شاڭعى الاڭىنداعى قاراپايىم ەڭبەككەرلەر
− 300 ميلليون ادام قار - مۇز سپورتىمەن اينالىستى، شينجياڭدا مەن بارمىن (3)
□ انار بۇلت / شينجياڭ گازەتىنىڭ ءتىلشىسى حۋاڭ ليڭيان
2022.02.09 14:39 كەلۋ قاينارى : شينجياڭ گازەتى
”كوپشىلىك داعدىلى قىزمەتتەرىڭدى ويداعىداي ىستەپ، حاۋىپسىزدىكتەن ساقتانۋ تورىن تەكسەرىپ، شاڭعى جولىندا قوقىر - سوقىر نارسەلەر بار - جوقتىعىن، شاڭعى جولى سىرعاناۋ تالابىنا جەتتى مە، جوق پا، تەكسەرىپ كورىڭدەر، جارتى ساعاتتان كەيىن جينالىڭدار“. 1 - ايدىڭ 30 - كۇنى تاڭعى ساعات 9 جارىمدا جىبەك جولى حالىقارالىق دەمالىس ورنىنىڭ شاڭعى جولدارى كۇن نۇرىنا شاعىلىسىپ نۇر شاشا جارقىراپ جاتىر، تالعات ساتاي جولداستارىمەن بىرگە ءبىر كۇندىك قاربالاس قىزمەتىن باستاپ كەتتى. ولار شاڭعى الاڭىنداعى ”ءۇن - ءتۇنسىز ەڭبەك ەتۋشى ەگەيلەر“ اتانعان قۇتقارۋ - كومەكتەسۋ اترەتىنىڭ مۇشەلەرى ەدى.شاڭعى الاڭىنىڭ ءبىرىنشى توپتاعى ”قوناعى“
”كۇندەگى قىزمەتىمىزدىڭ مازمۇنى ۇقساس بولعانىمەن، الايدا شاڭعى تەبۋ مەنىڭ تۇرمىسىمنىڭ ءبىر بولەگىنە اينالدى، شاڭعى جولىنا شىققانىمدا جىگەرىم تاسقىنداپ كەتەدى“. قۇتقارۋ - كومەكتەسۋ اترەتىنىڭ باستىعى، 45 جاستاعى تالعاتتىڭ وسى شاڭعى الاڭىندا تۇرعانىنا 14 جىل بولدى، بۇل ارانىڭ بۇرىش - پۇشپاعىنا دەيىن جانە وقىس جاعداي وڭاي تۋىلاتىن ءاربىر جەرگە دەيىن الاقانىنداعىداي قانىق بىلەدى.
اترەت مۇشەلەرىنە تەكسەرۋ مىندەتىن بۇيىرعاننان كەيىن ول تاعى شاڭعى الاڭىنىڭ ءبار جەرىن ارالاپ تەكسەرىپ كەتتى. ”اترەت مۇشەلەرىنىڭ تەكسەرۋىن ءبىر قابات كەپىلدىك دەسەك، مەنىڭ جاۋاپكەرشىلىگىم ولاردىڭ قىزمەتىنە تاعى ءبىر كەپىلدىك ۇستەۋ بولىپ تابىلادى“. ول ساقتىق تورىن جولاي ىرعاپ - ىرعاپ كوردى دە، ءوتىپ بارا جاتقان سامعار ماحمەتقاندى شاقىرىپ: ”مىنا تور دىڭگەگىن تاعى دا شىڭاي ءتۇس“، - دەدى. بۇرعىنى كوتەرىپ جۇرگەن سامعار سەرىكتەرىمەن بىرگە قايتا كەلدى. ”قىزمەتتى ىجداعاتتىلىقپەن ىستەڭدەر، مۇنىڭ ءبارى قاريدارلاردىڭ اماندىعىنا سايادى ەمەس پە“، - دەدى تالعات ەسكەرتىپ.
وسى قىستا 21 جاستاعى سامعاردىڭ مۇندا قىزمەت ىستەگەنىنە 3 جىل بولادى. ءار كۇنى شاڭعى جولىمەن ورلەي - قۇلداي قۇيعىتىپ جۇرگەندە، اشىق اسپان، قارلى دالادا كوڭىلىڭ كوتەرىلىپ قالادى عوي، الايدا سامعاردىڭ مۇنى قىزىقتاۋعا مۇرساسى تيمەيدى، كۇنىنە از دەگەندە شاڭعىمەن 100 كيلومەتردەن ارتىق سىرعانايدى، ”كۇندە كورىپ جۇرگەن سوڭ قىزىق سەزىنبەگەندىگىمنەن ەمەس، قايتا مەنىڭ كوزىم، ءسوزسىز، شاڭعى جولىنداعى ءاربىر قاريداردان تايماۋى كەرەك، ءمان - جايدى ءجىتى باقىلاۋىما تۋرا كەلەدى. الدە بىرەۋدىڭ جىعىلعانىن كورگەندە، جۇرەگىم ءدىر ەتە تۇسەدى، استە جارالانباسا ەكەن دەپ ويلايمىن“.
تاڭعى ساعات 10دا شاڭعى جولىنىڭ ساپاسىن شارلاپ تەكسەرۋگە شىققان اترەت مۇشەلەرى بيىكتەن قۇيعىتا اعىپ ءتۇسىپ، تالعاتقا ءاربىر شاڭعى جولىنداعى قاردىڭ باتتالۋ جاعدايى مەن حاۋىپسىزدىكتى تەكسەرۋ ناتيجەسىنەن مالىمەت بەرىپ: ”ءارقايسى شاڭعى جولىنىڭ شارت - جاعدايى جاقسى، حاۋىپسىزدىك تەكسەرۋى اياقتادى“، - دەيتىن.
”ءبىز شاڭعى الاڭىنىڭ ’ءبىرىنشى توپتاعى‘ قاريدارىمىز، تەك ءبىز سىرعاناۋ سىناعىن جاساعاننان كەيىن، ەشقانداي ماسەلە شىقپاسا بولعانى، باسقا قاريدارلاردىڭ الاڭعا كىرۋىنە بولادى“، - دەدى تالعات.اجالعا اراشا، جارالىعا جەبەۋشى بولعان قار - مۇز ” شايقاس مايدانى“
قۇتقارۋ - كومەكتەسۋ اترەتى مۇشەلەرىنىڭ بارلىعى دەرلىك سىزگە وزدەرىنىڭ تاجىريبەلى شاڭعى اۋەسكەرلەرى ەكەندىكتەرىن ايتادى، الايدا اۋەسكەرلىك اترەت مۇشەسى بولۋدىڭ نەگىزگى شارتى عانا. ”بۇل اراداعى ءاربىر اترەت مۇشەسى تۇگەلدەي قۇتقارۋ - كومەكتەسۋ جابدىقتارىن پايدالانۋ، ىستەتۋ جاتتىعۋىنان وتكەن ءارى ەمدەۋ، قۇتقارۋ بىلىمدەرىن ۇيرەنگەن، ءبارىن دە كاسىپتىك ماماندار باۋلىعان“، - دەيدى تالعات.
”شاڭعى تەبۋدى قىزۋ سۇيەتىن ادامداردىڭ بارلىعى شينجياڭعا كەلىپ قۇماردان شىعۋدى ارماندايدى، مەنىڭ كاسىپتىك ءبىلىمىم مەنى جەتىلدىردى“، - دەگەن 42 جاستاعى فۋ سۇڭتاۋ حۋاشي مەديتسينا داشۋەسىنىڭ ساقتىق مەديتسيناسى ءىلىمى كاسىبىنەن وقۋ تاۋىسقان، بىلتىر جىل اياعىندا قۇتقارۋ - كومەكتەسۋ اترەتىنىڭ مۇشەسى بولعان، بۇرىن ول حىبەيدىڭ يانچيڭىنداعى ۋانلۇڭ شاڭعى الاڭىندا قىزمەت ىستەگەن. ”ءبىرشاما اۋىر جاراقات العاندارعا جولىققاندا، مەن جارالانۋ دارەجەسىن ءداپ باسىپ تۇجىرىمداي الامىن، سول ارقىلى قۇتقارۋدىڭ ۇتىمدى ۋاقىتىن مىقتى يگەرەمىن، بۇل مەنىڭ قۇتقارۋ - كومەكتەسۋ اترەتىنىڭ وزگە مۇشەلەرىمەن سالىستىرا ايتقانداعى ارتىقشىلىعىم سانالادى“.
قازىرگە دەيىن فۋ سۇڭتاۋدىڭ ارتىقشىلىعىن ساۋلەلەندىرۋ ورايى بولا قويماعانىمەن، الايدا ءار كۇنى كىشى - گىرىم جاراقات العان قاريدارلار از بولمايدى. ”جارالانۋ ۇنەمى تۋىلىپ تۇرادى، كەيبىر قاريدارلار سىرعاناۋ قابىلەت دەڭگەيى جەتپەگەندىكتەن، وقىستان جوعارى دارەجەلى سىرعاناۋ جولىنا ءتۇسىپ كەتىپ جارالانادى، كەيبىرەۋلەرى ءبىر - بىرىنە سوعىلىپ قالىپ جارالانادى“، - دەيدى تالعات.
قۇتقارۋ - كومەكتەسۋ اترەتىنىڭ ءاربىر مۇشەسى وزدەرىنە تەرەڭ اسەر قالدىرعان قۇتقارۋ - كومەكتەسۋ كەشىرمەسىن ايتىپ بەرە الادى. ءبىر اپتانىڭ الدىندا سامعار شاتتىق اڭعارىندا شاڭعىسى ءبولىنىپ كەتكەندىكتەن ەكى اياعى جارالانعان ءبىر قاريداردى قۇتقارىپ شىقتى، ”سول كەزدە الگى قوناقتىڭ ەكى تىزەسىن شاڭعى ءتىلىپ كەتىپتى، تەرەڭ جاراقاتتانىپتى، ءسوز جوق، كومەكشى اسپاپتاردان پايدالانىپ تاۋدان الىپ تۇسۋىمە تۋرا كەلدى“، - دەيدى سامعار.
ءادىلجان سىماعۇل قارلى دالادا قۇتقارۋ موتوتسيكلىن جۇرگىزۋگە، ءتۇرلى جابدىقتاردى باسقارۋعا جاۋاپتى. قۇتقارۋ - كومەكتەسۋ سيگنالىن تاپسىرىپ العاننان كەيىن، ول زۋزانى الا سالىپ موتوتسيكلمەن دەرەۋ تاۋ باسىنا تارتتى، سول كۇنگى كۇن شۋاقتى بولسا دا، 60 كيلومەتر ساعاتتىق جىلدامدىقپەن زىمىراعاندا، ىزىنەن قار بوراپ، جەل بەتىن پىشاقپەن تىلگەندەي قاتتى ءتيدى، ”قىسقا عانا بىرنەشە مينۋتتا، توڭىپ كەتەسىڭ“، - دەيدى ءادىلجان.
فۋ سۇڭتاۋ كۇنى بۇگىنگە دەيىن انا مەكتەبىندە وقۋعا كىرۋ سەرتىندەگى: ”اجالعا اراشا، جارالىعا جەبەۋشى بولىپ، جاپا - ماشاقاتتان قايتپايمىن“، - دەگەن ءسوزدى ەسىنە ساقتاپ كەلەدى. ”مەنىڭ اجالعا اراشا، جارالىعا جەبەۋشى بولاتىن مايدانىم شيپاحانادان وسى اراعا وزگەردى، ءبىراق قۇن كوزقاراسىم باستان - اياق وزگەرگەنى جوق“.قۇتقارۋ - كومەكتەسۋدەگى ”اعا - باۋىرلار ليانى“
تۇسكى تاماقتارىن اسىعىس - ۇسىگىس ىشكەن جانات قابيدوللا مەن اسەر ايسابەك اياقتارىنا شاڭعىلارىن بايلاپ، تىلدەسكىلەرىن الىپ، جارىق شاعىلىستىرعىش اسپا كيىم كيىنىپ، شاڭعى جولىنا شىعۋعا دايىندالدى. جىل بويى بيىك تاۋداعى شاڭعى جولىندا قىزمەت ىستەپ، كۇشتى ۋلترا كۇلگىن ساۋلەسىنىڭ اسەرىنەن ەكەۋىنىڭ ءجۇزى باسقالارعا قاراعاندا توتىعىڭقى كورىنەدى، ”اعايىندىلار وسىلاي بولادى“، - دەدى جانات اسەردى قۇشاقتاي.
جانات پەن اسەر كىشكەنتايىنان بىرگە وسكەن دوستار، ەكەۋى ارالارىنا ءبىر جىل سالىپ شاڭعى الاڭىنداعى قۇتقارۋ - كومەكتەسۋ اترەتىنىڭ مۇشەسىنە اينالدى، ”ول ەكەۋى قيىن سايكەسەدى، ونىڭ ۇستىنە سىرعاناۋعا وتە شەبەر، سوندىقتان ول ەكەۋىن تاۋ باسىنداعى شاڭعى جولىنا ورنالاستىردىم“، - دەيدى تالعات.
فۋ سۇڭتاۋدان سىرت، قۇتقارۋ - كومەكتەسۋ اترەتىنىڭ 24 اترەت مۇشەسى تۇگەلدەي تاۋ بوكتەرىندەگى ءۇرىمجى اۋدانىنىڭ ءارقايسى اۋىل - قالاشىعىنىڭ مالشىلارى، كوبى جاستايىنان تانىس بولعاندىقتان، شاڭعى الاڭىنا بىرگە كەلىپ قىزمەت ىستەپ، قۇتقارۋ - كومەكتەسۋدەگى ”اعا - باۋىرلار ليانىن“ قۇراعان. ”بۇل ارادا كوپشىلىك ءبىر ءۇيلى جانداي، مەن ولارعا مەديتسينالىق قۇتقارۋ بىلىمدەرىن ۇيرەتەمىن، ولار ماعان شاڭعى تەبۋدىڭ قىرى - سىرىن ۇيرەتەدى“، - دەگەن فۋ سۇڭتاۋ مۇندا كەلگەنىنە ۇزاق بولماسا دا، وسى كوللەكتيۆپەن ەتەنە ارالاسىپ كەتكەندىگىن ايتتى.
بۇكىل اترەتتە جاسى ەڭ كىشىسى سامعار، جاسى ەڭ ۇلكەنى اترەت باستىعى تالعات، كوپشىلىك جاقىن تارتىپ ونى ”تا اترەت باستىعى“ دەسەدى، اترەتكە جاڭادان كىرگەن ءاربىر مۇشە تۇگەلدەي تالعاتتىڭ العاشقى باۋلۋىنان وتەدى. ”ءبىزدىڭ قۇتقارۋ - كومەكتەسۋ بىلىمدەرىمىز بەن شاڭعى تەبۋ شەبەرلىگىمىزدى تۇگەلدەي تا اترەت باستىعى ۇيرەتكەن“، - دەيدى اسەر.
تالعاتتىڭ شاڭعى الاڭىندا قۇتقارۋ - كومەكتەسۋ ءبىلىمى اسا مول، بۇرىن يتاليادا تاربيەلەنگەن. ”تا اترەت باستىعىنىڭ قۇتقارۋ - كومەكتەسۋ حيكاياسىن وتە ەرتەدە - اق ەستىگەنمىن، بارلىعىمىز وعان ەرەكشە سۇيىنەمىز، قۇرمەتتەيمىز، ونىمەن بىرگە قۇتقارۋ - كومەكتەسۋدە بولعانىمىزدى داڭق سانايمىز“، - دەيدى سامعار.
”قۇتقارعان ادامدارىمىزدىڭ بارلىعى دەرلىك ءبىزدىڭ حابارلاسۋ تەلەفونىمىزدى قوسىپ الىپ، ارتىنان دوسىمىزعا اينالىپ كەتەدى، بۇل دەگەنىڭىز ءبىر ءتۇرلى تابىس سەزىمىن تۋدىراتىن ءىس قوي“، - دەيدى تالعات.
14 جىلدان بەرى تالعات تا شينجياڭنىڭ قار - مۇز ىستەرىنىڭ دامۋىنا كۋا بولدى: ”قاريدارلار جىلدان - جىلعا كوبەيۋدە، بۇرىنعى قاريدارلاردىڭ كوبى شاڭعى الاڭىنىڭ شاڭعىلارىن جالعا الاتىن، قازىرگىلەردە ءوز شاڭعىلارىن الا كەلەتىندەر كوپ، دەمەك، شاڭعى اۋەسكەرلەرىنىڭ بارعان سايىن كوبەيگەنى انىق“.
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
مادەنيەت
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
