قازاق ماگيستر – دوكتورلار بىرلەستىگىنىڭ 3- كەزەكتى قيمىلى وتكىزىلدى

حالىق تورابى، 25 – مامىر، بەيجيڭ. قازاق ماگيستر – دوكتورلار بىرلەستىگىنىڭ «ارمان مەن تالعام» اتىنداعى 3 – كەزەكتى ءوزارا پىكىر الماستىرۋ قيمىلى 24 – مامىردا بەيجيڭدەگى ۇلتتار باسپاسىنىڭ زالىندا وتكىزىلدى. قيمىلعا بەيجيڭدە جانە باسقا ولكە – قالالاردا قىزمەت ىستەيتىن نەمەسە ۇيرەنىپ جۇرگەن 100دەن استام جوعارى ءبىلىمدى قازاق جاستارى قاتىناستى.

　　مەملەكەتتىك ساياسي ءماسليحات كەڭەسىنىڭ مۇشەسى اكبار ءماجيت ۇلى، قازاقستاننىڭ شاڭحاي ىنتىماقتاستىق ۇيىمىنداعى تۇراقتى وكىلى باعدات سەيىتباتتالوۆ، بەيجيڭ قالالىق ۇلتتار بىرلەستىگىنىڭ باس حاتشىسى جاڭ شۋەبين قاتارلى سيلى قوناقتار قيمىلعا قاتىناستى ءارى ءسوز سويلەپ، قيمىلدىڭ ءمانى مەن ماڭىزىنا توقتالدى. ىلە – شالا اتالعان ۇيىمنىڭ جاۋاپتىسى گۇلميرا قامي قىزى ءسوز سويلەپ، ۇيىمدى قۇرۋداعى ماقساتتارى مەن قازىرگە دەيىنگى ۇيىمداستىرىلعان قيمىلداردى تانىستىرىپ ءوتتى. وسىدان سوڭ، بەيجيڭدەگى جوعارى مەكتەپتەردە وقىپ جاتقان اسپيرانتتار ەركەبۇلان ءمۇتان ۇلى جازعان «ارمان جولىنداعى تالعام» اتتى دراممانى ورىندادى.

　　قيمىلدىڭ كەلەسى باسقىشىندا ءوز سالاسىندا ەلەۋلى ەڭبەك ەتىپ، تابىستى جۇمىستار تىندىرىپ جۇرگەن قازاقتىڭ جوعارى ءبىلىمدى ازاماتتارى ءسوز كەزەگىن الىپ، وزدەرىنىڭ تابىستى تاجىريبەلەرىن، عىلمي جەتىستىكتەرىن، ءدۇپ كەلگەن قيىندىقتارى مەن ونى جەڭگەن قايتپاس جىگەرلەرىن اڭگىمەلەپ، قيمىلعا قاتىناسىپ وتىرعان جاستارعا شابىت بەرىپ، ولاردىڭ قيالىن ءار قيىرعا جەتەلەدى. اسىرەسە جاپونيادان وقىپ كەلگەن بولات، ورلەۋحان قاتارلى ءبىلىمدى ازاماتتاردىڭ جاپونيادا كورگەن بىلگەندەرى، زەرتتەۋ سالالارىنداعى جەتىستىكتەرى تىڭداعانداردى ءتانتى ەتتى.
تولىعىمەن