بەتتى ساقتاۋ | باس بەت قىلۋ | حات ساندىعى | حابارلاسىڭىز | ءبىز تۋرالى
حالىق تورابى

«ىلە كەشىنىڭ» 20 جىلدىعى دابىرالى تويلاندى

سەنبەك اۋەسقان ۇلى («ىلە كەشى» گازەتىنىڭ ءتىلشىسى)

2013.01.14 15:35   كەلۋ قاينارى : حالىق تورابى



  قاڭتاردىڭ 9 – كۇنى قۇلجا قالاسىنداعى ىلە دوستىق قوناق ۇيىندە «ىلە كەشى» گازەتى قازاقشا باسىلىمىنىڭ شىعا باستاعانىنا 20 جىل تولعانىن قۇتتىقتاۋ قيمىلى مەن «مەن جانە <ىلە كەشى>»، «قارعالداق» اتتارىنداعى سيلىقتى شىعارما اۆتورلارىن سيلاۋ سالتى دابىرالى وتكىزىلدى.

  قۇتتىقتاۋ قيمىلىنا اۆتونوميالى رايونداعى، ىلە وبلىسىنداعى، وبلىسقا توتە قاراستى اۋدان، قالالارداعى قاتىستى ورىنداردىڭ باسشىلارى، الىس – جۋىقتان كەلگەن سيلى قوناقتار بولىپ 100 گە جۋىق كىسى قاتىناستى. ىلە وبلىستىق ساياسي كەڭەستىڭ بۇرىنعى ورىنباسار ءتورايىمى ۇلىقان سۇلتان قىزى، ىلە وبلىستىق الپىس ەكى قوڭىردى زەرتتەۋ عىلمي قوعامىنىڭ ورىنباسار ءتوراعاسى اقىمەتبەك انۋاربەك ۇلى، ىلە وبلىستىق جەرگىلىكتى شەجىرە قۇراستىرۋ كەڭسەسىنىڭ بۇرىنعى مەڭگەرۋشىسى ابىلاش قاسىمبەك ۇلى، اۆتونوميالى رايوندىق ۇلتتار ءتىل – جازۋ قىزمەتى كوميتەتىنىڭ ورىنباسار مەڭگەرۋشىسى جارقىن ابىلەز ۇلى، ىلە گازەتى مەكەمەسىنىڭ باستىعى ەرمەك ايات ۇلى، ىلە كەشى گازەتى مەكەمەسىنىڭ باستىعى جاۋ پىڭيۋان، «ىلە كەشى» گازەتىنىڭ ورىنباسار باس رەداكتورى نۇرجان جانەتقان ۇلى ءتوراعالار مىنبەسىنەن ورىن الدى.

  قۇتتىقتاۋ قيمىلىندا اۋەلى نۇرجان جانەتقان ۇلى «‹ىلە كەشى› 20 جىل بەلەسىندە، جۋرناليستەر ەڭبەگى ەل ەسىندە» دەگەن تاقىرىپتا ءسوز سويلەپ، 1993 – جىلى قاڭتاردىڭ 1 – كۇنى جارىق كورگەن «ىلە كەشى» گازەتىنىڭ اسحات كەرىمباي ۇلى، ايدار اقان ۇلى، اقىمەتبەك انۋاربەك ۇلى، لو ۋىنچيڭ، قيۇم سوپى، ياڭ جىنبو، سۋ حۇڭبو، جارقىن ابىلەز ۇلى قاتارلى ءار دارەجەلى باسشىلاردىڭ، جانكۇيەر اۆتور، وقىرمانداردىڭ ىستىق قۇشاققا الىپ، ايالى الاقانىمەن ماپەلەۋىندە تەز شيراپ، ەرتە ەسەيگەنىن، بۇگىنگى كۇندە توپشىسى قاتىپ، ۇيادان قياعا سامعاپ، ەلىن سۇيىندىرگەن ەلەۋلى باسىلىمنىڭ بىرىنە اينالعانىن اتاپ ءوتتى ءارى قۇتتىقتاۋ قيمىلىنا قاتىناسقان كوپشىلىككە قۇرمەت ءبىلدىرىپ، العىس ايتتى.

  وسىدان سوڭ ۇلىقان سۇلتان قىزى، اقىمەتبەك انۋاربەك ۇلى، ابىلاش قاسىمبەك ۇلى، جارقىن ابىلەز ۇلى، ەرمەك ايات ۇلى، ىلە گازەتى مەكەمەسىنىڭ الدىڭعى كەزەكتەگى مەكەمە باسشىلارى اقبەردى يزاتبەك ۇلى، بەيىلقان مۇقاش ۇلى، ىلە گازەتى مەكەمەسى پارتكومىنىڭ بۇرىنعى ورىنباسار شۋجيى، ىلە كەشى گازەتى مەكەمەسى پارتيا باس ياچەيكاسىنىڭ بۇرىنعى شۋجيى، «ىلە كەشى» گازەتىنىڭ بۇرىنعى ورىنباسار باس رەداكتورى قيۇم سوپى ءوز تۇرعىلارىنان گازەتتىڭ جارىق كورۋىندەگى تاريحي استار، التى جىل جالعاسقان دايىندىق قىزمەتى، گازەت مەكەمەسىنىڭ قۇرىلۋى، گازەتتىڭ ا دەگەننەن وقىرماندى باۋراپ الارلىقتاي تارتىمدى شىعۋى، كەيىنگى دامۋ بەلەستەرى، اسىرەسە، «ىلە كەشىنىڭ» ەلىمىز قازاقتارىنىڭ بىردەن – ءبىر كەشكى گازەتى رەتىندە ءبىر بوستىقتىڭ ورنىن تولتىرعانى جونىندە ىستىق ىقىلاسپەن، تەبىرەنىسپەن وي تولعاپ، گازەتتىڭ 20 جىلدىق مەرەي تويىن قىزۋ قۇتتىقتادى، سونداي – اق گازەتتى ۇلكەيتۋ، ءتىپتى بولماعاندا، گازەتتىڭ بەت سانىن كوبەيتۋ، باسىلىمىن رەڭدىگە وزگەرتۋ وقىرمانداردىڭ تالابى، ءداۋىردىڭ قاجەتى ەكەنىن ۇسىنىس، پىكىر رەتىندە ورتاعا قويدى.

  ساقا باسشىلاردىڭ، ساقا جۋرناليستەردىڭ لەبىزىنەن سوڭ ىلە كەشى گازەتى مەكەمەسى قازاق رەداكسياسىنىڭ ورىنباسار مەڭگەرۋشىسى تولەنباي بەگداۋلەت ۇلى شينجياڭ گازەتى مەكەمەسىنىڭ، تارباعاتاي گازەتى مەكەمەسىنىڭ، التاي گازەتى مەكەمەسىنىڭ، كۇيتۇن قالالىق حالىق ۇكىمەتىنىڭ، نىلقى اۋداندىق حالىق ۇكىمەتى مەن ۇگىت ءبولىمىنىڭ قۇتتىقتاۋ حاتتارىن، ىلە وبلىستىق مادەنيەت – دەنەتاربيە – راديو – كينو – تەلەۆيزيا مەكەمەسى پارتيا ياچەيكاسىنىڭ ورىنباسار شۋجيى، مەكەمە باستىعى قىزىركەلدى ءابدىراحمان ۇلىنىڭ جياڭسۋ ولكەسىنىڭ نانجيڭ قالاسىنان جولداعان قۇتتىقتاۋ حاتىن وقىدى.

  ىلە كەشى گازەتى مەكەمەسى قازاق رەداكسياسىنىڭ مەڭگەرۋشىسى سەنبەك اۋەسقان ۇلى «مەن جانە <ىلە كەشى>»، «قارعالداق» اتتارىنداعى سيلىقتى شىعارما باعالاۋ قيمىلىنىڭ ناتيجەسىن، گازەتتىڭ 20 جىلدىعى بايلانىسىمەن سيلانعان ۇزدىك ەرىكتى تىلشىلەردىڭ ەسىمدىگىن جاريالادى. «مەن جانە <ىلە كەشى>» سيلىقتى شىعارما تۇرىندە جارقىن ابىلەز ۇلى «كەشەگى ‹ىلە كەشى›» دەگەن شىعارماسىمەن 1 – دارەجەلى جۇلدەنى، ساۋلەت توقتىبايەۆ پەن ەلەش مۇراتبەك ۇلى 2 – دارەجەلى جۇلدەنى، شەرالى ايتۋعان ۇلى قاتارلى 4 اۆتور 3 – دارەجەلى جۇلدەنى الدى؛ «قارعالداق» سيلىقتى شىعارما تۇرىندە تۇرسىن تالاس ۇلى «قارايتىن بەت جوق» دەگەن اڭگىمەسىمەن 1 – دارەجەلى جۇلدەنى، ەربولات تولەۋقان ۇلى «توبىق» دەگەن اڭگىمەسىمەن، باعاشار نارىنبايەۆ «اقاۋ» دەگەن اڭگىمەسىمەن 2 – دارەجەلى جۇلدەنى، مۇراتبەك ماقسۇت ۇلى قاتارلى 4 اۆتور 3 – دارەجەلى جۇلدەنى الدى، تۇرىمبەك قاسەن ۇلى، دالەلقان بايبوتايەۆ قاتارلى 7 اۆتورعا جاقسى اڭگىمە سيلىعى بەرىلدى. بايسۇلتان نۇپتەبەك ۇلى، ءالباتىر ءابىلاقان ۇلى، بەيسەنباي ساۋىت ۇلى، قۇرلىسقان ءتاليان قىزى قاتارلى 11 ەرىكتى تىلشىگە «ۇزدىك ەرىكتى ءتىلشى» داڭق كۋالىگى بەرىلدى.

  «ىلە كەشى» گازەتىنىڭ رەداكتورى باقىتالى سەيىتقان ۇلى رەداكسياداعى جۋرناليستەر اتىنان، كۇيتۇن قالالىق راديو – تەلەۆيزيا مەكەمەسىنىڭ قىزمەتكەرى قۇرلىسقان ءتاليان قىزى ەرىكتى تىلشىلەر اتىنان، موڭعۇلكۇرە اۋداندىق پارتكوم تۇراقتى كوميتەتىنىڭ مۇشەسى، ۇگىت ءبولىمىنىڭ باستىعى سۇلۋمان ورازيمان قىزى گازەتتىڭ جانكۇيەرلەرى اتىنان، موڭعۇلكۇرە اۋداندىق قازاق باستاۋىش مەكتەبىنىڭ زەينەتكەرى، جازۋشى باعاشار نارىنبايەۆ سيلانعان اۆتورلار اتىنان، موڭعۇلكۇرە اۋدانى ۇزىنبۇلاق اۋىلدىق پارتكومنىڭ ورىنباسار شۋجيى، اۋىل باستىعى دۋمان ماعاۋ ۇلى «قارعالداق» سيلىقتى شىعارما قيمىلىن دەمەۋشى ورىن اتىنان ءسوز سويلەدى.

  قۇتتىقتاۋ قيمىلىندا گازەتىمىزدىڭ شاڭىراق كوتەرىپ، ىرگە جايۋىندا جاپالى ەڭبەك ەتىپ، كورنەكتى ۇلەس قوسقان جارقىن ابىلەز ۇلى، ساۋلەت توقتىبايەۆ، باقىتبەك نەسىپبەك ۇلى، بىلىسبەك ءابدىرازاق ۇلى قاتارلى جولداستارعا ۇلەس سيلىعى بەرىلدى. موڭعۇلكۇرە اۋدانىنىڭ ۇزىنبۇلاق اۋىلىنا گازەت مەكەمەسى اتىنان كەستەلى تۋ بەرىلىپ، العىس ايتىلدى.

  «ىلە كەشىنىڭ» رەڭدى باسىلعان 8 بەتتىك مەرەكەلىك ارناۋلى سانى قۇتتىقتاۋ سالتىندا الدىن الا تاراتىلىپ، كوپشىلىكتىڭ جاقسى باعاسىن الدى.

  قۇتتىقتاۋ سالتىنان كەيىن الىس – جۋىقتان كەلگەن قوناقتارعا ارنايى قوناعاسى بەرىلدى. ىلە پەداگوگيكا ينستيتۋتىنىڭ اراي قينايات قىزى باستاعان شاعىن كونسەرتتىك توبى كۇي ورىنداپ، ءان شىرقاپ، ءبي بيلەپ مەرەكە دۋمانىن اسىردى. تۇرىمبەك قاسەن ۇلى قيسا، نۇربولات ءابدىقادىر، جاڭاتاي قابدىكەرىم ۇلى، نۇرجان ماناپ ۇلى قاتارلىلار ولەڭ ايتىپ، ۇلارقان قاقارمان قىزى ءان شىرقاپ، وزدەرىنىڭ سۇيىكتى گازەتتەرىنە شاشۋ شاشتى. سۋرەتتەردى تۇسىرگەن سىمايىل ىسقاق ۇلى

  كەلۋ قاينارى: حالىق تورابى

【1】 【2】 【3】 
جاۋاپتى رەداكتورى : نۇرعيسا قۇرمانجان ۇلى

 سۋرەت