بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>ازاماتتىڭ ايتارى

بىلىكتى وقىتۋشى ءبىلىمدى وقۋشى تاربيەلەيدى

       اقىلباي مۇقامەتالي ۇلى

2017.01.16 14:45    

  ادام جانىنىڭ ينجەنەرى ۇستازدىق كەز كەلگەن كىسىنىڭ قولىنان كەلە بەرەتىن جەڭىل كاسىپ ەمەس، ول اسا قاجىرلىلىقتى، تىنباي ىزدەنۋدى، مول ءبىلىمدى قاجەت ەتەدى. ۇستازدىق سىندى وسى ءبىر ماشاقاتتى كاسىپتىڭ تىزگىنىن مىقتاپ ۇستاپ، ساباق ءوتۋ مەن وقۋشى تاربيەلەۋدەگى ىسكەرلىگى، شەبەرلىگى، مول تاجىريبەسى ارقىلى كوپتەگەن جاس تۇلەكتى جوعارى وقۋ ورىندارىنا اتتاندىرىپ، ولاردىڭ عىلىم كوگىندە سامعاۋىنا جەبەۋشى بولعان ۇزدىك مۇعالىمدەردىڭ ءبىرى، ىلە وبلىستىق 1- ورتا مەكتەپتىڭ تىرەكتى ءتىل – ادەبيەت وقىتۋشىسى گۇلباھار ءابدىلقاميت قىزى.

  ءار جولى ورتا مەكتەپتىڭ 3 – جىلدىعىن تاربيەلەپ جەتەلەۋگە مىندەتتى بولىپ العان كلاسىنداعى وقۋشىلاردىڭ ٪90 – 80 ى جوعارى وقۋ ورىندارىنا قابىلدانىپ، مەكتەپ پەن اتا – انالاردىڭ زور قۇرمەتىنە بولەنگەن گۇلباھار ءابدىلقاميت قىزى التىن ۇيا – انا مەكتەپ قۇشاعىندا وقىپ ءبىلىم الۋدىڭ العاشقى ساپارىن نىلقى اۋدانىندا باستاعان سوڭ، ورتا مەكتەپتى بۇرىنعى ىلە ايماقتىق 1 – ورتا مەكتەپتە جالعاستىردى، 1993 – جىلى ىلە پەداگوگيكا شۋەيۋانىنىڭ ءتىل – ادەبيەت فاكۋلتەتىنە قابىلدانىپ، 1998 – جىلى كەلەسى جىلىندا ىلە وبلىستىق 1 – ورتا مەكتەپكە ءتىل – ادەبيەت وقىتۋشىسى بولىپ ورنالاستى. ول وقىتۋشى بولعان 18 جىلدان بەرى ارداقتى كاسىبىنە اينالدىرعان ءتىل – ادەبيەت ساباعىن تاپجىلماي ءوتىپ، ۇلتىمىز ۇلاندارىن سارقىلماس ءتىل – ادەبيەت بىلىمىمەن سۋسىنداتتى، ۇزاق جىل وقىتۋشىلىق ىستەۋ بارىسىندا اۆتونوميالى رايوندىق وقۋ – اعارتۋ مەڭگەرمەسىنىڭ ساباق جارىسى مەن ساباق دايىندىعىن جازۋ جارىسى، ىلە وبلىستىق وقۋ – اعارتۋ مەكەمەسىنىڭ سيلىقتى ماقالا جارىسى سياقتى كاسىپتىك جارىستارعا تالاي رەت قاتىناسىپ، 9 رەت سيلاندى. ايتالىق، اۆتونوميالى رايوندىق وقۋ – اعارتۋ مەڭگەرمەسى وقىتۋدى زەرتتەۋ كەڭسەسىنىڭ 2012 – جىلى اقپاندا شينجياڭ بويىنشا وتكىزگەن ساباق جوبالاۋ جارىسىندا 3 – دارەجەلى بولىپ سيلاندى، اۆتونوميالى رايوندىق وقۋ – اعارتۋ، عىلىم – تەحنيكا زەرتتەۋ ورنىنىڭ 2012 – جىلى جەلتوقساندا رايونىمىز بويىنشا وتكىزگەن ءىرى كولەمدى ساباق جوبالاۋ جارىسىندا باس جۇلدەنى الدى، اۆتونوميالى رايوندىق وقۋ – اعارتۋ مەڭگەرمەسى وقىتۋدى زەرتتەۋ كەڭسەسىنىڭ 2011 – 2012 – جىلدارى رايونىمىز بويىنشا وتكىزگەن عىلمي ماقالا جازۋ جارىستارىندا ەكى رەت باس جۇلدەنى الدى، اۆتونوميالى رايوندىق وقۋ – اعارتۋ، عىلىم – تەحنيكا زەرتتەۋ ورنىنىڭ 2015 – جىلى رايونىمىز كولەمىندە وتكىزگەن عىلمي ماقالا جازۋ جارىسىندا ءبىرىنشى بولىپ سيلاندى، ىلە وبلىستىق وقۋ – اعارتۋ، عىلىم – تەحنيكا زەرتتەۋ ورنىنىڭ 2012 – جىلى وتكىزگەن عىلمي ماقالالاردى باعالاۋ جارىسىندا «ساباق جوباسىن جازۋدا كوڭىل بولەتىن تۇيىندەر» اتتى عىلمي ماقالاسى باس جۇلدەنى، ىلە وبلىستىق وقۋ – اعارتۋ قوعامى مەن ىلە وبلىستىق وقۋ – اعارتۋ مەكەمەسىنىڭ وقىتۋدى زەرتتەۋ كەڭسەسى 2013 – جىلى وتكىزگەن عىلمي ماقالالاردى باعالاۋ قيمىلىندا «ساباقتان كەيىنگى قايتارما اڭىس» اتتى عىلمي ماقالاسى باس جۇلدەنى الدى. مۇنان تىس، ول مەكتەپتە «ۇزدىك كلاس جەتەكشىسى »، «ۇزدىك قىزمەتكەر»، «ۇلتتار ىنتىماعىنىڭ ۇلگىسى »، «ۇزدىك 8 – ناۋرىز قىزىلتۋشىسى » بولىپ كوپ رەت سيلاندى.

  مىنە وسىنداي اۆتونوميالى رايون مەن ىلە وبلىسى بويىنشا وتكىزىلگەن كولەمدى ءتىل – ادەبيەت ساباعى جارىستارىندا ءوزىنىڭ توسەلگەن كاسىپتىك قابىلەتى مەن وقىتۋشىلىق ورەسىن ايگىلەپ، توپ جارا العا شىققان گۇلباھار ساباق جوبالاۋ، ساباق دايىنداۋ، وقۋشىلاردىڭ ماقالا جازۋىنا جەتەكشىلىك ەتۋ، تاپسىرما ورنالاستىرۋ، تاپسىرما تەكسەرۋ سىندى ساباق ءوتۋدىڭ ءاربىر بۋىن مۇقيات يگەرىپ، وقىتۋ ونىمدىلىگىن جوعارىلاتۋعا بارىنشا كۇش سالدى. ول ءوزىنىڭ ءتىل – ادەبيەت ساباعىن وقىتۋ بارىسىندا قورىتقان قۇندى تاجىريبەلەرى مەن وقىتۋ شەبەرلىگى تۋرالى توقتالعاندا: ءتىل – ادەبيەت وقىتۋشىسىندا مول كاسىپتىك نەگىزدىك ءبىلىم مەن كۇشتى جاۋاپكەرلىك تانىم بولۋمەن بىرگە، ءار ساعاتتىق ساباققا مۇقيات دايىندالۋ كەرەك، وقۋشىلاردى ءتىل – ادەبيەت ساباعىنا قىزىقتىرۋ ءۇشىن، تۇرمىسپەن جاناسىمدى ەكىنشى ساباقحانا قيمىلىن ءجيى ۇيىمداستىرىپ، وقۋشىلاردى ءتىل – ادەبيەت ورەسىن جوعارىلاتۋعا شابىتتاندىرىپ وتىرعان دۇرىس. ءتىل – ادەبيەت وقىتۋشىسىنىڭ ءتىل بايلىعى مول، ەستەتيكالىق تالعامى جوعارى، سىرتتاي ۇيرەنگەن ءبىلىمى كوپ بولعانى ءجون. سوندا عانا وقىتۋشى ءتىل – ادەبيەت ساباعىنىڭ نەگىزدىك بىلىمدەرى مەن امالياتتىق بىلىمدەردىڭ سايكەسىمدىلىگىن ارتتىرا الادى دا، وقۋشى ءتىل – ادەبيەت ساباعىنداعى نەگىزدىك بىلىمدەردى وڭاي تۇسىنەدى. اسىرەسە، جوعارىلاپ وقۋعا ەمتيحان تاپسىراتىن وقۋشىلاردىڭ ءتىل – ادەبيەت ساباعى ناتيجەسىن جوعارىلاتۋدا وقىتۋشى الدىمەن ەمتيحان كولەمىن مىقتى يگەرىپ، جالپىلىق پىسىقتاۋ مەن ءتۇيىندى پىسىقتاۋدى سايكەستىرۋى، ەندى ءبىرى وقۋشىلاردىڭ ماقالا جازۋداعى جاسامپازدىق قابىلەتىن جوعارىلاتۋعا كۇش سالۋى قاجەت،- دەدى.

  قازىر مەكتەپتە ءتىل – ادەبيەت گرۋپپاسىنىڭ جاۋاپتىسى بولىپ مىندەت ارقالاپ وتىرعان گۇلباھار ورتالاۋ، ورتا مەكتەپ كلاستارىنا ءتىل – ادەبيەت ساباعىن وتۋمەن قوسا، ونەگەلى كلاس جەتەكشىسى دە بولا بىلگەن جوعارى دارەجەلى وقىتۋشى. ول جەتەكشىلىك ەتكەن كلاسى ءار جىلى كلاستار ارا باعالاۋدا الدىڭعى ورىندا تۇردى. اسىرەسە، ورتا مەكتەپتىڭ 3 – جىلدىعىنداعى وقۋشىلارعا ەمتيحانعا قالاي دايىندالۋ، ەمتيحاندى قالاي تاپسىرۋ، ەمتيحان بەرۋ الدىندا بايقالاتىن قوبالجۋدان، سالعىرتسۋدان قالاي ارىلۋ جونىندە جۇيەلى تاربيە بەرىپ، تۋرا جول كورسەتكەندىكتەن، ءار جىلعى جوعارى مەكتەپ ەمتيحانىندا ونىڭ كلاسىنداعى وقۋشىلاردىڭ كوبى جوعارى مەكتەپكە قابىلدانىپ كەلەدى. مۇندا 2008 – جىلى ول كلاس جەتەكشى بولعان ورتا مەكتەپ 3 – جىلدىعىنان 40 وقۋشى، 2010 -، 2012- جىلدارى 30 دا 35 وقۋشى، 2015 – جىلى 32 وقۋشى، 2016 – جىلى 39 وقۋشى جوعارى مەكتەپكە وقۋعا ءتۇسىپ، مەكتەپ بويىنشا اعالاپ العا شىقتى. 2016 - جىلى ونىڭ كلاسىندا وقىپ 645 ءنومىر العان نابيجان ءالىمجان ۇلى وبلىس بويىنشا قوس تىلدەگى جاراتىلىستىق ساباق كلاستارىنان ءبىرىنشى بولىپ نانكاي داشۋەسىنە قابىلداندى.

  مەكتەپ قۇشاعىندا 11 جىل ءبىلىم الىپ عىلىم شىڭىنا قانات قاققالى وتىرعان جاستۇلەكتەردى كۇشتى جاۋاپكەرشىلىك تانىممەن، بار ىنتا – پەيىلىمەن تاربيەلەپ، ولاردىڭ جوعارىلاپ وقۋىنا جەبەۋشى بولعان گۇلباھار ءابدىلقاميت قىزى كۇدىرى مول كلاس جەتەكشىلىك قىزمەت تۋرالى سىر شەرتكەندە: «تاس تۇسكەن جەرىنە اۋىر» دەمەكشى، وقۋشىلارعا، اسىرەسە، ورتا مەكتەپتىڭ جوعارعى جىلدىقتارىنداعى بالالارعا كلاس جەتەكشى بولۋ وڭاي – وسپاق ءىس ەمەس، ويتكەنى، ولار ورتا مەكتەپ قۇشاعىنان تۇلەپ ۇشىپ، اشتى تەردىڭ ءتاتتى جەمىسىن كورگەلى وتىر عوي، مۇندايدا كلاس جەتەكشىسىنىڭ تاربيەسىندە ءسال بوساڭسۋ بولىپ، بالالار دۇرىس باعداردان كوز جازسا، ەڭبەگى ەش بولارى حاق. سوندىقتان، ورتا مەكتەپ بىتىرگەلى وتىرعان وقۋشىلاردى تابىس تورىنە قاراي جەتەلەۋدە الدىمەن مەكتەپ، اتا – انا، وقىتۋشى سىندى ءۇش جاقتىڭ سايكەسىمدىلىگىن كۇشەيتۋ، وقىتۋشى نەمەسە كلاس جەتەكشى وقۋشىنىڭ بويىنداعى ەرەكشەلىكتى سەزگىرلىكپەن بايقاپ، سول بويىنشا تاربيەلەۋ، وقۋشىنىڭ ەمتيحان الدىنداعى كوڭىل كۇيىن مەڭگەرۋگە شەبەر بولۋ كەرەك. ادەتتە جوعارى مەكتەپكە ەمتيحان تاپسىراتىن ورتا مەكتەپ وقۋشىلارى ەمتيحانعا قالاي دايارلىق كورەرىن بىلمەي اڭكى – تاڭكى بولادى، ءار ساباقتاعى تۇسىنبەگەن ورىندارىن قايتىپ تولىقتارىن بىلمەي ساسقالاقتايدى، ەمتيحانعا دەيىن ساباقتى قاراپ بولا الماي قالام با دەپ ابىرجيدى، وسىنداي كەزدە كلاس جەتەكشى وقۋشىلاردىڭ كوڭىل كۇي جاقتاعى اۋىتقۋىنا قاراتا پسيحيكالىق جاقتان ۇنەمى كەڭەس بەرىپ، دۇرىس نۇسقاۋ كورسەتىپ وتىرۋى كەرەك. سوندا بالالار ەمتيحانعا قالاي دايىندالۋدىڭ نىساناسىن بەلگىلەي الادى. دەمەك، جوعارى مەكتەپ ەمتيحانى قارساڭىندا وقۋشىلاردا سىناۋعا قالاي دايىندالۋ جونىندە دۇرىس كوزقاراس قالىپتاستىرىپ، تاماشا ۇيرەنۋ ورتاسىن جاراتۋ – كلاس جەتەكشىسىنىڭ ىستەۋگە ءتيىستى بورىشى – دەدى.

  وقىتۋشى مەن وقۋشىنىڭ ناتيجە جاراتىپ تابىستى بولۋىن ءبىر جاعى مەكتەپ ۇيىمىنىڭ يكەمدى باسشىلىعىنان بولە قاراۋعا بولمايدى. ءبىر وقىتۋشىنىڭ نەمەسە وقۋشىنىڭ ۇزدىك ناتيجەسى سول مەكتەپ ۇيىمىنىڭ دۇرىس مەكتەپ باسقارۋ ءتاسىلى، مەكتەپ باسشىلارىنىڭ دۇرىس باسشىلىق ەتۋى بارىسىندا قولعا كەلەدى. مەكتەپتىڭ وقىتۋشىعا سەنىم ارتىپ قولداپ – قۋاتتاۋى وقىتۋشى ءۇشىن ۇلكەن شابىت، وقىتۋشى مەن وقۋشىنىڭ تاماشا ناتيجە جاراتۋىنداعى داڭعىل جول سانالادى. ءتىل – ادەبيەت وقىتۋشىسى گۇلباقار ءابدىلقاميت قىزى مەن ول ءار كەزەك كلاس جەتەكشى بولعان ورتا مەكتەپتىڭ 3 – جىلدىعىنداعى وقۋشىلاردىڭ ءۇرتىس جاقسى ناتيجەلەرگە قول جەتكىزە الۋى انە سول مەكتەپ ۇيىمىنىڭ كەمەلدى باسشىلىعىنىڭ جەمىسى. ءبىز ۇلتىمىز وقۋ – اعارتۋى مۇنان دا ارمان كوركەيىپ، گۇلباھار تەكتەس ۇرپاق تاربيەلەۋدەگى جاۋاپكەرشىلىگى كۇشتى، ىزدەنگىش، ساباق وتۋگە شەبەر، تاجىريبەلى وقىتۋشىلاردىڭ قاتارى مولايىپ، ونەر – عىلىم ايدىنىندا ەڭبەكتەنە بەرسە، اتا – اناسى مەن ۇستازدارىن قۋانىتقان ۇلاندارىمىز كوبەيە بەرسە ەكەن دەپ تىلەيمىز.

  كەلۋ قاينارى: «ىلە گازەتى» - ىلە اقپارات تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.