بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

جولبارىستىڭ ادامعا شابۋىلداۋى جانە ادام ءولىمىن كەلتىرىپ شىعارۋى ماسەلەسى نەلىكتەن 3 كۇندە 2 رەت تۋىلدى؟

2021.05.26 14:14  



  حىنان شيچۋاندا ەكى جولبارىس ادامعا شابۋىلداعاندىقتان اتىپ ءولتىرىلدى

5 – ايدىڭ 25 – كۇنى، حىنان ولكەسى نانياڭ قالاسى شيچۋان اۋدانى شاڭجي قالاشىعى دانجياڭ تاۋىس سايىندا جولبارىستىڭ ادامعا شابۋىلداۋى وقيعاسى تۋىلدى، قورشاۋىنان قاشىپ شىققان ەكى جولبارىس سول جەردە اتىپ ءولتىرىلدى. 5 – ايدىڭ 25 – كۇنى دانجياڭ تاۋىس سايىنىڭ باقتاشىسى جولبارىستى ازىقتاندىرىپ جاتقاندا، جولبارىس ونى تىستەپ جارالاعان، ەكى جولبارىس قورشاۋىنان شىعىپ، قاشقان. جارالانعان باقتاشى جيا XX دەرەۋ ەمحاناعا جەتكىزىلگەنىمەن، قۇتقارۋ ءونىم بەرمەي، قازا بولعان.

  شيچۋان اۋداندىق ورمان شارۋاشىلىعى مەكەمەسىنىڭ قاتىستى جاۋاپتىسىنىڭ تانىستىرۋىنشا، قورشاۋدان شىعىپ كەتكەن ەكى جولبارىس دانجياڭ تاۋىس سايىنىڭ ىشىندە مەڭگەرىلگەن، تالاي رەت شىرعالاپ ۇستاماق بولعاندا، ۇستاي الماعان، جۇرتشىلىقتىڭ ءومىرىنىڭ حاۋىپسىزدىگىنە كەپىلدىك ەتۋ ءۇشىن، ساعات 14 تەن 20 مينۋت وتكەندە جانە 15 تەن 12 مينۋت وتكەندە ەكى جولبارىستى اتىپ ولتىرگەن.

  جەرگىلىكتى ورىنداعى قاتىستى تاراۋلاردىڭ العاشقى قادامداعى تەكسەرۋىنە قاراعاندا، ەكى جولبارىس انحۇي ولكەسى سۋجوۋ قالاسىنداعى بەلگىلى سەرىك ويىنى ۇيىرمەسىنىڭ قاراماعىندا بولىپ، دانجياڭ تاۋىس سايى ويىن قويۋعا مايعا العان، تيجارات كۋالىگى جانە باعۋ – باپتاۋ رۇقسات كۋالىگى قاتارلى رەسمياتتارى تولىق. قازىر ءىستىڭ سوڭىن جايعاستىرۋ جانە وقيعانى تەكسەرۋ قىزمەتى قاتىستى زاڭ – تۇزىمدەرگە جانە تارتىپتەرگە ساي ورىستەتىلۋدە.

  وسىنىڭ الدىنداعى حابار: انحۇي بىڭبۋدا حايۋانات باقتاشىسىنا جولبارىس شابۋىلداپ، باقتاشى قازا بولدى

  انحۇي تورابىنىڭ 5 – ايدىڭ 23 – كۇنى حابارلاۋىنشا، 5 – ايدىڭ 23 – كۇنى تۇستەن بۇرىن ساعات 8 دە، بىڭبۋ قالاسى يۇيحۇي رايونى جاڭگۇڭشان حايۋاناتتار باقشاسىندا قايعىلى وقيعا تۋىلدى. باقتاشى ياڭ ۇستاز كۇندەلىكتى قىزمەت بارىسىندا، ءوزى ازىقتاندىراتىن جولبارىستىڭ شابۋىلداۋىنا ۇشىراپ، ەمحاناعا شۇعىل جەتكىزىلگەن بولسا دا، باقىتقا قارسى قازا بولعان.

  شۇعىل قۇتقارۋعا قاتىناسقان بىڭبۋ قالالىق 1 – ەمحاناسى شۇعىل ەمدەۋ ءبولىمىنىڭ ايتۋىنشا، جارالانعان ادامنىڭ موينىندا، باسىندا، ارقاسىندا تۇگەل جولبارىستىڭ تىستەگەن، تىرناعان ىزدەرى قالعان، تەكسەرۋ ارقىلى دەمى ۇزىلگەنى تۇراقتاندىرىلعان.

  وتباسىنداعىلاردىڭ تانىستىرۋىنشا، ياڭ ۇستاز بيىل 55 جاستا، جاڭگۇڭشان حايۋاناتتار باقشاسىندا جولبارىس باقتاشىسى بولعانىنا جيىرما جىلداي بولعان. ورتالىق تەلەۆيزيانىڭ حابارىندا جەرگىلىكتى ورىنداعى باسقارۋ تاراۋلارىنىڭ تانىستىرۋىنشا، باقتاشىنىڭ جولبارىستى اۋاشالاۋ بولمەسىنىڭ ەسىگى مىقتاپ بەكىتىلگەن – بەكىتىلمەگەنىن تۇراقتاندىرماي تۇرىپ، جولبارىستىڭ قورشاۋىنا كىرىپ، قورشاۋدىڭ ءىشىن تازالاماق بولعانى العاشقى قادامدا تۇراقتاندىرىلدى.

  كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

 سۋرەت