بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>ءتىل-ادەبيەت

ماحاببات ماقامدارى

بالاپان راباتوۆ

2013.08.19 14:27    


1

ماحابباتتىڭ شەر جايلاعان شەبىندە،
-سۇيەم سەنى... دەدەىم بە، دەدىم بە.
دەرت بار ەدى جۇرەگىمدە مەنىڭ جاس،
ءورت بار ەدى سەنىڭ ىستىق دەمىڭدە.

كۇبىرلەي مە، كۇرسىنە مە كۇزگى باق،
جاپىراعىن جايلاپ قانا ءۇزدى ۇزاق.
ارىق تالدار ارباڭ-قۇرباڭ ابىگەر،
بۇتاعىمەن بۇلا تاڭدى سىزعىلاپ.

كەرىلىپ تاڭ، كەلە جاتتى كۇن شىعىپ،
جۇتاڭ باقتى جارىلقاۋعا قۇلشىنىپ.
ماساڭ كوڭىل، ماۋجىرادى ماحاببات،
گۇلدەن ۇشقان توزاڭدارعا تۇنشىعىپ.

2

بىلە المادىم ارمىسىڭ، ۇياتپىسىڭ،
مىقىنىنا جيناعان ميات كۇشىن.
ماقپال قارا شاشىڭمەن مايسقاندا،
سامال ۇرعان ءسامبى تال سياقتىسىڭ.

تۇيمەڭ بە ەكەن، جوق الدە تاراعىڭ با،
الىپ جاتىپ ءيىلىپ قارادىڭ دا.
كەتىپ باراجاتتىڭ سەن بۇرىلماستان،
تۇيىلىسكەنءتورت كوشە تورابىندا.

كىسى ءنوپىر، كوشە دۋ، عۇمىر شۇناق،
(قيامەتتىڭ قايتپەك ەم قىزىن سۇراپ؟)
قياناتشىل، قىزىلكوز نەمەلەردەي،
قىلاڭ ەتتى قارسىدان قىزىل شىراق.

شىراق جاندى شۋىلعا شىم باتىردى،
قيالعا دا قيمادى قىمباتىڭدى.
اقىن بىتكەن جاقپاعان بوياۋلارمەن،
سىزىپ السام دەپ ەدىم سىمباتىڭدى.

بايقادىم دا بويىڭنان قۋات قۇندى،
كوبىك شاشقان كوڭىلدە كۇي اسقىندى.
قايدان جۇرگەن ارۋسىڭ قان كوشەدە،
جوعالۋعا اينالعان ۇيات سىندى.

3

بۇرشىك اتقان ءدان ەدىم تەكتى وڭىردە،
اينىماسپىن سەنەن مەن شەكتى ومىردە،
ۇناتۋدان تۇراتىن « ۇزىن عۇمىر»،
جەتپەي قالسا ءجون ەندى جەك كورۋگە.

جاقسى كورۋ باقىتى جۇبايلاردىڭ،
(جاقتىرماساڭ تۋى دا قۇلايدى اردىڭ.)
كۇندى اينالعان سەكىلدى جەردىڭ شارى،
جىل-ون ەكى اي مەن سەنى شىر اينالدىم.

سەرىگىم بوپ ءۇمىت پەن سەنىم ءار تاڭ،
شومىلعانىم شۋاققا سەنىڭ ارقاڭ.
قيامەت قوي وتكەرۋ سەنسىز ءومىر،
قيانات قوي جەك كورۋ سەنى قالقام.


4

جان ەمەس ەم جۇمىس تاپپاي ەرىككەن،
كوز كورگەسىن باس اينالدى كورىكتەن.
ساۋالىما جاۋاپ بەرشى سەن اۋەل:
ــ سۋدىڭ سۋدى سىمىرگەنىن كورىپ پە ەڭ؟

سۋداي سۇلۋ ەكەنسىڭ عوي، سۋسادىم،
ءۇيىردى كەپ ۇيلەنبەگەن كۇش-اعىن.
ايپارانىڭ از الدىندا قالدىڭ سەن،
ايقاراعا جەتپەي قالدى قۇشاعىم.

جۇمباقتىڭ دا جاۋابى سول: ءيىرىم،
يىرىمگە بۇرىلىپ تۇر ءبۇيىرىم.
مەنىڭ جانىم تەكتەۋ ءۇشىن جارالعان،
تەك ءومىردىڭ تەرەڭى مەن قيىرىن.

5

سەن ماعان ءبىر ءسوز ايتتىڭ جەردەن اۋىر،
(ەستىمەسىن ونىڭدى ەل مەن اۋىل.)
ءومىر دەگەن وسى عوي شاپقان اتتاي،
كەيدە ءتاۋىر ارقاسى، كەيدە جاۋىر.

قالدى كوڭىل، سىزدادى كوكىرەگىم،
كۇلىندەي بوپ شىلىمنىڭ وت رەڭىم.
كۇتپەگەن ءسوز بولدى عوي، سالماعى اۋىر،
قايتسەم ونى سانامنان وشىرەمىن.

جاقىندارىم جالتارىپ، جات ارباعان ــ
شەرگە اينالىپ بارادى «شەكەر زامان».
قارماعىمدى قاپقاندا مايدا باقىت،
ارمانىڭدى ايتتىڭ-اۋ بەكەر ماعان.

باتاسىن دا، قىزىن دا بەرگەن اۋىل،
ويناعانىن كورمەسىن تورگە داۋىل.
قاۋىرسىنداي پەندەڭە قاۋقارى جوق،
نەگە ساۋلەم ءسوز ايتتىڭ جەردەن اۋىر.

6

قىر كۇيەكتىڭ سوڭىندا ــ
وتىزىندا سول ايدىڭ.
قالاي كەلدىڭ سەن مۇندا،
تارقادى عوي سولاي مۇڭ.

قۋانىشىم جەتتىڭ بە،
تۋ الىستان زورىعىپ.
كۇلىپ كىردىڭ ەسىكتەن،
كەتكەن ەدىڭ تورىعىپ.

نازعا اينالىپ نالامىز،
جاز اۋىسىپ كۇز كەلدى.
مىنا كۇننەن اينالدىم،
قاۋىشتىرعان بىزدەردى.

جىلۋ بولسا جۇرەكتە،
كوڭىلدە قاق تۇرمايدى.
ءومىر دەگەن وسى عوي ــ
ءبىر قۋانىش، ءبىر قايعى.

7

تاڭ اتسا توعىز قازانعا،
اياقتار ەندى عازال دا.
قۇلشىنىپ قايتا قارايمىن،
تىرشىلىك دەگەن گوزالعا.

اعامەن سيلى تەل ءوستىم،
اقىلىن الدىم، كەڭەستىم.
ۇمىتشاقتىعىم بولماسا،
ۇرىنشاق بىرەۋ ەمەسپىن.

باسىنعان مەنى جوق ەشكىم،
باس ۇرعان ماعان جوق ەشكىم.
ومىردە مىناۋ وزگە ەمەس،
ءوزىم مەن ءوزىم ەگەستىم.

كۇندەردى قۋىپ ەش وتكەن،
قولىمدا بۇگىن قوس وكپەم.
نامىستان جازىم بولماسام،
ولمەسىم انىق وسەكتەن.

8

كۇرسىنبە، جانىم، كۇرسىنبە،
(جۇدەگەن جۇرەك، ءجۇر سۇلدە)
كەۋدەمە قويىپ باسىڭدى،
قۇلاق سال مىناۋ دۇرسىلگە.

كۇرسىنبە،جانىم، كۇرسىنبە،
كۇندەرگە كورىك كىرسىن دە.
بۇلتىنان مۇڭنىڭ بۇلقىنىپ،
جاۋا الماي الدە ءجۇرسىڭ بە؟!

كۇرسىنبە، جانىم، كۇرسىنبە،
جاۋاتىن بولساڭ ىركىلمە!
كومىلىپ مەن كەتەيىن،
كوزىڭنەن اققان «شىركىنگە».

9

جالعانداعى جان اشىرىم،
قاسىمداعى سەرىگىم.
مولدىرەيدى قاراشىعىڭ،
جىلاتتى ەكەن سەنى كىم؟

تۇنىپ تۇرعان تۇنىعىڭا،
تاس اتتى ما دۇشپانىڭ.
ۇساقتاردىڭ ۇعىمىنان،
ۇتىلماسىن ۇستامىڭ.

باققاندارى پارا، پايدا،
قاعىنباسىن قاي ازعىن.
ءتوزىمىڭدى تورە سايلا،
تالعامىنا تايازدىڭ.

كوڭىلىڭدى كول ءتارىزدى،
شولگە بولا سارقىما.
قارسى وينالىق قارتامىزدى،
سايقالداردىڭ سالتىنا.

باسكە تىگەم بالەم ءبارىن،
بۇلاڭداسىن بۇل توبىر.
كوڭىلسىز كۇن كالەندىرىن،
جىلاماي-اق جىرتا ءبىل.

بوساماسىن ءتوزىمىڭ دە،
بوتالاسىن ارمانىڭ.
سول باياعى سەزىمىڭنەن
اينما سەن، ارداعىم!

10

مەڭىرەۋ ەمەس اينالا،
مەڭىرەيگەن مەن عانا.
مەنىڭ مىنا كۇيىمنەن
سەكەم العان سەن عانا.

نامىستانىپ ءنان قالا،
ەسىركەمەي ەن دالا.
ەكى ۇداي جۇگەندە،
ەسىڭ كەتكەن سەن عانا.

جۇرەك جۇدەۋ، جان جارا،
سوعىلىسىپ سەڭ-نالا.
جۇتىپ جۇرسەم جىندى سۋ،
جۇباتقان دا سەن عانا.

شيپا بولىپ ەم جاڭا،
شيراعاندا مەن مانا.
قۋانىشتان كۇلە الماي،
جىلاعان دا سەن عانا.

جاقپاي ءىسىم اللاعا،
الىپ جاتسام «جولداما».
كوزىڭ جاسى كول بولىپ،
كومەتىن دە سەن عانا.

11

كوزىمدەسىڭ سەن، مەنىڭ كوزىمدەسىڭ سەن،
وڭاشا ءبىر سويلەگەن سوزىمدەسىڭ سەن.
ومىرىمە شۋاق تۇسپەي قالعان ساتتەردە،
مۇنار باسىپ، سەيىلگەن ءسال سەزىمدەسىڭ سەن.
بار اسىلىن باعىشتار ءوز گۇلىمسىڭ سەن،
قاراشىعىم، ساۋلەلى كوز نۇرىمسىڭ سەن.
كوزىمدەسىڭ سەن، مەنىڭ كوزىمدەسىڭ سەن،
بەرىلمەگەن قيالعا توزىمدەسىڭ سەن.
ءومىرىمنىڭ شات اۋەنى شەرتىلگەن شاقتا،
اجارىڭمەن، ارىڭمەن پاك وزىمدەسىڭ سەن.
بار اسىلىن باعىشتار ءوز گۇلىمسىڭ سەن،
قاراشىعىم، ساۋلەلى كوز نۇرىمسىڭ سەن.

«شينجياڭ گازەتىنەن» عالامتورعا دايىنداعان: جۇلدىز اقباي قىزى (پراكتيكانت)
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.