شينحۋا اگەنتتىگىنىڭ 4 – ايدىڭ 24 – كۇنى بەيجيڭنەن بەرگەن حابارى. دۇنيە جۇزىلىك دەنساۋلىق ساقتاۋ ۇيىمىنىڭ 4 – ايدىڭ 23 – كۇنى ايتۋىنشا، 4 – ايدىڭ 21 – كۇنىنە دەيىن، 12 مەملەكەتتە بالالاردا اۋرۋ سەبەبى بەلگىسىز شۇعىل حاراكتەرلى باۋىر قابىنۋى اۋرۋى بايقالعان، كەمىندە ءبىر بالا قازا بولعان.
دۇنيە جۇزىلىك دەنساۋلىق ساقتاۋ ۇيىمى جاريالاعان مالىمەتكە قاراعاندا، قازىرگە دەيىن اۋرۋ سەبەبى بەلگىسىز شۇعىل حاراكتەرلى باۋىر قابىنۋ اۋرۋىنا 169 بالانىڭ شالدىققانى جونىندە مالىمەت بەرىلگەن، مۇنىڭ ىشىندە 114 بالا انگليادا. ا ق ش، يسپانيا، يزرايليا، دانيا، يرلانديا، گوللانديا، يتاليا، نورۆەگيا، فرانسيا، رۋمينيا جانە بەلگيا ەلدەرىندە دە ناۋقاس بايقالعانى جايلى مالىمەت بەرىلگەن.
ناۋقاس بولعاندار ءبىر ايلىق نارەستەدەن تارتىپ 16 جاسقا دەيىنگى ارالىقتاعى بالالار. 17 ناۋقاسقا باۋىر الماستىرۋ وپەراتسياسىن جاساۋ قاجەت بولعان.
دۇنيە جۇزىلىك دەنساۋلىق ساقتاۋ ۇيىمى قازا بولعان ناۋقاس بالانىڭ قاي ەلدە ەكەنى سىندى ەگجەي – تەگجەيلى اقپاراتتاردى جاريالاماعان.
كوپتەگەن ناۋقاستاردا بايقالعان اۋرۋ بەلگىلەرى ءىش اۋرۋ، ءىش ءوتۋ، جۇرەك اينۋ قاتارلىلاردى قامتيدى، ناۋقاستاردىڭ كوبىندە قىزۋى ورلەۋ سىندى اۋرۋ بەلگىسى بايقالماعان. مالىمەت بەرىلگەن بارلىق ناۋقاستاردان A، B، C، D، E سىندى ۇنەمى كەزدەسەتىن بەس ءتۇرلى باۋىر اۋرۋى ۆيرۋسى بايقالماعان.
دۇنيە جۇزىلىك دەنساۋلىق ساقتاۋ ۇيىمىنىڭ ايتۋىنشا، كەمىندە 74 ناۋقاستىڭ ءبىر ءتۇرلى بەز ۆيرۋسىمەن جۇعىمدالعانى انىقتالعان، مۇندا 18 ادامنىڭ 41 تيپتەگى بەز ۆيرۋسىمەن جۇعىمدالعانى تۇراقتاندىرىلعان؛ 20 ناۋقاستىڭ جاڭا تيپتى ايدارشا ۆيرۋسپەن جۇعىمدالعانى انىقتالعان؛ 19 ناۋقاستان بەز ۆيرۋسى مەن جاڭا تيپتى ايدارشا ۆيرۋس ەكەۋىمەن بىردەي جۇعىمدالعانى انىقتالعان.
دۇنيە جۇزىلىك دەنساۋلىق ساقتاۋ ۇيىمىنىڭ ايتۋىنشا، بەز ۆيرۋسى بۇل ناۋقاستاردىڭ جۇعىمدالۋىنىڭ سەبەبى دەپ جورامالداۋعا بولادى، الايدا، بۇل قازىرگى جاعدايدى تولىق ءتۇسىندىرىپ بەرە المايدى.
قازىر بەلگىلى بولعان بەز ۆيرۋسى ون ءتۇرلى، ولاردىڭ كوبى تۇماۋ اۋرۋىنىڭ بەلگىلەرى، قىزۋى ورلەۋ، كومەكەيى اۋرۋ قاتارلىلارمەن بايلانىستى. 41 تيپتەگى بەز ۆيرۋسى ادەتتە ءىش ءوتۋ، جۇرەك اينۋ، قىزۋى ورلەۋ قاتارلىلارمەن بايلانىستى، مۇنان سىرت، ۇنەمى تىنىس جولى اۋرۋلارىمەن قوسارلانا جۇرەدى. يممۋنيتەت قۋاتى قالىپتى بالالاردىڭ 41 تيپتەگى بەز ۆيرۋسىمەن جۇعىمدالعاننان كەيىن باۋىر اۋرۋىنا شالدىعۋى سىندى جاعداي بۇرىن بايقالماعان.
ناۋقاستاردىڭ باسىم كوپ ساندىسى جاڭا تيپتى ايدارشا ۆيرۋس ۆاكسيناسىن ەكتىرمەگەن، سوندىقتان، قازىر ولاردىڭ باۋىر اۋرۋىنا شالدىققان سەبەبى جاڭا تيپتى ايدارشا ۆيرۋس ۆاكسيناسىنىڭ كەرى اسەرى ەمەس دەپ قاراۋعا بولادى.
دۇنيە جۇزىلىك دەنساۋلىق ساقتاۋ ۇيىمى قازىر بۇل ىسكە ءجىتى نازار اۋدارۋدا ءارى انگليا دەنساۋلىق ساقتاۋ تاراۋلارىمەن، باسقا مۇشەلەرمەن، سەلبەسكەن ورىندارمەن بىرگە سەلبەستىك ورىستەتۋدە.
دۇنيە جۇزىلىك دەنساۋلىق ساقتاۋ ۇيىمى بىلاي دەپ قاراعان: جۋىردان بەرى مالىمەت بەرىلگەن بالالار شالدىققان شۇعىل حاراكتەرلى باۋىر اۋرۋىنان ساقتانۋداعى كەزەك كۇتتىرمەيتىن مىندەت — اۋرۋدىڭ سەبەبىن تابۋ، قولدى ءجيى جۋۋ مەن تىنىس جولىنىڭ تازالىعىن ساقتاۋ سىندى شارالار بەز ۆيرۋسى قاتارلى ۇنەمى كەزدەسەتىن ۆيرۋستارمەن جۇعىمدالۋدىڭ الدىن الادى. (وۋ لان)
كەلۋ قاينارى: حالىق تورابى