ەگەي ەر، ەرەن ەڭبەك(12)

2013.05.13 14:06   كەلۋ قاينارى : حالىق تورابى

　　قۋاندىق كوبەن ۇلىنىڭ ءومىر بايانى

　　قۋاندىق كوبەن ۇلى 1977-جىلى 13-مامىر التاي قالاسى الاعاق اۋىلىندا تاتاناي وتباسىندا تۋىلعان. 1995-جىلى التاي ايماقتىق 1-ورتا مەكتەپتى بىتىرىپ، ىلە پەداگوگيكا ينيستيتۋتىنىڭ ادەبيەت فاكۋلتەتىنە قابىلدانعان. ول ينيستيتۋت تابالدىرىعىندا-اق حاتكەرلىك ونەرىمەن تانىلىپ، قازاق تاريحىندا تۇڭعىش جەكەلىك حاتكەرلىك كورگىزبەسىن وتكىزگەن. ال وسى 5 جىلدا ول كاسىپتىك بىلىمىنەن سىرت، «جانىبەك اتتاس ەگەيلەر»، «وتىرار ويرانى»، «تۇعىلىق تەمىر جانە موعۇلىستان»، «ۇلاعاتتى ۇلتتىق ۇعىم ـــ ءتورت» قاتارلى التى زەرتتەۋ ماقالاسىن جازىپ،ءتۇرلى جۋرنال-گازەتتە جاريالادى. سونداي-اق ينيستيتۋتتى وزات بىتىرىپ، 2000-جىلى شينجياڭ تەلەۆيزياسىنا ءتىلشى بولىپ ورنالاسادى. ول ىلگەرىندى-كەيىندى رەداكتور، وپەراتور، رەجيسسەر، جۇرگىزۋشى، فيلىمگەر بولىپ تەلەنىڭ بار ونەرىنە ارالاسىپ شىنىقتى. قۋاندىقتىڭ 18 تەلە ارناۋلى حابارى ءارجىلى وتەتىن شينجياڭ اقپارات سيلىعىنان 1-، 2-دارەجەلى بولسا، 8 تۋىندىسى جۇڭگو از ۇلت تەلە-راديو قوعامى جاعىنان جىلىنا ءبىر رەت وتكىزىلەتىن مەملەكەتتىك ۇيعۇر، قازاق، قىرعىز تىلىندەگى راديو-تەلە سارا تۋىندىلارىن باعالاۋدا ەرەكشە جانە 1-دارەجەلى بولدى . اسىرەسە «ءبىر عاسىر» اتتى دەرەكتى فيلىمى بۇكىل مەملەكەتتىك 24-كەزەكتى تەلەۆيزيا «التىن بۇركىت» سيلىعىن السا ، 2008-جىلى بىرلەسكەن مەملەكەتتەر ۇيىمى بەيجيڭ ءىس باسقارماسىنىڭ از ۇلت تەلە تۋىندىلارىنا ارنالعان 3-كەزەكتى «جينپىڭ سيلىعىنا» يە بولسا، ءوزى «ۇزدىك رەجيسسەر» سيلىعىن الدى. سونىمەن قاتار بۇل دەرەكتى فيلىم 3-كەزەكتى تيانشان ادەبيەت- كوركەمونەر سيلىعىنىڭ «قۇرمەت ماراپاتىنا» قول جەتكىزدى. سونداي-اق، ءوزى رەجيسسەرلىك ەتىپ جاساعان «ارس جۇلدەگەرى»، «ورىنسىز اۋەس، ورنى تولماس وكىنىش»، «قاتيپانىڭ ءبىر جىلى»، «مەكتەپ ـــ قورعانى، ۇرپاق ـــ قورمالى» اتتى تەلە بەرىلىمدەرى كورەرمەندەردىڭ جاقسى اڭىسىن قوزعاعان. قاشان دا سونى تاقىرىپتارعا توقتالىپ جۇرەتىن قۋاندىق ءوز كاسىبى جايلى «تەلە ونەرى» اتتى قۇراستىرعان. جيناق كىتابى 2008-جىلى شينجياڭ عىلىم- تەحنيكا باسپاسىنان جارىق كوردى. كاسىبى جايلى «سۇحبات الۋ سونداي وڭاي ما ؟»، «ديكتور، جۇرگىزۋشىلەر كىدىرىسكە دە كوڭىل بولگەنى ابزال»، «تەلە بەرىلىمدەرىنىڭ جاڭالانۋى كورەرمەن سۇرانىسىنان»، «قازاقتا تەلە سانۋىنى بار ما؟» اتتى 20 عىلمي ماقالالارى ءتۇرلى باسىلىمداردا جاريالاندى. ول قازىر شينجياڭ حاتكەرلىك قوعامىنىڭ، اۆتونوميالى رايوندىق تاڭجارىق زەرتتەۋ قوعامىنىڭ، شينجياڭ قازاق مادەنيەتىن زەرتتەۋ قوعامىنىڭ، ىلە قازاق اۆتونوميالى وبلىستىق حاتكەرلىك قوعامىنىڭ مۇشەسى.

　　كەلۋ قاينارى: حالىق تورابى