مەملەكەتتىك 12 - كەزەكتى حالىق قۇرىلتايىنىڭ 4 - ءماجىلىسى بەيجيڭدە اشىلدى

2016.03.07 13:45   كەلۋ قاينارى : ءتاڭىرتاۋ تورابى

　　شي جينپيڭ، يۇي جىڭشىڭ، ليۋ يۇنشان، ۋاڭ چيشان، جاڭ گاۋلي ءتوراعالار مىنبەسىنەن ورىن الدى

　　لي كىچياڭ مەملەكەتتىك كەڭەس اتىنان ۇكىمەت قىزمەتىنەن بايانداما جاسادى، ءماجىلىستى جاڭ دىجياڭ باسقاردى

　　مەملەكەتتىك 12 - كەزەكتى حالىق قۇرىلتايىنىڭ 4 - ءماجىلىسى 5 - ناۋرىز كۇنى تۇستەن بۇرىن حالىق سارايىندا اشىلدى. مەملەكەتتىك كەڭەستىڭ زۇڭليى لي كىچياڭ ماجىلىسكە ۇكىمەت قىزمەتىنەن بايانداما جاساعاندا بىلاي دەپ اتاپ كورسەتتى: كۇرەس جۇرگىزگەندە عانا بولاشاققا جول تارتۋعا بولادى. ءبىز شي جينپيڭ جولداس باس شۋجي بولعان پارتيا ورتالىق كوميتەتىنىڭ توڭىرەگىنە تىعىز ىنتىماقتاسىپ، زەيىن - زەردەنى، كۇش - قۋاتتى شوعىرلاندىرىپ، ءورىس اشا العا ۇمتىلىپ، بيىلعى ەكونوميكالىق، قوعامدىق دامۋدىڭ نىسانالى مىندەتتەرىن قۇلشىنا ورىنداپ، جاپپاي دوڭگەلەك داۋلەتتى قوعام قۇرۋدىڭ شەشۋشى جەڭىسىنە قول جەتكىزەتىن كەزەڭدە جاقسى باستاما اشىپ، قۇدىرەتتى، دەموكراتيالى، وركەنيەتتى، جاراسىمدى سوتسياليستىك وسىزاماندانعان ەل قۇرۋعا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ىسكە اسىرۋعا تىڭ ۇلەستەر قوسۋىمىز كەرەك.

　　ءبىر ميلليارد 300 ميلليون حالىقتىڭ كەلەلى تاپسىرماسىن ارقالاعان مەملەكەتتىك حالىق قۇرىلتايىنىڭ 3000عا تارتا ۋاكىلى ماجىلىسكە قاتىناسىپ، نەگىزگى زاڭ مەن زاڭداردا بەرىلگەن قاسيەتتى قىزمەت جاۋاپكەرلىكتەرىن شىنايى وتەدى. حالىق سارايىنىڭ 10 مىڭ ادامدىق ۇلكەن زالىنداعى شىراقتار سامالاداي جارقىراپ، ءتوراعالار مىنبەسىنىڭ تورىنە مەملەكەت گەربى ءىلىندى، ءماجىلىس الاڭى جالىندى بەينەگە ەندى.

　　ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى جاڭ دىجياڭ ءماجىلىستى باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى لي جيانگو، ۋاڭ شىڭجۇن، چىن چاڭجى، يان جۇنچي، ۋاڭ چىن، شىن يۋەيۋە، جي بيڭشۋان، جاڭ پيڭ، شياڭبا پيڭسو، ەركىن يمىرباقى، ۋان ىشياڭ، جاڭ باۋۋىن، چىن جۋ ءتوراعالار مىنبەسىندەگى اتقارۋشى ءتوراعالار ورنىنا وتىردى.

　　شي جينپيڭ، لي كىچياڭ، يۇي جىڭشىڭ، ليۋ يۇنشان، ۋاڭ چيشان، جاڭ گاۋلي جانە ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى.

　　مەملەكەتتىك 12 - كەزەكتى حالىق قۇرىلتايىنىڭ 4 - ماجىلىسىنە قاتىناسۋعا ءتيىستى ۋاكىل 2943. بۇگىنگى ماجىلىسكە 2890 ۋاكىل قاتىناستى، 53 ۋاكىل قاتىناسا المادى، قاتىناسقاندار سانى زاڭدا بەلگىلەنگەن ۋاكىل سانىنا ۇيلەسەدى.

　　تۇستەن بۇرىن ساعات 9دا جاڭ دىجياڭ جۇڭحۋا حالىق رەسپۋبليكاسى مەملەكەتتىك 12 - كەزەكتى حالىق قۇرىلتايى 4 - ءماجىلىسىنىڭ اشىلعانىن جاريالادى. زالداعىلار تۇگەل ورىندارىنان تۇرىپ، گيمندى اسقاقتاتا شىرقادى.

　　ءماجىلىستىڭ كەڭەستىك تارتىبىنە ساي، مەملەكەتتىك كەڭەستىڭ زۇڭليى لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى. ۇكىمەت قىزمەتىنەن بايانداما مىناداي 3 بولەككە ءبولىندى: ءبىرىنشى، 2015 - جىلعى قىزمەتتەرگە شولۋ؛ ەكىنشى، «13 - بەسجىلدىق» جوبا كەزىندەگى باستى نىسانا مىندەتتەر مەن كەلەلى شارالار؛ ءۇشىنشى، 2016 - جىلعى ءتۇيىندى قىزمەتتەر.

　　لي كىچياڭ بىلاي دەدى: وتكەن ءبىر جىلدا ەلىمىزدىڭ دامۋى كوپتەگەن قيىنشىلىق پەن قاتاڭ سىن - سايىسقا ءدوپ كەلدى. شي جينپيڭ جولداس باس شۋجي بولعان پارتيا ورتالىق كوميتەتىنىڭ پارمەندى باسشىلىعىندا، ەلىمىزدەگى ءار ۇلت حالقى بەرىك سەنىممەن جانە ايرىقشا قايسارلىقپەن قيىنشىلىقتاردان قامال الىپ، ءورىس اشا العا ىلگەرىلەپ، ەكونوميكالىق، قوعامدىق دامۋ ورنىقتىلىق بارىسىندا ىلگەرىلەپ، ورنىقتىلىق بارىسىندا جاقسارۋعا بەت الىپ، تۇتاس جىلداعى باستى نىسانالى مىندەتتەرىن ورىنداپ، رەفورما جاساۋ، ەسىك اشۋدا جانە سوتسياليستىك وسىزامانداندىرۋ قۇرىلىسىندا تىڭ دا كەلەلى تابىستارعا قول جەتكىزدى. لي كىچياڭ ورنىقتى ارتتىرۋدى، قۇرىلىمدى رەتتەۋدى، حاۋىپ - قاتەردەن ساقتانۋدى بارىنشا كۇشەيتىپ، ماكرولىق رەتتەۋ - مەڭگەرۋ فورماسىن جاڭالاۋ؛ بازاردىڭ ومىرشەڭدىك كۇشىن قوزداتۋدى ارقاۋ ەتىپ، رەفورما جاساۋ، ەسىك اشۋ تەبىنىن ارتتىرۋ؛ ساپانى جوعارىلاتىپ، ونىمدىلىكتى ارتتىرۋعا نازار اۋدارىپ، كاسىپ سالاسىندا جاڭالىق اشۋدى، دەڭگەيىن ءوسىرۋدى العا ىلگەرىلەتۋ؛ دامۋ اياسىن كۇش سالا اشۋدى كوزدە ۇستاپ، وڭىرلەردىڭ سايكەستى دامۋى مەن جاڭاشا قالا - قالاشىقتاندىرۋدى جەبەۋ؛ حالىق تۇرمىسىن جاقسارتۋدان، حالىقتىڭ باقىت بايلىعىن جەبەۋدەن جازباي، قوعامدىق ىستەردەگى رەفورمانى، دامۋدى العا ىلگەرىلەتۋ؛ قوعامنىڭ جاراسىمدىلىعىن، ورنىقتىلىعىن جەبەپ، زاڭ بويىنشا اكىمشىلىك جۇرگىزۋ مەن جونگە سالۋ فورماسىن جاڭارتۋدى جەبەۋ سياقتى جاقتاردا وتكەن ءبىر جىلداعى قىزمەتتەردى ەسكە ءتۇسىردى.

　　لي كىچياڭ بىلاي دەدى: بىلتىرعى قول جەتكەن ناتيجەلەردى تولىق تۇراقتاندىرۋمەن بىرگە، ەلىمىزدىڭ دامۋىندا ءالى دە كوپتەگەن قيىنشىلىقتار مەن ماسەلەلەردىڭ ءومىر ءسۇرىپ وتىرعاندىعىن سەرگەكتىكپەن كورە ءبىلۋىمىز ءتيىس. تاۋقىمەت تانىمى مەن جاۋاپكەرشىلىكتى ارقالاۋ تانىمىن ونان ارى كۇشەيتىپ، وسى ماسەلەلەردى ءبىر جايلى ەتۋگە زور كۇش سالىپ، حالىقتىڭ كوكەيىندەگى قالاۋىن اكىمشىلىك جۇرگىزۋدىڭ بەتالىسى ەتۋدەن جازباي، ۇكىمەت قىزمەتىن بار ىنتا پەيىلمەن تىڭعىلىقتى جاقسى ىستەپ، حالىقتىڭ كۇتكەن ءۇمىتىن اقتاۋىمىز كەرەك.

　　«12 - بەسجىلدىق» جوبا كەزىندەگى دامۋ تابىستارىن ەسكە تۇسىرگەندە لي كىچياڭ بىلاي دەدى: «ج ك پ ورتالىق كوميتەتىنىڭ حالىق شارۋاشىلىعى مەن قوعامدىق دامۋدىڭ <13 - بەسجىلدىق> جوباسىن جاساۋ جونىندەگى ۇسىنىسىنا» ساي، مەملەكەتتىك كەڭەس «حالىق شارۋاشىلىعى مەن قوعامدىق دامۋدىڭ <13 - بەسجىلدىق> جوبا پروگرامماسىن (جوبا نۇسقا)» جاساپ، ءماجىلىستىڭ قاراۋىنا تاپسىردى. «پروگراممانىڭ جوبا نۇسقاسى» جاپپاي دوڭگەلەك داۋلەتتى قوعام قۇرۋدىڭ كۇرەس نىساناسىن مىقتاپ ارقاۋ ەتىپ، دامۋداعى بىركەلكىسىزدىك، سايكەسىمسىزدىك، باياندى بولماۋ سياقتى كورنەكتى ماسەلەلەرگە مەڭزەس جاڭالىق اشا دامۋ، سايكەستى دامۋ، جاسىل دامۋ، اشىق دامۋ، بىرگە يگىلىككە كەنەلەتىن دامۋ سىندى دامۋ يدەياسىن بەرىك ورناتۋدى جانە دايەكتى تياناقتاندىرۋدى باسا دارىپتەپ، بۇدان بىلايعى 5 جىلداعى ەكونوميكالىق، قوعامدىق دامۋدىڭ باستى نىسانا مىندەتتەرىن ايقىنداپ، دامۋعا تىرەك بولاتىن ءبىرسىپىرا كەلەلى ساياساتتاردى، كەلەلى ينجەنەريالار مەن كەلەلى نىسانداردى العا قويىپ، تومەندەگىدەي 6 جاقتى كورنەكتىلەندىردى: ءبىرىنشى، ەكونوميكانىڭ ورتا جوعارى قارقىنمەن ارتۋىن ساقتاپ، كاسىپ سالاسىنىڭ ورتا جوعارى دەڭگەيگە قادام تاستاۋىن العا ىلگەرىلەتۋ؛ ەكىنشى، جاڭالىق اشۋدىڭ جەتەكشىلىك رولىن كۇشەيتىپ، دامۋعا قۇدىرەتتى قوزعاۋشى كۇش قوسۋ؛ ءۇشىنشى، جاڭاشا قالا - قالاشىقتاندىرۋ مەن اۋىل شارۋاشىلىعىن وسىزامانداندىرۋدى العا ىلگەرىلەتىپ، قالا مەن اۋىلدىڭ، وڭىرلەردىڭ سايكەستى دامۋىن جەبەۋ؛ ءتورتىنشى، جاسىل ءوندىرىس، تۇرمىس فورماسىن قالىپتاستىرۋدى جەبەپ، ەكولوگيالىق قورشاعان ورتانى جەدەل جاقسارتۋ؛ بەسىنشى، رەفورما جاساۋ، ەسىك اشۋدى تەرەڭدەتىپ، دامۋدىڭ جاڭا ءتۇزىلىسىن ورناتۋ؛ التىنشى، حالىق تۇرمىسىن ۇزبەي جاقسارتۋ، باقىت - بايلىعىن ۇزبەي جەبەۋ، جالپى حالىقتىڭ دامۋ تابىستارىنان بىردەي يگىلىكتەنۋىنە مۇمكىندىك جاساۋ.

　　لي كىچياڭ مىنانى اتاپ كورسەتتى: «31 - بەسجىلدىق» جوبا كەزىندەگى ەكونوميكالىق، قوعامدىق دامۋ قىزمەتتەرىن جاقسى ىستەۋدە، جاپپاي دوڭگەلەك داۋلەتتى قوعام قۇرۋ نىساناسىن جۇزەگە اسىرۋدا 3 ءتۇيىندى كۇش سالا مىقتاپ يگەرۋ كەرەك. ءبىرىنشى، دامۋدىڭ ماڭداي الدى مىندەت ەكەنىن مىقتاپ يگەرۋ. ەكىنشى، قۇرىلىمدىق رەفورمانى زور كۇشپەن ىلگەرىلەتۋ. ءۇشىنشى، دامۋدىڭ كونە قوزعاۋشى ەنەرگيالارىنىڭ جاڭا قوزعاۋشى ەنەرگيالارىمەن جالعاسۋىن جانە كونە قوزعاۋشى ەنەرگيالارىنىڭ جاڭا قوزعاۋشى ەنەرگيالارعا اينالۋىن جەدەلدەتۋ كەرەك.

　　لي كىچياڭ بىلاي دەدى: 2016 - جىلعى دامۋدىڭ باستى نىساناسى − ەل ءىشى ءوندىرىسىنىڭ جالپى ءونىم قۇنىن %6.5 تە %7 مولشەرىندە ارتتىرۋ، تۇرعىنداردىڭ تۇتىنۋ باعاسىنىڭ ءوسۋ مولشەرىن %3 مولشەرىندە ۇستاۋ، قالا - قالاشىقتاردا 10 ميلليوننان استام ادامدى تىڭنان كاسىپتەندىرۋ، قالا - قالاشىقتارداعى تىزىمگە الدىرعان جۇمىسسىزدىق مولشەرىن %1.5 كولەمىندە مەڭگەرۋ، يمپورت - ەكسپورتتى ورنىقتىرۋ، جاقسارتۋ، حالىقارالىق كىرىس - شىعىستى نەگىزىنەن تەڭگەرۋ، تۇرعىندار كىرىسىنىڭ ارتۋىن ەكونوميكالىق دامۋمەن بىردەي جەبەۋ. بىرلىك ىشكى ءوندىرىس جالپى ءونىم قۇنىنا سارىپ بولاتىن ەنەرگيا مولشەرىنىڭ كۇشەمەلىلىگىن %3.4تەن استام تومەندەتىپ، باستى لاستاۋشى زاتتاردى ىعىستىرىپ شىعارۋدى ۇزدىكسىز ازايتۋ.

　　لي كىچياڭ 2016 - جىلى ءتۇيىندى تۇردە جاقسى ىستەلۋگە ءتيىستى مىناداي 8 ءتۇرلى قىزمەتتى العا قويدى: ءبىرىنشى، ماكرولىق ەكونوميكالىق ساياساتتى ورنىقتىرۋ جانە كەمەلدەندىرۋ، ەكونوميكالىق اينالىمنىڭ لايىقتى كولەمدە بولۋىنا كەپىلدىك ەتۋ؛ ەكىنشى، قامداۋ جاعىنداعى قۇرىلىمدىق رەفورمانى كۇشەيتىپ، ءۇرتىس ارتتىرۋ قوزعاۋشى كۇشىن نىعايتۋ؛ ءۇشىنشى، ىشكى سۇرانىستىڭ كومەسكى كۇشىن كۇشەيتىپ، دامۋ كەڭىستىگىن اناعۇرلىم كەڭەيتۋ؛ ءتورتىنشى، وسى زامانعى اۋىل شارۋاشىلىعىن دامىتۋدى جەدەلدەتىپ، شارۋالاردىڭ كىرىسىن ءۇرتىس ارتتىرۋدى جەبەۋ؛ بەسىنشى، جوعارى دەڭگەيدەگى جاڭا كەزەكتى سىرتقا ەسىك اشۋدى ىلگەرىلەتىپ، سەلبەستىك جاساسىپ، تەڭ يگىلىككە كەنەلۋدى ىسكە اسىرۋعا كۇش سالۋ؛ التىنشى، قورشاعان ورتانى جونگە سالۋ سەرپىنىن كۇشەيتىپ، جاسىل دامۋدىڭ تىڭ تابىستارعا قول جەتكىزۋىن ىلگەرىلەتۋ؛ جەتىنشى، حالىق تۇرمىسىن جاقسارتۋدى شىنايى قامتاماسىز ەتىپ، قوعامدىق قۇرىلىستى كۇشەيتۋ؛ سەگىزىنشى، ۇكىمەتتىڭ ءوز قۇرىلىسىن كۇشەيتىپ، بيلىك جۇرگىزۋ قابىلەتى مەن قىزمەت وتەۋ ورەسىن ءوسىرۋ.

　　لي كىچياڭ سونىمەن بىرگە، ۇلت، ءدىن جانە مۇھاجىرلار قىزمەتى، مەملەكەت قورعانىسى مەن ارميا قۇرىلىسى، شياڭگاڭ، اۋمىننىڭ دامۋى مەن تايۋان بۇعازى ەكى جاعالاۋىنىڭ قاتىناسى، سونداي - اق ەلىمىزدىڭ سىرتقى ساياساتى جونىندە ەگجەي - تەگجەيلى بايانداۋ جاسادى.

　　ءماجىلىستىڭ كەڭەستىك ءتارتىبى بويىنشا، ءماجىلىس حالىق شارۋاشىلىعى مەن قوعامدىق دامۋدىڭ «13 - بەسجىلدىق» جوباسىنىڭ پروگراممالىق نۇسقاسىن قاراپ تەكسەردى، 2015 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە 2016 - جىلعى حالىق شارۋاشىلىعى مەن قوعامدىق دامۋ جوسپار جوباسى جونىندەگى بايانداماسىن جانە 2016 - جىلعى جوسپار جوباسىن، 2015 - جىلعى ورتالىق پەن جەرگىلىكتى ورىنداردىڭ مەجە ەسەبىنىڭ اتقارىلۋ احۋالى جانە 2016 - جىلعى ورتالىق پەن جەرگىلىكتى ورىنداردىڭ مەجە ەسەپ جوباسى جونىندەگى بايانداماسىن جانە 2016 - جىلعى مەملەكەتتىك مەجە ەسەپ جوباسىن قارادى.

　　ما كاي، ۋاڭ حۋنيڭ، ليۋ ياندۇڭ، ليۋ چيباۋ، شۇي چيلياڭ، سۇن چۇنلان، سۇن جىڭساي، لي يۋانچاۋ، ۋاڭ ياڭ، جاڭ چۇنشيان، فان چاڭلۇڭ، مىڭ جيانجۋ، جاۋ لىجي، حۋ چۇنحۋا، لي جانشۋ، گو جينلۇڭ، حان جىڭ، دۋ چيڭلين، جاۋ حۇڭجۋ، ياڭ جيڭ، چاڭ ۋانچۋان، ياڭ جيەچى، گو شىڭكۇن، ۋاڭ يۇڭ، جوۋ چياڭ، ساۋ جيانميڭ، حان چيدى، پابالا گىليەلاڭجيە، دۇڭ جيانحۋا، ۋان گاڭ، لين ۋىن - ي، لو فۋحى، حى حوۋحۋا، جاڭ چيڭلي، لي حايفىڭ، چىن يۋان، لۋ جانگۇڭ، جوۋ شياۋچۋان، ۋاڭ جيارۇي، ۋاڭ جىڭۋي، ما بياۋ، چي شۇيچۇن، چىن شياۋگۋاڭ، ما پەيحۋا، ليۋ شياۋفىڭ، ۋاڭ چينمەي، سونداي - اق ورتالىق اسكەري ىستەر كوميتەتىنىڭ مۇشەلەرى فاڭ فىڭحۇي، جاڭ ياڭ، جاۋ كىشى، جاڭ يوۋشيا، ۋ شىڭلي، ما شياۋتيان، ۋي فىڭحىلار دا ءتوراعالار مىنبەسىنەن ورىن الدى.

　　شياڭگاڭ ەرەكشە اكىمشىلىك رايونىنىڭ اكىمى لياڭ جىنيىڭ، اۋمىن ەرەكشە اكىمشىلىك رايونىنىڭ اكىمى سۇي شى - ان ماجىلىسكە سىرتتاي قاتىناستى ءارى ءتوراعالار مىنبەسىنەن ورىن الدى.

　　ساياسي كەڭەس مەملەكەتتىك 12 - كەزەكتى كوميتەتىنىڭ 4 - ماجىلىسىنە قاتىناسىپ جاتقان ساياسي كەڭەس مۇشەلەرى ماجىلىسكە سىرتتاي قاتىناستى.

　　ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميا، سونداي - اق قارۋلى ساقشى بولىمدەرىنىڭ، حالىقتىق ۇيىمداردىڭ قاتىستى جاۋاپتىلارى دا ماجىلىسكە سىرتتاي قاتىناستى نەمەسە سىرتتاي تىڭدادى.

　　شەتەلدەردىڭ جۇڭگوداعى ەلشىلەرى دە ءماجىلىستى سىرتتاي تىڭدادى. «شينجياڭ گازەتى»