بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>ءتىل-ادەبيەت

وزگەرىس كىتاپ وقۋدان باستالادى

2015.05.26 13:21  



  ءبىر ادامنىڭ جان دۇنيەسىنىڭ دامۋى وقۋىمەن بايلانىستى

  ءبىر ادامنىڭ جان دۇنيەسى قالاي داميدى، جەكە تۇلعانىڭ رۋحاني بولمىسى قالاي قالىپتاسادى دەگەن سۇراقتار ۇستىندە كوپ وي جۇگىرتە بەرمەيمىز. ەگەر جان مەن ءتاننىڭ دامۋىن قاتار قويىپ سالىستىراتىن بولساق، ءتاننىڭ دامۋى كوبىنەسە تۇقىم مەن گەننىڭ ىقپالىندا بولعانىمەن، جەكە تۇلعانىڭ جان دۇنيەسىنىڭ دامۋى تۇگەلدەي تۇقىم مەن گەنگە ەمەس، قايتا ونىڭ كەيىنگى وقۋ - توقۋىنا بايلانىستى ەكەندىگىن بايقار ەدىك.

  جەكە تۇلعانىڭ جان دۇنيەسىنىڭ دامۋ تاريحى كۇللى ادامزاتتىڭ رۋحاني بولمىسىنىڭ دامۋ تاريحىنىڭ شاعىن كورىنىسى ىسپەتتى. ءاربىر جەكە تۇلعا ءوز رۋحىن اتا - بابادان قالعان تاجىريبەلەردى قايتالاۋ نەگىزىندە بايىتادى. ال بۇل قايتالاۋ وقۋ ارقىلى ىسكە اسىرىلادى.

  ادامزات تاريحىنىڭ سان - ساناقسىز رۋحاني بەلەستەرى بار، شوقتىعى بيىك سول بەلەستەرگە كوتەرىلۋ نەمەسە ولاردان اسۋدىڭ جالعىز جولى − وقۋ مەن ويلانۋ. تەك كىتاپ وقىپ، كۇڭزى، مىڭزى سياقتى عۇلاما حاكىمدەرمەن كەڭەس قۇرعاندا عانا سول ءداۋىردىڭ رۋحاني بيىگىنە كوتەرىلۋگە بولادى؛ تەك كىتاپ وقىپ، ادەبيەت پەن ونەردىڭ قايتا ورلەۋى كەزەڭىندەگى ۇلى ۇستازدارمەن ءتىل تابىسقاندا عانا سول ءداۋىردىڭ يدەولوگيالىق دەڭگەيىمەن تەڭەسۋگە بولادى.

  ادامزاتتىڭ رۋحاني باسپالداعى وسىنداي قايتالاۋلار ناتيجەسىندە بىرتە - بىرتە بيىكتەي بەرەدى. ەگەر وسىنداي قايتالاۋلار بولماسا، ادامزاتتىڭ رۋحى ءپاس تارتادى، قۇردىمعا كەتەدى. ەگەر كىتاپ وقىماساق، ءبىزدىڭ بۋىننىڭ رۋحاني دەڭگەيى ادەبيەت پەن ونەردىڭ قايتا ورلەۋى كەزەڭىندەگى ۇلى ۇستازداردىڭ ەتەگىنەن ۇستاۋعا جاراماس ەدى، ءتىپتى، ونان ىلگەرى تاريحي كەزەڭدەرمەن دە يىقتاسا الماس، بالكىم.

  مەن ينتەرنەتتى ەمەس، كىتاپتى قاستەر تۇتاتىن اداممىن. ادامزاتتىڭ ەڭ ۇلى ويلارى تۇگەل كىتاپتا. قازىر ەلىمىزدە ينتەرنەت وقىرماندارىنىڭ قاتارى قاعاز وقىرماندارىن شاڭ قاپتىرىپ كەتكەنىمەن، ءبارىبىر ادامزاتتىڭ ەڭ ۇلى وي - تولعامى ءالى دە ينتەرنەتتەن دەربەس دەپ بىلەمىن. ينتەرنەتتە اقپاراتتار، جارنامالار جانە ساۋىق - سايراندار كوزىمىزدى كوبىرەك قىزىقتىرار بالكىم. ءبىراق، ادامزاتتىڭ تۇسىنىگىن، وتە - موتە، ادامي اقىلدىڭ اڭعارىمىن ينتەرنەت ارقىلى بايىتۋ مۇمكىن ەمەس، پاراساتتى مازمۇن دەگەنىڭىز ينتەرنەتتە اسىلدىڭ قيىعى، التىننىڭ سىنىعى سياقتى نەكەن - ساياق دۇنيە. ادامزات ويىنىڭ دامۋى، ادام ويىنىڭ دامۋى تۋرالى ايتار بولساق، اقپاراتتان بىلىمگە، بىلىمنەن پاراساتقا كوتەرىلۋ رۋح پەن اقىلدىڭ بىرتىندەپ جيناقتالۋ، بايۋ، دامۋ ءۇردىسى بولىپ تابىلادى. تەك كىتاپ وقىعاندا عانا ءار ادامنىڭ پاراساتى رۋحاني «پراميدانىڭ» ۇشار باسىنا بىرتە - بىرتە كوتەرىلۋى مۇمكىن. جەكە تۇلعالاردىڭ پاراسات - پايىمى جيناقتالا كەلە زامانىمىزدىڭ رۋحاني بيىگى رەتىندە كوزگە تۇسەدى.

  كىتاپ وقىماي جەكە تۇلعانىڭ جان سەزىمى ۇشتالا المايدى، ونىڭ رۋحاني الەمىنىڭ كەمەلدىككە جەتۋى دە مۇمكىن ەمەس.

  كىتاپتىڭ قالتامىزدى قالىڭداتۋى ەكىتالاي، الايدا اقىل كوزىمىزدى اشاتىنى داۋسىز.

  كىتاپتىڭ اسەم كورىك بەرۋى ەكىتالاي، الايدا دەڭگەيىمىزدى كوتەرىپ، تىنىسىمىزدى كەڭىتەتىنى داۋسىز. ايداي سۇلۋ بولماعانمەن، كەي ادامنىڭ اۋزىنان اقىق توگىلىپ، تىڭداۋشىنىڭ جان دۇنيەسىن بالقىتىپ، كوكتەم سامالىنداي جادىراتاتىنى بولادى، ونىڭ قاسىنان ۇشان - تەڭىز بىلىمىنە ءتانتى بولىپ، كوڭىلىڭىزگە نۇر قۇيىپ قايتاسىز. ادامنىڭ كەلبەتى گەنىنە بايلانىستى، ونى قولدان وزگەرتۋگە بولمايدى، ءبىراق وقۋ - توقۋ ارقىلى كەنەرەمىزدى كەڭىتىپ، كەۋدەمىزدى جازىپ، بال - بۇل جانا الامىز.

  كىتاپتىڭ عۇمىرىمىزدى ۇزارتۋى ەكىتالاي، الايدا كىتاپ ارقىلى ءومىرىمىزدىڭ ارناسىن كەڭىتىپ، قاتپارىن قالىڭداتۋعا تولىق مۇمكىندىگىمىز بار. ادامنىڭ عۇمىر جاسى گەن سەكىلدى تۋا ءبىتتى فاكتورلارعا بايلانىستى، ال وقۋ - توقۋ ارقىلى ءبىزدىڭ رۋحاني دۇنيەمىزدىڭ كوكجيەگى ءتىپتى كەڭەيىپ، قازىناسى تولىعا تۇسەدى.

  كىتاپ ارقىلى شەكتى عۇمىردا شەكسىز سۇلۋلىقتان ءلاززات الىپ، كوركەم ومىردەن كوڭىلگە ءنار جيناي الامىز. كىتاپ ارقىلى عۇمىر بويى اڭساتقان اسىل ارمانعا قولىمىز جەتۋى ەكىتالاي، الايدا كىتاپ ءبىزدى ارمانىمىزدىڭ بيىگىنە ءبىر تابان جاقىنداتا تۇسەدى.

  سوندىقتان وقۋ جەكە تۇلعانىڭ رۋحاني دامۋىندا ولشەۋسىز ماڭىزعا يە دەپ تولىق سەنىممەن ايتا الامىن. «شينجياڭ گازەتى»

جاۋاپتى رەداكتورى : نۇرعيسا قۇرمانجان ۇلى

 سۋرەت