- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ءجاۋدىر شالعام(6)
2013.01.22 13:50
6
ەكىنشى كۇنى، قۇرىلىس باسىنان ءبادىزشى جىگىت پەن جۇيزى بويجەتكەننىڭ قاراسى كورىنبەدى. بۇكىل قۇرىلىس باسىن ءبىر ءتۇرلى توڭ-تورىس كوڭىلسىزدىك مەڭدەتتى. ۇستاماسى ۇستاعان ادامداي كۇن دە دىرىلدەپ شاڭىتا قالعان. ازىناعان كۇزگى جەل كەندىرلەردى تەڭىزدەي تولقىتۋدا. ونىڭ باسىنا قوناقتاعان توپتى تورعاي شوشىنا شيقىلداۋدا. كوپىر وتكىندەرىنەن ساۋلاعان جەلدەن شاڭ-توزاڭ بۇرقىراپ، اسپاندى سارى تۇتەك باستى. سيىر ساسكە شاماسىندا عانا جەل باسىلدى. كۇن دە بىرتە-بىرتە اشىلدى. وسىنداي ىسكە كەز بولعانىنا كەلىنشەك الىپ ەندى عانا ورالعان تەتە مەڭگەرۋشى ليۋ تايياڭنىڭ ءيت جىنى كەلدى. ۇستاحانانىڭ اۋزىنا بارىپ، تەمىرشى جىگىتتى جەر-جەبىرىنە، جەكەن سۋىنا جەتكىزە سىباۋمەن قاتار، جۇيزى بويجەتكەنگە شىققان كوزىنىڭ ورنىنا ماڭدايداعى جالعىز كوزىڭدى ويىپ الىپ بەرەمىن دەپ تە قۇقايلاندى. تەمىرشى جىگىتتە ءۇن جوق. قاپ-قارا جۇزىندەگى بەزەۋ بورتكەندەرىنە دەيىن قىزارىپ كەتىپتى، سولىقتاپ اۋىر-اۋىر تىنىستايدى، اراقتى قاۋىپ-قاۋىپ ۇرتتاپ سۋداي سىمىرەدى.
قانداي كۇشتىڭ كەرەمەتى ەكەنى بەلگىسىز، بادىزشىلەر ەكپىندى قيمىلداپ، جۇمىستى ماندىتىپ جىبەردى. مۇقىلدانعان بۇرعىلار ۇستاحانادا ءۇيىلىپ قالدى. تەمىرشى جىگىت جەر توسەگىندە ءيىرىلىپ جاتىر. اراقتى قىلقىلداتا جۇتادى. ۇڭگىردە اراق ءيىسى مۇڭكىپ تۇر.
- قورىقتىڭ با؟ پۇشايمان پاقىردىڭ كەيپىنە كەلە قالدىڭ با؟ بەيشارا بولا قالساڭ سۇراۋى بولماي ما؟- دەپ ياناتتادى قاتتى اشۋلانعان تەتە مەڭگەرۋشى ليۋ تايياڭ ونى اياعىمەن ءتۇرتىپ،- ونان دا ورنىڭنان تۇرىپ، بۇرعىلاردى جوندە. سوندا قىلمىسىڭدى ەڭبەگىڭمەن ازداپ بولسا دا جۋا الاسىڭ.
تەمىرشى جىگىت قولىنداعى اراق قۇمىراسىن اۋەلەتىپ لاقتىرىپ قالدى. كوپىردىڭ استىڭعى بەتىنە تيگەن قۇمىرانىڭ كۇل-پارشاسى شىقتى. قۇمىرانىڭ اراق جۇققان سىنىقتارى ليۋ تايياڭنىڭ ءۇستى-باسىنا جابىستى. تەمىرشى جۇگىرىپ سىرتقا شىقتى. دەنەسىن باسى ءبىر جاعىنا اۋدارىپ ، قيسىق كەتىپ بارادى:- اعاشونەڭ نەگە قورقادى، مەن قۇدايدان دا قورىقپايمىن، ولىمنەن تايسالمايمىن. سوندا ادامنان قورقامىن با؟- دەيدى ايعايلاپ. ول ورمەلەپ توسپا قاباعىنا شىقتى. تاعى سول ايعاي:- مەن ەشكىمنەن قورىقپايمىن!- دەيدى داۋرىعىپ. ول تاس قورشاۋعا اياعىن سوعىپ الدى دا بۇلعالاقتاپ جىعىلۋعا شاق قالدى. «بايقا، كوپىردەن ۇشاسىڭ»،- دەپ دۋىلدادى استىرتتا تۇرعاندار. «ۇشامىن با؟»- دەپ قارقىلدادى تەمىرشى. ول كۇلگەن بويى قورشاۋدىڭ باعانىنا جابىستى. جاقتاۋعا تابانى تيە قولىن قويا بەردى. ەندى مىنە قالت-قالت ەتىپ سول جاقتاۋدا تىك تۇر. استىرتتا تۇرعاندار جادىلانعانداي دەمدەرى ىشىنە ءتۇسىپ، سىلەيىپ قالعان.
تەمىرشى جىگىت قۇلاشىن كەڭ جايدى. ەكى قولىن قۇستىڭ كەمەل قاناتىنداي جوعارى-تومەن سەرمەپ ۇشقاننىڭ بەيىمىن جاسادى. سونان قورشاۋدىڭ تابان ەندەمەيتىن تار جاقتاۋىندا بۇلعاقتاپ جۇرە باستادى. اياق الىسىن بىرتە-بىرتە جىتىلەتتى. اياڭى جۇگىرۋگە اۋىستى. استىرتتا تۇرعانداردا زارە جوق. بىرەسە كوزدەرىن باسىپ الادى، بىرەسە ساۋساق اراسىنان سىعالايدى.
تەمىرشى جىگىت ەلبەڭ قاعىپ، سەندەلەكتەي تاس قورشاۋدىڭ جاقتاۋىندا ءالى جۇگىرىپ ءجۇر. استىرتتاعى شىمىرلاپ اققان اعىل-تەگىل قاراكوك ايدىندا ەربەڭدەگەن ساعىمى ارا-تۇرا جارق ەتىپ قالادى. ول ەرسىلى-قارسىلى، بىرەسە باتىستان شىعىسقا، بىرەسە شىعىستان باتىسقا جۇگىرەدى، بولجىراتىپ ءان ايتقان دا بولادى: «احاۋ، كورمەگەن ەم كەزسەم دە، نانجيڭنەن دە، بەيجيڭنەن. دامبالىندا شام جايناتقان سەرىلەردى. قالالاكۋ، بۇل قالاي. كورمەگەن ەم كەزسەم دە، نانجيڭنەن، سوناۋ بەيجيڭنەن. دامبالىندا ساقپان اتقان پەرىلەردى. قالالاكۋ، اۋ، قالالاي……».
بادىزشىلەردىڭ جۇرەكتى بىرنەشەۋى توسپاعا شىعىپ تەمىرشىنى سۇيرەپ ءتۇستى. ول بۇلقىنىپ ءجۇر. اۋزىن بۇزىپ: «اكەڭدى، مەندە جۇمىستارىڭ بولماسىن. اعاشونەڭ تسيرك ونەرىنىڭ ايتۋلى ارداگەرى. كينوداعى سىلقىمدار الگى سىم ارقاننان جۇرەدى عوي. ال مەن توسپا قورشاۋىنىڭ پىشاقتىڭ قىرىنداي جاقتاۋىنان جۇگىردىم. ايتىڭدارشى، اكەڭنىڭ، كىم مىقتى……». الگى جىگىتتەر ونى ۇڭگىرىنە تيتىعى قۇرىپ، ءيتىرىقتاپ ءجۇرىپ ارەڭ جەتكىزدى. ەندى مىنە، ول توسەگىندە بالشىقتاي يلەنىپ، دومالانىپ جاتىر. اۋزىنان اق كوبىك اعىپ، قايتا-قايتا القىمىن تىرنالاي بەرەدى. وكىرىپ-باقىرادى:- اياۋلى اناشىم، ازاپ قوي، ازاپ! قينالىپ بارام. قارا بالا، اينالايىن شاكىرتىم، قۇتقارا گور مەنى. شالعام اكەلشى، شالعام……
قارا بالانىڭ سۋ جاڭا قىلتاسىنا تۇسكەن جەيدە كيىپ جۇرگەنىن جۇرت توسىن بايقادى. تەكەنىڭ تەرىسىندەي قالىڭ ءارى اۋىر كەنەپ كەزدەمەدەن تىگىلگەن كورىنەدى. بەس جىل كيىسە دە ونىڭ توزار ءتۇرى جوق. جەيدەنىڭ كەستەلى جيەگىندەي بولىپ، ەتەگىنەن دامبالىنىڭ بالاعى ءبىراز شىعىپ قالىپتى. قارا بالانىڭ اياعىنا كيگەنى دە جاپ-جاڭا حاي-الاي دوپ شاقايى ەدى. ءبىراق شاقاي تىم ۇلكەن كەلگەن سوڭ باۋعا زورلاپ قاتتى تارتىپ بايلاعاندىقتان بولار، كەيىپسىز شارا باس لاقاداي كەيكيىپ قالعان سۇرقى بار.
- قارا بالا ەستىمەدىڭ بە؟ ۇستازىڭ سەنى قانداي شارۋاعا جۇمسادى؟- دەدى ءبىر قارت ۇستا قورقورىنىڭ سابىمەن قارا بالانىڭ ارقاسىنان ءتۇرتىپ.
قارا بالا ۇڭگىردەن شىقتى. ونان توسپانىڭ قاباعىنا ورمەلەدى. كەندىرلىكتىڭ ىشىنە بۇقشيا سۇڭگىدى. كەندىرلىكتە سورابى سولعىن سوقپاق بار ەكەن. كەندىرلەر قاق جارىلىپتى. ول كەلە جاتىپ ءبىر جەرگە توقتاي قالدى. بىرەۋلەر اۋناعانداي كەندىرلەر جاپىرىلعان ەكەن. ول قولىمەن كوزىن ۋقالادى. سونان ءبىر وكسىپ قويدى دا، تاعى دا العا ىلگەرلەدى. ءبىراز جەرگە ءجۇرىپ بارىپ، ەكپەتتەپ جاتا كەتتى. سونان شالعام تانابىنا قاراي ورمەلەدى. ارساقاي قارت كورىنبەگەن سوڭ، بەلىن جازىپ، شالعام تانابىنىڭ ورتاسىنا تامان باردى. جۇرەلەپ وتىردى. شالعام جۇيەگىنىڭ ارا-اراسىنا ۇيالاپ وتىرعىزىلعان ءبيدايلاردىڭ كۇلگىن قىزىل وركەنى توپىراق بەتىنە شىعا باستاپتى. ول قوس تىزەرلەپ، ءبىر شالعامدى جۇلىپ الدى. شالعامنىڭ نازىك جىڭىشكە تامىرلارى توپىراقتان اجىراعاندا، سۋداعى كوبىك جارىلعانداي بولماشى ءبىر دىبىس ەستىلدى. قارا بالا قۇلاعىن بار ىجداعاتىمەن سول دىبىسقا توستى. اسپاننىڭ ارعى تۇبىنە تالماۋراپ قالقىپ اۋاعا سىڭگەنشە سونىڭ ىزىنەن كوز اۋدارمادى. اسپاندا تەڭگەدەي بۇلت جوق ەدى. كەنجە كۇزدىڭ كەربەز كۇنى شۋاقتى ساۋلەسىن ەش بوگەتسىز توگىپ تۇرعان. قارا بالا قولىنداعى شالعامىن كۇنگە توستى. اناۋ ءتۇنى تەمىر ءتوستىڭ ۇستىندە ەلەس بەرگەن حيكىمەت كورىنىستەردى تاعى ءبىر كورگىسى كەلەدى. كۇن ساۋلەسىنىڭ جارىعىندا بۇل شالعامنىڭ دا وزەن تۇڭعيىعىنا بوي جاسىرعان الگى شالعام سەكىلدى جاۋدىر دە جايناقى، اسەم دە ايشىقتى سيپاتىن اشسا، التىنداي راۋلاسا ەكەن دەپ دامەلەنەدى. الايدا بۇل شالعام ءتۇڭىلدىردى. ونىڭ بويىنان الدە نەندەي جايناقىلىق پەن ايشىقتىلىق سيپات تا، راۋانداعان التىن شەڭبەر دە كورىنبەدى. جاۋتىلدەپ تۇراتىن زەر قابىرشىقتى كۇمىس قىلاڭ سۇيىقتىق تا مۇلدە بايقالمادى. ول تاعى ءبىر شالعامدى جۇلدى. ونى كۇن ساۋلەسىنە ۇستاپ باقىلادى. بۇل دا ۇمىتسىزدەندىردى. بىلايعى جۇمىس قاراپايىم قايتالاۋلار تۇرىندە ءوربىدى. قارا بالا تىزەرلەپ ءبىر ادىم جۇرەدى دە ەكى شالعام جۇلادى. ونى كۇنگە كوتەرىپ ۇستاپ قارايدى. سونان لاقتىرادى. تىزەرلەپ تاعى ءبىر ادىم جۇرەدى. جۇلادى. كوتەرەدى. قارايدى. لاقتىرادى……
باقشا كۇزەتەتىن ءىرىڭ كوز قارت قىرىققابات تانابىندا كوبەلەك دەرناسىلىن ءولتىرىپ وتىر ەدى. بىرەۋىن ۇستايدى، قولىمەن مىجيدى. تاعى بىرەۋىن ۇستايدى، جانە مىجيدى. ول ۇلى ساسكە شاعىندا كۇزەت ۇيىندە ۇيىقتاپ قالعان اترەتباسىنى وياتۋ ءۇشىن وتىرعان ورنىنان تۇرەگەلدى. اترەتباسى تۇندە شالا ۇيقىلى بولعان سوڭ قىستاقتا مازالاۋشى كوپ، جاندىكتەردىڭ دىبىسىنان باسقا ۋ-شۋدان اۋاشا عوي دەپ وسى باقشاعا كەلىپ جاتقان-دى. قارت بويىن جازىپ ورنىنان تۇرعاندا ومىرتقالارى كۇتىر-كۇتىر ەتتى. سول ءسات شالعام تانابى جاقتان كۇن كوزىنە شاعىلىسىپ الاۋداي قىزارعانءبىراۋماق سولايىمەن نازارىنا شالىقتى. قارت قولىن قالقالاپ سول تۇسقا سىعىرايا كوز ۇزاتتى. سونان، اياق الىسىن تەزدەتىپ، جۇرە-جۇرە شالعام تانابىنا دا ىلىكتى. الگى قىزارىپ جايراپ جاتقان نارسەلەر جۇيەكتەن جۇلىنعان ءالى تولىق پىسپەگەن شالعامدار ەكەن.
- سوراقى-اي،- دەپ شار ەتتى قارت. ول شارت جۇگىنگەن كۇيى ءبىر ۇلكەن شالعامدى كۇن كوزىنە كوتەرە ۇستاپ سىعالاپ وتىرعان جاس بالانى كوردى. كوزدەرى الاقانداي، جانارى جالت-جۇلت ەتەدى. جالپى كەسپىرى كىسىنىڭ جانى اشيتىنداي. ءبىراق قارت كەشىرمەدى. جەتەلەپ، سۇيرەلەپ كۇزەت ۇيىنە اكەلدى دە، اترەتباسىنى وياتتى.
- اترەتباسى، جامان بولدى، شالعامىمىزدى مىنا اپاناق دەندەپ قوپارىپ تاستاپتى.
اترەتباسى ۇيقىلى كوزىن تىرمالاپ اشىپ، شالعام تانابىنا كەتتى. ودان شىج-بىجى شىعىپ، كەلە قارا بالانىڭ قۇيرىعىنا دوپتەپ اياماي ءبىر تەپتى. قارا بالا جەردەن ءبىر زاماتتا سۇيرەتىلىپ ازەر تۇردى. بالانى ەس جيۋعا ۇلگەرتپەي، اترەتباسى شاپالاقپەن تاعى ءبىر جانىدى.
- ءيتتىڭ كۇشىگى، قايسى قىستاقتانسىڭ؟
قارا بالانىڭ كوز شاراسى جاسقا تولىپ تۇر.
- سەنى بۇلىنشىلىك جاساۋعا كىم جىبەردى؟
قارا بالانىڭ جاستى جانارى ءمولت-ءمولت ەتەدى.
- اتىڭ كىم؟
قارا بالا بور بوپ ەگىلىپ تۇر.
- اكەڭنىڭ اتى كىم؟
قارا بالانىڭ جانارىنان تارام-تارام جاس پارلادى.
- اكەڭدى، مىناۋ مۇتتەم مىلقاۋ ەكەن عوي.
قارا بالا كەمسەڭ-كەمسەڭ ەتتى.
- اترەتباسى، راقىم ەتە گور، قويا بەرە سالشى،- دەدى ارساقاي قارت.
- قويا بەر دەيسىز بە؟- دەدى اترەتباسى ىرجالاڭداپ،- ءوزى دە، مۇنى قويا بەرەمىن عوي.
اترەتباسى قارا بالانىڭ جاڭا جەيدەسىن، جاڭا شاقايىن، بوربايىنداعى دامبالىن تۇگەل سىپىرىپ الىپ، جۇمارلاپ-جۇمارلاپ تامنىڭ بۇرىشىنا لاقتىردى دا:
- ۇيىڭە بارىپ اكەڭە ايت. كيىمدەرىڭدى سول كەلىپ السىن، ەندى كوزىمنەن جوعال!- دەدى.
قارا بالا تەرىس بۇرىلىپ ءجۇرىپ كەتتى. باستاپقىدا ۇيالعانسىپ شۇمەتايىن قولىمەن باسىپ ەدى. بىرەر قادام جۇرگەننەن كەيىن قولىن ودان بوساتتى. ۇستىندەگى لىپاسىنان تۇتتاي بولىپ تىر جالاڭاش كەتىپ بارا جاتقان بالاعا سىرتىنان قاراپ كوڭىلى بوساي قالعان قارتتىڭ القىمىنا اششى وكسىك تىعىلدى.
قارا بالا تەلەگەي تەڭىزگە سۇڭگىگەن بالىقتاي كەندىرلىككە تەرەڭ بويلاپ كورىنبەي كەتتى. كەندىر جاپىراقتارى سۋدىرلاپ باياۋ تولقيدى. كۇزگى كۇننىڭ جۇمساق ساۋلەسى جارىسا جالت-جۇلت ەتەدى.
قارا بالا— قارا بالا—.
(سوڭى)
«ءجاۋدىر شالعامنىڭ» جازىلۋ بارىسى
مو يان
1984-جىل. قىستىڭ كۇشىنە ەنە قويماعان العاشقى كۇندەرى ەدى. تاڭ مەزگىلىندە ءتۇس كورىپپىن. كەڭ ماڭعار شالعام تانابى ەكەن دەيمىن. تاناپتىڭ ورتا تۇسىندا ءشوپ كۇركە تۇر. الگى كۇركەدەن قولىندا ۇستاعان سەرەسى بار قىرمىزى قىزىل كيىمدى تولىقشا دەنەلى ءبىر بويجەتكەن شىعا كەلدى. سونان ەگىستىكتەن ءبىر شالعامدى سەرەسىمەن شانشىپ الدى دا بيىك ۇستاپ، نارتتاي شىرايلانىپ جاڭا شىعىپ كەلە جاتقان كۇندى بەتكە الا ماعان قاراي كەلە جاتتى. سول ساتتە تۇرۋعا كەرناي شالىندى. مەن وسىنا اقجارىلقاپ ءتۇستىڭ اياسىندا ۇزاق مالتىدىم. كوڭىلىم الابۇرتىپ، سەرى سەزىم وي-سانامدى الديلەي بەردى. سول كۇنى ءتۇستىڭ الدىندا ساباقتى تىڭداي وتىرىپ، تۇسىمدە كورگەندەرىمدى كۇندەلىگىمە قوندىردىم. ءبىر اپتا دەگەندە العاشقى نوبايىن جازىپ ءبىتىردىم. ونى وڭدەۋگە تاعى ءبىر اپتاداي ۋاقىت جۇمسادىم. سوندا وسىنىڭ ءوزى حيكايات پا؟ حيكاياتتى وسىلاي جازۋعا بولا ما؟ بۇعان انىق كوزىم جەتپەۋشى ەدى. ءبىراق بۇرىنعى جازىپ-سىزعاندارىمنان مۇنىڭ وزگەشەرەك ەكەنىن بۇلدىرلاۋ بولسا دا جانىم سەزدى. بۇرىنعى تۋىندىلارىمدا «مەن» جوق-تى. بۇل حيكاياتىمدا جازىلعانى دەرلىك «مەن» بولىپ كەلەدى. بۇل تۋىندىمنىڭ تۇپكى ويى كورگەن ءتۇسىم نەگىزىندە قۇرىلۋمەن قاتار، بۇعان جانە تۇڭعىش رەت ءوزىمنىڭ ءتول كەشىرمەمدى ەنگىزدىم. مۇندا مەنىڭ قوعامعا، ومىرگە دەگەن كوز قاراسىم تيتتەي دە جاسقانۋسىز قاعازعا ءتۇستى. بالالىق جادىنىڭ تابيعات دۇنيەسىن سەزىنۋ تاسىلدەرى دە جازىلدى.
سول تۇستا ساباقتاستار اراسىندا، دوستار اراسىندا شىعارمالارىمىزدى ءوزارا وقىپ، پىكىر الىساتىن ادەت بار-دى. مەن تۋىندىمنىڭ سوڭعى قاراۋىن كومەگىڭ بولسىن دەپ فاكۋلتەتىمىزدىڭ وقۋ جوراسى ليۋ يرانعا تاپسىردىم. ول وقىپ شىعىپ:- بارەكەلدى، مىنا تۋىندىڭ جاي حيكايات عانا ەمەس، جىر-داستان ەكەن،- دەدى قاباعات قۋانىپ. ليۋ يران شىعارماڭدى مەڭگەرۋشىمىز شۇي حۋايجۇڭعا بەردىم ، ول كىسى مۇنى قالايدا ۇناتادى دەدى . ارادا بىرنەشە كۇن وتە، مەن دالىزدە مەڭگەرۋشى شۇي حۋايجۇڭعا جولىعىپ قالدىم. ول كىسى وتە پايىمدى ءساتتى شىققان شىعارما دەپ وڭ باعالادى. ول كىسىنىڭ باس ساياسي ءبولىمنىڭ ءان-ءبي ۇيىرمەسىندە ىستەيتىن حانىمى يۇي زىڭشياڭ ۇستاز دا سول حيكاياتىمدى وقىپ شىققانىن ايتتى. حيكاياتتاعى قارا بالادان ايىرىقشا اسەرلەندىم دەدى.
حيكاياتىمنىڭ «التىن رەڭدى شالعام» دەگەن بۇرىنعى تاقىرىبىن مەڭگەرۋشى شۇي حۋايجۇڭ «ءجاۋدىر شالعام» دەپ وزگەرتكەن ەكەن. سول كەزدە بۇل وزگەرتۋدى تىم ورىندى سانامادىم. ماعان «جاۋدىردەن » گورى «التىن» الدە قايدا ايدىندى سەزىلەتىن. ءبىراق بىرنەشە جىلدان كەيىن مەڭگەرۋشىنىڭ سولاي وزگەرتۋىنىڭ ۇلكەن پاراساتتىلىق ەكەنىن ءتۇسىندىم.
كوپ ۇزاماي، تاياۋدا جارىق كورە باستاعان «جۇڭگو جازۋشىلارى» مەنىڭ سول حيكاياتىمدى جاريالايتىن بولىپتى. جاۋاپتى رەداكتورى شياۋ ليجۇن ەكەن. مەڭگەرۋشى شۇي حۋايجۇڭ ءبىراز ساباقتاسىمىزدىڭ باسىن قوسىپ، سول حيكايات تۋرالى شاعىن سۇحبات وتكىزدى. سۇحباتتى مەن رەتتەپ جازىپ شىقتىم. 1985-جىلى ناۋرىز ايىندا «جۇڭگو جازۋشىلارىنىڭ» 2-سانىندا حيكاياتىم مەن وسى سۇحبات جاريالاندى. كوپ وتپەي، «جۇڭگو جازۋشىلارىنىڭ» باس رەداكتورى فىڭ مۋ مىرزا «ءجاۋدىر شالعام» جونىندەگى عىلمي تالقىنى باسقارىپ اشتى. عىلمي تالقىعا ۋاڭ زىڭچي، شى تيەشىڭ، لي تو، لەي دا، زىڭ جىننان سياقتى مىرزالار قاتىستى ءارى وڭ باعالارىن ايتتى. مىنە وسىلاي، «ءجاۋدىر شالعام» مەنىڭ «اتىمدى اسپانداتقان شىعارماعا» اينالدى.
الدىڭعى جىلى شىعارمالار جيناعىن قۇراستىرۋ ورايىندا بۇل حيكاياتىمدى قايتا وقۋىما تۋرا كەلدى. سول بارىستا ءبىرتالاي ولاق سويلەمدەر مەن ولقىلىقتاردى بايقادىم. سولاي دا، بىلايعى جەردە مۇنداي اڭگىمە جازا المايتىنىمدى دا بىلەمىن.
جاۋاپتى رەداكتورى : نۇرعيسا قۇرمانجان ۇلى
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
