كوكەناي بالۋان مەكەنىندەگى «قازاقشا كۇرەس»

ءسوزىن جازىپ سۋرەتىن تارتقان: باقىتقان اسەت ۇلى، مەيىربەك احاتقان ۇلى

2013.06.05 15:04   كەلۋ قاينارى : حالىق تورابى

　　كوكەناي قالەل ۇلى كوكتوعاي اۋدانى قىزىلشىلىك (بۇرىنعى قاراتۇڭكە) اۋىلىنىڭ ءتول تۋماسى، قازاق ۇلتىنا، ايماعىمىزعا، رايونىمىزعا ءتىپتى ەلىمىزگە داڭق الىپ بەرگەن ەل ارىسى. 1962-جىلى رايونىمىزعا بالۋاندىقتان تۇڭعىش التىن مەدال الىپ بەرگەن، 1963-جىلى بەيجيڭدە 2-رەتكى بالۋاندار جارىسىندا جۇلدەگەر بولىپ، جۇڭگو بالۋاندار كومانداسىنا قابىلدانىپ، حالىقارالىق جارىسقا جولداما العان. ءبىر رەتكى جارىستا ەكى قابىرعاسى سىنىپ كەتكەنىنە قاراماي مايدانعا شىعىپ، قالعان سەگىز مينۋتتا ءنومىر ۇتتىرماي تەڭ شىعىپتى، كەيىن جاراقاتى ساۋىعىپ، سول كەزدەگى ەكى مىقتى − جاپون جانە اراب بالۋانىن جىعىپتى. 1964-جىلى بەيجيڭدە وتكىزىلگەن حالىقارالىق ۇسىنىس جارىستا يندونەزيانىڭ الەمدىك جۇلدەگەرىن جەڭىپ ەلىمىزگە داڭق الىپ بەرگەن. 1965-جىلى ءوز سالماعىندا الەمدىك جۇلدەگەر اتالعان شەتەل بالۋانىن جىعىپ ەسىمى دۇنيەنى ءدۇر سىلكىندىرگەن. وسىدان كەيىن مەملەكەتتىك كومانداداعى كوكەنايدى ەل ءىشى جانە شەتەلدەگى بەلدى باسىلىمدار سۋرەتىمەن قوسا تانىستىرادى، مەملەكەتتىك دەنە تاربيە كوميتەتى «تاڭداۋلى سپورتشى» دەپ داڭق كۋالىگىن بەرگەن ارداقتى ارىسىمىز، مارقۇم 1982-جىلى 41 جاسىندا تۇيىقسىز جۇرەك اۋرۋىنان ارامىزدان اتتانىپتى.

　　وسى ءبىر ايگىلى ەسىمدى ەسكە الۋ، ۇرپاقتارعا ونىڭ رۋحىن جالعاستىرۋدى ماقسات ەتكەن كوكتوعاي اۋدانى قىزىلشىلىك اۋىلدىق پارتكوم مەن ۇكىمەت 31-مامىردا قىزىلشىلىك اۋىلدىق جاتاقتى مەكتەپ اۋلاسىندا التاي ايماعىنىڭ ءارقايسى اۋداندارىنان بالۋان شاقىرىپ، «كوكەناي اتىنداعى قازاقشا كۇرەس» بالۋاندار سايىسىن وتكىزدى. جارىسقا اۋىر جانە جەڭىل سالماقتا ەكى ءتۇر بويىنشا 48 اتان تىرسەكتى بالۋان قاتىناسىپ، كاسىپتىك شەبەرلەر تورەشىلىك ەتىپ، بالۋانداردىڭ كيىمى، كۇرەس شەبەرلىگى، جارىس قاعيداسى بولسىن، بارلىعىنان قازاقشا كۇرەستىڭ دارالىق ەرەكشەلىگىن اڭعارتتى. سوڭىندا اۋىر سالماقتا سارتوعاي ارايبەك قۇراماسىنان ەسبول اعا جۇلدەگەرلىكتى جەڭىپ السا، جەڭىل سالماقتا قىزىلشىلىك قۇراماسىنان امانجول اعا جۇلدەگەر بولدى. التى بالۋانعا ءبىرىنشى، ەكىنشى، ءۇشىنشى دارەجە بويىنشا بايگە بەرىلدى.

　　قىزىلشىلىك اۋىلىنىڭ باستىعى بەكەن ۋالدان ۇلى: «كوكتوعاي اۋدانى مادەنيەتى مايەكتى، شارۋاشىلىعى شالقىعان، ىنتىماعى جاراسقان جاراسىمدى مەكەن. ال قازاق كۇرەسى ساحارا مادەنيەتىنىڭ جاۋھارى، قىزىلشىلىكتەگى جارىس وسى ساحارا مادەنيەتىنىڭ مارتەبەسىن ونان ارى اسىرىپ ۇرپاقتارعا اسىل قاسيەتىن تاعى ءبىر رەت كورسەتتى»،-دەدى

　　كەلەسى كەزەكتى بالۋاندار سايىسىن شاكۇرتى قالاشىعى وتكىزەتىن بولدى.

　　قوس اۆتوردىڭ قىزمەت ورنى جەكە-جەكە: كوكتوعاي اۋداندىق پارتكوم ۇگىت ءبولىمى، كوكتوعاي اۋداندىق مال شارۋاشىلىق مەكەمەسى

　　كەلۋ قاينارى: حالىق تورابى