- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
شالقىمالار
ماقپال ءماۋلىقان قىزى
2015.08.16 10:21
قۇلىنىمنىڭ كۇلكىسى
جاداعاي تىرلىكتىڭ سۋىرتپاق سۇردەكتەرىنەن تياناق تاپپاي مىسىم قۇرىعان كۇندەردە، كوڭىلىمنىڭ كوك ورتەڭىن كۇل باسىپ، سابىرىم سارقىلىپ، سانام سارعايعان شاقتاردا، الىپ ۇشقان اق جۇرەگىم قوناقتار تۇعىرىن تاپپاي لاپىلداعان سۇلۋ سەزىمىم مۇز استىنا توعتىلعانداي توقىراعان تۇستاردا... تۇپ- تۇنىق كوك تورعىن اسپاندى التىن نۇرعا بولەگەن تامىزدىڭ تامىلجىعان كۇنىندەي كوكىرەگىمە كوركەمدىك كوبەلەگىن قوندىرىپ، جۇزىمە جىلىلىق نۇرىن ويناتقان، قۇدىرەتتى كۇش، جاز جايلاۋدىڭ سىركىرەپ ءوتىپ سەلت ەتكىزىپ سەرگىتەر نوسەرىندەي، تىرلىكتىڭ تىنىمسىز توپىرىنان توزاڭ باسقان جۇرەگىمدى جۋىپ-شايىپ، ءومىردىڭ ۇلاعات ۇشپاعىنا شىعارار شىڭىراۋ باقىت، ىلعيدا مەنى شىتىرمان توردان تۇلەتىپ تىرلىكتىڭ تىڭ تەبىرەنسىمەن تىك تۇرعىزادى. مەنى باقىتتىڭ بەسىگىندە تەربەپ، توڭىرەگىمە كىنادان پاك، وكپە-نازدان قۇلان-تازا كىرشىكسىز جانارمەن قاراتادى. بۇل قۇدىرەت ايەل زاتىنا تاسقا تامىر بىتىرىپ، تەبىرەنتەر مەيىر سيلايتىن، ەركەكتەر الەمىنە بارلىق اقىماقتىقتان ادا -كۇدە ارىلتىپ، اكەلىك ابروي سيلايتىن ۇكىدەي ۇلبىرەگەن، گۇلدەي قۇلپىرعان ءسابي كۇلكىسى. مونتازداي موماقان ءسابيىمنىڭ رياسىز كۇلكىسى قاباعىما مەيىر بولىپ ءسىڭىپ، تامىرىمدا قان بولىپ ويناپ، تۇرشىككەن تۇلا بويىمدى وت كۇزىندەگى قورعاسىنداي بالقىتىپ، بار الەمدى تىڭنان تانىتادى. ءارقاشان كۇلىپ قارسالعان قۇلىنىم مەنى مەڭسىز بوزعىلىت قۇمدى دالادان جاپ -جاسىل بۇلاق بويىنا جەتەلەيدى. شاڭى اسپانعا شىعىپ قولقانى قاپقان تىمىرسىق توزاڭنان الۋان گۇلمەن كومكەرىلگەن ءجاننات جايلاۋعا باستايدى. ءتورت توڭىرەگى ەل كوشكەن جۇرتتاي قۇلازىعان ءتۇپسىز ۋايىمنان قۇتقارىپ، جانارىمدى جارىق ەتكىزىپ، مەيىردىڭ مونشاعىن توگىلدىرىپ، بايابان باقىتقا باستايدى.
قۇلىنىمنىڭ كۇلكىسى مەنى قايسارلىققا، باتىلدىققا، كىرشىكسىز ادالدىققا، كىشپەيىلدىككە، اياۋشىلىققا، ماحابباتقا جەتەلەيدى. قۇلىنىمنىڭ كۇلكىسى سيلاعان بارلىق كۇش-قۋاتىما دەگەن شەكسىز قۇرمەتىمنىڭ قۇدىرەتى، مەنى، قۇلىنىم ءۇشىن باياندى باقىت سيلاۋعا قۇلشىندىرادى. ماعان تىڭ تىرلىك سيلاعان قۇلىنىمنىڭ كۇلكىسى مەنى بارلىق بايانسىزدىقتاردان قۇتقارىپ، سايلاۋىت ساپارعا باستايدى. قۇلىنىمنىڭ كۇلكىسى…
ساعىنىش
ساعىنش-سال سامالمەن سىرلاسىپ، ۇزاق سىبىرلاعان اپپاق قايىڭنىڭ ساپ-سارى جاپىراعى. ساعىنىش-تۇتاس تابيعاتقا ۇزاققا سوزىلعان بوداۋسىز سەزىم سيلايتىن سولعىن بوياۋلى تاۋ قويناۋىنىڭ قوڭىراۋلى كۇزى. سابىرسىز ساعىنىشىمدى تۇتاتقان جاپىراق بەتىندەگى كوزگە بىردە قانىق، بىردە سولعىن سىرلى سىزىقتار انامنىڭ اجىمدەرى مە، الدە جۇرەگىمنەن جىلۋى سارقىلىپ بولماعان جاستىعىمنىڭ سۋرىتپاق سىرلارى ما؟ كوز قاداعان سايىن جۇرەگىم سىزدايدى. كۇزدىڭ دىمقىل لەبى جۇزىمدە سىرعاناعان تامشىلاردى تامار باعىتىنان تاندىرىپ قۋالاپ بارادى. كوكىرەگىمدى قارس ايىرىپ، اۋىر وكسىك قىسادى. جۇرەگىم سىزداپ تۇتاس دەنەم مۇزداپ بارا جاتقانداي، جاپىراقتار مەن بىرگە دوداعا ءتۇسىپ قالىقتاعىم كەلەدى. اڭعاردى قۋالاپ قۇلاعان جەز قانات جەل، ۇشىر مەنى بيىكتەرگە. كەڭىستىككە كوتەرىپ مىڭ اۋدارىپ ۇرىلشى بارىپ بەيمالىم جاننىڭ ءديدارىنا. اساۋ تاسقىننىڭ سوتقار سەڭى سوققىلاعان سالىندىداي جۇدەۋ ءجۇزىم جۇيكەسىن ءجىبىتىپ جانىما جىلىلىق قۇيلار ما ەكەن. تامشى-تامشى جاستارىم جىمىڭ-جىمىڭ جۇلدىزدارعا اينالىپ كوك تورعىن اسپاننىڭ ايباتىن اسىرىپ، سارىلعان ۇزاق تۇندەردىڭ تىمسكى مۇڭىن تىپ-تيپىل ەتىپ تىندىرار ما ەكەن. مۇنار ىشىندە مۇگەدەكتەي مەڭىرەۋ مۇڭمەن مەسەلدەڭدى قايتارىپ مەڭدەتكەن ساعىنىش! قۇم دالانىڭ قىتىمىر كۇنىندەي كەنەزەنى كەپتىرىپ، شولدەتكەن ساعىنىش! ءتاتتى ەلەستەرگە قۇلاش ۇرعىزىپ اق كەپتەر ارماننىڭ قاناتىن تالدىرىپ، تالىقتىرعان ساعىنىش! ساتقا ۇرعانداي سۇلدەرىڭدى قالدىرىپ، زارىقتىرعان ساعىنىش! ساۋمال سەزىمدەرىمدى سىلىق سىرعا ايلاندىرىپ، سىبىر-سىبىر ءۇن قاتقان ساعىنىش!
جۇبانىش ومىردەگى مولشەرى بەلگىسىز سان - ساناقسىز ۋاقيعالاردىڭ جانە ءبىرى بولىپ ءوتتى. قارسى الۋسىز كيلىگە كەتەتىن كوپ ىستەر ۋاقتتىڭ وتۋمەن سىركەدەي سۋ كوتەرمەس كوڭىلىڭدى شىلعيلانىپ يلەنە بەرەر كوننەن دە كونىمدى ەتەدى ەكەن. كۇلەمىن عوي دەگەن جەردە كۇلە المايمىن، جىلايىنشى دەگەن جەردە جەر تارتقان دەنەم جەڭىلدەپ ەسسىز ەلىتىپ دالاقتاپ تۇرعانىمدى كەشىگىپ سەزەمىن دە، ەرىكسىز ەس جىيامىن. ۇستاپ تۇرعان مۋۇزداي دۇنيەڭنىڭ سۋىعى ميىڭا ينەدەي ءشانشىلىپ تۇتاس نەرۆتەرىڭ جيىركەنىپ تاستاپ جىبەرۋگە ءداس قالىپ تۇرعانىڭدا، قالايدان - قالاي جۇرەگىڭدى ەلجىرەتەر جىلۋ جۇگىرەدى دەنەڭە. قىزىق جادىراي قالاسىڭ دا، ولمەس ءۇمىتتىڭ قۇيرىعىنا اسىلىپ، بۇلاڭ دۇنيەنىڭ بىردە سولعىن، بىردە قانىق الۋان رەڭىنە ەلىتەسىڭ - اي كەپ. بۇلت بولىپ قالىقتاعىڭ كەلەدى، جەل بولىپ شارىقتاعىڭ كەلەدى. بەتەگەدەن بيىكتەپ جۋساننان الاسارىپ كورىنبەي جاتىپ، كورگىڭ كەلەدى مىنا دۇنيەنى. جيىركەنىپ قۇتىلا الماي، ءيا، قۇنىعىپ قۇشاعىڭدى تولتىرا الماي وكىنەسىڭ دە، وشىگەسىڭ . اھ ۇرىپ قورلاناسىڭ، كۇشىڭ جەتىپ ءال- قۋاتىڭ اسىپ تۇرىپ، السىزدىكتىڭ مازاعىندا ماسقارالاناسىڭ. ايعايلايىن، ايتايىنشى ايتارىمدى دەگەندە، باتىل اشۋىڭدى كولگىرلىگىڭ بۇركەمەلەپ، ۇياتىڭ ۇستاي الماققا ۇمتىلادى. سونىمەن، ۇيالماعاندى كورىپ ۇيالاسىڭ، نەدەن ۇيالامىن دەپ بەل بايلاعاندا بالعىن ويى بال- بۇل جانىپ ۇكىلى ۇمىتپەن، اق لاعىل ارمانمەن ۇمتىلعان باسقا ءبىر بالا جۇرەك مەنى كورىپ ۇيالىپ قالماسىنشى، دەسى قايتىپ سۋىنىپ قالماسىنشى دەگەن ويعا كەلىپ سەلت ەتىپ ەس جىياسىڭ دا ، «جانىم ارىمنىڭ ساداعاسى »،- دەپ ءوزىڭدى-ءوزىڭ جۇباتاسىڭ دا، ءومىردىڭ بۇلتاق بۋىندارمەن يرەك باسىپ كەتە باراسىڭ … جۇبانىشى جوق نۇكتەدەن جۇبانىش تاپقان كوڭىل- اي، جۇبانىش ول بارىڭا شۇكىرلىك قوي، قىسقا عۇمىردىڭ قۇشاعىن جۇبانىشتارمەن تولتىرىپ، تولىسىپ باراسىڭ!
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
