بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>ءتىل-ادەبيەت

تاۋلىك

ماعزان اكۋا ۇلى

2014.06.03 15:23     كەلۋ قاينارى : شينجياڭ گازەتى

  ءبىر تاۋلىك 24 ساعات، 24 ساعات 1440 مينۋت، ونىڭ 600 مينۋتىن دەمالىسقا شىعارىپ جىبەرىڭىز نەمەسە ەشكىممەن ۇشىراتپادىمعا جورىڭىز، سوندا 800 دەن استام مينۋتىڭىزدا مۇرنىڭىزعا سۋ جەتپەي، اياعىڭىزدان توزاسىز، اۋزىڭىزدى اۋىرتاسىز، قۇلاعىڭىزدى قۇدىق تۇبىنە توساسىز، ويىڭىز ون ساققا جۇگىرەدى، انا - مىنانى بايقاستاپ سابىلاسىز، اۋزىڭىز كوبىرشىپ سويلەيسىز، باسقالار نە دەيدى، قۇلاق تۇرەسىز، ەلدىڭ ءبارى سەنى ءسوز قىپ جاتقانداي ەلەڭدەپ، بايىز تاپپايسىز،... باسقانىكى بولسا دا، «كەرەكتى تاستىڭ اۋىرلىعى جوققا» ساناپ، كوڭىل تۇكپىرىڭىزگە جيا جۇرەسىز، ەرتەڭ كەزدەسكەندە ىڭعىلىنا باعايىن، نە دەر ەكەن، ءوزىنىڭ ۇزىن قۇلاعى شالعان شىعار دا نە مەنى سىناپ كورەر، ءوزىنىڭ بالىق ۇندەس، باقا تىلدەس جاقتاسىنا بالاپ، نە كوردىڭ، نە ءبىلدىڭ دەر، سوندا قۇلاننىڭ قاسۋىنا ماسانىڭ باسۋى بوپ جاتپاسىنا كىم كەپىل، ارزاننىڭ دا اسىلى بولادى، بولماعاندا ىڭعايىن باعىپ، ىندىنىن سۇلبالاپ كورمەيمىن بە؟ بالكىم، اش وزەگىنە تۇسكەن بولىپ، اسايمىن دەسە، تۇبىتكە قۇم قوسىپ ساۋدالاعانداي نە مايعا وراپ... تاستاعانداي، وڭەشىنىڭ وڭەزەسىن ءجىبىتىپ، زاپىرانىن جۇمسارتپايمىن با؟ ءىم، ءبىلدىم، وسىنداي ءبىر تاۋلىك، ءتىپتى، ءبىر ومىرىڭدە سۋشا ساپىراتىن ءىرىتىندى ويدىڭ ساباسىن تولتىرىپ العان سوڭ، ءوز كۇيبەڭىڭنىڭ يتبەگىنە ءتۇسىپ، تاسىڭدى ۇزىن ءيىڭنىڭ انا باسىنان ءبىر، مىنا باسىنان ءبىر كورسەتەسىڭ دە وتىراسىڭ باعجيىپ. قارسى جاعىڭ، دۇرىسى قارسىلاسىڭ قالاي وينار ەكەن؟...

  24 ساعات − ءبىر تاۋلىك. قالا تۇرمىسى بولعان سوڭ، الگىندەي وي مەڭدەگەن سۇلباڭنىڭ بۇزىلعان قانىن تاراتىپ، قاتقان قان تامىرىڭدى جۇرگىزىپ، كەۋپايا قۇلقىن، كوبىك قۇرساعىڭدى بوساتىپ، ايرانداي اشىعان ميىڭدى سەرگىتۋگە بولا ەرتەمەن سىرتقا شىعىپ، كەرىلىپ - سوزىلاسىڭ، حال - حادىرىڭا قاراي ارەكەت جاسايسىڭ، كەيدە مىسىقشا باسپالاي باساسىڭ، كەيدە جەتى اۋليەنىڭ بىرىندەي سۇلكەككە تۇسەسىڭ، كەيدە ماڭعازسىپ تۇيە تابانداساڭ، كەيدە تۇياعىڭ تاق - تاق ءتيىپ، سىلبىر اياڭعا كوشەسىڭ؛ كەيدە تيتىڭ - تيتىڭ جورعا سىماعىڭمەن دەلدەڭ - دەلدەڭ قاعاسىڭ؛ كەيدە ءوزىڭ سەكىلدى بىرەۋ كوبەلەكشە جالباڭداپ جانىڭنان ۇشىپ وتسە، كەيدە كوكىرەگىن ىس شالعان تاعى بىرەۋدىڭ جۇلدىز قۇرتشا جىبىرلاپ بارا جاتقانىن بايقايسىڭ؛ انە، وزىڭە قاراما - قارسى تاعى بىرەۋ قوڭىز اياڭمەن سىرعاقتاپ كەلەدى، وسىنداي ءبىرشاقتا جولدىڭ قارسى جاعىنان وزىڭە تانىس سۇلبا قولىنىڭ الاقانىن ساعان قاراتا اسكەرشە بەلگى بەرىپ ءوتىپ بارا جاتادى، جۇزىندە جىلماڭ جىميىس بار. سەزىپ كەلەمىن، ونىڭ مۇنىسى: «سەنى بىلەم» دەگەنى، «سەن، بادىراق، ماعان تيىسپە، مەن دە سەنەن ات بويى اۋلاقپىن» دەگەننىڭ كەبىن كيگەنى. جايشىلىقتا ادامدار الاقاندارىن ىشىنە قاراتىپ ۇستاپ، ەسەندەسەدى نەمەسە قوشتاسادى، بۇل سيلاسىمدىلىق، قيماستىق بەلگىسى، كەيدە قوس الاقاندى جايا الا ۇشۋ دا وسىنداي اق نيەتتىڭ ايعاعى بولىپ جاتادى. ال انانىڭ سىڭار قولىن كوتەرىپ، الاقانىن ساعان قاراتا تىك جايۋىنىڭ نىشانى نە؟ بىردەڭە تىلەسە دە ولاي ىستەمەس بولار، وندا قولدىڭ الاقانى كەڭىستىككە قاراي جايىلادى عوي، شاپالاقپەن وسىپ جىبەرەم دەۋ مە؟ جوق، ول دا ەمەس، باعىنىشتىلىقتان ءتىپتى نىسپى جوق. مەن دە ونىڭ ىستەگەنىن مايمىلشا ءدال وزىندەي قايتالادىم دا، ءوز باعىتىما كەتە بەردىم، ويلاعانىم، الدىمنان تاعى نە ۇشقاسار ەكەن، ول تاعى قانداي قىلىققا باسادى، مەنشى؟ وي جەتەگىندە كەلە جاتىپ، ءوز اۋلامىزدىڭ قاقپاسىنا دا جەتىپپىن. ءيا، ءبىر تاۋلىك، وسىلاي باستالادى، سالدەن سوڭ كەڭسەگە بارامىن، ونان ۇيگە، ونان، ءيا، ءبىر تاۋلىك، تاعى نە بولار ەكەن!...
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.