بەتتى ساقتاۋ | باس بەت قىلۋ | حات ساندىعى | حابارلاسىڭىز | ءبىز تۋرالى
حالىق تورابى>>مادەنيەت

قازاق مادەنيەت كورگىزبەسى

حاباردى جازعان: قالمۇرات ماقسات ۇلى ورتالىق ۇلتتار ۋنيۆەرسيتەتى قازاق ءتىل-ادەبيەت فاكۋلتەتى 

2013.03.21 16:58   كەلۋ قاينارى : حالىق تورابى



  2013-جىلى 15-ناۋرىز، ورتالىق ۇلتتار ۋنيۆەرسيتەتى قازاق ءتىل-ادەبيەت فاكۋلتەتىندەگى ستۋدەنتتەردىڭ ۇيىمداستىرۋىندا مەكتەپ اۋلاسىندا «قازاق مادەنيەت كورگىزبەسى» اشىلدى.

  تاڭعى الاڭ-ەلەڭنەن قاربالاستىققا تۇسكەن ەلپەك جىگىتتەرىمىز ءاپ-ساتتە-اق كادىمگى قازاقي كيىز ءۇيىمىزدىڭ كەرەگەسىن كەڭ جايىپ، شاڭىراعىن كوتەرسە، ەپتى قىزدارىمىز ءۇيدىڭ ءىشىن كەرەمەتتەي قىلىپ جاساپ ۇلگىردى. اتا كورىپ وق جونىپ، شەشە كورىپ تون پىشكەن، قازاقتىڭ سالتىن ساناسىنا ءسىڭدىرىپ، تەبىنىنەن تەكتىلىگىن تانىتىپ تۇراتىن ەلگەزەك ستۋدەنتتەر قازاعىمىزدىڭ دالا مادەنيەتىن قۇجناعان قالانىڭ قاق ورتاسىنان كورسەتىپ كورەرمەنىن تاڭداندىردى.

  بۇل رەتكى كورگىزبەنىڭ بارلىق دۇنيەلەرى وقۋشىلاردىڭ قولىنان جينالدى. كيىز ءۇيدىڭ ىشىندەگى قازاقتىڭ ويۋ-ورنەكتەرى، سىرماق، ءتور كورپە، تۇسكيىز، جاستىق، تورگە ىلىنگەن ۇلتتىق كيىمدەر مەن مۋزىكا اسپاپتار، تۇلكى، قارساق تەرىلەرى، وقشانتاي، كىسە، قامشى، ەرجىگىتتىڭ بەس قارۋى بولعان ساداق، قالقاندار ءبار-بارى كورەر كوزدىڭ جاۋىن الىپ، بەينە ساحارانىڭ توسىندەگى قازاقتىڭ التى قانات اق ورداسىن كوز الدىمىزعا ەلەستەتكەندەي بولدى.

  ارەدىكتە مەكتەپتىڭ مۋزيكا ينيستيتۋتىنىڭ ستۋدەنتتەرى ۇلىتتىق كيىمدەرىن كيىپ، ۇلتتىق اسپاپتارىن كوتەرىپ، بەينە باعزىنىڭ سال-سەرىلەرىندەي سالتاناتپەن كەلىپ، قارا قوستىڭ تورىندە قوڭىر دومبىرانىڭ شاناعىنان كۇي توگىپ، قوبىزدىڭ مۇڭلى اۋەنىمەن سىبىزعىنىڭ سىرلى ءۇنىن توعىستىرىپ، حالىق اندەرىن قوڭىراۋلاتىپ شىرقاپ كورەرمەنىن جەلپىندىردى. «بىتەر ىستىڭ باسىنا، جاقسى كەلەر قاسىنا» دەگەندەي ايگى ءانشى، ءداستۇرلى حالىق اندەرىن ورىنداۋشى سەرىك اعامىز دا دۇبىردەن قالماي اسىعا جەتىپ، قارا قوسىمىزدىڭ تورىندە، حالىق اندەرىن بەبەۋلەتە شىرقاپ، وسىنداي يگى جۇمىستار ىستەپ جاتقان ءىنى-قارىنداستارىنا اقجارما تىلەگىن اقتارىپ قايتتى.

  ءبىزدىڭ بۇل رەتكى قيمىلىمىز ورتالىق ۇلتتار ۋنيۆەرسيتەتى قازاق ءتىل-ادەبيەت كاسىبى قۇرىلعانىنىڭ 60 جىلدىق، فاكۋلتەت قۇرىلعاندىنىڭ 10 جىلدىق، ناۋرىز مەرەكەسىنىڭ فاكۋلتەتىمىز جاعىنان ءوتىپ كەلە جاتقانىنا 30 جىل تولاتىن كەرەمەتتەي كەزەڭگە تۋرالاپ وتكىزىلگەن قيمىل بولعاسىن، كورگىزبەگە فاكۋلتەتىمىزدەگى ۇستازدارىمىزدىڭ عىلىمي ەڭبەكتەرىمەن قوسا، وقۋشىلار جاعىنان شىعارىلاتىن «اق بەسىك» جۋرنالىمىزدىڭ ءار ساندارىن، سونىمەن قاتار فاكۋلتەتىمىزدىڭ ءبىرقانشا ماراپات كۋالىكتەرىن قويىپ، جاس فاكۋلتەتىمىزدىڭ باعىندىرعان بيىكتەرىن باسقالارعا تانىستىردىق.

  بۇعان قوسا قازاقتىڭ زەرگەرلىك بۇيىمدارىن دا كورگىزبەگە قويىلىپ، قازاقتىڭ ەرتەدەگى سوعىس قۇرالدارى ـــ دۋىلعا، ساۋىت، قىلىش، قالقانداردا كورگىزبەنىڭ ءبىر شەتىنەن ورىن الدى. ارناۋلى ۇيىمداستىرعان تانىستىرۋشىلارىمىز تاماشالاۋشىلارعا ۇلتتىق بۇيىمداردى ەگجەي-تەگجەيلى تانىستىرسا، پىسىق قىزدارىمىز كيىز ءۇيدىڭ ىشىنە داستارقان جايىپ، ۇلتتىق تاعامدارىمىزدى تىزىپ، قوناقتارعا ىستىق ىقلاسپەن شاي قۇيىپ، قازاعىمىزدىڭ قوناعۋار سالتىن تاعى ءبىر قىرىنان ايگىلەدى. ونەرلى ۇل قىزدارىمىز ۇلتتىق كيىمدەرىمەن دوڭگەلەنە بيگە باسىپ كورەرمەندەرمەن سان مارتە قارا جورعا بيلەپ، ءان ايتىپ بەرىپ تاماشالاۋشىلاردى تامسانتتى.

  وسىلايشا باس-اياعى ءبىر كۇنگە سوزىلعان مادەني قيمىلدا ءبىز جۇزدەرىنەن كۇلكى ەسكەن، جۇرەكتەرىمەن ۇندەسكەن، ۇلت مۇراسىن ۇجدانىنداي قاستەرلەگەن قازاقتىڭ قاراپايىم ستۋدەنتتەرىنىڭ جانارىنان جالىن، قاباعىنان قاجىرلىلىقتىڭ وتىن كوردىك. ۇلتتىق رۋحاني مادەنيەتىمىزدى جانداندىرۋعا كۇش سالامىز دەگەن سەرتىن كوردىك.

  بۇرىنعىعا مۇراگەر بولا بىلگەن ۇجداندى ۇرپاقتىڭ، كەيىنگىگە بۇيداگەر بولا الاتىنىنا سەنىمىمىز كامىل.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 【10】 【11】 【12】 【13】 【14】 【15】 
【16】 【17】 【18】 【19】 【20】 【21】 【22】 【23】 【24】 【25】 【26】 【27】 【28】 【29】 【30】 
【31】 【32】 【33】 
جاۋاپتى رەداكتورى : نۇرعيسا قۇرمانجان ۇلى

 سۋرەت