حالىق ءانى ــ قازىنام(2)

2012.12.10 16:00  

　　اۋەلدە وسى شارانىڭ وتكىزىلۋىنە وراي جاراتىپ، جاقىننان جاردەمشى بولىپ، قولداپ-قۋاتتاپ، جول نۇسقاعان ۇلتتار ۋنيۆەرسيتەتى مۋزيكا ينيستيتۋتىنىڭ باستىعى سايرىن پروفەسسور وسى رەتكى شارانىڭ ينيستيتۋت تاريحىنداعى تۇڭعىش رەت وزدىرىلعان قازاقتىڭ ءداستۇرلى ءان كەشى بولعاندىعىن ايتا كەلە، سەرىكتىڭ ۇلتتىق ءداستۇرلى اۋەندەردى، اندەردى زەرتتەپ، ونى جادىندا ساقتاپ، جالعاستىرىپ، وسى ءبىر ءساليقالى كەشتە كوپشىلىكپەن قاۋىشتىرىپ وتىرعان اسىل قاسيەتىنە، ۇلت جاندىلىعىنا ريزاشىلدىعىن ءبىلدىردى، سول قۇندىلىقتارىمىزدى ۇلىقتاۋدا تەك وزىمىزبەن شەكتەلىپ قالماي، ونى وزگە ۇلت وكىلدەرىنە دە تانىستىرىپ، باسقالاردىڭ ءوزىمىزدى ىشكەرىلەي ءتۇسىنىپ، كوپتەپ قابىلداۋىنا جول اشۋىمىز كەرەك دەگەن ويىن تۇيىندەدى.

　　«جىگىتكە ولەڭ دە ونەر، ونەر دە ونەر، شىن جۇيرىك ورگە سالسا ورشەلەنەر» دەپ ونەر ولكەسىندە دومبىرانى قوڭىر اۋەنىنە سەرىك ەتىپ، توپتى ورتادا تالايلاردىڭ جۇرەك قىلىن شەرتىپ، ءداستۇرلى ءان ورىنداۋ شەبەرلىگىمەن ءوز ورتاسىنان وزا شاپقان سەكەڭ بۇگىنگى كەشتىڭ شىمىلدىعىن حالىق ءانى «مۇحيدا شايبامەن» باستاپ، شىعانداتا شىرقاپ، «سۇرجەكەي»، «بۇلبۇلىم»، «اق ايشا»، «قارعام-اۋ» اندەرىمەن ءبىر تولعاپ وتكەندە جيىلعان توپتىڭ ءداستۇرلى اندارىمىزدىڭ رۋحاني قۇندىلىعى مەن ورىنداۋ شەبەرلىگىنە دەگەن ىزەتىنەن تۋىنداعان قوشامەت ءۇنى زال ءىشىن كەرنەپ، ءالسىن-ءالى جاڭعىرىعىپ جاتتى. سەكەڭ 2009-جىلى جاڭا جۇڭگو قۇرىلعاندىعىنىڭ 60 جىلدىعى قارساڭىندا شينجياڭ ۇيعۇر اۆتونوميالى رايونى بويىنشا وزدىرىلعان ءداستۇرلى ءان ايتۋ جۇلدەلى جارىسىندا التىن سيلىقتى قانجىعاسىنا بايلاۋىنا سەبەپشى بولعان «داۋرەن-اي» اتتى ءاندى بۇگىندە سونداي ءبىر وزگەشە سەزىممەن قۇيقىلجىتىپ وتكەندە، ورىنداۋ شەبەرلىگىنە تاڭ قالىپ، تاڭداي قاقپاعان ادام بولماسا كەرەك. ول شىرقاعان ءان تىڭداۋشىسىن تاۋىپ، كوپتىڭ رۋحاني سارىعىن باستى.