- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ونەر ولكەسىندەگى 10 كۇن
(ساپار ەستەلىگى)
شايسۇلتان قىزىر ۇلى
2013.10.14 16:35 كەلۋ قاينارى : ءتاڭىرتاۋ تورابى
ادام ومىرىندەگى ءار ساعات، ءار مينۋت تاريح بولىپ ادام ساناسىندا قالاتىن سياقتى. ءبىز باسىمىزدان كەشىرگەن 10 كۇن − ءان قاناتىندا، كۇي كۇمبىرىندە سالتاناتتى مۇراجايلاردا ونەرگە ىقىلاس قۇلاتقان قاۋىم ورتاسىندا وتكەن 10 كۇن!
ونىڭ ەستە قالار مايەگى ىلە قازاق اۆتونوميالى وبلىسى، ورتالىق حالىق راديو ستانسياسى، شينجياڭ حالىق راديو ستانسياسى بىرلەسىپ وتكىزگەن «پارتيام دەپ اندەتەم» اتتى راديو ساۋىعى ىلە قازاق اۆتونوميالى وبلىستىق حالىق ۇكىمەتى مەن وبلىسقا توتە قاراستى 2 قالا، 8 اۋدانداعى باسشىلاردىڭ قولداۋىمەن زەڭگىر اسپانعا كوتەرىلىپ، قازاق ءتىلىن ۇعاتىن، ونەرگە قۇمار حالىقتى ءبىر جەلپىندىرىپ، رۋحاني ءشولىن ساتكە بولسا دا قاندىرىپ تاستادى. وسى 10 كۇندە تىكەلەي ەفيرگە تاراعان 100دەن استام ءان - كۇي، تەرمە، ايتىس سياقتى سارالانعان شىعارمالار تىڭدارمان قاۋىمنىڭ القاۋىنا بولەندى. ىلە وبلىسىنا قاراستى اۋدان - قالالاردان 10 ساعات تىكە باعدارلاما تاراتۋدى جوسپارلاپ، ۇيىمداستىرۋعا جەتەكشى بولعان شينجياڭ حالىق راديو ستانسياسى ادەبيەت - كوركەمونەر ءبولىمىنىڭ جاۋاپتى رەداكتورى جەڭىسقان ءنۇسىپ ۇلى بولاتىن دا، وسى 10 ساعاتتىق ءىرى تىكە تاراتۋ باعدارلاماسىنا ورتالىق حالىق راديو ستانسياسىنان جۇرگىزۋشى سەرىك راقىم ۇلى، شينجياڭ حالىق راديو ستانسياسى قازاق رەداكسياسىنان جۇرگىزۋشى ءدارياش شايمۇرات قىزى، ىلە حالىق راديو ستانسياسىنان جەڭىس ابدىرەشيت ۇلى جانە جۇرگىزۋشى ەرعازى مەدەتقان ۇلى، شينجياڭ سۋرەتتى جۋرنالى ۇسىنىس ەتكەن ءتىلشى اقىت ءبيدوللا ۇلى، تىكە تاراتۋ باعدارلامالارىنىڭ تەحنيك قىزمەتكەرى ايدىن قۇسايىن ۇلى باستاتقان ءبىر شوعىر جاستار وسى رەتكى دابىرالى قيمىلدى تابىستى تامامداۋ ءۇشىن 28 - شىلدە كۇنى بايتاق ىلەنىڭ بايابان دالاسىنا قاراي ات باسىن بۇرعان ەدى. العاشقى بەكەت جوڭعار جيەگىنە شاڭىراق كوتەرگەن جۇلدىز قالا كۇيتۇننىڭ ويىن - ساۋىق ۇيىرمەسىنىڭ ونەرپازدارى جۇرگىزۋشىنىڭ:
بارلىق ۇلت ءبىر - بىرىنە باۋىر باسقان،
اينالدىق اعايىن مەن اۋىلداستان.
دانالىعى دارىعان بۇل قالانىڭ،
دارالىعىن جىرلايدى ءداۋىر داستان! - دەگەن ولەڭىمەن شىمىلدىق اشقاندا كۇمبىرلەگەن كۇي، اسەم ءان كۇيتۇن قالاسىن گۇلگە بولەپ قالماستان، قايتا تىڭدارمان قاۋىمنىڭ ساناسىنا نۇرساۋلە قۇيعانداي سالتاناتقا بولەدى. وتانىمىزدىڭ باتىس قاقپاسىنداعى شارۋاشىلىعى شالقىعان، قوردالى قورعاس اۋدانى تەك شەكارا ساۋداسىنىڭ ساۋلەتتى مەكەنىنە اينالىپ قالماستان، رۋحاني وركەنيەتى دە بارا قالعان جانداردى جالت قاراتسا، ال كوپ ۇلت قونىستانعان قۇلجا اۋدانى مەن شاپشال اۋدانىنىڭ ارتيستەرى ءار ۇلت تىلىندە ورىنداعان قۇلاقتان كىرىپ بويدى الار اندەرى مادەنيەت وركەنيەتىنىڭ ورلەپ بارا جاتقانىن ايگىلەدى.
راديو ساۋىعىنىڭ كونسەرت نومىرلەرى ارقىلى كەمەڭگەر پارتيامىزدىڭ باسشىلىعىندا قول جەتكەن تابىستاردى، ۇلى وزگەرىستەردى ۇگىتتەۋدى، وسىنداي ۇردىستە پارتيا باۋلىپ، باسشىلار قولداعان ونەرپازداردىڭ ەرەكشەلىگىن ايگىلەۋدى ماقسات تۇتقان ءبىزدىڭ تىكە تاراتۋ كەرۋەنىمىز ءبىر اۋداننان اتتاپ تاعى ءبىر اۋدانعا بارعاندا، تاعى دا ءبىر ەرەكشە جاڭالىقتىڭ كۋاگەرى بولىپ وتىردى. ءبىز تالعارىنا ۇشقان قۇس تالىپ جەتەتىن تارلان تاڭبالىنىڭ اسقارىنا ءان - كۇي باۋىر باسقان نىلقىدان ءبىر كەزەڭ اسىپ، گۇل بايشەشەگى جامىراي اشىلعان، گۇل كەستەلى كۇنەسكە جەتكەنىمىزدە تاماشا ءبىر، جاڭاشا ءبىر ءومىر كارتيناسى كوزىمىزدى ءسۇرىندىردى. ونەر ادامدارىنا تەبىنى تەنتەك قاس پەن ىلەنىڭ اقجال تولقىنى، ساۋمال سامالى شابىت بەرىپ، دارىنىن قاناتتاندىرعانداي سەزىمگە جەتەلەيدى. نىلقىنىڭ وتان ازاتتىعى جولىنداعى جاۋىنگەرلىك ەرلىگىن اۋىزعا الماعان كۇننىڭ وزىندە، بۇگىنگى زامان مادەنيەتىنىڭ وركەندەۋى جولىندا سۇبەلى ناتيجە جاراتۋى سىرت كوزدى قايران قالدىرادى.
نىلقى اۋداندىق مادەنيەت مەكەمەسىنىڭ 1 - جانە 2 - باستىعى قازاقتىڭ قاراپايىم كەلىندەرى بولعانىمەن، كەلەشەك ءۇشىن تالپىنىستارى تاۋداي ەكەن. مەكەمە باستىعى ءجاميلانىڭ ەمەۋىرىنىنە قاراعاندا، وسى زامان مادەنيەتىن وركەندەتۋدە، بەيزاتتىق مادەنيەتتى قورعاۋدا ونەر ادامدارىنىڭ ەرەكشەلىگىن مىقتى ۇستاۋدى باستى مىندەت ەتكەن. ايتالىق، تۇڭعىش كەزەكتى جۇڭگو شينجياڭ ءشاربات نىلقى بال ارا مادەنيەت، ساياحات مەرەكەسى مەن «قۇلپىرعان نىلقى» اتىنداعى ادەبيەت - كوركەمونەر ويىن - ساۋىق قيمىلىندا «10 مىڭ شەبەردىڭ قىزاي كەستەسىن تىگۋدەي» شاڭحاي گەنيس رەكوردىن جاڭالاۋمەن تىنباي، كورەرمەنىن تامساندىرعان «قىزاي كەستەسى» ساحنالىق وپەراسىن ورىنداپ شىعۋدا ءبىر ءبولىم ونەر ادامدارىن تاربيەلەۋمەن بىرگە، قىزاي انانىڭ ءوز قولىمەن تاپقىرلاعان اق قالپاعىن ارقاۋ ەتىپ، الۋان بوياۋلى كەستە ونەرىن ارتيستەردىڭ ساحنالىق كيىمىنە ءسىڭىرىپ، قازاق ارۋلارىنىڭ سان عاسىرلىق ارمانىن، بۇگىنگى تالپىنىسىن تاماشا بەينەلەگەن. اۋدان باسشىلارى ونەرپازدار قوسىنىن جىل سايىن قاناتتاندىرۋدى كوزدەپ، جۋىق جىلدان بەرى 29 رەت اقىندار ايتىسىن وزدىرىپ، بەيزاتتىق مادەنيەتتىڭ تامىرىن تەرەڭنەن تارتۋعا، وسى ادىستەرمەن سولعىنداي باستاعان ادەبيەت - كوركەمونەردىڭ گۇلتەكشەسىن كوبەيتۋگە جول اشقان.
كەلەسى بەكەتتەرگە تاياعان سايىن ءان - كۇي سىندى كوركەمونەر نومىرلەرى تايازي ما دەسەك، بارعان سايىن تەرەڭىنە تارتىپ، زەڭگىر اسپانعا ءبىر ساعات بويى ءۇزىلىسسىز تاراعان كونسەرت نومىرلەرى تىڭدارمان قاۋىمنىڭ كوڭىلىنەن شىعىپ، دۇركىن - دۇركىن تەلەفوندار سىڭعىرلاپ، القاۋلى كەلتە حاتتار كەلىپ جاتتى. ەسىمدە قالۋىنشا، ءبىرحاتتا: «التايداعى اۋىلداردان وسىلايشا تاراتىلعان ءان - كۇي كوپ - كورىم جەلپىندىرىپ ەدى، وسى جولعىسى ونان اسىپ ءتۇستى، راديو تولقىنى ارقىلى كۇندە تىكە تاراتۋ قيىن عوي، جارتى جىلدا ءبىر جالعاسىپ تۇرسا، جانىمىزدا جاڭعىرىپ قالار ەدى - اۋ... وعان العىستان وزگە بيلىك ايتۋعا شاما قايدا؟!» دەپ جازىلىپتى. وسىنداي ويلار جەتەگىندە كۇنەس اۋدانىنىڭ ورىنباسار اكىمى ارداق پەن مادەنيەت مەكەمەسىنىڭ باستىعى نۇرتايدىڭ جەتەگىندە وزگەشە ءبىر كىتاپتىڭ بەتىن اشتىق، وسىنىڭ الدىنداعى تىكە تاراتۋ قيمىلى ىلعي قالادا وتسە، بۇل جولى اۋدان اكىمى تولقىننىڭ ايتۋى بويىنشا قالادان موينى الىستاۋ زەكتى اۋىلىنىڭ وتىرىقتاندىرۋ تۇينىندە وزدىرىلدى. قالىڭ قاۋىم جايباسار، سىلبىر ەمەس، تاڭمەن تالاسىپ، جاڭا قىستاقتىڭ كىندىگىندەگى شاعىن الاڭعا تۇس - تۇستان قۇيىلىپ جاتتى. ءشوپ شابۋ، ەگىن ورۋ سىقىلدى ناۋقاننىڭ قىزا شاپپا كەزى بولسا دا كەرى تارتپاي، دۋمانعا ەنتەلەپ، ەسكەۋىلدەپ قۇلاق تۇرۋدە، ماڭدايلارىن كۇنگە توسەگەن قاۋىم ساحناعا كوز تىككەندە:
ءارقاشان ارايلى اسپانىمىز،
ءتاتتى ءدامدى تاڭدايعا باسقانىمىز.
ەڭ اۋەلى، داڭقتى پارتيانى،
اسەم انمەن جىرلايدى قارتتارىمىز! - دەگەن جۇرگىزۋشىنىڭ دەمەۋىمەن ومىراۋىنا اق بۋرىل ساقالى توگىلگەن، جاسى 70تى جەلكەسىنەن باسىپ وتىرعان ورداقان ءسۇتتىباي ۇلى مەن اق سامايى ۇلپىلدەگەن، ءوز تۇسىندا رايونداعى، وبلىستاعى، ايماق، اۋداندارداعى بايقاۋلاردا تاڭداۋلى ءانشى اتاعىنا بولەنگەن اعارتۋشى اپايىمىز 70 دەيتىن جاستى ەڭسەرىپ قالسا دا، قىرمىزى گۇلدى تەرگەن قىر قىزى سيپاتىن كارىلىككە بەرمەي بۇرالا باسىپ، سىزىلتىپ ءان شىرقاعاندا، ىلەنىڭ باياعىدا ول عالامعا كوشىپ كەتكەن تاڭجارىق، اشىمدەردىڭ ارۋاعى ءبىر اۋنادى - اۋ دەگەن وي ءار كەۋدەنى نۇقىپ وتكەندەي بولدى، سونىمەن ىلە مەن قاستىڭ اساۋ تولقىنىنداي ءان مەن كۇي ءبىرىن - ءبىرى شوقتىقتاپ تۇرعان ساتتە، جۇرگىزۋشى ءدارياش:
شارۋاشىلىق جاندانىپ سان سالالى،
ءار كوكەيدەن كوڭىلدى ءان تارادى.
شاقپى وزەنى ءاشىم بوپ كۇي توككەندە،
تاڭجارىق بوپ سويلەيدى تاۋ سامالى، - دەگەندە، كۇنەستىڭ عانا ەمەس، ولكەمىزگە سۇلۋ انىمەن ونەگە بولعان كۇمىس كومەي ءانشى باقىت اسەن قىزى ورىنداعان اسەم ءان، جارقىنبەك پەن اققۋ جاقىپنۇر قىزىنىڭ جىر دوداسى، ءسابينۇر قاھارمان ۇلى ورىنداعان تاڭجارىقتىڭ «قوس جەڭگە» ءانى، ءاشىمنىڭ «كەڭەس» كۇيلەرى تىڭداۋشىنىڭ كوڭىلىن بوساتىپ، كىرپىكتەرىنە كۇمىس شىق دومالاتتى. اۋدان مادەنيەتىن تىڭ تەبىنمەن ەرەكشە تۇسپەن، وزگەلەردەن وزگەشە سانمەن دامىتۋدىڭ جولىن قاراستىرعان كۇنەستەگى باسشىلار وتكەن جىلى «جۇڭگو شينجياڭ كۇنەس ايتىس تالقى مىنبەسى» جيىنىنىڭ اشىلۋىنا تاماشا دايىندىق جاساپ، ەلىمىزدىڭ ءىشى - سىرتىنداعى مامانداردى جالت قاراتسا، ال بيىل نارات ساياحات رايونىنىڭ اقوزەن جايلاۋىنا قازاقتىڭ كيىز ءۇي مادەنيەتىنىڭ مارەسىن ايگىلەۋ ءۇشىن 14 مىڭ كيىز ءۇي تىگىپ، شاڭحاي گەنيس رەكوردىنا قول جەتكىزگەن. رايونىمىز بويىنشا 4 از ۇلت ساياحات قورىعى قىستاعىنىڭ قاتارىنان ەنشى العان نارات تاياسۋ بەيزاتتىق مادەنيەت ساياحات قىستاعى قۇرىلىپ، سەرۋەنشىلەردىڭ ءبىر ءسات تىنىستايتىن، تاماشالايتىن ورنىنا اينالعان. ال تاعى دا بيىل بەس A دارەجەلى ساياحات ءتۇيىنىنىڭ ءبىرى بولعان ناراتتا حالىقارالىق دەڭگەيدە وزدىرىلعان ات بايگەسى ءساتتى اياقتاپ، تەك اۋداننىڭ عانا ەمەس، ىلە قازاق اۆتونوميالى وبلىستىڭ اتاعىن ءبىر بەلەسكە كوتەرىپ تاستادى. « −− وسىنىڭ بارلىعى دەيدى ارداق راقىم قىزى، - مادەنيەتىمىز بەن ادەبيەت - كوركەمونەر قىزمەتكەرلەرى ءۇشىن ۇلكەن وراي بولدى، ولار وسىدان ءبىر قىدىرۋ ءنار الدى...» تىڭداپ وتىرساڭ، گۇل كۇنەستە بەيزاتتىق مادەنيەت حاقىنداعى ادامدى قۋانتارلىق جاڭالىقتار تۋىنداي باستاپتى. دۇنيە ءجۇزىنىڭ تۇكپىر - تۇكپىرىندەگى 40 مەملەكەتتەن كەلگەن قار - مۇز شاڭعىشىلارى كوركەم كۇنەستىڭ بەيزاتتىق مادەنيەتىنەن ءلاززاتتانىپ كوڭىلدى قايتقان ەكەن.
بايتاق ىلەنىڭ قاي اۋىلىنا، قاي اۋدانىنا بارساڭىز دا رۋحاني جاڭالىقتى، رۋحاني جاقتاعى سەرپىلىستى كورىپ، كوڭىلىڭىز كونشيدى. ءان قاناتىنا ءمىنىپ، كۇي شاناعىمەن الەمدى ارالاعانداي بولاسىز، وسىنداي وي جەتەگىمەن تەكتى مەكەن تەكەستە، تولىقسىعان توعىزتاراۋدا، تۇلپار مەكەنى موڭعۇلكۇرەدە بولعان كۇندەرىمىزدە بولەكشە ءبىر سيعا بولەندىك. بۇل تاعى دا ءان مەن كۇي، مادەنيەت تۇعىر بولعان اتا تاريح، اتالار ءىزى، بۇگىنگى ۇرپاقتىڭ اتالار اقىلياسىن سۋىتپاي ونەر بيىگىنە تالپىنىسى ەدى. ىرىسى شالقىعان ىرىستى ىلەدەگى ايگىلى 8 ءمۇيىستى سەرى قالاشىق اتانىپ، تىلگە تيەك بولىپ جۇرگەن، وزگەشە الەمدىك بوياۋىمەن دۇنيە گەنيس رەكوردىن ومىراۋىنا وردەن ەتىپ تاققان، مەملەكەتتىك 1 - دارەجەلى تاريحي مادەنيەتتى اۋدان اتاعىن العان تەكتى مەكەن تەكەس كەشەگى تاريحتىڭ كۋاسى بولسا، بۇگىنگى ونەردىڭ −−ءان مەن كۇيدىڭ مەكەنىنە اينالعان. اقىننىڭ بۇل حاقىندا تولعاعان ولەڭىنە ىقىلاس قۇلاتايىق:
سوناۋ ساق، ۇيسىندەردەن بەرى قاراي،
تەكەسكە ادام بارما سۇيىنبەگەن.
اسەت ءان ساپ، تاڭجارىق جىرىن توگىپ،
قايعىسىن قوجەكەدەي كۇيشى جەگەن.
وسى ءبىر شۋماق ولەڭ تەكەستىڭ ار جاق - بەر جاعىن ايگىلەپ تۇرعانداي، تەكەستى ءان مەن كۇي مەكەنى دەسە دەگەندەي - اق ەكەن، كۇي اتاعى قوجەكەدەن بەرى قاراي بۇگىنگى شامۇعۇن جۇنىسپەك ۇلى، اكيما دوسمىرزا ۇلى، نۇرىمباي سۇلەيمەن ۇلى سياقتى ساۋساعىنان كۇي، كومەيىنەن جىر شاشىراعان العى بۋىندى ەتەكتەپ كەلە جاتقان تۇرىسپەك اكىم ۇلى، اباي جارىلقاسىن ۇلى سياقتى اقىندار، ەرگەلدى مەن تىلەبالدى، پاريدا مەن قۋانىشتار ورىنداعان اندەر تىكە تاراتۋ باعدارلاماسىنىڭ اۋەنىن كوك الەمىنە شارىقتاتا تۇسكەندەي ەدى. ءبىر تاۋدان اسساڭ ارجاعىنان تاعى ءبىر بيىك تاۋ كورىنەتىنى سەكىلدى، تولىسىپ، تولىقسىپ جاتقان توعىزتاراۋداعى ەلگە ءمالىم ماعاۋيا بايمۇقان ۇلى تاربيەلەگەن تەرمەشىلەر مەن ءانشى - كۇيشىلەر ورىنداعان «ءبي بولماس بەلىن جالپاق بۋعانمەنەن» اتتى تەرمە، «ءتاڭىر تاۋ −− اتامەكەن» ءانى، «ساعىنىش» اتتى سازدى كۇيلەر، اسىرەسە، حالىق اندەرى مەن جىراۋلار جىرىن كوڭىلىنىڭ كوكتەڭىزىنە سىڭىرگەن ماساباي راقىمجان ۇلى سياقتى حالىق ونەرپازدارى ورىنداعان تامىرى تەرەڭگە تارتقان حالىق اندەرى، سوسىن تاعى كوز جانارى سونسە دە، كوكىرەك كوزى جايناپ تۇرعان، جاس اقىندار ءمۇشايراسىنىڭ جۇلدەگەرى بەگالى تولەۋباي ۇلىنىڭ سىرعا تولى ولەڭدەرى تىكە تاراتۋ راديو قورىمىزدىڭ ءبىر بوستىعىن تولتىرعانداي كوڭىلىمىزگە توقشىلىق باعىشتادى. تۇلپار مەكەنى موڭعۇلكۇرەگە تابانىمىز تيەر - تيمەستەن - اق:
تۇلپارلار مەكەنى − تىرشىلىك تىنىسم،
تۇلپارلار مەكەنى − شايقالماس ىرىسىم.
تۇلپارلار مەكەنى − جورىقتا ۇرانىم،
تۇلپارلار مەكەنى − ۇلاعات ۇلىسىڭ!
- دەگەن ولەڭمەن مادەنيەت ولكەسىنىڭ يرىمىنە تارتا بەرگەن. ءيا، شىندىعى سولاي. بۇل وڭىردە نە ءبىر جەز تاڭداي اقىنداردىڭ ءۇنى قالعان. ايگىلى ايتىس اقىنى قويدىم دارۋباي قىزى، اقىن كودەك مارالباي ۇلى، كۇيشى مازاق پەن اتىقان يسا ۇلدارىنىڭ اتىن الدىمەن اۋىزعا الىپ، اسىل تۋىندىلارىن ەفيرگە تۋ ەتىپ كوتەرەر ەدىك. ۇلتىمىزدىڭ قيسا - داستانىن وزەگىنە تالشىق ەتىپ، كوكەيىندە ساقتاعان، ءبىر ءوزى مۇدىرمەي 200 قيسا - داستاندى جورعاداي تايپالتاتىن قيساگەر كاحاپ اسقار ۇلى تاڭجارىقتىڭ «ەل سىرى» تولعاۋىن ءبىر عاجاپ مۇڭلى ۇنمەن ورىنداعاندا، تىكە تاراتىپ كەلە جاتقان كىشكەنتاي عانا كوشپەلى ستانسيامىزدىڭ كەتىگىن تولتىرعانداي بولدى. پاي، پاي، ونەر ادامدارىنىڭ ءۇنىن سىرتتاي ەستۋ ءبىر عانيبەت تە، بەتبە - بەت ەستۋ قانداي اسەرلى ەدى!!...
ءان مەن كۇيدىڭ بۋىمەن ءبىزدىڭ شاعىن تىكە تاراتۋ ۇيىرمەمىز ساۋدا - ساتتىعى قازانداي قايناپ، ساياحاتشىلارى سابىلىپ كەلىپ - كەتىپ جاتقان اسەم قۇلجا قالاسىنا دا جەتتى، بۇل ەڭ سوڭعى بەكەت ەدى. مۇنداعى كونسەرت شىمىلدىعى اقىن، جۋرناليست ەركىن سۇلتانوۆتىڭ:
قۇلجا، قۇلجا، ىلەنىڭ جۇرەگىسىڭ،
جان - جاعىڭدا كۇلتەلى كۇلەدى شىڭ.
تالپىندىرعان ارماننىڭ تالعارىنا،
سەن حالقىمنىڭ مىزعىماس تىرەگىسىڭ، - دەگەن ولەڭ جولدارىمەن اشىلدى. ال «پارتيام دەپ اندەتەم» دەگەن كەرمە تۋدىڭ الدىنا جينالعان ونەرپازدار راديو الدىنداعى قالىڭ تىڭدارماندارعا، زالداعى كورەرمەندەرگە اسەم اننەن، كۇمبىرلى كۇيدەن، جالىندى جىردان تارتۋ ۇسىنىپ، 10 كۇن بويى ىلە ءوڭىرىن كەرنەگەن ۋگاي ءۇندى ونان سايىن شارىقتاتتى. كوك اسپاننان ءۇزىلىپ تۇسكەن التىن مونشاق سىقىلدى اسەم قۇلجا قالاسىنان تالاي - تالاي تاعىلىمى كۇشتى تارلاندار مەن ءار قيلى ونەردىڭ شوقتىعىنان باسقان ونەرپازداردىڭ تۇلەپ ۇشقانى كوپكە ايان عوي. الدىڭعى اعالارىنىڭ ءىزىن سۋىتپاي كەلە جاتقان ونەرپازداردىڭ ءبىرى ىرىسكەلدى رايىمجان ۇلى «پارتيام» اتتى ولەڭىن وقىسا، كەزەك كۇتكەن انشىلەر دانەشتىڭ «تۋعان جەر» ءانىن ورىنداسا، كومپوزيتور سىماعۇلدىڭ قىزى اراي قۇرمانعازىنىڭ «سارى ارقاسىن» ورىندادى، ايتۋلى اقىن كىنازبەكتىڭ «اسەم قۇلجا باعىندا» اتتى جۇرەك قىلدى تەربەيتىن ولەڭى بۇل ساحنادا انمەن قابىسىپ، وتان اسپانىنا شارىقتادى. وشكەنىمىز قايتا ۇشىقىنداعان بۇگىنگى زاماندا، ۇلتىمىزدىڭ قاعا بەرىستە قالىپ بارا جاتقان تۇرمىس - سالت جىرلارىنىڭ ءبىر بولشەگى «جاراپازان» جىرىنىڭ سۇلۋ انمەن ادىپتەلىپ، ەفيردە شارىقتاۋى تىڭدارمان قاۋىمىنىڭ كوڭىلىنەن شىققاندىعى ءسوزسىز.
ءبىز 10 كۇندىك ساپارىمىزدا ىلەنىڭ 8 اۋدان، 2 قالاسىنىڭ ۇلان - قايىر دالاسىنداعى وركەندەگەن وركەنيەتى مەن زىمىران زاماناعا ىلەسىپ، ادام ايتسا سەنگىسىز رۋحاني مادەنيەت وزگەرىسىن، بايتاق وتان باۋىرىنا كىندىك قانى تامعان تارلان ونەرپازداردىڭ تانباي، تالماي، قاتاردان قالماي كەلە جاتقان جىگەرىنە، بۇگىنگى زامانادا باعى جانعان ۇل - قىزدارىنىڭ قايدان سالسا، سونان شىعاتىن ونەرىنە رازى بولدىق. بارلىعىنا باسشىلىق كومەگىن اياماعان اعايىندارعا جۇرەك جاردى راقىمەتىمىزدى ءبىلدىرىپ، ارتىمىزعا قاراي - قاراي ءبىر عاجاپ قيماستىقپەن ورتالىق قالاعا بەت الدىق!!! «شينجياڭ گازەتى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
