزتوبەنىڭ باتىس جاعىنا قويىلعان...

  ءيا، بەسىن اۋىپ بارادى. تالاي عاسىردىڭ بەلىن تالدىرعان ۋاقىت اتتى قارت عۇلامادا كيىز كىتابىنىڭ پاراعىن قالىڭداتۋعا، قاشانعا دەيىن سوڭىنا شىعىپ، نۇكتەسىن قويۋعا اسىعۋدا ...

  «جامانمەن جولداس بولعان بار عۇمىرىڭ، جاقسىنىڭ جەتپەيدى ەكەن ءبىر كۇنىنە» دەپ كەلەتىن حالىق ولەڭىندەگىدەي، مەن دەءبىر كۇندىك كوڭىلدى ساپار باسىپ، جاقسى-جاقسى ويلار ارقالاپ ورالدىم.

  2011-جىل
جاۋاپتى رەداكتورى : نۇرعيسا قۇرمانجان ۇلى
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.