مول ءونىم كورىنىسى مەن مۇندالادى، تيانشان الابىندا شاتتىق جىرى شارىقتادى

انار بۇلت / شينجياڭ گازەتىنىڭ تىلشىلەرى

2021.09.26 15:45   كەلۋ قاينارى : شينجياڭ گازەتى

　　9 - ايدىڭ 22 - كۇنى لوپ اۋدانى دول اۋىلى حالىق الاڭىندا ”مول ءونىمدى قۇتتىقتاۋ، پارتيانىڭ مەيىرىنە العىس ايتۋ“ تاقىرىبىندا 4 - رەتكى جۇڭگو شارۋالار مول ءونىم مەرەكەسىن قۇتتىقتاۋ جانە وزىندىك ەرەكشەلىكتەگى اۋىل شارۋاشىلىق قوسىمشا ونىمدەرىن كورمەگە قويىپ ساتۋ قيمىلى وتكىزىلدى، 10 اۋىل - قالاشىقتان (ءمالى) كەلگەن ءار ۇلت بۇقاراسى 40 نەشە ءتۇرلى جەرگىلىكتى وزىندىك ەرەكشەلىكتەگى اۋىل شارۋاشىلىق قوسىمشا ونىمدەرىن كورمەگە قويدى. □ سۋرەتتى ءماماتالي ءانۋار تۇسىرگەن

　　وزىندىك ەرەكشەلىكتەگى اۋىل شارۋاشىلىق ونىمدەرىن كورمەگە قويىپ ساۋدالادى، تانىستىردى، ءار ءتۇرلى تەرۋ جارىستارىن وتكىزدى، شارۋالاردى كۇزگى جيىن - تەرىننىڭ دۋماندى كورىنىسىن كورۋگە ۇيىمداستىردى... 9 - ايدىڭ 23 - كۇنى، ەسكىشە كالەندار بويىنشا كۇن مەن ءتۇننىڭ كۇزگى تەڭەلۋى، 4 - رەتكى جۇڭگو شارۋالار مول ءونىم مەرەكەسى دەر شاعىندا وتكىزىلدى. تيانشان الابىندا الۋان ءتۇرلى قيمىلدار وتكىزىلىپ، شارۋالارعا قۇرمەت ءبىلدىرىلىپ، مول ءونىم ماراپاتتالىپ، مەرەكە مەرەيى مەن ەڭبەك شاتتىعى شار تاراپقا تارالدى.مول ءونىمدى قۇتتىقتاپ، مول ءونىم شاتتىعىنا بولەندى

　　قازىر جىڭ اۋدانىندا كۇزگى الاقات پىسا باستادى. تورسيعان قىپ - قىزىل الاقات كۇن نۇرىمەن كوزگە وتتاي باسىلادى. قىستاق تۇرعىندارىنىڭ جۇزىنەن مول ءونىم شاتتىعى مەن مۇندالايدى.

　　9 - ايدىڭ 21 - كۇنى جىڭ اۋدانى تولى قالاشىعى داجۋاڭبەي قىستاعىنداعى الاقات ەگىمشىلىك بازاسىندا، الاقات تەرۋ جارىسى قىزۋ ورىستەتىلدى. تورەشىلەردىڭ بۇيرىق بەرىسىمەن، الاقات تەرۋشى 15 شەبەر بەلگىلەنگەن اۋماقتا جابال جارىسقا ءتۇستى.

　　2 ساعاتقا جالعاسقان جارىستان كەيىن، قىزمەتكەرلەر جارىسقا تۇسكەن ساڭلاقتاردىڭ تەرگەن الاقاتىن تارازىلادى، سونداي - اق الاقاتتىڭ ۇلكەن - كىشىلىگى، رەڭى، تازالىق دەڭگەيى سياقتى جاقتاردان باعالاۋ جۇرگىزدى. جىڭ اۋدانى تولى قالاشىعى داجۋاڭزى قىستاعىنىڭ تۇرعىنى لي حۋايتۇڭ جارىستا 1 - بولدى. ”الاقات ەگۋدىڭ ارقاسىندا، ءۇيىمىزدى جاڭالاپ سالىپ الدىق، اۆتوكولىك ساتىپ الدىق، بانكەگە اقشا دا قويدىق، تۇرمىسىمىز بارعان سايىن جاقسارىپ كەلەدى. مۇنان بىلاي ۇزدىكسىز قۇلشىنىپ، ساپاسى مۇنان دا جاقسى الاقات ەگىپ، اناعۇرلىم كوپ اقشا تابۋعا، كۇش سالامىن“، - دەدى لي حۋايتۇڭ شاتتانا كۇلىپ.

　　9 - ايدىڭ 23 - كۇنى اتۇش قالاسى ازاق اۋىلى بۇيامەت قىستاعىندا وتكىزىلگەن تىڭ تىنىستى اۋىل - قىستاق مادەنيەت، ساياحات، كوركەمونەر مەرەكەسى جانە بۇيامەت قىستاعىنىڭ ءجۇزىم ءۇزۋ مەرەكەسى جەرگىلىكتى شارۋالاردى مول ءونىم شاتتىعىنا بولەدى. ازاق اۋىلى ازاق قىستاعىنىڭ تۇرعىنى يارمامەت رىشيد ەككەن ءجۇزىمىنىڭ ساپاسى ەڭ جوعارى بولعاندىعى ءۇشىن، قيمىلدا سيلاندى.

　　يارمامەتتىڭ ءجۇزىم ەككەنىنە 25 جىل بولدى، قازىر قىستاقتا اتى اۋىزعا ىلىنگەن مايتالمان ەگىمشى سانالادى. ”بيىل جۇزىمنەن 5 توننا ءونىم الىپ، 15 مىڭ يۋان ناق پايدا تابامىن دەپ شامالاپ وتىرمىن“، - دەدى يارمامەت قۋانىشپەن.

　　ازاق اۋىلدىق پارتكومنىڭ ورىنباسار شۋجيى يۇي يۇي بىلاي دەدى: ”ەگىمشىلىكپەن شۇعىلداناتىن وتباسىلارى وسى رەتكى قيمىل ارقىلى ءوزارا تاجىريبە اۋىستىردى، مۇنىڭ الداعى جەردە عىلمي ەگۋ مەن باپتاۋعا بەلگىلى كومەگى بولاتىنى ءسوزسىز“.مول ونىمگە كەنەلىپ، شارۋالار جايراڭ قاقتى

　　9 - ايدىڭ 23 - كۇنى جۇڭگوداعى قىزىل بۇرىش مەكەنى ساۋان قالاسى انجىحاي قالاشىعىندا 10 مىڭ توننا قىزىل بۇرىش ”كۇن نۇرىمەن الاۋلاپ“، جالپاق دالانى قىزىل ”تەڭىزگە“ اينالدىردى. سارى ءتۇستى جۇگەرىمەن جەرگە جايىلعان قىزىل بۇرىشتىڭ ۇستىنەن ”دوڭگەلەك داۋلەتتى تۇرمىس“ دەگەن جازۋ ءتۇسىرىپ، جەرگىلىكتى شارۋالار مول ءونىم شاتتىعىن وسىنداي تاسىلمەن بەينەلەدى.

　　بيىل ساۋان قالاسى 52 مىڭ مۋ جەرگە جالپاق قىزىل بۇرىش، ءسۇيىر قىزىل بۇرىش، كوكونىس قىزىل بۇرىش، يمەك قىزىل بۇرىش سىندى 4 جەلى بويىنشا 19 ءتۇرلى ءونىم ەكتى. انجىحاي قالاشىعى گۋداۋ قىستاعىنىڭ تۇرعىنى دوۋ حۇڭيان بىلاي دەدى: ”بيىل 170 نەشە مۋ جەرگە ءسۇيىر قىزىل بۇرىش ەككەن ەدىم، وتكەن جىلدارداعىدان ءونىمى جوعارى، ساپاسى دا جاقسى بولدى، ونىڭ ۇستىنە ماشينامەن تەرگەندىكتەن تاپ - تازا بولدى، مول ءونىم الدىم دەپ ەسەپتەيمىن“.

　　9 - ايدىڭ 22 - كۇنى قاراقاش اۋدانى اقساراي اۋىلى الۋارىق قىستاعىنىڭ تۇرعىنى جانناتقان قۇدىرەت جاڭعاقتارىن كەپتىرىپ جاتىر ەكەن. جانناتقاننىڭ جەردەگى جاڭعاقتارعا قاراپ قۋانىشى قوينىنا سيماي تۇرعانى انادايدان بايقالدى.

　　”8 مۋ جەرگە ەككەن جاڭعاقتارىمدى تۇگەلدەي كەپتىرىپ قويدىم، بيىلعى جاڭعاقتىڭ ساپاسى وتە جاقسى بولدى، بىلتىرعىدان 5000 يۋاننان ارتىق پايدا تاباتىنىم مۇندا تۇر“، - دەدى جانناتقان تولىق سەنىممەن.

　　بيىل قاراقاش اۋدانىندا 440 مىڭ مۋ جەرگە جاڭعاق ەگىلدى. ءپىشىنىن تۇزەۋ، بۇتاۋ، تەلىپ تۇقىمىن ساپالىلاندىرۋ سياقتى ساپاسىن جوعارىلاتىپ، ءونىمدى ارتتىرۋ شارالارى، سونداي - اق اۋىل شارۋاشىلىق تەحنيكتەرىنىڭ عىلمي جەتەكشىلىك ەتۋى ارقىلى قاراقاش اۋدانى جاڭعاق وندىرىسىندە بۇكىل كاسىپ تىزبەگى بويىنشا دامۋدى جۇزەگە اسىرىپ، بازار بولاشاعى بارعان سايىن جاقسارىپ كەلەدى.مول ونىمنەن يگىلىكتەنىپ، تىڭ تۇرمىسقا كەنەلدى

　　اتى ايگىلى بۋرىلتوعايدىڭ سۋىق سۋ بالىعى، نارتتاي قىزىل الاقات، تاريحى ۇزاق التاي قويى... 9 - ايدىڭ 19 - كۇنى بۋرىلتوعاي اۋدانى كوكاعاش اۋىلى اقوتكەل قىستاعىندا ”مول ءونىمدى قۇتتىقتاپ، پارتيانىڭ مەيىرىنە العىس ايتۋ“ تاقىرىبىندا شارۋالار مول ءونىم مەرەكەسى قيمىلى باستالدى. تۇتاس اۋدانداعى 6 اۋىل - قالاشىق، 63 قىستاقتىڭ وزىندىك ەرەكشەلىكتەگى اۋىل شارۋاشىلىق قوسىمشا ونىمدەرى ارلى - بەرلى وتكەندەردى ات باسىن بۇرىپ، تاماشالاپ، ءدام تاتىپ كورۋگە باۋرادى.

　　بۋرىلتوعاي اۋداندىق اۋىل شارۋاشىلىعى، اۋىل - قىستاق مەكەمەسى پارتيا باسشىلىق گرۋپپاسىنىڭ شۋجيى چىن يۋە بىلاي دەدى: شارۋالار مول ءونىم مەرەكەسىن وراي ەتىپ اۋىل شارۋاشىلىق قوسىمشا ونىمدەرى كورمەسىن اشۋداعى ماقساتىمىز −− كورمەگە قويۋ ارقىلى اۋىل شارۋاشىلىق ونىمدەرىن قىستاقتان شىعارىپ، قالاعا ەنگىزۋ، جەرگىلىكتى اۋىل شارۋاشىلىق قوسىمشا ونىمدەرىنىڭ اتىن شىعارۋمەن قاتار، بۇقارانىڭ كىرىستى ارتتىرۋ ارنالارىن كەڭەيتۋ، -دەدى.

　　9 - ايدىڭ 21 - كۇنى تەكەس اۋدانى كوكتەرەك اۋىلى كوكتەرەك قىستاعىنىڭ تۇرعىنى ءيۇسىپجان ءسىلام ءوزى ەككەن المالارىن الىپ اۋداندا وتكىزىلگەن وزىندىك ەرەكشەلىكتەگى اۋىل شارۋاشىلىق قوسىمشا ونىمدەرىن كورمەگە قويىپ ساتۋ قيمىلىنا قاتىناستى.

　　سول كۇنى تەكەس اۋدانىنداعى 8 اۋىل - قالاشىقتاعى 21 كاسىپورىن، سەلبەستىك كووپەراتيۆى، وتباسى ەگىنشىلىك الاڭىنان اكەلىنگەن 130 نەشە ءتۇرلى اۋىل شارۋاشىلىق قوسىمشا ونىمدەرى كورمەگە قويىپ ساتۋ قيمىلىنا قاتىناستىرىلدى. ”مول ءونىم مەرەكەسى شارۋالاردىڭ مەرەكەسى عانا ەمەس، قايتا بۇكىل جۇڭگو حالقىنىڭ مەرەكەسى. مۇنان بىلاي مەن عىلمي ەگۋ، باپتاۋ تەحنيكالارىن ونان ارى قۇلشىنا ۇيرەنىپ، ساپاسى مۇنان دا جاقسى الما ەگىپ، قاجىرلى ەڭبەگىمە سۇيەنىپ، باقىتتى تۇرمىسقا كەنەلەمىن“، - دەدى ءيۇسىپجان.

　　(ءتىلشى ءپاريزات ابدۇل، قاتىناسقان تىلشىلەر جاڭ تيڭ، ءرايدا، ءجازيرا نەسىپبەك، سۇڭ يا - ۋىن، سۇڭ ۋيگو)