كوركەم! يۇنناننىڭ ليجياڭ قالاسىندا وسىرىلگەن اسەم گۇلدەر ەل ىشىندە ءوتىمدى بولدى

2021.08.23 16:17  

　　رەڭدى كەلتەباس. ليۋ ۋىنشياڭ فوتوسى

　　حالىق تورابىنىڭ 8 – ايدىڭ 23 – كۇنى ليجياڭنان بەرگەن حابارى. يۇننان ولكەسى ليجياڭ قالاسى جوعارى ءونىمدى وسىزامانعى گۇل – بايشەشەك كاسىپ سالاسى باقشاسىندا وندىرىلگەن رەڭدى كەلتەباس كۇن سايىن ۇشاقپەن ەلىمىزدىڭ جەر – جەرىنە جەتكىزىلىپ، ءتۇرلى قالالارداعى ادامدار ۇستىرتتەگى رەڭدى كەلتەباستىڭ كوركىنەن ءلاززاتتانا الاتىن بولدى.

　　ليجياڭدا كۇن تۇرى جەتكىلىكتى، كليمات جىلى، كۇندىز بەن تۇنگى تەمپەراتۋرا پارقى زور، گۇل ءوسىرۋ كاسىپ سالاسىن دامىتۋعا توتەنشە ۇيلەسىمدى. باستابىندا مۇنداي رەڭدى كەلتەباستىڭ ۇرىعىن شەتەلدەن ليجياڭعا ەنگىزۋشى 80 – جىلداردىڭ تۇلەگى، ۋان جيا ەسىمدى باعبان بولاتىن.

　　ۋان جيا گوللانديانىڭ ۋاگەنينگەن داشۋەسىنىڭ باقشا شارۋاشىلىعى بازارى كاسىبىنەن وقۋ تاۋىسقان، ەلگە ورالعان سوڭ، ول الدىمەن گوللانديا جەكە قارجىلاندىرعان كاسىپورىندا التى جىل قىزمەت ىستەگەن، كەيىن جەرگىلىكتى ۇكىمەتتىڭ ساۋداگەر شاقىرۋ، قارجى ەنگىزۋ ساياساتىنىڭ سامالىنا ىلەسە، ءبىر مەكتەپتە وقىعان جاڭ شۋرۇيمەن بىرگە ليجياڭعا كەلىپ، ەكەۋى باقشا شارۋاشىلىعى سەرىكتەستىگىن اشقان ءارى گوللانديادان رەڭدى كەلتەباستىڭ ۇرىعىن ەنگىزىپ، كاسىپ سالاسى باقشاسىندا باپتاعان.

　　2020 – جىلى 8 – ايدا، ءتۇستى كەلتەباس نىسانى قۇرىلعان ءارى ىسكە قوسىلعان، تەك ءبىر جىلدىڭ ىشىندە، ءۇستىرتتى وڭىردەن اكەلىنگەن بۇل ءتۇستى كەلتەباس سيرەكتىگى جانە تاماشا ساپاسىنا سۇيەنىپ، تەز ارادا ەل ىشىندەگى ءبىرىنشى، ەكىنشى دەڭگەيدەگى قالالارداعى قالىڭ تۇتىنۋشىلاردىڭ قالاۋىنان شىققان ءارى قوماقتى بازار مولشەرى مەن سوماسىن جاراتقان.

　　قىزىل، كۇلگىن، سارى، قارا ... باقشا رايونىنداعى زەردەلى تۇتاسپالى اينەك جىلىجايدا 10 نەشە ءتۇرلى رەڭدى كەلتەباس جارىسا شەشەك اتىپ، كورگەن ادامدى وزىنە باۋرايدى. ولاردىڭ وزدەرىنە ءتان كوركەمونەرلىك لەبى ەسەتىن «پيكاسسو»، «حولليۆد»، «ازى» قاتارلى ەسىمدەرى دە بار.

　　توپىراقسىز ءوسىرۋ تەحنيكاسىنا سۇيەنگەندىكتەن، بۇل ءتۇستى كەلتەباستاردىڭ ءونىم مولشەرى جوعارى بولىپ قالماستان، ساپاسى دا وتە ورنىقتى، 365 كۇن الما – كەزەك اشادى، جىلدىق ءونىم مولشەرى 3 ميلليون تالدان اسادى، بارلىعى ساتىلىپ بولعاندا، جىلدىق ءوندىرىس قۇنى ون ميلليون يۋاننان اسادى.

　　گۇل اشۋ مەزگىلىندە، ءۇزىپ العان رەڭدى كەلتەباستاردى قىزمەتكەرلەر العاشقى قوراپتاۋدان وتكىزىپ، سۋ قۇيىلعان گۇلدى كاتەلگە وتىرعىزىپ، سۋىق قامبادا ساقتايدى. بۇل ءبىرقىدىرۋ جۇمىستى گۇيفىڭ قىستاعىنداعى 50 نەشە جۇمىسشى – قىزمەتكەر ورىندايدى، وسى ارقىلى ولاردىڭ كاسىپتەنۋ ماسەلەسى دە شەشىم ەتىلگەن.

　　«الداعى مەزگىلدە، 450 مىڭ شارشى مەترلىك جوعارى ولشەمدى زەردەلى گۇل قيۋ، گۇل ەگۋ زاۆودى اينەك جىلىجايى سالىنىپ بولىپ، ماڭايداعى قىستاقتارداعى تۇرعىندارعا 250 نەشە جۇمىس ورنىن ازىرلەپ، شارۋالاردىڭ كاسىپ سالاسىنداعى جۇمىسكەرگە اينالۋىنا شىنايى وراي جاراتادى»، — دەيدى ليجياڭ قالاسى گۋچىڭ رايونى كاينان ءمالى باسقارماسى گۇيفىڭ الەۋمەتتىك اۋماعى پارتيا باس ياچەيكاسىنىڭ شۋجيى حى ليفىڭ. (زىڭ جىحۇي، ليۋ ۋىنشياڭ)

　　كەلۋ قاينارى: حالىق تورابى