- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«ءومىر بەلەستەرى» – ونەگە ەلەستەرى
جاڭاتاي قابدىكەرىم ۇلى
2015.07.28 15:58
سوڭعى جىلدارى جۇڭگو قازاق ادەبيەتىندە مونوگرافيالىق شىعارمالار مولايدى. قالامگەر اعالاردىڭ،ياعني سۇلتان جانبولاتوۆتىڭ «ءبىز»، باتىرقان قۇسبەگيننىڭ « كەشۋلەر »،ۇلىقان سۇلتان قىزىنىڭ «عۇمىر دارياسى»؛قارت قوعام قايراتكەرلەرىنىڭ،ياعني ءجانابىل سىماعۇل ۇلىنىڭ « بالاشاقتان بولاشاققا »،قىدىرباي ءمۇرسالىم ۇلىنىڭ « داۋرەن-اي »،قادىس ءجانابىل ۇلىنىڭ «ءومىر ورنەكتەرى»،ءباتيما جاكۋليننىڭ «ءوتتى ءومىر وسىلاي»،ت.ب رومان،ەسسەلەرى وقىرمانىنا ۇسىنىلىپ،ەلىنىڭ رۋحاني يگىلىگىنە اينالدى. مەمۋارلىق،مونوگرافيالىق شىعارمالاردىڭ ءوتىمدى بولاتىنى ەسىمى ءماشھۇر قايراتكەردىڭ قاراپايىم ادام تۇرعىسىنداعى عۇمىرناماسىن بىلۋگە قىزىعاتىن ادامنىڭ كوپتىگى. ويتكەنى وندا شىن ادام،شىن وقيعا باياندالاتىندىقتان،اۆتور ءومىر سۇرگەن ورتا،قوعام،ادامدار اراسىنداعى قارىم-قاتىناس،مىنەزدەمە وقىرمانداردى قىزىقتىرماي قويمايدى. وسىنداي شىعارمالاردان وقىرماندار كەرەمەت كەشۋلەردىڭ كارتيناسىن كورىپ،ونان ۇلگى-ونەگە العىسى كەلەدى.
ءبىز وقىعان مەمۋارلىق ەسسەلەردىڭ كولەمدىسىنىڭ،كەمەلدىسىنىڭ ءبىرى «ءومىر بەلەستەرى». ەل تىزگىنىن ۇستاعان باسشىلاردىڭ ءبىرى،كورنەكتى قوعام قايراتكەرى،كوشەلى قالامگەر اسحات كەرىمباي ۇلى اعامىزدىڭ ءومىر كەشىرمەسىن ورنەكتەپ،وقىرماندارىنا ونەگە كورسەتۋى مىندەتتى دە يگىلىكتى ءىس. اۆتور توعاناعى تولىمدى بۇل ەڭبەگىنە ۇزاق دايىندىقپەن،ۇلاعاتتى ويمەن،سارقىلماس قورمەن كەلگەن.
جاۋاپكەرشىلىگى كۇشتى،جاپالى دا داڭقتى باسشىلىق مىندەتتەن ساتكە بولسا جۇگى جەڭىلدەي قالعاندا،جاپالى،جولى اۋىر جازۋشىلىق جورىعىنا اتتانعان اسحات اعامىز وسىعان دەيىن « جەمىستى جىلدار»،«شەتەلدەگى كۇندەر»،« ءومىر بەلەستەرى» (البوم) اتتى ءۇش كىتاپتى ۇسىنىپ ۇلگىردى. ماقالامىزدا اۆتوردىڭ 2013 -جىلى «شينجياڭ جاستار -ورەندەر باسپاسىنان » باسىلىم كورگەن «ءومىر بەلەستەرىنىڭ» (عۇمىرنامالىق ەسسە) 1-كىتابى تۋرالى قىسقاشا توقتالۋدى ءجون كورىپ وتىرمىز.
بيلىكتىڭ بۇيداسىن ۇستاعان بىلىكتىلىك ءبىر باسقا دا،قالامگەرلىك قۋات ءبىر باسقا. ويتكەنى باسشىلىق _ حالىقتىڭ قالاۋىنان،پارتيا، ۇكىمەتتىڭ تالابىنان شىققان ءومىردىڭ ورنالاستىرۋى دا،جازۋشىلىق _ جاراتىلىسىنان بىتكەن تۋما تالانت پەن تابيعاتتىڭ تارتۋى. الدىمەن ارىدان قوزعاساق،اسحات اعادا ادەبيەت-كوركەمونەردىڭ تەمپەرامەنتى اتا تەگىنەن دە،جاساعان ورتاسىنان دا كونتاگيوزدى (جۇعىستى) جالعاستىلىق بار. باباسى سىبانباي ءبي،كەرىمبايدىڭ اكەسى كۇشىباي زاڭگى،بەرگى اتالارى نۇراحىمەت ەل باسقارىپ،جۇرت بيلەگەن ادامدار. ايگىلى جازۋشى ءسابيت مۇقانوۆ اپتالاپ جاتىپ،شەجىرەسىن شەرتكىزىپ،ءبايىتىن تىڭداپ تامسانىپ «ساحارا سۇڭعىلاسى» دەپ اتاعان سۇلتان شەشەن،اككوردەون،سكريپكا،گيتارا،بالالايكا،ماندولين سىندى ءار ۇلت مۋزيكا اسپاپتارىنىڭ قولىنا تۇسكەنىن سايراتا بىلەتىن سازگەر سادىق جاقىپ ۇلىنداي الۋەتتى اكەلەردىڭ اسەرى قانشالىق. سول كىسى سارقىتىن بەرىپ،سيعا تارتقان گارموندى اسحات اعا دا اجەپتاۋىر مەڭگەرىپتى. وعان « اۆسترالياعا ساپارداعى» احات ساباقتاسىنىڭ وتباسىنداعى وتىرىس ايعاق. ەندى ءبىر جاعى،التىنسارى،ساكەن،تابيلاقان سىندى شەتتەرىنەن سۋىرىپ سالما شەشەن،اقىن،اقىلدى توركىنى بار،تەكتى قوقىربايداي («كارى اپا») التىن انالارىنىڭ بالا اسحاتقا دا اسەرى از بولماعان كورىنەدى. سوناۋ 1956-جىلدارى قۇلجا قالاسىنان ارنايى ءۇي ساتىپ الىپ،بالا وقىتۋ دا سول زاماننىڭ زيالى شاڭىراعىنىڭ شارۋاسى. بۇلار اۆتوردىڭ قالامگەرلىك قۋاتى انا سۇتىنەن دارىعان تۋما قاسيەت ەكەنىن مويىنداۋ.
اۆتوردىڭ تۋىپ -وسكەن ورتاسىن ايتساق،« ءومىر بەلەستەرىنىڭ » ءبىرىنشى بولەگىندەگى ءوزى ايتقانداي،ونەر بەسىگىندە تەربەتىلىپ ەرجەتكەنى،« ادامنىڭ بۇلبۇلى » اتانعان اسەتتىڭ ءانى شىرقالعان اۋىلدا تۋعانى (اسەتتى كۇشىباي زاڭگى ءوز قولىمەن سوڭعى ساپارعا ارۋلاپ اتتاندىرعان)،ياعني وسىنداي ونەر ورتاسىندا تۋىپ،وركەنيەت ولكەسىندە وسكەن اسحات اعا نەگە قالامنان الىستاسىن،قوعامنىڭ ءار قويناۋى قالايشا ويلى قاباعىنان قاعىس قالسىن!؟ۋنيۆەرسيتەتتى ماتەماتيكا ماماندىعىمەن تاۋىسسا دا قوعامدىق قىزمەتكە ارالاسا باستاعان سوڭ،«بوتاكوز»،«قاراعاندى» روماندارىمەن سۋسىنداپ،ورتا مەكتەپ قابىرعاسىندا جازا باستاعان ولەڭ شوعىن قايتا ۇرلەي باستايدى،وسى كەزدە «ماي سەيىلى» دەگەن ولەڭى جاريالانىپ،جاقسى لەپەستەر ەستيدى. تىلگەر،عالىم،جەزدە اعاسى مىركامال جالەلقان ۇلىنىڭ ۇسىنىسىمەن «قىزىل تۇلكى» رومانىن،« ىلە گازەتىنىڭ » تاپسىرىسىمەن
«حانزۋ بالالار ەرتەگىسىن» اۋدارىپ،اۋدارماشىلىق تالانتىن تانىتادى. دەگەنمەن،وسىدان كەيىن موينىنا جۇكتەلگەن باس كوتەرتپەس باسشىلىق مىندەت باعىتىن باسقا ارناعا بۇرىپ اكەتەدى.
«ءومىر بەلەستەرى» ات ۇستىندە جۇرگەن ازاماتتار ءۇشىن تابىلماس تاجىريبە ساباق،ۇتىمدى وقۋلىق ءتارىزدى.
«كوپ جاساعانىڭ نە كەرەك،
تاريحتى ايتىپ بەرمەسەڭ.
ەرتە تۇرعانىڭ نە كەرەك،
ورگەن مالدى كورمەسەڭ» دەگەندەي،كورگەن-بىلگەندەرىن،ومىردەن سەزگەندەرىن،شەشىم-تۇجىرىمدارىن بۇكپەسىز بەزبەندەپ،ءوزىنىڭ پايىم-پارمەنىمەن تۇيىندەپ وتىرعان. «مەن دە اداممىن جارالعان سۇيەك-ەتتەن» دەپ باتىر اتامىز باۋىرجان مومىش ۇلى ايتقانداي،مەمۋاردا بيلىكتى بولەك ءبىر تۇلعا رەتىندە ەرەكشەلەمەي،قاراپايىم پەندە تۇرعىسىندا بەينەلەپ باياندايدى. كىتاپتىڭ تۇسە بەرىسىندە ءوزى تۋعان ولكەنىڭ جاعراپيالىق جاعدايىن،گەوگرافيالىق ءتۇزىلىسىن توپونيمدەرمەن (جەر -سۋ اتتارى) ءتۇسىندىرىپ،وڭىرلىك ونوماستيكالىق اتاۋلارمەن (حالىقتىق اتاۋلار) ايىرىپ،سوزبەن سالعان كارتاداي كوركەم كورىنىستى كوز الدىڭا الىپ كەلەدى. ونان ارى اۆتور ءوزىنىڭ بالدىرعان بالالىق شاعىنداعى باسىنان وتكەن قىزىقتى شاقتارىن بايانداي وتىرىپ،قازاق سالتىنىڭ قايماعى بۇزىلماعان سول شاقتاعى ەل تۇرمىسى،تىرشىلىك ءتاسىلى،ءداستۇر داعدىسى،بالالار ويىنى،ۇلتتىق سپورت ويىندارى،توي-تومالاق،تۇرمىس-سالت ءبار-ءبارىن مۇمكىندىگىنشە كىرىستىرگەن. «بولار بالا وزا تۋار» دەپ حالىق ايتسا،«تاربيەنىڭ نەگىزى بەس جاسقا دەيىن قالانادى. بەس جاسقا دەيىن جۇرگىزگەن بارلىق تاربيە ءىسىڭىز _ بۇكىل تاربيە بارىسىنىڭ توقسان پايىزىن يەلەيدى » دەپتى ا. س. ماكارەنكا. جەتىگە جەتكەنشە جەتى اتاسىن جاتتاۋدى وتباسىلىق تاربيەنىڭ الىپپەلىك ساۋاتى ەتكەن قازاقى عاداتىمىزدىڭ بارىنەن سۇرىنبەي وتەدى. اتا-اناسىن قۇرمەتتەي بىلگەن ادامدار عانا وتانعا وپالى بولاتىنىن اباي تاعىلىمىنا تابىنىپ،ەكى ەنەنى تەل ەمىپ،ەرتە ەسەيگەن ەستىلىگىن اڭعارتادى. اۆتوردىڭ ءوز سوزىمەن ايتقاندا «... اعايىن اراسىنداعى نەتكەن تاتۋلىق،نەتكەن ۋادە مەن سەرتكە بەرىك كىسىلىك قاسيەت،تاماشا ءداستۇر... ەكەنىن ەسكەرتىپ،اتا-اناسىنىڭ كوڭىلىنە ەش كولەڭكە تۇسىرمەي...» ومىردەن اتتاندىرادى. ارينە،ۇزارتىپ ايتساق،ءبىر شاڭىراقتىڭ عانا ەمەس،وتاننىڭ ورتاق ۇعلانى بولعانى دا وسى.
ۋنيۆەرسيتەت قۇشاعىنداعى «مادەنيەت زور توڭكەرىسى» ارالاسقان الاپاتتى جىلدار،اسكەري قوسىندا قايتالاي تاربيە الۋ،قىزمەت ىزدەپ ساندالىس،«قارامايلىداعى كوڭىلسىز كۇندەر» كورگەن تۇستەي ەلەستەيدى. ءبىر عانا اقيقات قايدا بارسا دا قاراپايىم قام كوڭىل جانداردىڭ مۇڭىنا ورتاقتاسىپ وتىرادى،سوناۋ قىستاقتا جۇرگەن جەرىندە مالشىلاردىڭ مەكتەپ قيىنشىلىعى تۋرالى پىكىرىن اۋدارىپ،العاش كوزگە تۇسكەنى _ «اقىلىڭ ەڭبەگىڭمەن ەكى جاقتاپ الىپ شىعار» دەگەن اباي سوزىنە سەندىردى. ساياسات وڭالىپ،زامان قايتا ساباسىنا تۇسكەندە قۇرمانالى،قاپەز قاتارلى ەل اعالارىنىڭ،تايىر بەلگىباي،داۋلەت حالىق ۇلى سىندى ونەر ادامدارىنىڭ قىزمەتى قايتا قالپىنا كەلۋ جۇمىسىنا بەل شەشە كىرىسىپ ءجۇرىپ،«يىلسە دە سىنبايتىن اقيقاتتىڭ بارىنا» ءتاۋبا ايتادى.
ورتا مەكتەپ وقىپ جۇرگەندە-اق ادەبيەت-كوركەمونەر كۋرجەگى مەن دەنە تاربيە قيمىلدارىنا قىزۋ ات سالىسىپ،ۇيىمداستىرۋ شارالارىن قىزۋ اتقارىسىپ جۇرگەندىكتەن بە،باسشىلىق مىندەت العاندا دا وسى سالاعا وڭ قاباعىمەن قاراپتى. ىلە قازاق اۆتونوميالى وبلىستىق تەاتردىڭ كەمەلدەنۋى،شەتەلگە شىعىپ كونسەرت قويۋعا مۇمكىندىك الۋى،ىلە تەلە-فيلم اۋدارۋ،جاساۋ ورتالىعىنىڭ قۇرىلۋى قاتارلى قۇزىرلى جۇمىستارعا باستاماشى بولادى. ەسسەدە « 6000 جىل اتقا مىندىك » دەگەنىمىزبەن،«كوكپاردان» كوش كەيىن قالعانىمىزعا نامىستانىپ،«كوكپارشىلار كومانداسىن» قۇرىپ،قارجىلاي دەمەپ،شەتەلدەن تۇلپارلار اكەلىپ جانداندىرۋعا جەبەۋشى بولعانىن ەرەكشە اتاعان ءجون سياقتى. سونىڭ ارقاسىندا ەل ءۇمىتىن اقتاعان كوكپارشىلارىمىز اۆتونوميالى رايوندىق از ۇلت دەنە تاربيە جارىستارىندا نەشە مارتە باس جۇلدەنى العانىن وقي وتىرىپ،تاقىمىمىزدى قىسامىز. «جەمىستى جىلدارداعى » ماقالالاردىڭ كوبى بولسىن، «ءومىر بەلەستەرىندە» سۇيىنە ءسوز ەتكەن تاقىرىپتىڭ سۇبەلىسى بولسىن،اقىندار ايتىسى ايتا قالسىن اۋىزعا الىنعان ەكەن. ەسسەگە ەلىتىپ ءوز كوزىممەن كورىپ،باسى-قاسىندا كۋاشىسى بولعان كەزدەرىمدى ەلەستەتىپ ءوتتىم. 1998-جىلى قىركۇيەكتە ىلە قازاق اۆتونوميالى وبلىسىنىڭ 12-كەزەكتى اقىندار ايتىسىنىڭ باستالۋ سوزىندە اسحات اعا اقىنداردىڭ تۇرمىسىنا كوڭىل ءبولۋ،ماعلۇماتىن ءوسىرۋ،تاربيەلەۋ،كۋرس اشۋ جونىندە العاش رەت جازباشا دا،اۋىزشا دا ارنايى توقتالعان بولاتىن (كەيىنگى بىرنەشە كەزەكتى ايتىس مىنبەسىندە دە وسى پىكىردى باسا دارىپتەدى). ارەدىك ماماندارمەن كەڭەستە «اۆتونوميالى رايوندىق اقىندار ايتىسى بولماسا،موري،باركول،بۇراتالا سىندى قازاق ۇلتى ءجيى قونىستانعان وڭىرلەر قاعىس قالادى ەكەن» دەگەن پىكىر-تالاپتار ورتاعا قويىلدى. اسحات اعا ورىندى تالاپتى جوعارىعا جەتكىزۋگە،ورىندالۋىنا كۇش سالۋعا ەمەۋرىن ءبىلدىردى. ەسسەدە جازىلعانداي،سونىڭ كەلەر جىلىندا اۆتونوميالى رايوندىق تۇڭعىش كەزەكتى اقىندار ايتىسى ءوتتى. 2008-جىلى شينجياڭ ۇيعۇر اۆتونوميالى رايوندىق اقىندار ايتىسىن زەرتتەۋ قوعامى قۇرىلىپ،بۇرىنعى ىلە پەداگوگيكا ينستيتۋتى كۇيتۇن وقىتۋ رايونىنان اقىندار كلاسى اشىلىپ،سوڭىنان تولىق كۋرسى بويىنشا وقۋشى قابىلدايتىن بولدى. ايتپاقشى،قازاقتىڭ «الپىس ەكى قوڭىرى» مەملەكەت دارەجەلى بەيزاتتىق مۇرا قاتارىنا الىنۋىنا دا اسحات اعانىڭ ەڭبەگى از بولمادى. سونىڭ ارقاسىندا تارىداي شاشىلىپ قالعان قانشاما حالىق ءان-كۇيلەرى جينالدى،قورعالدى،نوتاعا ءتۇسىرىلدى،حان تىلىنە اۋدارىلدى،توم-توم كىتاپ باسىلدى. «الپىس ەكى قوڭىردى» ارقاۋ ەتىپ،ۇلتتىق مۋزيكامىز دا بىرگە زەرتتەلىپ،ءبىر قىدىرۋ ەڭبەكتەر ىستەلدى.
«شەتەلدەگى كۇندەردە» مەملەكەتتەر ارا ساياسي قارىم-قاتىناس،كەزدەسۋلەر مەن كەلىسىمدەر نەگىز ەتىلسە،«ءومىر بەلەستەرىندە» كەي مازمۇندارعا قاراپايىم كىسى عۇمىرناماسى تۇرعىسىندا تولىعىراق توقتالعان. «ەلدەستىرمەك ەلشىدەن،جاۋلاستىرماق جاۋشىدان» دەگەندەي،حالىقارالىق قاتىناستارداعى قاۋىشۋ مەن قايشىلىق ءيت جىعىس ءتۇسىپ جاتادى عوي. سونىڭ بارىنە ءسوزدىڭ جۇيەسىن تاۋىپ،ءىستىڭ شيەسىن شەشەتىن ەپ تە كەرەك،دەس تە كەرەك ەكەن. قازاقستان رەسپۋبليكاسىنىڭ وزىنە 17 رەت ساپارمەن بارۋى كوپ نارسەنى تۇسىندىرمەي مە. قورعاس حالىقارالىق شەكارا سەلبەستىك ورتالىعىنىڭ قۇرىلۋى،ەۆرو-ازيا 2 -تەمىر جولىنىڭ ىسكە قوسىلۋى سىندى ءىرى ىستەردىڭ جەتەكشىلىك مىندەتىن وتەۋدە ساياساتكەرگە ءتان سابىرلىلىق،باسشىعا ءتان بايسالدىلىق،ديپلوماتيالىق دەڭگەيدەگى مامىلەگەرگە ءتان مايدا قوڭىر مىنەز، قىلىش جۇزىندە قىلت جىبەرمەس شەبەرلىك،قىل ۇستىندە قيسىنىن تابار شەشەندىك كورسەتكەن كەزدەرى كىتاپ بەتىن اقتارعان سايىن كەزدەسىپ وتىرادى.
اسحات اعا اتقا مىنگەننەن تارتىپ جارتى عۇمىرى جول ساپاردا بولىپ،جەر شارىنىڭ ارعى بەتى مەن بەرگى بەتىن شيىرلاپ شىققان عوي. مەنىڭ ءبىر تاڭ قالعانىم،اۋدارماشى بار دەگەن كۇننىڭ وزىندە ءتىلى دە،ءتۇرى دە،جەرى دە،ەلى دە جات سونشاما مەملەكەتتەردىڭ تاريحىن،جاعراپيالىق ورتاسىن،ساياسي اۋجايىن،ەكونوميكالىق شارۋاشىلىعىن،جان سانىن،ۇلت قۇرامىن،مادەنيەت-اعارتۋىن يەلەپ،كەزىككەن كىسىلەردىڭ جالپى جاعدايىن،ەسىمىن،قارسى الۋ كونسەرتتەردەگى ورىندالعان شىعارماعا دەيىن ەستەلىك الىپ ۇلگىرۋى بولدى. ەرتەلى-كەش جورتۋىلداي ءجۇرىس،كەزدەسۋ،كەڭەسۋ،كەلىسۋ،قوناعاسى...
«اتتىڭ جالى،تۇيەنىڭ قومى» دەگەندەي،جىنىككەن ساتتە جاڭبىردىڭ اراسىنان جۇرگەندەي،قايتىپ ۋاقىت شىعارعاندىعى. پيفاگوردىڭ: « ۇيىقتار الدىندا وتكەن كۇندە ءوزىڭنىڭ نە ىستەپ،نە تىندىرعانىڭدى وي ەلەگىنەن ءبىر وتكىزبەي تۇرىپ،كوزىڭدى جۇمۋشى بولما» دەگەنىن جادىندا ساقتاعان سىڭايلى.
«ادامدى ادام تۇسىنبەۋ ءبىر اقىرەت،ويلى جاس ءتۇسىنىپسىڭ،راقىمەت» دەپ مۇقاعالي جىرلاعانداي،اتالعان مەمۋاردى وقىعان سوڭ ءمانساپ يەلەرىنە دەگەن تۇسىنىگىڭ دە تەرەڭدەي تۇسەتىندەي. «مىڭنىڭ قامىن ءبىر ويلار،ءبىردىڭ قامىن كىم ويلار» (ورىس ماقالى) دەسەڭىز،«ءومىر بەلەستەرىنىڭ» بەتىن پاراقتاڭىز. «ءوزىم-اي دەمەي،ەلىم-اي!» دەيتىن ەل جاندى باسشىلارعا كوڭىلىڭىز كونشىپ،جانىڭىز سەمىرەدى. قايدا جۇرسە دە،قاي باس قوسۋ بولسا دا حالىقتىڭ،قالا بەردى،ءوزى ۋاكىل بولعان ۇلت تاعدىرى،شارۋالاردىڭ وتىرىقتانۋى،جان باعىسى،مال باعىسى،قازاق باسشى كادرلارىنىڭ ورنى،سانى،رولى ءبار-ءبارى باس قاتىراتىن تاقىرىپتار. ماسەلەن،جاۋ لىجي جولداس چيڭحاي ولكەسىنىڭ باستىعى بولىپ تۇرعان كەزدە شينجياڭعا كوشىرگەنگە كوندىگە الماي،قايتا چيڭحايعا كەلگەن قازاقتاردىڭ جەر-سۋ،مال جاعدايىنا ءمان بەرۋىن ءوتىنۋى، ەكى ايدان كەيىنگى بەيجيڭدەگى ءبىر جينالىستا كەزىككەندە جاۋ لىجيدىڭ: «وتكەندەگى بۇيىمتايىڭىزدى ويداعىداي ورىنداپ قويدىم» دەگەنىن ەستىپ،قازاق قاۋىمى اتىنان العىس ايتۋى،بەيجيڭ وليمپياداسىندا مىس مەدال العان بوكس شەبەرى قانات ءسىلامعا قۇرمەتى،ۇرىمجىدەن ەكى رەت بەيجيڭگە ۇشىپ بارىپ،جارىستىڭ باسى-قاسىندا بولىپ،جۇلدەسىن قۇتتىقتاۋى...
«جاقسىلىق جاسادىم» دەپ جارنامالاپ ءوزىن ۇگىتتەمەي،ۇندەمەي ءجۇرىپ-اق كوپ جۇمىستاردىڭ ءجونىن تاۋىپ جۇرگەنى... اتالعان كىتاپتى وقىعان ادامنىڭ جانىن سۇيىندىرەدى.
مەمۋار _ « مەننىڭ » عانا عۇمىرناماسى ەمەس،قايتا اۆتورعا قاتىستى قوعامدىق ورتا مەن قىزمەتتەس جولداستارى دا قاعىس قالماعان. مۇندا ءوزىن كوتەرمەلەپ،قاناتتاستارىن قاقپايلاپ،ەڭبەگىن ەلەۋسىز قالدىرۋدان مۇلدە اۋلاق،قايتا وزگەلەردىڭ ەسەلى ىستەرىن دە كورنەكتىلەندىرىپ كورسەتىپ،جولداستىق سيلاستىق،ۇلكەنگە قۇرمەت،كىشىگە ىززەت تۇرعىسىنان توقتالادى. جازىلۋ ستيلى جاعىنان ايتساق،جالتىلداق سوزدەر مەن ءسوزۋارلىققا سالىنباي،ۇعىنىقتى،تۇسىنىكتى جەتكىزگەن. ءيا،بۇل اتالعان اۆتوبيوگرافيادان العان العاشقى اسەرىمىز عانا.
تارباعاتاي اقپارات تورابىنان
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
